Elliði og endurreisn stjórnmálanna

Snörp brýning Elliða Vignissonar til sjálfstæðismanna var framlag bæjarstjórans í Vestmannaeyjum til endurreisnar stjórnmálanna. Eftir hrun féllu stjórnmálin í ónáð og stjórnmálamenn taldir meðal verstu manna.

Það er tímabært að endurskoða einhliða fordæmingu á stjórnmálum og þeim sem þar starfa. Í lýðræðisríki þjóna stjórnmálamenn og stjórnmálaflokkar því hlutverki að bjóða fram valkosti sem almenningur kýs um.

Elliði hvetur sjálfstæðismenn til að leita til grunngilda flokksins og skammast sín ekki fyrir að gefa sig að stjórnmálum. Brýningin er þörf, bæði fyrir sjálfstæðismenn og félagsmenn annarra stjórnmálaflokka. Endurreisn stjórnmálanna hlýtur að hefjast með flokksmönnum sjálfum.

Grein Elliða geymdi kröftugt líkingarmál sem sumum var ekki að skapi. Gagnrýnin sem Elliði fékk á sig úr öðrum áttum, t.d. frá Agli Helgasyni, ber þess merki að endurreisn stjórnmálanna er ekki tekið fagnandi. Verðfall stjórnmálamanna hækkaði pundið í álitsgjöfum út í bæ.

Les Mikki Mús DV?

Ríkissaksóknari lögsækir fólk á grundvelli fréttaherferðar DV, sem bjó til lekamálið. Saksóknari tekur þátt í umræðu á samfélagsmiðli með því að ,,læka" pólitíska pælingu um lekamálið.

Til að bíta höfuðið af skömminni blandar saksóknari blásaklausri teiknimyndapersónu í umræðuna, sem var satt að segja nógu farsakennd fyrir.

Ríkissaksóknari sem leggur á sig að ráðast í rannsóknir og málssóknir í þágu herferðar DV bruðlar með almannfé. Og það er ekki fyndið. 

 

Fráleitt að gera mál úr „læki“

Áfengið, unglingarnir og fákeppni

Unglingar eru helsti starfskraftur matvöruverslana. Ef áfengi verður selt í einkaverslunum er aðgengi unglinga að áfengi stóraukið, bæði þeirra sem þar starfa og annarra unglinga. Í viðtengdri frétt segir 

Markaðsvæðing áfeng­is, ekki síst gagn­vart börn­um og ung­l­in­um með aðstoð fremstu ímynd­ar­sér­fræðinga og aug­lýs­inga­fólks auk gríðarlegs fjár­magns, hefði þannig ekk­ert með lýðræðis­lega umræðu að gera að hans sögn. Um væri að ræða ein­hliða, keypt­an áróður sem byggði á ítr­ustu viðskipta­hags­mun­um en ekki vel­ferð barna og ung­linga. 

Alþingi getur ekki samþykkt að fákeppnisverslunin hér á landi fái heimild að selja áfengi. 

 

Rangt að „Bónusvæða áfengissölu“

Ísland virkar

Á Íslandi er nær ekkert atvinnuleysi, hagvöxtur er um 3 prósent og verðbólga er lág en samt fyrir ofan núllið. Af þessu leiðir er hagur íslenskra heimila betri en víðast hvar í heiminum og fer jafnt og þétt batnandi.

Á Íslandi eru meginþættir efnahagsstarfsseminnar stilltir til að veita sem flestum jafnasta hlutdeild í afrakstrinum innan ramma markaðshagkerfisins.

Fullveldið og krónan eru forsendan fyrir því að Ísland virkar.

Jókst um 638 milljarða

Læk-umræðan og lýðræðið

Bloggið og samfélagsmiðlar eins og feisbúkk ættu að öðru jöfnu auka umræðu og þátttöku almennings í lýðræðissamfélaginu. Enginn þröskuldur er fyrir þátttöku og því ætti þúsund blóm að blómstra, eins og formaðurinn sagði á tímum menningarbyltingarinnar.

En það er ekki allt sem sýnist frjálsræði netheima. Síðuhaldari tók nýverið þátt í umræðu um eitthvert málefni á spjallþræði á feisbúkk. Eftir nokkur skoðanaskipti kom eftirfarandi athugasemd (skrifuð eftir minni): Páll fær fæst lækin af þeim sem taka þátt í umræðunni.

Þessi aðferð, að ,,læka" einstakar athugasemdir á spjallþráðum, er einhvers konar atkvæðagreiðsla í rauntíma. Lesendur umbuna athugasemdum sem þeim fellur í geð með ,,læki." Atkvæðagreiðsla á meðan umræðunni stendur er  ekki annað en yfirlýsing um stuðning við málsaðila en ekki málefni þar sem umræðunni er ekki lokið.

Við þessar kringumstæður verður umræðan morfís-keppni.

Evrópa virkar ekki

Evrópusambandið býður 28 aðildarríkjum sínum upp á tæp 12 prósent atvinnuleysi að meðaltali, engan hagvöxt og verðhjöðnun sem mun knésetja skuldugustu þjóðir sambandsins, Ítalíu fyrst.

Wolfgang Münchau efnahagsskríbent Spiegel segir aðildarríki ESB ekki búa við svigrúm til að gagnsetja efnahagskerfi sín. Aðeins Evrópusambandið sjálft í samvinnu við seðlabanka evrunnar getur ráðist í það stórvirki að hleypa lífi í efnahagsstarfssemi álfunnar. Framkvæmdastjórn ESB er á hinn bóginn ekki með umboð til nauðsynlegra ráðstafna og því gerist ekkert.

Í Telegraph óttast Jeremy Warner að tröllauknar skuldir kæfi eftirspurn sem heldur aftur af verðbólgu og vöxtum. Fyrr heldur en seinna rennur upp fyrir lánadrottnum að þeir fá ekki peningana sína tilbaka og þá verður hvellur.

Bandaríkin eru komin fyrir horn með öflugan hagvöxt og æ sterkari dollar. Þjóðverjar horfa öfundaraugum á Bandaríkin stökkva fram úr Evrópusambandinu, sem ætlaði sér að verða heimsveldi viðskipta og fjármála, en situr kirfilega fast í heimagerðri kreppu ónýts gjaldmiðlasamstarfs. 

Stöðnun ríkjandi á evrusvæðinu

Vinstrimenn og kaupfélagsstjórinn sem stjórnar Íslandi

Einu sinni formæltu vinstrimenn Davíð Oddssyni fyrir að stjórna Íslandi. Vinstrimenn sáu Davíð á bakvið allt sem þeim var ekki að skapi. Í skjóli þráhyggjunnar um Davíð urðu ýmsir lukkuriddarar í viðskiptum að sérlegum skjólstæðingum vinstrimanna, - með það eitt sér til ágætis að Davíð taldi þá ekki merkilega pappíra.

Kaupfélagsstjórinn í Skagafirði, Þórólfur Gíslason, er kominn í hlutverk Davíðs Oddssonar. Samkvæmt vinstrimönnum stjórnar Þórólfur viðskipta- og fjármálalífinu á bakvið tjöldin. Helsti samfélagsrýnir vinstrimanna,  Guðmundur Andri Thorsson, segir Þórólf sitja við hægri hönd guðs og dæma þar einn í gjaldþrot en annan til auðlegðar.

Auðvitað renna sem fyrr lukkuriddarar á slóð vinstrimanna og segja Þórólf ábyrgan fyrir því að þeir hafi ekki ,,meikað" það í viðskiptum. Vinstrimenn lofsynja lukkuriddarana enda sjá þeir aldrei rangan hest án þess að veðja á 'ann.

Bankalegar forsendur réðu för

Heimsþorpið verður múslímsk martröð

Marshall MacLuhan lagði grunninn að heimsþorpinu á sjötta áratug síðustu aldar þar sem amerísk menning drottnaði og einhver útgáfa af vestrænu lýðræði þreifst. Þjóðverjarnir á Die Welt segja heimsþorp kanadíska fjölmiðarýnisins orðið að martröð, - einkum sökum herskárra múslíma.

Annar meginboðskapur MacLuhan var að miðillinn sé boðskapurinn (medium is the message) í merkingunni að fjölmiðlatækni framleiði tiltekinn boðskap sem fellur að ráðandi tækni. Af þeirri staðreynd myndi leiða einsleitni. Eða svo sagði kenningin.

Múslímarnir í kalífadæminu í Sýrlandi/Írak afhöfða vestræna menn og færa þar með sönnur á að tækni skapar ekki einsleitni. Fáum sögum af vestrænu fólki að hálshöggva hvert annað með sveðju í einni hendi en iphone í hinni. Boðskapur miðilsins er ekki sá sami í Reykjavík og Aleppo.

Nágrannar nýja kalífadæmisins eru ekki tæknivæddir í ráðgjöf um að uppræta öfgarnar. Forsætisráðherra Dubai ráðleggur til dæmis trúarbragðafræðslu í anda yfirvalda í Saudí-Arabíu. Flestir hryðjuverkamannanna sem flugu á tvíturnana í New York í byrjun aldarinnar komu frá Saudí-Arabíu og  líklega ekki fullnuma í múslímskum fræðum umburðarlyndis og náungakærleika.

Við horfum fram á harðari heim öfga.

 

 

 

Elliði og Jóhann; hægriupprisa og vinstrieymd

Hægrimenn ná vopnum sínum jafnt og þétt. Elliði Vignisson túlkar sjónarmið hægrimanna í Sjálfstæðisflokknum og Framsóknarflokknum eru skeleggir miðhægrimenn eins og Vigdís Hauksdóttir, Frosti Sigurjónsson og Ásmundur Einar Daðason.

Grundvallarsjónarmið hægrimanna er fullvalda Ísland með forræði eigin mála annars vegar og hins vegar sjálfsbjörg einstaklingsins. Þetta eru hugmyndir jafngamlar nútímastjórnmálum á Fróni, sem hófust með sjálfstæðisbaráttunni um miðja 19. öld.

Á vinstri kanti stjórnmálanna ríkir á hinn bóginn eymd og volæði. Blaðafulltrúi ríkisstjórnar Jóhönnu Sigurðardóttur, Jóhann Hauksson, grætur klofninginn í röðum vinstrimanna sem í tíð Jóhönnu vildu selja fullveldið til Brussel en núna til Noregs. Lítt ígrunduð hentistefna ræður ferðinni í báðum tilvikum.

Hægrimenn erfa landið; vinstrimenn eru eilífa varaskeifan sem fær sín augnablik undir sólinni þegar hægrimenn klúðra sínum málum um stund, líkt og í hruninu.

Flokkurinn „eins og syrgjandi ekkja“

Leifur, Kólumbus og Polo

Sögulegar staðreyndir eru kúnstugar. Lengi var Kristófer Kólumbus talinn fyrstur Evrópumanna til að stíga fæti á Ameríku. Íslendingar áttu ritaðar frásagnir, Eiríks sögu rauða og Grænlendingasögu, er greindu frá meginlandi vestan Grænlands þar sem þeir Leifur heppni Eiríksson og Bjarni Herjólfsson römbuðu á fyrir tilviljun á tíundu öld.

Fornleifafundur á L'Anse aux Meadows á Nýfundnalandi á sjöunda áratug síðustu aldar staðfesti búsetu norrænna manna á meginlandi Ameríku um 500 árum fyrir för Kólumbusar. Staðurinn er kominn á heimsminjaskrá Sameinuðu þjóðanna og ætti sem slíkur að vera kunnur þeim sem fjalla um ,,fund" Evrópumanna á Ameríku.

En nei, nú er rætt um hvort Maro Polo sé fyrsti Evrópumaðurinn í henni Ameríku án nokkurrar vísunar í norrænu landkönnuðina. Klént.