Bretar eru vinir, en líka óvinir: um heimsku í stjórnarráðinu

Bretar settu á okkur hryðjuverkalög í aðdraganda hrunsins, það var ekki vinarbragð. Bretar sendu herskip upp að ströndum Íslands til að verja rányrkju breskra togara í íslenskri landhelgi. Ekki var það huggulegt af stórveldinu.

Hvorugt þessara atriða rataði í ítarlega frétt stjórnarráðsins um 80 ára stjórnmálasamband Íslands og Bretlands, sem raunar var slitið um tíma vegna stríðsins um landhelgina. Heimskan í stjórnarráðinu gerir Gulla utanríkis að meiri hálfvita en hann þyrfti að vera og gæti þriðji orkupakkapilturinn alveg verið án bjarnargreiðans.

Heimskan í stjórnarráðinu er angi af menningarsjúkdómi sem veldur því að fólk sér heiminn í svart-hvítu og tapar blæbrigðum veruleikans. Menningarsjúkdómurinn krefst annað hvort eða - á meðan heimurinn er bæði og. Í sæmilega mönnuðu stjórnarráði ætti fyrir löngu að vera komið hjarðónæmi fyrir alþjóðaveiru sem einkum leggst á fólk töluvert neðan meðalgreindar.

Hlutlægt mat er að Bretar eru sögulega bæði og, vinir og óvinir. Seint á miðöldum sigldu þeir hingað, veiddu og versluðu yfirleitt til hagsbóta fyrir landsmenn sem annars voru undir dönsku yfirvaldi. Þegar herskip hans hátignar sigldu inn Faxaflóa 10. maí 1940 varpaði þjóðin öndinni léttar. Það voru ekki sveinar Hitlers sem sóttu okkur heim. Nokkurt stímabrak varð mánuði áður þegar þýskar hersveitir lögðu undir sig Noreg og Danmörku. Bretar voru ótvírætt betri kostur. Líkt og Íslendingar eru Bretar eyþjóð(ir) sem lítt taka undir isma meginlandsins, hvort heldur forskeytin séu nas-, kommún- eða ESB.

Þjóðir eiga ekki hugsjónir, aðeins hagsmuni. Þessi grunnhugsun gildir í samskiptum þjóðríkja frá nýöld. Þjóðríkið á fyrst og fremst skyldum að gegna við íbúa sína. Til að rækta þá skyldu mega stjórnvöld aldrei falla í þá gildru að umgangast íbúana eins og börn sem hvorki vita í þennan heim né annan.

Bretar eru vinaþjóð en stundum skerst í odda þar sem hagsmunir Íslands og Bretlands fara ekki saman. Á hátíðarafmæli stjórnmálasambands þjóðanna ætti ekki að draga fjöður yfir sögulegar staðreyndir.

Eitt atriði enn gæti skýrt hálfvitatexta stjórnarráðsins. Bretar tóku stórmerkilega ákvörðun í þjóðaratkvæðagreiðslu árið 2016; að yfirgefa Evrópusambandið, Brexit. Sjálfkrafa færir Brexit okkur nær Bretum andspænis ESB. Hvers vegna skyldi eins og einni setningu ekki splæst í frétt utanríkisráðuneytisins um þetta atriði. Jú, það er alþjóðaveiran sem meira og minna allir í íslensku utanríkisþjónustunni eru smitaðir af: sæluríkið er ESB, utan þess er harðbýli. Sérstaklega ef maður er smitaður embættismaður - og ætti með réttu að vera í sóttkví.

Stjórnmálasamband við Bretland 80 ára

ESB bannar ferðalög til Íslands

Framkvæmdastjórn ESB ákvað í dag á fundi í Brussel að framlengja lokun Evrópu fyrir ferðamönnum utan álfunnar til 15. júní. 

Gulli utanríkis og Áslaug dómsmála tóku þátt í fyrri lokun ESB á Evrópu, sem gildir til 15. maí.

Ekki vel sniðugt að láta Brussel ákveða hverjir megi koma til Íslands og hverjir ekki.

Vill alla áfram í sóttkví

Rasismi í heimsþorpinu: Trump og Pútín

Sameinuðu þjóðunum er illa við Trump forseta. Glókollur í Hvíta húsinu dregur lappirnar við að fjármagna heimsþorp frjálslyndra vinstrimanna með manngerðu loftslagi, fjölmenningu og alles.

Andstæðingar heimsþorpsins eru rasistar, samkvæmt skilgreiningu Sameinuðu þjóðanna.

Einn vinur heimsþorpsins, Kevin Rudd, fyrrum forsætisráðherra Ástralíu, segir nýjasta trix Trump-vina að rekja kórónuveiruna til kínverskrar rannsóknastofu. Pjúra rasismi. Lýsing Rudd á samsærinu er að breyttu breytanda sú sama og Trump-vinir höfðu á samsæri frjálslyndra vinstrimanna eftir kosninganna 2016 þegar Pútín Rússlandsforseti var sagður hafa tryggt kjör Trump.

Heimsþorpinu kann að skorta leiðtoga. En ættarhöfðingjarnir eru með andstæðingana á hreinu: Donald Trump og þar á eftir Valdimar Pútín.

 

„Flóðbylgja haturs og rasisma“ vegna veirunnar

Skeljungur, Hagar og Össur: ljótu andlit kapítalismans

Siðleysi fyrirtækja á beinum ríkisstyrk að greiða eigendum arð og kaupa eigin bréf, til að auka verðmæti ráðandi hluthafa, er algert.

Skeljungur, Hagar og Össur eru auðrónarnir sem koma óorði áfengið sem heldur annars öllum sáttum; mannúðlegt markaðshagkerfi.

Almenningur ætti að forðast viðskipti við auðrónana.

Breyta hlutabótaleið til að hindra misnotkun

Varð bylting á Íslandi? Ef ekki, þá engin ný stjórnarskrá

Ríki gera sér nýjar stjórnarskrár eftir byltingu eða eru knúin til þess eftir tap í stríði. Eftir byltingar í Bandaríkjunum og Frakklandi á 18. öld tók bæði ríkin upp nýja stjórnarskrá. Þjóðverjar töpuðu tveim stríðum á síðustu öld, ný stjórnarskrá í bæði skiptin.

Varð bylting á Íslandi? Tapaði Ísland stríði? Nei, og þess vegna engin ný stjórnarskrá.

Vinstrimenn, raunar, telja sumir hverjir að bylting hafi orðið hér veturinn 2008 til 2009 og kenna við búsáhöld. En það voru óeirðir sem stofnað var til af pólitískum öflum.

Óeirðir og bylting er sitthvað. Það vita allir, nema kannski fáeinir vinstrimenn.

Einbeitum okkur að aðalatriðunum

Kolbeinn gegn 700 vísindamönnum

700 vísindamenn og sérfræðingar segja engar hamfarir yfirvofandi vegna manngerðs veðurfars.

Kolbeinn Óttarsson Proppé þingmaður Vinstri grænna spyr hvaðan Miðflokksmenn koma. Nú, landi þekkingar og fræða, auðvitað.

Kolbeinn býr aftur í ævintýralandi Grétu Thunberg þar sem líftóran er hrædd úr litlum börnum með tröllasögum um að maðurinn stjórni veðurfari á jörðinni.

Spyr undan hvaða steini Miðflokkurinn skreið

Stormsveitir Eflingar í leik- og grunnskólum

Sósíalfasismi Eflingar tekur á sig þá mynd að einkennisklæddir einstaklingar vaða í skítugum skónum inn í leik-, grunnskóla og aðrar opinberar byggingar og þykjast hafa lögregluvald til að ákveða hvernig fólk standi og sitji.

Verkfallsvarsla er þetta hlægilega fyrirbrigði kallað og komst í tísku á liðinni öld með ýmsum öðrum ismum.

Þetta er ,,lögvarinn réttur" okkar segja sósíalistarnir sem fyrirlíta borgaralegt réttarsamfélag.

Sósíalfasistarnir koma óorði á kjarabaráttuna. Sumarbúðir eru til leigu fyrir svona þenkjandi fólk. Til dæmis í Síberíu.

Verkfallsvörðum vísað út af velferðarsviði

Samfylkingin, 20 ára skakki ESB-turninn

Samfylkingin var stofnuð til að verða hinn turninn í íslenskum stjórnmálum og keppa við Sjálfstæðisflokk um völd og áhrif í samfélaginu.

Stóra málið sem átti að fleyta flokknum til valda og frama var ESB-aðild Íslands. Tækifærismennska en ekki ígrundun var ástæða þeirrar stefnu. Með þjóðina í taugaáfalli eftir hrun tókst að knýja fram samþykkt á alþingi 15. júlí 2009 að Ísland sækti um ESB-aðild.

Samfylkingin náði að verða turn í kosningunum 2009, fékk 30 prósent fylgi. Í kosningunum fjórum árum síðar hrapaði fylgið í 12,9 prósent.

Síðan er Samfylking skakki ESB-turninn í íslenskum stjórnmálum.

Nýtt merki flokksins er punktur með skökkum línum. Vel við hæfi.

Samfylkingin skiptir um merki

Píratar auglýsa að þeir séu óþarfir

Píratar eru að stofni til nördaflokkar með áhuga á ókeypis efni á lýðnetinu. Þá urðu þeir borgaralaunaflokkur; sofa fram yfir hádegi og leika sér í tölvum á nóttinni - á launum frá ríkinu.

Upp á síðkastið eru Píratar upphlaups- og spurningaflokkur. Frumlegasta spurningin er að biðja um skriflega útgáfu af óskrifuðum reglum alþingis. Næsta væntanlega spurning: hvernig lítur hringlaga þríhyrningur út?

Sjálfir svara Píratar aldrei spurningunni sem ekki brennur á vörum fólks: til hvers eru þeir?

Ein spurning verður að 60-80 spurningum

Maðurinn þolir ekki meira en 15 gráðu hita

Heimsendaspámenn gerast æ djarfari í fullyrðingum. Nú heitir það að maðurinn þoli ekki hærri hitastig en 15 gráður á celcíus.

Á Íslandi er meðalhitinn um fimm gráður. Margir Frónbúar fara til heitari landa, þegar flug gefst, og koma gjarnan tilbaka brúnir og sællegir.

Engar fréttir eru af Íslendingum sem stikna úr hita á Spáni og Kanarí.

En, auðvitað, ef vísindin segja við deyjum við hærri meðalhita en 15 gráður hlýtur það að vera satt. Er það ekki?

Hlýnun jarðar hafi áhrif á milljarða fyrir 2070