ESB-sinni vill á þing fyrir Vinstri græna

Róbert Marshall var þingmaður Samfylkingar og vildi ákafur inn í Evrópusambandið. Til að fjölga kratískum ESB-flokkum á alþingi tók hann að sér í verktöku fyrir Össur Skarphéðinsson að stofna Bjarta framtíð.

Sá flokkur varð frægur að endemum fyrir að sprengja ríkisstjórn Bjarna Ben. á næturfundi. Það reyndist pólitísk sjálfsmorðsárás. Björt framtíð ei meir kosningar á eftir.

Nú er Róbert mættur á sviðið hjá Vinstri grænum og vill á þing fyrir Suðurkjördæmi. Sprengidagur er handan við hornið.

Róbert vill á þing fyrir VG

Trump, samsæri um kosningar og loftslag

Sigur Trump 2016 var tilefni samsæriskenninga. Sú langlífasta að Pútín Rússlandsforseti hafi tryggt sigurinn. Tap Trump í kosningunum 2020 er uppspretta samsæriskenninga um að kosningunum hafi verið stolið. Time-útgáfan rekur samsærið til vanheilags bandalags BLM, frjálslyndra aðgerðasinna og tæknirisa. Álitsgjafi á Fox rekur þráðinn, sjá síðustu 5 mín.

Falsfréttir áttu að hafa tryggt kjör Trump 2016 en víðtækt samsæri gegn forsetanum kom í veg fyrir endurkjör fjórum árum síðar.

Fyrir marga táknaði kjör Trump endalok Bandaríkjanna. Ég þekki Bandaríkjamenn sem flúðu til Íslands vegna forsetans. Aðrir, frjálslyndir kunningjar frá háskólaárunum, voru um kyrrt en nánast í varanlegu póltíski áfalli 2016-2020.

Nú þegar karlinn er farinn úr Hvíta húsinu skyldi ætla að hlutir féllu í fyrra horf. Svo er ekki, sjá meðfylgjandi frétt. Vofa Trump leikur lausum hala. Höfuðborgin er setin þjóðvarðliðum til að gæta nýrra valdhafa, Biden og félaga. Ógnarorðræða er um hreinsanir á meintum Trumpistum í embættismannakerfinu og í stofnunum.

Trump, jafn fyrirferðamikill og hann annars er, skýrir ekki óöryggi og andstyggð sem leikur lausum hala í Washington-borg. Dýpri ástæður liggja að baki.

Eitt sem sameinar flesta andstæðinga Trump er trúin á manngert loftslag. Kenningin er að athafnir mannsins, brennsla jarðefnaeldsneytis, hækki hitastig jarðarinnar. Fyrir marga er þetta trúarkenning, dogma, sem festist í sessi kjörtímabilið 2016-2020 einmitt sökum þess að Trump hafnaði kenningunni.

John Kerry, utanríkisráðherra Obama-stjórnarinnar, er orðinn æðsti maður loftslagsmála hjá Biden forseta. Þegar Biden kom til Reykjavíkur fyrir tveim árum að veita viðtöku verðlaunum fyrir loftslagsmál flaug hann einkaþotu. ,,Ég er betri en þið, ég þarf einkaþotu til að bjarga jörðinni frá hlýnun af mannavöldum," var viðkvæðið hjá Kerry. Og það er rifjað upp, sjá hér og hér. 

Völd sem byggja á blekkingu annars vegar og hins vegar hroka fá ekki til lengdar staðist. Samsærið sem núna stendur yfir gengur út á að fá fólk til að trúa kenningunni og horfa framhjá hrokanum. Vofa Trump er þénug Grýla til vekja hræðslu. Hrætt fólk er trúgjarnt.

 

 

 

 

Fullyrðingar Trumps kostað skattgreiðendur milljarða

Menningarstríð á leiðarasíðu Mogga

,,Árið 1973 voru 76% þeirra sem luku námi karlar, árið 1985 var hlutfallið jafnt og nú er hlutfall karla, sem ljúka háskólanámi, 36%... Það gengur ekki að kerfið sé þannig uppbyggt að annað kynið njóti sín betur en hitt."

Tilvitnunin hér að ofan er í leiðara Morgunblaðsins í dag. Skólakerfið skilar skakkri útkomu. Karlkynið er afvelta en konur ráðandi. Hvað er til ráða?

Á sömu blaðsíðu Mogga dagsins skrifar Svandís heilbrigðisráðherra um niðurstöðu kynjafræðings, já, kynjafræðings, sem fenginn var að gera úttekt á ,,kynjuðu" heilsufari. Þar segir að

konur virðast búa við lakara heilsufar og minni lífsgæði en karlar og að ástæður þess megi rekja að hluta til félagslegrar og efnahagslegrar stöðu þeirra í samfélaginu.

Konur eru betur menntaðar, eru sérfræðingar í auknum mæli, en karlar verr menntaðir og vinna lengri vinnudag. Þekkt staðreynd er að lífaldur kvenna er lengri en karla. Samt búa konur við ,,lakara heilsufar og minni lífsgæði" en karlar, segir Svandís.

Þessi ólíku viðhorf, leiðarans annars vegar og hins vegar Svandísar, eru til marks um að djúp gjá er staðfest á milli þeirra sem velta fyrir sér stöðu kynjanna, og þar með allra landsmanna, í íslensku samfélagi. Þessa gjá þarf að brúa.

 

 

Sérstaklega rætinn Y

Frásögn meðfylgjandi fréttar er lyginni líkust. Einhver, sem nefndur er Y í dómnum, ræðst inn í húsbíl með rúðubroti. Hann er stunginn í höndina við verknaðinn af 26 ára þýskum strák sem var í húsbílnum með kærustu sinni vitstola af hræðslu.

Y lýgur því til að hann hafi ,,óvart" dottið í gegnum bílrúðuna og sé almennt og yfirleitt friðarins maður er aldrei geri flugu mein.

Frásögn Y er frá upphafi fáránlegur skáldskapur. Engu að síður tekur ákæruvaldið upp þykkjuna og krefst dóms yfir þýska stráknum fyrir ,,sérstaklega hættulega líkamsárás". Til að bæta gráu ofan á svart krefst Y 4 milljóna kr. í skaðabætur.

Góðu heilli var þýski stráklingurinn sýknaður. En mikið lifandis ósköp er Y óvönduð manneskja.

Og hvernig stendur á því að ákæruvaldið eyðir opinberum fjármunum í mál sem er tóm steypa frá upphafi?

 

Skelfingu lostinn ferðamaður sýknaður

Biden afskrifar ekki þjóðhyggju Trump

Klerkastjórnin í Íran er komin í náðina hjá Biden-stjórninni en Sádí-Arabía í ónáð. Þessu var öfugt farið hjá Trump. Pútín í Rússlandi verður tekinn fastari tökum en áður, segir Biden og amerískir hermenn verða áfram í Þýskalandi. Trump ætlaði að kalla þá alla heim.

Lítið segir af afstöðu Biden til áforma Erdogan í Tyrklandi að auka áhrif sín fyrir botni Miðjarðarhafs, sem að einhverju marki var í samvinnu við Sádí-Arabíu.

Trumpismi er þó ekki alveg útdauður í Biden-stjórninni hvað utanríkismál varðar. Tímaritið Foreign Affairs vekur athygli á að hagsmunir bandarískra verkamanna verði í forgrunni nýrrar utanríkisstefnu Bandaríkjanna. Áður en Trump kom til skjalanna var framgangur fjármálafyrirtækja efst á lista. 

Batt enda á stuðninginn við stríðið

Lýðræði, menning og farsótt

Aðeins Norðurlönd, Írland, Nýja Sjáland og Kanada eru fullveðja lýðræðisríki, samkvæmt tímaritinu Economist. Önnur ríki búa við áfátt lýðræði og allt upp í harðstjórn.

Economist kennir farsóttinni um versandi stöðu lýðræðis í heiminum. Ríki heims bregðast ólíkt við faraldrinum. Engin samþykkt uppskrift er við Kínaveirunni og lærdómurinn er fenginn jafnóðum og viðbrögð eru ákveðin með opinberum lögum og reglum.

Eitt sem einkennir þau ríki er fá jákvæða umsögn um lýðræði er að þau teljast fremur einsleit í alþjóðlegum samanburði og búa að menningarlegri samheldni.

Farsóttin er efnahagsleg, pólitísk og heilsufarsleg og skellur á með tilheyrandi hamförum. Einsleit menning þjóðríkja gerir þau betur í stakk búin að standast áraunina. 

Hörmulegar afleiðingar Covid-19

Vinstrimenn hallast til þjóðhyggju

Hvers vegna er landamærunum ekki lokað? spyr breski Verkamannaflokkurinn í auglýsingaherferð og vill nota nýfengið fulleldi frá Brussel til að gera Bretland breskt á ný.

Upp með þjóðfánann og niður með alþjóðahyggjuna er viðkvæði Verkamannaflokksins. Til viðbótar eiga þingmenn flokksins að forðast drusluklæðnað pírata á alþingi. Virðulegur klæðnaður hæfir ábyrgum málflutningi; drusla í útliti er drusla í hugsun.

Svo gerist það að vestræna elítan frestar Davos-fundum að ræða alþjóðavæðinguna. Óformlegt bandalag hefur verið á milli vinstrimanna og vestrænu valdaelítunnar. Vísindaskáldskapur um manngert loftslag í heimsþorpinu er límið í bandalaginu.

En nú er hún Davosbúð stekkur. Vinstribörnin orðin þjóðleg og alþjóðahrafnarnir flognir. Heimur batnandi fer.

Davos-ráðstefnunni frestað í annað sinn

Heimurinn grænkar, þökk sé CO2

Meira af koltvísýringi, CO2, í andrúmslofti jarðar þýðir að fæðuframboð trjáa og plantna eykst. Heimurinn hefur orðið grænni síðustu 35 ár, segir NASA, þökk sé CO2.

Einhverjir kynnu að halda, og aðrir trúa, að koltvísýringu af mannavöldum valdi hitafarsbreytingum á jörðinni og/eða auki tíðni stórviðra. Hvorugt er rétt, segir lofslagsvísindamaðurinn Roy Spencer. Franski dómstóllinn, sbr. meðfylgjandi frétt, er einfaldlega úti að aka.

Spencer gerði nýlega úttekt á raunbreytingu hitastigs í Kanada og bar saman við spálíkön síðustu 30 ára. Í ljós kom að líkönin gerðu ráð fyrir 50% meiri hækkun hitastigs en raunmælingar sýndu. Hræðslan við manngerða hlýnun hvílir öll á spálíkönum sem í áratugavís spá meiri hlýnun er raun er á. Samt vill fólk trúa öðru og dómstólar dæma samkvæmt bábiljunni.

Hræðslan við heimshlýnun af mannavöldum er úr lausu lofti gripin. Frá 1880 hefur hlýnað um eina gráðu á jörðinni, segi og skrifa um eina gráðu. Tímabilið frá 1300 til 1900 er kallað litla ísöld. Hvers vegna? Jú, á miðaldahlýskeiðinu, sem á undan kom, var hlýrra. Þannig gerast kaupin á henni jörð, frá degi til dags, frá einu loftslagsskeiði til annars.

Loftslagsbreytingar eiga sér náttúrulegar orsakir og þannig hefur það alltaf verið. Löngu áður en maðurinn kom fram sem tegund - við erum aðeins 200 þús. ára gömul - var loftslag jarðar síkvikt. Síðasta ísöld var á dagskrá náttúrunnar fyrir aðeins 12 þúsund árum, sem er hálft augnablik í jarðsögunni. Svo ryðst heimsendaspámennskulið upp á dekk og segir manninn stýra veðurfari jarðarinnar. 

Manngert veður er nýju fötin keisarans. Ímyndun. 

Ríkið brást í baráttu við loftslagsbreytingar

Áfengi, sóttvörn og þegnskapur

Frelsi og þegnskapur er sitthvað. Í vörn gegn Kínaveirunni láta Íslendingar margt ófrelsið yfir sig ganga í þegnskap við samborgara sem veikir eru eða aldraðir. Kínaveiran leggst ekki á hraust fólk. Þeir sem höllum fæti standa eru aftur í hættu.

Í áfengismálum höfum við í áratugi sýnt þeim þegnskap sem ekki kunna með áfengi að fara. Einkum þó fjölskyldum þeirra sem veikir eru fyrir víni. Þegnskapurinn birtist þannig að við sem kunnum hóflega umgengni við áfengi sættum okkur við ófrelsið að geta ekki keypt rauðvín eða bjórkippu í matvörubúð.

Um rýmkun aðgengis að áfengi segir Áslaug Arna: ,,Við í Sjálf­stæðis­flokkn­um fögn­um öll­um stuðningi við frelsið."

Þegar lýðheilsa er í húfi er þegnskapur meira virði en frelsið. Gildir bæði um farsótt og áfengi.

 

 

 

Frumvarp Framsóknar „sérkennilegur“ stuðningur

Pírati býr til spillingu - í pólitískum tilgangi

Píratinn Halldór Auðar Svansson er einn höfunda skýrslunnar um spillingu á Íslandi, upplýsir Brynjar Níelsson. Halldór Auðar vill komast á þing.

Halló Hafnarfjörður, er það ekki spilling að búa til skýrslu um spillingu og bjóðast sjálfur til að lagfæra ósköpin? Hvort er líklegt að Halldór Auðar hafi bætt í eða dregið úr  meintri spillingu, - þegar hann sjálfur hyggst hagnast á henni?

Vinstrifuglar eins og Halldór Auðar gera Ísland ljótt og bjóða síðan fegrunaraðgerð á kostakjörum. Fremur ósmekklegt, svo ekki sé meira sagt. Að ekki sé talað um hugarfarið að baki. Ljótleikinn byrjar innra með fólki.

 

Ísland í 17. sæti á spillingarlista