Fékk ekki bréf frá Samherja - en málssókn frá RÚV

Tifallandi athugasemdir fengu ekki bréf frá Samherja þegar norðlenska útgerðin var gagnrýnd fyrir að atast í Seðlabanka Íslands eftir sýknu í dómsmáli er leiddi af rannsókn bankans á gjaldeyrisviðskiptum eftir hrun, sjá hér og hér.

Þegar á daginn kom að rannsókn Seðlabankans var reist á blekkingum RÚV sneru Tilfallandi athugasemdir við blaðinu og gagnrýndu RÚV fyrir að misbeita fjölmiðlavaldi til að klekkja á útgerðinni. Tilfallandi athugasemdir eru þannig gerðar að þær taka mið að veruleikanum en ekki ímyndun og fordómum.

RÚV er til muna illskeyttari en Samherji þegar kemur að viðbrögðum við gagnrýni. Höfundi Tilfallandi athugasemda var stefnt þegar falsfréttir RÚV í Evrópuumræðunni voru afhjúpaðar. RÚV tapaði málinu fyrir héraðsdómi en lét ekki þar við sitja. Hagsmunahópurinn á Efstaleiti reyndi að fara með málið fyrir hæstarétt en varð ekki kápan úr því klæðinu.

Annars mætti halda að gúrkutíð sé runnin upp hjá fjölmiðlum þegar bréfaskriftir Samherja verða fréttir. Slíkar fréttir draga upp þá mynd að stjórnsýslan sé orðin svo ofurviðkvæm - woke - að ekki megi senda bréf án þess að fólk fái taugaáfall.

Seðlabankastjóri fékk bréf frá Samherja

Villidýr og vísindi

Indverska afbrigði Kínaveirunnar er lýst sem ,,algjöru villidýri" í meðfylgjandi frétt. Myndræn framsetning á veiru sem er ósýnileg mannsauganu eykur skelfingaráhrifin sem þjónar þeim tilgangi að fá fólk til að hlýða boðum og bönnum til að verjast villidýrinu.

Farsóttarvarnir eru sagðar byggðar á vísindum. Það segir aðeins hálfa söguna. Snemma í farsóttinni voru þau ,,vísindi" búin til að veiran væri náttúruleg, hefði orðið til á kjötmarkaði í Wuhan í Kína. 

En vaxandi líkur eru á að veiran sé manngerð, hafi orðið til í rannsóknastofu í Wuhan. Judith Curry tekur saman frásögnina um falsvísindin að baki meintri þekkingu um uppruna Kínaveirunnar.

Hvort heldur náttúruleg eða manngerð er Kínaveiran staðreynd sem þarf að takast á við. En hún er ekki villidýr. Ekki frekar en að vísindin séu óbrigðul.

Kappa lýst sem „algjöru villidýri“

RÚV kjaftstopp í 7 klukkustundir

Morgunblaðið birti frétt um nýjustu vendingarnar í Samherjamálinu kl. 12:24 í dag. RÚV sem bjó til herferðina gegn norðlensku útgerðinni fyrir bráðum áratug beið í heilar sjö klukkustundir með nýmælin. Mælt á fréttatíma er það heil eilífð.

Skoðum nú sjónarhorn Moggans annars vegar og hinsvegar RÚV. Sjónarhorn fréttar kemur fram í fyrstu efnisgrein, inngangi. Morgunblaðið er faglegt og málefnalegt. Hér er inngangurinn á mbl.is:

Eiðsvarn­ar yf­ir­lýs­ing­ar starfs­manna Sam­herja í kyrr­setn­ing­ar­máli sem bein­ist að fé­lög­um tengd­um Sam­herja og sak­born­ing­um í svo­kölluðum Fis­hrot- og Nam­gom­ar-mál­um voru lagðar fyr­ir dóm­stól í Namib­íu og birt­ir á vef dóm­stóls­ins í dag.

Lítum svo á frétt RÚV, sem birtist 20:03. Í inngangi lesum við:

Fyrrverandi og núverandi starfsmenn Samherja ráðast af miklum krafti gegn Jóhannesi Stefánssyni í staðfestum yfirlýsingum sínum til dómstóls í Namibíu. Þeir neita öllum ásökunum um spillingu og mútugreiðslur og segja Jóhannes, sem er málaður upp sem fíkill og glæpamaður, vera ábyrgan. 

Samlíkingin sýnir að Morgunblaðið er faglegur fréttamiðill sem vill upplýsa lesendur. RÚV stundar aftur sósíalíska baráttublaðamennsku í anda Þjóðviljans sáluga.

Skæruliðar hagsmunahópsins á Efstaleiti strituðust við í rúmar sjö klukkustundir að skrifa frétt um Samherjamálið er félli að fordómum vinstrimanna. Þeir enduðu með Þjóðviljafrétt. Einu sinni voru til sæmilega greindir vinstrimenn í blaðamannastétt. Núna eru þetta fréttabörn sem bera fram gutl.

Samherji tekur til varna í Namibíu

RÚV-hreinsanir í Samfylkingunni

Samherjamál RÚV verður aðalstefnumál Samfylkingarinnar í þingkosningunum í haust, segir áhrifamaður í flokknum. Ólína Þorvarðardóttir fyrrum þingmaður flokksins segir útsendara norðlensku útgerðarinnar innan flokksins.

Í framhaldi er krafist flokkshreinsana. Þeir flokksmenn sem ekki játast hreina RÚV-trú skulu settir af sakramentinu, segir í samantekt Eyjunnar.

Í dag fengu landsmenn aðgang að álagningu skattsins. Þar er sérstakur RÚV-skattur upp á rúmar 18 þúsund krónur sem allir landsmenn, 17 ára og eldri greiða.

RÚV gerir út heilu stjórnmálaflokkana og fær sérstakan nefskatt frá almenningi. RÚV er ríki í ríkinu.

ESB-sinni í prófkjöri Sjálfstæðisflokksins

Friðjón Friðjónsson sækist eftir öruggu sæti á framboðslista Sjálfstæðisflokksins í prófkjöri um næstu helgi. Í heilsíðuauglýsingu í Sunnudagsmogga segir Friðjón að við eigum að vera

óhrædd við að vera í sterkum og nánum tengslum við nágranna- og viðskiptaþjóðir okkar.

Þetta er annað orðalag yfir inngöngu í Evrópusambandið. ESB-sinnar koma sjaldnast til dyranna eins og þeir eru klæddir. Undirmál eru þeirra háttur.

Friðjón gat sér orð að selja Íslendingum þriðja orkupakkann. Með orkupakkanum fær ESB ítök i raforkuframleiðslu Íslendinga. Maðurinn er almannatengill að starfi og hefur þá skoðun sem hverju sinni gefur best í aðra hönd. Sjóðir ESB eru digrir.

Ef Friðjón fær öruggt þingsæti á framboðslista Sjálfstæðisflokksins er flokkurinn í höfuðborginni ókjósanlegur í þingkosningunum í september. 

Biðst RÚV afsökunar?

Samherji biðst afsökunar á því að starfsmenn fyrirtækisins hafi farið offari í að verja það árásum hagsmunahópsins á Efstaleiti.

Í framhaldi má spyrja hvort RÚV biðjist afsökunar að hafa falsað gögn um Samherja, brotið siðareglur og efnt til samsæris við aðra ríkisstofnun, Seðlabanka Íslands, um að koma höggi á Samherja?

Mun hagsmunahópurinn á Efstaleiti sjá að sér og biðjast afsökunar?

Samherji biðst afsökunar

RÚV, Facebook og tjáningarfrelsið

RÚV bannaði gagnrýni á fréttaflutning hagsmunahópsins á Efstaleiti í Samherjamálinu. Facebook bannaði gagnrýni í kínversk stjórnvöld í Kínaveirumálinu.

Nú snýr Facebook við blaðinu og leyfir umræðu um að Kínaveiran gæti verið manngerð, búin til á rannsóknastofu í Wuhan og fyrir mistök eða ásetning sleppt lausri á mannkynið.

Hvað gerir RÚV? Jú, sendir á vettvang þingmannsefni sem segir tjáningarfrelsi RÚV standa ofar tjáningarfrelsi annarra.

Þingmannsefnið, Sigmar Guðmundsson, segir:

Já, það mun verða heil­ög bar­átta hjá mér alltaf að standa vörð um al­mennt tján­ing­ar­frelsi og frelsi fjöl­miðla til þess að segja frá án þess að það séu hags­muna­öfl að toga hlut­ina til og teygja.

Halló Hafnarfjörður, RÚV teygði og togaði heimildir til að fá það út að Samherji væri glæpafélag. Hagsmunahópurinn á Efstaleiti falsaði skjöl, skipulagði falsfréttir og virkjaði síðan útlend hagsmunaöfl þegar upp komst um strákinn Tuma.

Sigmar kallar það ,,heilaga baráttu" að hagsmunahópurinn á Efstaleiti fái gagnrýnislaust að telja fólki trú um að hvítt sé svart. Ritskoðarar Facebook eru í smávegis tengslum við veruleikann. Sigmar og RÚV-arar alls engum.

ps

Það er svolítið sætt, sniðugt og afhjúpandi þegar Sigmar veitir í mbl.is-viðtalinu innsýn í hvernig fjölmiðlasamfélagið á Íslandi virkar. Sigmar segist hafa fengið þessi viðbrögð þegar tilkynnt var að hann yrði þingmannsefni:

En maður er bara að fá vin­sam­lega kveður og hvatn­ingu. All­ir koll­eg­ar mín­ir á RÚV og öðrum miðlum sem hafa haft sam­band við mig eru bara mjög hvetj­andi með þetta.

Svo er reynt að telja okkur trú um að íslenskir fjölmiðlar séu sjálfstæðir. Þvílík firra. Þetta eru strákar og stelpur í vina- og hagsmunabandalagi þvers og kruss. Sást síðast í kjöri formanns Blaðamannafélags Íslands.

Leyfa færslur um að Covid-19 hafi verið manngerð

Erlend eftirspurn eftir bótum á Íslandi

Bótakerfið á Íslandi er svo rausnarlegt útlendingar koma hingað í flugvélaförmum í leit að opinberri framfærslu. 

Atvinnuaðgerðasinnar efna til mótmæla ef vísa á umsækjendum um opinbera framfærslu á bug. 

Stjórnmálamenn þora ekki að andmæla bruðli á almannafé. 

 

Mannúðarkrísa í Grikklandi en einnig á Íslandi

Kínaveiran, Trump og fjölmiðlar

Trump fyrrverandi Bandaríkjaforseti kenndi veiruna sem veldur COVID-19 við upprunalandið, sem er Kína. Jafnframt fyrirskipaði hann rannsókn á tilurð veirunnar. 

Trump-hatur meginþorra vestrænna fjölmiðla leiddi til þess að Kínaveiran varð bannorð og frásögn kínverskra stjórnvalda, um uppruna veirunnar á kjömarkaði í Wuhan-borg, var tekin góð og gild.

En, óvart, er í Wuhan-borg Öein helsta sýklarannsóknastofa í Kína. Öllum mátti vera ljóst að sá möguleiki var þegar í upphafi fyrir hendi að veiran hafi orðið til á rannsóknastofu, segir í grein í Telegraph.

Fjölmiðlar brugðust frá a til ö í Kínaveiru-málinu. Þar gekk maður undir manns hönd að rækta Trump-hatrið og átu hráar kínverskar lygar.

Fjölmiðlar sem fokka upp jafn stóru máli og Kínaveirunni eru engu skárri en nafnlaus nettröll er spúa út úr sér falsfréttum dag inn og dag út.

Biden krefst rannsóknar á uppruna Covid-19

Bótaflokkar, leti og lífshamingjan

Atvinnulausir kjósa fremur að fá bætur frá ríkinu en ráða sig í vinnu, kemur fram í Kastljósþætti á RÚV.

Hver er skýringin?

Jú, það eru bótaflokkar á alþingi sem tala fyrir því sjónarmiði að þeir sem nenna ekki að vinna skuli fá rífleg framlög úr sjóðum almennings.

Bótaflokkarnir segja boðskapinn ekki berum orðum. En þeir segja í einn stað að fólk sem á eitthvað á milli handanna sé líklega spillt, stundi arðrán á vinnandi fólki eða sé beinlínis glæpahyski. Í annan stað aumingjavæða bótaflokkarnir samfélagið með skilaboðum um að allir eigi voða bágt að vera á lífi. Nema þeir efnuðu, sem eru líkast til þjófar.

Bótaflokkarnir þrífast ekki í tómarúmi. Í vælumenningunni eru rök færð fyrir því að alþjóð lifi eymdarlífi. Svo dæmi sé tekið af handahófi þá var pistill í RÚV um að loftslagsbreytingar yllu andlegri vanlíðan. Efni pistilsins er rakinn þvættingur. Á landnámsöld var hlýrra en í dag og menn bæði nenntu og gátu en grenjuðu ekki í fósturstellingu undir súð. 

Pistillinn er hannaður, skrifaður og fluttur í þeim tilgangi að fólk segi: æi, loftslagsbreytingar eru mig lifandi að drepa. Ég ætla bara að vera heima undir sæng og bíða eftir atvinnuleysisbótum til að endurnýja Netflix-áskrifina.

Kosningabarátta stendur yfir í sumar. Bótaflokkarnir verða með allar klær úti að koma tvíþættum boðskap á framfæri. Í fyrsta lagi að Ísland sé ónýtt og í öðru lagi að fólk eigi bágt. Í september, þegar við göngum til kosninga, eigum við að spyrja okkur hvort við viljum aumingjavæða Ísland eða líta björtum augum til framtíðar og fækka bótaflokkum á alþingi. Látum ekki bótaflokka stela af okkur lífshamingjunni.