Logi útilokar Samfylkingu frá ríkisstjórn

Án Sjálfstæðisflokks verður ekki hægt að mynda starfhæfa ríkisstjórn, fari kosningar samkvæmt könnunum.

Helsta ráð Loga formanns Samfylkingar er að útiloka samstarf við Sjálfstæðisflokk.

Sjálfskaparvítin taka á sig kynlegustu myndir.

Stendur við útilokun Sjálfstæðisflokks og Miðflokks

Múslímar tapa slæðustríðinu í Evrópu

Atvinnurekendum er heimilt að reka úr vinnu starfsmenn sem bera utan á sér trúarleg tákn í berhögg við starfsmannastefnu fyrirtækisins. Á þessa leið er niðurstaða Evrópudómstólsins í málum tveggja þýskra fyrirtækja sem beittu viðurlögum múslímskar konur er mættu til vinnu með ásjónu huldar í slæðu í berhöggi við starfsmannastefnu.

Múslímar telja sig hafa fullan rétt til að sýna umheiminum hverrar trúar þeir eru en það rekst á veraldleg vestræn gildi um að klæðast ekki felubúningi á almannafæri.

Bresku útgáfurnar Telegraph og Guardian greina frá málinu hvor með sínum hætti.

9 flokka óreiða í haust?

Með 9 þingflokka á alþingi blasir við pólitísk óreiða. Veik ríkisstjórn með annað tveggja tæpan meirihluta eða 4 til 5 flokka innanborðs er ávísun á upplausn.

Verkefnið næstu vikur er að sannfæra almenning að vanþrif eru af fjölda smáflokka á alþingi.

En fari svo að þjóðin kýs yfir sig 9 þingflokka alþingi er hætt við að næsta kjörtímabil verði stutt.

Stjórnarmyndun ákaflega erfið

Biden, Trump og draumurinn um heimsríkið

20 ára stríðsrekstur Bandaríkjanna í Afganistan er það lengsta í sögu stórveldisins. Og það var mistök frá upphafi, líkt og Íraksstríðið 2003-2011.

Tilefni Afganistanstríðsins var árásin á tvíturnana í New York 11. september 2001. Hugmyndafræðina að bak er að finna í bók Francis Fukuyama um Endalok sögunnar.

Ráðandi kenning í Washington á síðasta áratug liðinnar aldar og fram að kjöri Trump var að vestrænt samfélagskerfi, stundum kallað vestrænt lýðræði, myndi leggja undir sig heiminn eftir fall kommúnismans 1989/1991.

Draumurinn um frjálslynda heimsríkið sem hið eina sanna stórveldi átti að koma í kring útskýrir hernaðarævintýri Bandaríkjanna alla þessa öld. Evrópusambandið og Nató voru helstu ábekingar og Sameinuðu þjóðirnar afgreiðslustofnun fyrir nauðsynlegar yfirlýsingar.

Trump fékk kjör sem forseti Bandaríkjanna 2016 með það umboð að binda endi á hernaðarævintýrin og setja áætlanir um heimsríkið ofan í skúffu.

Núverandi forseti, Joe Biden, fylgir stefnu Trump. Það þykir aftur ekki kurteisi að segja það upphátt.

„Mistök“ að draga herlið frá Afganistan

Lögmaður, glæpur og tjáning

,,Mér finnst mér hafi verið nauðgað," gæti einhver sagt að loknu kynlífi. Viðkomandi hefur rétt á þeirri sannfæringu. Kynlíf er sjaldnast stundað eftir skráðri og samþykktri verklýsingu. Hvílubrögð eru með ýmsum hætti. 

Aftur ef einhver segir opinberlega að nafngreindur einstaklingur hafi nauðgað sér horfir málið á annan veg. Nauðgun er alvarlegur glæpur.

Sá sem er sakaður um nauðgun, en telur sig ekki hafa framið glæpinn, á þann rétt að ákæra útskýri málavöxtu og eftir atvikum sé rannsökuð af óvilhöllum aðila. Reynist ákæran á rökum reist fer málið áfram til saksóknara og þaðan fyrir dóm séu málavextir þannig að meiri líkur en minni séu til sakfellingar. Í tilfelli nauðgunar er að jafnaði um að ræða þvingun, hótun eða ofbeldi. Dómar hafa einnig fallið þolanda í vil þegar hann gat hvorki samþykkt kynlíf né hafnað sakir svefndrunga eða ölvunar. 

Lögmaðurinn Gunnar Ingi Jóhannsson skrifar grein um tíðrætt mál þessa dagana þar sem nafnlausar ásakanir eru hafðar í frammi um kynferðisbrot/nauðgun nafngreinds einstaklings. Í greininni er að finna þetta sjónarmið:

Þær saka tónlistarmanninn um kynferðisofbeldi. Þessar ásakanir eru settar fram í nafni tjáningarfrelsis, sem einnig er varið af stjórnarskrá þessa lands. Í 73. gr. hennar segir að allir séu frjálsir skoðana sinna og sannfæringar og eigi rétt á að láta í ljós hugsanir sínar. (undirstrikun pv)

Ég hef fullt frelsi til að hafa hvaða skoðun sem er á lögmanninum Gunnari Inga og tjá þær skoðanir á opinberum vettvangi. En ef ég hefði þá skoðun að Gunnar Ingi hafi framið lögbrot - hvaða lögbrot sem er - þarf ég að gera meira, sum sé rökstyðja skoðun mína. Gunnar Ingi, eins og allir aðrir, á þann rétt að ekki sé vegið að mannorði og æru með ,,skoðunum" og ,,sannfæringu". Í dómum er gerður skýr greinarmunur á skoðunum og staðhæfingu um staðreynd. Ásökun um glæp er staðhæfing um staðreynd. 

Allir eru frjálsir skoðana sinna og sannfæringar. En ef einhver er þeirrar skoðunar og sannfæringar að glæpur hafi verið framinn af nafngreindum einstaklingi þarf að rökstyðja það og eftir atvikum færa fram sönnur á glæpnum.

Í mannlífinu háttar þannig að glæpir eru framdir sem ekki eru upplýstir og gerendur komast ekki undir manna hendur. Flestum þykir það skárri kostur en að saklausir séu dæmdir fyrir glæpi sem þeir frömdu ekki. Þetta er munurinn á réttarríkinu og lögmálum frumskógarins.

 

 

Mannvirðing og liðsdráttur

Er Ingó veðurguð verðugur mannorðsins? Nei, segja Öfgar, hann hefur ekki komið fram af virðingu við konur. Já, segja stuðningsmenn, hann er hvorki ákærður né dæmdur og nafnlausar sögur eru ómarktækar.

Svo hefst liðssafnaður, ýmist til stuðnings Ingó eða Öfgum, og dómsmál eru undirbúin. Ekki um athafnir veðurguðsins heldur æru hans.

Minnir á Sturlungu. Virðing og sæmd koma þar við sögu, liðsdrættir og dómsmál sömuleiðis. En málsatvik oft óljós.

Vilja að nöfn þeirra sem studdu Ingó verði birt

Ótti, óvinir og andstyggð

Í kalda stríðinu óttuðust vesturlönd Sovétríkin sem eftir seinna stríð stóðu fyrir valkosti við borgaralegt lýðræði og kapítalisma. Sovétríkin voru óvinurinn sem vestrænum almenningi var kennt að hafa andstyggð á. Á vesturlöndum voru sumir veikir fyrir kenningu Marx eftir óbragðið af fasisma. Borgaraleg stjórnmál fundu málamiðlun, blandað hagkerfi, og buðu lífskjör og mannréttindi sem kommúnisminn gat ekki keppt við. 

Um það leyti sem Sovétríkin kiknuðu undan kommúnisma verður til nýr ótti á vesturlöndum. Óttinn við heimshlýnun af mannavöldum var, merkilegt nokk, keyrður áfram af mönnum eins og Al Gore, sem töldu sig skilja og hafa lausn á kjarnorkuvopnaógninni.

Án ógnar og sameiginlegs óvinar var erfitt að halda vestrænu hjörðinni í einum flokki. Einhverjir reyndu að blása lífi í gamlar glæður, gerðu Rússland undir Pútín að aðalóvini vesturlanda. Sú samsæriskenning náði hámarki 2016 þegar Pútin var sagður hafa tryggt Trump sigur í bandarísku forsetakosningunum. 

En óttinn við heimshlýnun af mannavöldum er til muna áhrifaríkari en Rússagrýlan. Rússland er með hagkerfi á stærð við Kanada og stundar ekki útflutning á hugmyndafræði líkt og Sovétríkin sálugu.

Afleiðingin af ótta við loftslagsbreytingar af mannavöldum er að andstyggðin beinist að þeim sem ábyrgir eru fyrir meintum ósköpum. Samhliða hugmyndafræðinni um manngert loftslag vex andstyggð vesturlandabúa á sjálfum sér. Sjálfshatrið birtist í ýmsum myndum en líklega hvað gleggst í fræðilegri kynþáttahyggju.

Háskólar eru uppspretta samsæriskenningarinnar um manngert veðurfar og fræðilegrar kynþáttahyggju. Hnignun háskóla er komin á dagskrá sjálfstætt hugsandi fræðimanna.

Háskólar verða fyrst til á miðöldum og eru eitt merkilegasta framlag Evrópu til heimsmenningarinnar. En þeir þrífast ekki í andrúmslofti ótta, óvina og andstyggðar. Í slíku andrúmslofti verða til gervivísindi, kommúnísk erfðafræði á tímum Stalíns og heimshlýnun af mannavöldum í tíð Joe Biden. 

Í veröld ótta, óvina og andstyggðar eru það nöfn eins og Trofim Lysenko og Gréta Thunberg sem slá í gegn. 

Jafn áríðandi að ræða loftslagsmál og kjarnorkuvopn

Markaðurinn fyrir kynþáttaníð

Markaðurinn fyrir baráttu gegn kynþáttaníði er margfalt stærri en markaðurinn fyrir kynþáttaníði.

Fámennum hópi kynþáttahatara er gert hátt undir höfði í fjöl- og félagsmiðlum. Gagngert til að þjóna þeim stóra markhópi sem líður hvað best við þá iðju að fordæma rangláta.

Kynþáttahatur og hatur á kynþáttahatri eru tvær hliðar á sömu mynt.

Ef þið níðist á einum níðist þið á okkur öllum

Tveir miðaldra hvítir karlar og taugatrekktir unglingar

Þeir Leonardo Bonucci (34) og Giorgio Chiellini (36) eru gamlingjar í knattspyrnu. Saman drógu þeir Ítalíu til úrslita á Evrópumeistaramótinu.

Þar sem báðir eru varnarmenn gátu þeir ekki nema tryggt jafntefli í venjulegum leiktíma.

Í vitaspyrnukeppni reyndust miðaldra taugar haldbetri en unglinganna.

 

Ítalía Evrópumeistari í annað sinn

RÚV, smjörflugan, ofbeldi og sigur

Smjörflugukenningin, stundum kennd við fiðrildi, segir að lítill atburður langt í burtu geti löngu seinna orðið stóratburður. Til dæmis að skordýr blaki væng í Kyrrahafi í maí og það verður stormur á Norður-Atlantshafi í september. 

Hádegis-RÚV segir okkur að ef England vinnur Ítalíu í kvöld verði meira ofbeldi. Sökudólgarnir eru fótbolti, þjóðarstolt, eitruð karlmennska og vímuefni.

Smjörflugukenning RÚV er töluvert önnur útlegging á úrslitaleiknum en hjá Douglas Murray sem segir fótbolta og þjóðarstolt prýðilegt mótefni gegn vænisýki vinstrimanna, ,,wokedom".

,,Þjóðarstolt minnir okkur á að fleira sameinar okkur en sundrar og tilfinningin er ekki bundin við fótboltavöllinn," skrifar Murray. Hann er Englendingur, eins og gefur að skilja.

Baldur Hermannsson, sem veit sitthvað um þjóðarstolt, fótbolta og karlmennsku (veit ekki með vímuefni) skrifar af sama tilefni

Í dag er stóra stundin, England gegn Ítalíu, hið háleita hvíta kaldræna Norður gegn funheitu svækjusömu Suðri, hið norræna stolt gegn suðrænni lævísi ...Í dag leggjum við til hliðar minningar um þorskastríð og hryðjuverkalög ... í dag höldum við allir sem einn með frændum okkar Tjöllum.

Þjóðarstolt er sem sagt ekki bundið við eina þjóð heldur flyst það á stærri menningarheima. Gefur auga leið; ef innrás yrði gerð frá Mars myndi mannkyn sameinast.

Smjörflugukenning RÚV um að ofbeldi vex ef eitt lið mætir öðru í fótboltaleik er álíka sönn og að grimmd fylgi siðmenningu. Í náttúrunni er engin grimmd. Þegar mávur gúffar í sig andarunga vestur á Nesi er hann ekki grimmur heldur svangur. Siðmenning býr til orðræðu um grimmd og ofbeldi til að kenna hvað er við hæfi og hvað ekki. Nokkuð fljótandi skil eru þar á milli. Murray, sem nefndur er hér að ofan, er hommi en nýtur virðingar sem pólitískur álitsgjafi. Fyrir hálfri öld hefði hann orðið að dylja kynhneigðina væri honum annt um virðingu sína.

Sigur sameinar og ýtir innbyrðis sundurþykkju sigurvegaranna til hliðar. Í kvikmyndinni Konungurinn, sýnd á Netflix, er sagt frá Frakklandsleiðangri Hinriks 5. Englandskonungs. Í næst síðustu senu viðurkennir ráðgjafi konungs að hafa með brögðum vélt Hinrik til innrásar í Frakkland. Vélabrögðin voru í þágu háleitara markmiðs, að sameina Englendinga og efla með þeim konungsást og virðingu fyrir yfirvaldi. Hinrik drepur ráðgjafa sinn. Í lokasenu kvikmyndarinnar biður Hinrik verðandi eiginkonu sína, dóttur Frakkakonungs, að lofa sér því einu að segja alltaf satt.

Verðandi eiginkona konungs játar. Í augnaráði hennar má lesa vangaveltur um hvaða útgáfu smjörflugukenningarinnar hún teldi að helst mætti kalla sannleika.