Einkastríð Þórdísar til heimabrúks

Diplómatísk stríðsyfirlýsing Þórdísar Kolbrúnar utanríkisráðherra er ekki í þágu íslenskra hagsmuna. Tilkynning um lokun sendiráðs Íslands í Moskvu er sett fram, og skilin í Rússlandi, sem ögrun.

Hvers vegna ætti Ísland að ögra Rússlandi? Samskipti þjóðanna hafa ávallt verið vinsamleg. Rússar opnuðu markaði sína á sovéttímanum þegar við áttum í landhelgisdeilu Breta, sem beittu okkur viðskiptaþvingunum.

Jú, kynni einhver að segja, Rússar réðust inn í Úkraínu. Síðan hvenær eru stríð í útlöndum rök fyrir lokun íslenskra sendiráða? Bræðraþjóðir í austurvegi þjarka um landamæri, öryggishagsmuni og réttindi þjóðarbrota. Það er leitt, eins og öll átök, ekki síst þau er kosta mannslíf, en koma Íslendingum ekkert sérstaklega við.

Einkastríð Þórdísar Kolbrúnar er pólitísk dygðaflöggun til heimabrúks. Tollfrjáls innflutningur á úkraínskum kjúllum fékk ekki meðbyr hjá stjórnarmeirihlutanum á alþingi, einmitt vegna íslenskra hagsmuna. Þórdís Kolbrún varð að sýna herskáa frjálslynda vinstrinu að hún væri ekki síðri Rússahatari en þeir og setti lokun íslenska sendiráðsins í Moskvu í úkraínskt samhengi.

Þórdís Kolbrún er ekki þingmaður og ráðherra fyrir frjálslynda vinstrimenn heldur íhaldsmenn. Nema, auðvitað, að þannig hátti að frjálslyndir vinstrimenn hafi yfirtekið Sjálfstæðisflokkinn.

Ríki eiga hagsmuni, ekki hugsjónir. Glennulegt einkastríð Þórdísar Kolbrúnar gengur þvert á íslenska hagsmuni en fellur að alþjóðahyggju frjálslyndra vinstrimanna. Gerist utanríkisráðherra ESB-sinni í framhaldinu?

Sér ekki fyrir sér að slíta stjórnmálasambandi

RSK-miðlar og eiginkona skipstjórans

Haustið 2020 er þáverandi eiginkona Páls skipstjóra Steingrímssonar í sambandi við Láru V. Júlíusdóttur lögfræðing. Eiginkona skipstjórans til margra ára hafði um hríð glímt við andlega vanheilsu. Hún sýndi af sér hegðun og háttu sem kom Páli skipstjóra, börnum þeirra og stórfjölskyldu í opna skjöldu. Fyrst eftir að einkenni létu á sér kræla þáði hún aðstoð, greiningu og meðferð. Er sjúkdómurinn ágerðist afþakkaði konan hjálp. Veikindin réðu ferðinni. Konan hefur tvisvar verið nauðungarvistuð á sjúkrastofnun, hættuleg sjálfri sér og öðrum.

Eiginkonan, sem í tilfallandi bloggi hefur ávallt verið auðkennalaus, að undanskyldum veikindum hennar og að hún hefði verið nátengd skipstjóranum, var kynnt til sögunnar í gær á Heimildinni (Stundin og Kjarninn). Heimildin lætur eins og konan sé RSK-miðlum óviðkomandi. Veruleikinn er allur annar. Athafnir blaðamanna RSK-miðla og eiginkonu skipstjórans er ástæðan að fimm blaðamenn eru með stöðu sakborninga í refsimáli, byrlun og gagnastuldi. Sjötti sakborningurinn er hún sjálf. Blaðamenn, sem eiga að heita heilir á geði, misnotuðu yfir lengri tíma andlega veika konu og fengu til óhæfuverka. Það er stærsta ósagða frétt íslenskrar fjölmiðlasögu.  

Í byrjun árs 2021 tilkynnir eiginkona Páli skipstjóra að hún vilji skilnað. Í samtölum lét hún á sér skiljast að vinnuveitandi Páls, Samherji, ætlaði henni illt og skipstjórinn væri með í ráðum. Þá ásakaði hún eiginmann sinn um framhjáhald með ýmsum konum. Þau búa áfram saman. Páll taldi að skilnaðarhugmyndin væri afleiðing veikindanna en fannst ekki einleikið hve konan var hvöss gagnvart sér eftir ferðirnar suður. Páll stundar sína vinnu, er á sjó á Berg VE þessa vertíð.

Um miðjan apríl 2021 biður eiginkonan Pál um að útvega sér Imovane svefnlyfið og að hann taki lyfið út á eigin lyfseðil. Páll gruflar lítt í sérkennilegri bón eiginkonunnar og gerir eins og hann er beðinn.

Gögn lögreglu, sem þegar eru komin í umferð til sakborninga (blaðamanna) og brotaþola, sýna að ekki seinna en í apríl 2021 var komið á samband milli eiginkonu Páls skipstjóra og blaðamanna RSK-miðla. Af gögnunum verður ekki ráðið hvernig samskiptin hófust. Tveir möguleikar eru líklegastir. Að Lára V. Júlíusdóttir hafi haft milligöngu. Hún er vel tengd, eftir áratugastörf í þágu Samfylkingar. Lára var t.d. bankaráðsformaður Seðlabanka Íslands í tíð ríkisstjórnar Jóhönnu Sigurðardóttur - á þeim tíma þegar RÚV og seðlabankinn hófu atlögu að Samherja með fölsuðum gögnum um að fyrirtækið hefði brotið gjaldeyrislög. Atlagan rann út í sandinn, Samherji braut engin lög.

Hinn möguleikinn er að Rakel Þorbergsdóttir fyrrum fréttastjóri RÚV hafi náð trúnaði eiginkonunnar. Þær eru skólasystur frá Akureyri og unnu saman hjá ÚA sem ungar konur. Rakel var fyrst til að missa vinnuna á RÚV eftir að lögreglurannsókn hófst. Síðar hrukku af skaftinu Helgi Seljan og Þóra Arnórsdóttir.

Ranghugmyndir sameinuðu andlega veika konu og blaðamenn RSK-miðla. Sannanlega geðveikur einstaklingur og meintir andlega heilir blaðamenn ólu með sér ranghugmyndir um ofsóknir Samherja. Konan sá skuggalegt fólk elta sig og bíla veita sér eftirför; blaðamenn ímynduðu sér skæruliðadeild.

Skýrslur lögreglu sýna að í apríl 2021 kaupir Þóra Arnórsdóttir ritstjóri Kveiks Samsung-síma sömu gerðar og skipstjórinn notar. Þóra fær á símann númerið 680 2140. Símanúmer Páls er nánast eins, 680 214X.

Páll kemur úr róðri á Berg VE 29. apríl og fer rakleitt frá Vestmannaeyjum til Reykjavíkur og gistir á Hótel Óðinsvé. Eiginkonan kemur suður og hafði bæði með sér hvítvín og bjór. Skipstjórinn þáði hvorugt. Þau fara norður 1. maí.

Daginn áður, 30. apríl, var tilkynnt að Aðalsteinn Kjartansson fréttamaður Kveiks, undir stjórn Þóru, hætti að morgni hjá ríkisfjölmiðlinum og eftir hádegi réð hann sig á Stundina, þar sem systir hans, Ingibjörg Kjartansdóttir, er eigandi og ritstjóri. Rakel Þorbergsdóttir skrifar af því tilefni færslu á Facebook: ,,Þín verður sárt saknað en ég ætla að leyfa mér að vona að RÚV ,,pásan" verði stutt. [Broskall] Gangi þér allt í haginn í nýjum verkefnum, veit að þú átt eftir að halda áfram að blómstra sem fréttamaður og samfélagsrýnir."

Rakel gefur til kynna að hún viti hver verkefni Aðalsteins verði á Stundinni. Búið var að kaupa síma til að afrita síma skipstjórans. Nú þurfti að gera hann óvígan til að stela mætti símtæki hans. Líklega átti fyrst að koma skipstjóranum úr umferð helgina sem hann gisti í Reykjavík 30. apríl til 2. maí. En Páll vildi ekki áfengið sem honum var boðið.

Ef tilgátan er rétt sýnir slóð símtala á milli eiginkonunnar og blaðamanna þessa helgi að ný ráðagerð hafi verið sett saman í skyndi til að unnt væri að stela símanum. Lögreglan er með yfirlit yfir hver hringdi í hvern helgina 30. apríl til 2. maí, - mögulega einnig tölvupóstsamskipti.

Í landlegum á vorin og sumrin dundar skipstjórinn sér stundum í garðinum. Það gerði hann mánudaginn 3. maí fyrir tveim árum. Síðdegis kemur eiginkonan og hælir honum fyrir dugnaðinn, sem ekki gerðist á hverjum degi. Geðræn veikindi hafa áhrif á skapgerðina, ekki til góðs. Páll eldar hamborgara fyrir fjölskylduna. Eftir kvöldmat er hann einn í húsinu fram að háttatíma. Hann fer upp í rúm á tólfta tímanum en er ekki sofnaður þegar eiginkonan kemur heim og vill spjalla. Þau ræða saman. Konan skreppur fram, fær sér sígarettu en kemur að vörmu spori með tvo bjóra og réttir Páli annan. Eftir spjall spyr hún hvort hann ætli ekki drekka bjórinn. Páli fannst bjórinn beiskur en teygaði hann engu að síður. Næst rankaði hann við sér á gjörgæslu Landspítalans í Reykjavík.

Í gögnum lögreglu kemur fram að nágrannar Páls hafi vaknað við að hann barði bakdyr þeirra og bað um hjálp. Öskur skipstjórans voru ekki lágvær. Eiginkonan hélt til í bílskúrnum á meðan þessu fór fram, samkvæmt skýrslu lögreglu, og lét sér fátt um finnast.

Skipstjórinn er á gjörgæslu í öndunarvél eftir flutning með sjúkravél suður. Börnum hans er tjáð að tvísýnt sé um líf hans. Páll er meðvitundarlaus til 6. maí. Hann er undir læknishendi til 11. maí. Eiginkonan kemur með föggur hans á spítalann, þar á meðal símann. Hún lætur þann grun sinn í ljós að brotist hafi verið inn í símann á meðan Páll var meðvitundarlaus.

Í raun hafði það gerst að eiginkonan braust inn í síma eiginmannsins, m.a. til að veiða upplýsingar um samskipti sem hún taldi að hann ætti við aðrar konur. Þá fór eiginkonan með símann á Efstaleiti, höfuðstöðvar RÚV, til afritunar. Sú aðgerð tók ekki nema fáeinar mínútur. Skipulagið gekk út á að skipstjórinn yrði grunlaus um hvað hafði verið gert við símann á meðan hann var meðvitundarlaus. Köld rökhyggja í bland við brjálsemi einkennir útfærslu og verklag tilræðisins.

Þegar Páll nær skýrri hugsun á ný fær hann vitneskju um tvennt. Einhver hafði sent skilaboð úr síma hans á meðan hann var meðvitundarlaus. Í öðru lagi var horfið forrit úr símanum sem notað er til að afrita gögn. Páll áttaði sig hvers kyns væri þar sem hann áður hafði notað forrit til að flytja gögn þegar hann endurnýjaði síma sinn.

Föstudaginn 14. maí 2021 kærir Páll málið til lögreglu. Sex dögum síðar fær skipstjórinn tvö símtöl frá blaðamönnum. Þórður Snær Júlíusson ritstjóri Kjarnans hringir 14:56. Aðalsteinn Kjartansson á Stundinni, áður RÚV, hringir ellefu mínútum síðar, kl. 15:07. Samræmdar aðgerðir með kaldri rökhyggju. Erindi beggja var að bera undir Pál ásakanir um að hann væri höfuðpaurinn í skæruliðadeild Samherja.

Gögnin voru komin í hendur blaðamanna ekki síðar en 5. maí. Þeir biðu með birtingu frétta til 21. maí. RSK-liðar höfðu aflað sér upplýsinga um að sjálfvirkur staðsetningarbúnaður síma geymdi ekki upplýsingar lengur en í tvær vikur. Páll skyldi vera grunlaus.

Skipstjórinn svaraði Þórði snæ og Aðalsteini fáu enda miður sín. Símtölin staðfestu hans versta grun. Eiginkona hans til margra ára var verkfæri blaðamanna RSK-miðla í atlögu að lífi hans og heilsu, mannorði og einkalífi. Eiginkonan var fárveik, Páll vissi það mætavel. Höggið var að blaðamenn legðust svo lágt að misnota andlega veika.

Heimildin birti síðdegis í gær upplýsingar um eiginkonu Páls skipstjóra í tengslum við dómsmál þar sem eiginkonan var sýknuð af ákæru saksóknara um einelti gagnvart Örnu McClure lögfræðingi Samherja. Fjölmiðlar eins og Vísir og RÚV tóku fréttina upp á sína arma, sem og Morgunblaðið, samanber viðtengda frétt.

Verða framhaldsfréttir um blaðamenn sem nýttu sér veikindi konunnar? Verður Lára V. spurð hvort hún hafi komið á sambandi eiginkonunnar og blaðamanna? Verður Lára spurð hvað henni gekk til þegar hún stöðvaði yfirheyrslu yfir skjólstæðingi sínum, veiku konunni, þegar hún ætlaði að játa gjörðir sínar 5. október 2021? Verður Rakel spurð um samskiptin við konuna? Verður Þóra spurð um Samsung símann sem hún keypti í apríl, áður en Páli var byrlað? Spyr einhver Aðalstein um snögg vistaskipti rétt fyrir byrlun? Fáum við að vita hver stýrði Þórði Snæ og Aðalsteini, sem þá störfuðu hvor á sínum miðlinum, en hringdu á sama tíma í Pál og birtu samræmdar fréttir 21. maí 2021? Verða blaðamenn spurðir um hótanir um að leggja til frekari atlögu að einkalífi Páls og Örnu McClure - en hún er einnig brotaþoli í byrlunar- og símastuldsmálinu?

Líklegasta svarið er nei, fjölmiðlar fjalla ekki um glæpi blaðamanna.

Almenningur hlýtur að spyrja: til hvers eru fjölmiðlar?

Sýknuð af því að beita umsáturseinelti

Felix, skoðanir og sársauki

Felix Bergson kynnir á RÚV birtir færslu á Facebook:

þið sem eruð í því í yfirlætislegu umburðarlyndi að verja "málfrelsi" manna eins og ritstjóra Morgunblaðsins, vinar hans menntaskólakennarans, skáldsins í Skerjafirði, Miðflokksmóra og annarra dreggja samfélagsins ættuð að prófa að setja ykkur í spor fólks sem er bara að reyna að komast í gegnum daginn eins og við hin en býr við mikið óöryggi og hræðslu um tilveru sína vegna vaxandi andúðar í samfélaginu. Andúðar og ofbeldis sem einmitt skapast vegna skrifa þessara manna...

Tilefni færslunnar er að Kristján Hreinsson (skáldið i Skerjafirði) andmælti bábiljunni að hægt sé að fæðast í röngum líkama. Vegna skrifanna missti Kristján vinnuna í Háskóla Íslands með ruddalegum hætti. Tilfallandi gerði athugasemd.

Kjarninn i málflutningi Felix er að skoðanir sem stuðla að óöryggi og hræðslu séu óverðugar og skuli liggja í þagnargildi. Málfrelsið verji ekki skoðanir er valda sársauka.

Sjálfsblekkingu fylgir hræðsla um afhjúpun. Krafan um að aðrir sýni samstöðu með blekkingunni með þögn kallast meðvirkni. Þykir ekki góð latína, hvorki í lífinu almennt né í meðferðarstarfi. 

Sársauki er í vitund þess sem reynir. Óöryggi og hræðsla er hugarástand sem sprettur ekki upp vegna skoðana annarra. Hafi maður sjálfan sig nokkurn veginn á hreinu eru skoðanir annarra kannski upplýsandi en ekki mikilsverðar um eigið andlegt ástand. Ekkert okkar fer í gegnum lífið án hugarangurs.

Vandinn er að sársaukaþröskuldurinn er orðinn svo lágur hjá sumum að hversdagsleg sannindi, að nýburi fæðist aldrei í röngum líkama, má ekki segja upphátt án þess að einhver Felix fái taugaáfall. Sjálfsblekking þolir ekki sannindi, ekki frekar en tröllin dagsljósið. Vörnin er að virkja tilfinningarnar, að saka þá sem segja satt um kvöl og pínu þeirra er trúa að hvítt sé svart. 

Tilfinningar í stað skoðanaskipta yrðu slæm býtti. Auðvelt er að gera sér upp tilfinningar. Skoðanir þarf að rökstyðja.

 

Harmageddon: byrlun Páls og starfslok Þóru

,,Komið hefur í ljós að starfsmenn RÚV höfðu gert ráðstafanir til að unnt væri að afrita síma Páls Steingrímssonar áður en byrlað var fyrir honum," segir í Harmageddon Frosta Logasonar sem heldur úti hlaðvarpsþættinum Brotkast.

Í innslaginu er fjallað um tölvupósta er fóru á milli lögreglu og Stefáns Eiríkssonar útvarpsstjóra. Þar játar Stefán að síminn sem var notaður til að afrita síma Páls skipstjóra Steingrímssonar í byrjun maí 2021 hafi verið keyptur áður en skipstjóranum var byrlað 3. maí.

Frosti birtir tölvupóstana sem sýna að Stefán útvarpsstjóri hafi ætlað að þæfa málið þegar hann fékk fyrstu fyrirspurn frá lögreglu. Síðan rann upp fyrir útvarpsstjóra að yfirhylming á glæp væri ekki heppilegt atriði á ferilsskránni. Stefán vísaði á Þóru Arnórsdóttur ritstjóra Kveiks og kvað hana ,,munnlega" til frásagnar.

- Hálfum mánuði síðar var Þóra hætt á Kveik, segir Frosti í innslaginu. Fyrirsögnin er Blaðamenn og byrlarar.

Tilfallandi bloggari var til viðtals hjá Frosta í Brotkasti um byrlunar- og símastuldsmálið. Hér á sjá sýnishorn.

 

 

 

Sértrúarháskóli Íslands

Háskóli Íslands var einu sinni þjóðarskóli, byggður á sígildum gildum sannleiksleitar og frjálsra skoðanaskipta. Nú er hún Snorrabúð stekkur. Skoðanapistill Kristjáns Hreinssonar gerir hann óæskilegan starfskraft.

Kristján viðraði þá skoðun að allt eins líklegt er að vitlaust fólk fæðist í réttum líkama og að óvitlaust fæðist í röngum líkama. Skrifin eru gamansöm greining á bernskri umræðu.

Dýpri greining leiddi í ljós að í sumum menningarkimum er haft fyrir satt að náttúruna verði að leiðrétta. Menn eins og Kristján koma auga á þegar ekta er skipt út fyrir fals. Skoðanapistill hans er viðvörunarbjalla heilbrigðrar skynsemi.

Gangi Háskóli Íslands erinda sértrúarhópa, og taki mann og annan af sakramentinu fyrir að andmæla fávisku, er illt í efni.

Sértrúarsöfnuðir eiga sinn tilverurétt. Undir formerkjum félagafrelsis má efna til safnaðarstarfs um hvað fíflsku sem vera skal. Geldingar geta vappað um sem kerlingar og kennt nýja málfræði. Það má.

Rétturinn til að hafa rangt fyrir sér er undirstaða allra annarra mannréttinda. Um leið og þrengt er að frelsi manna til skoðana er fótunum kippt undan öllum mannréttindum. Sértrúarhóparnir, sem koma ekki auga á mótsögnina milli skoðanakúgunar og mannréttinda, þurfa einmitt á handleiðurum eins og Kristjáni að halda. En sérviskan útilokar skynsemina.

Þjóðarskóli sem heggur að rótum mannréttinda er orðinn að sértrúarskóla. Safnaðargjöld eiga að standa undir rekstrinum en ekki ríkisfé. 

 

Segir sér hafa verið sagt upp vegna skoðanapistils

Miðflokkurinn og AfD, fylgið eykst

Miðflokkurinn mældist undir fimm prósentum hjá Gallup um áramót; síðasta mæling gaf þeim tæp sjö prósent. Fylgið í ár fer ekki upp og niður heldur er tröppugangurinn jafn upp á við.

Allar fréttir um breytingu á fylgi íslenskra flokka síðustu mánuði snúast um stóraukið fylgi Samfylkingar. 

Vöxtur Miðflokksins, ekki mikill en samt vel mælanlegur og stöðugur, gæti orðið að stærri frétt þegar líður á árið.

Systurflokkur Miðflokksins í Þýskalandi er AfD, Valkostur fyrir Þýskaland. Báðir eru hægriflokkar og valkostir við stærri hefðbundna hægriflokka, Sjálfstæðisflokkinn á Íslandi og Kristilega demókrata í Þýskalandi.

Hægripólitík hefur á umliðnum árum verið hægfara vinstristefna, elt stjórnmálastefnu sem boðar meira ríkisvald og minna einstaklingsfrelsi. Tilbúinn ótti við heimsendi vegna hlýnunar eða veirufaraldurs er notaður til að berja almenning til undirgefni. Lagaboð að ofan um hvernig eigi að haga sér og hugsa valda vaxandi ókyrrð. 

AfD mælist með 19 prósent fylgi, jafnstór Jafnaðarmannaflokknum, SPD, systurflokki Samfylkingar. Kristilegir demókratar eru stöðugir undir þrjátíu prósentum.

Þeir sem greina ástæður lýðhylli AfD nefna andóf gegn grænni öfgahyggju, varhug við sístreymi flóttamanna og andmælum gegn takmörkunum á málfrelsi í nafni pólitísks rétttrúnaðar. Allt eru þetta mál til umræðu á Fróni. Miðflokkurinn hefur skýrari afstöðu en aðrir flokkar.

Seint verður sagt að íslensk og þýsk stjórnmál séu keimlík. Aftur háttar málum í nettengdum heimi þannig að skori stjórnmálafl stórt á einum stað er eins víst að það hafi áhrif á fjarlægari slóðum.

Svo er hitt, að útskýringar á stórauknu fylgi eins flokks eru alltaf ágiskanir. Það merkilega er að eina ágiskunin á margföldun fylgis Samfylkingar er Kristrún formaður. En þegar kemur að pólitík þarf formaður að tala um eitthvað annað en sjálfan sig.   

Hugur, líkami og leiðrétting

Leiðrétting á kyni felur í sér kyn hafi verið rangt. En það er ómöguleiki. Einstaklingur fæðist af öðru hvoru kyninu. Það er hversdagsleg staðreynd. Hlutverkaleikir barna eru önnur hversdagsleg staðreynd.

Allir vita að hugur og líkami fæðast sem einn og sami hluturinn, nýburi með meðvitund. Hugurinn er ekki aðgreindur frá líkamanum og er sem slíkur kynlaus. Ekki er vitað um neina hugsun sem sérgreind er öðru kyninu. Einstaklingar tileinka sér sjónarmið og hugmyndir sem draga dám af líkama þeirra. Skiljanlega, maður hefur þennan eina líkama sem er ferðafélaginn út ævina.

Bábiljufræði, að hægt sé að fæðast í röngum líkama, geta skaðað óþroskaða einstaklinga, barna og ungmenna. Ekki tjóar að banna heimskar hugmyndir, það gerir þær spennandi og er andstætt góðum siðum málfrelsis.

Góðir siðir eru einnig að vekja athygli á firrum sem eru hættulegar börnum og unglingum. Áfengi og fíkniefnum er ekki haldið að ungmennum og það á ekki að kenna þeim sannanlegar ranghugmyndir - að hægt sé að fæðast í röngum líkama. Eina leiðin til að fá þá útkomu að vera í röngum líkama er að lenda á villigötum með hugsun sína, líkt og þekkist hjá áfengis- og fíkniefnaneytendum. Líkja má útbreiðslu ranghugmynda um hvað gerist í getnaði og fæðingu við félagslegan vímuefnafaraldur.

Ef fermingarstrákur segði ,,mér líður eins og stelpu" væri það álíka ómarktækt og hann segði ,,mér líður miðaldra." Það er markleysa að ímynda sér sig af öðru kyni, aldri, hörundslit eða uppruna. Maður er það sem maður er og þarf að lifa með þeirri staðreynd.

Maðurinn fæðist annað tveggja karlkyns eða kvenkyns; ekki hvorugkyns og heldur ekki fiðraður eða hreistraður með sporði. Maðurinn er takmarkaður í líkamanum en getur leyft sér að hugsa hið ómögulega. Heilbrigði er að gera greinarmun á veruleika og ímyndun. Félagslegi vímuefnafaraldur síðustu ára gerir engan greinarmun á ímyndun og veruleika.

Þeir sem halda sig af röngu kyni þurfa ekki kynleiðréttingu heldur geðhjálp. 

Kynleiðréttingar á börnum bannaðar í Texas

Namibíuflóttinn: Finnur Þór leitar hælis hjá dómstóli Samfylkingar

Flóttamönnum Namibíumálsins fjölgar. Finnur Þór Vilhjálmsson saksóknari hjá héraðssaksóknara sækir um dómarastöðu hjá héraðsdómi Reykjavíkur. Frá árinu 2019 rannsakar Finnur Þór Namibíumálið, ásakanir RSK-miðla um mútugreiðslur Samherja í Afríkuríkinu. Fyrri Namibíuflóttamenn hafa axlað sín skinn á Efstaleiti.

Bróðir Finns Þórs, Ingi Freyr Vilhjálmsson, er blaðamaður á einum RSK-miðla, Heimildinni/Stundinni. Ingi Freyr útbjó gögn í hendur bróa saksóknara í samráði við ógæfumanninn Jóhannes Stefánsson uppljóstrara. Tvöföld atsókn bræðra í glæpum fékk tilfallandi til að lyfta brúnum.

Ekki batnaði staða bræðralagsins þegar á daginn kom að Ingi Freyr er sakborningur í þeim anga Namibíumálsins sem lýtur að byrlun Páls skipstjóra Steingrímssonar og stuldi á síma hans. Fjölskyldukómík í réttarríkinu, gæti orðið Netflix-sería.

Fyrri flóttamenn Namibíumálsins eru Aðalsteinn Kjartansson, Helgi Seljan, Rakel Þorbergsdóttir og Þóra Arnórsdóttir. Öll störfuðu þau á RÚV í nóvember 2019 og áttu aðild að Namibíumálinu. Ekkert þeirra er lengur á ríkisfjölmiðlinum. Aðalsteinn og Helgi eru á Heimildinni, skrifa hálfa frétt á viku - stundum saman. Fyrir á fleti eru sakborningarnir Þórður Snær og Arnar Þór Ingólfsson. Allt verðlaunablaðamenn, eins og gefur að skilja í fagstétt andverðleikanna. Rakel og Þóra eru vistaðar í þróunarhjálp utanríkisráðuneytisins (við hæfi) annars vegar og hins vegar í almannatengsladeild Landsvirkjunar, sem þarf að selja vinstrimönnum virkjunarkosti og vindmyllur. 

Fái Finnur Þór stöðu hjá héraðsdómi Reykjavíkur fellur hann eins og flís við rass að musteri kaffihúsaréttlætisins. Dómstóllinn gengur óformlega undir nafninu dómstóll Samfylkingar, næsta dómstig á eftir dómstóli götunnar. Innvígðir vita fyrirfram niðurstöðu mála, t.d. Þórður Snær sakborningur Júlíusson ritstjóri Heimildarinnar, áður Kjarnans. Kaffihúsaréttlætið er engin vísindi heldur vinstripólitík í verki.

Enginn íslenskur fjölmiðill fjallar um Namibíuflóttamennina. Það væri eins og að ræða snöru í hengds manns (kaffi)húsi.

Átta sækja um tvö dómaraembætti

Árásargirni RÚV

Auglýsingadeild RÚV er árásargjörn, segir í viðtengdri frétt. Sama gildir um fréttadeild. Svo dæmi sé tekið er tveggja ára gömul frétt á RÚV með eftirfarandi fyrirsögn:

Íslendingar ákærðir vegna Samherjamálsins í Namibíu

Þrír einstaklingar eru nafngreindir og myndir birtar af þeim. En enginn Íslendingur var eða hefur verið ákærður í Namibíu. 

Árásargirni í sinni tærustu mynd. Forherðingu er söðlað á glæpinn með því að sannanlega röng frétt stendur keik og óleiðrétt á heimasíðu ríkisfjölmiðilsins í tvö ár og fjórum mánuðum betur.

Á RÚV heitir það að ef frétt er á skjön við veruleikann er það verst fyrir veruleikann.

Árásargirni RÚV og forherðing sækir afl sitt í auglýsingafé annars vegar og hins vegar nefskatt, 20 þús. krónur, sem allir skattskyldir landsmenn eru neyddir til að borga í hítina.

Opinbert vald sem misþyrmir saklausu fólki og skattleggur brotaþola í ofanálag á ekki að þrífast í siðuðu samfélagi.

Telja æskilegt að leggja niður auglýsingadeild RÚV

Óbirt Namibíufrétt RSK-miðla

RÚV og Heimildin (áður Stundin/Kjarninn), RSK-miðlar, sérhæfa sig í Namibíumálum, eins og alþjóð er kunnugt frá Kveiksþættinum alræmda í nóvember 2019. Samherji var þar ásakaður um mútugreiðslur til namibískra embættismanna til að komast yfir kvóta í hrossamakríl.

Nú stendur yfir dómsmál þar syðra. Enginn Samherjamaður er sakborningur og enginn lögaðili tengdur útgerðinni á sakabekk. Aðalsakborningurinn er Bernhard Esau fyrrum sjávarútvegsráðherra. Í þriggja daga gamalli frétt útgáfunnar Namibian er sagt frá skýrslugjöf Esau í dómssal.

RÚV og Heimildin, RSK-miðlar, vitna reglulega í Namibian en ekki kemur stakt orð um yfirheyrslur yfir Esau. Hvernig víkur því við að aðalsakborningurinn í Namibíumálinu, sem RSK-miðlar kalla alltaf Samherjamálið, er ekki fréttaefni þeirra íslensku miðla sem sérhæfa sig í málinu?

Skýringin er vitanlega sú að skýrslugjöf Esau fyrir dómi sýnir svart á hvítu að Samherji var fórnarlamb en ekki gerandi í sakamálinu sem nefnist Fishrot þar syðra.

Í fréttinni kemur fram að yfirmenn opinberrar stofnunar, Fishcor, seldu Samherja kvóta en stungu undan greiðslum sem Samherji innti af hendi. Samherji var í góðri trú, keypti kvóta af opinberri stofnun.

Namibísk lög gera ráð fyrir að Fishcor selji kvóta og noti afraksturinn í uppbyggingu innviða og þróunaraðstoðar innanlands.

Nafn Jóhannesar Stefánssonar, fyrrum yfirmanns Samherja í Namibíu, síðar uppljóstrari, kemur fyrir í fréttinni. Þar segir frá tölvupósti forstjóra Fishcor, Sacky Shanghala, til Jóhannesar um að nýta sameiginleg fiskimið Angóla og Namibíu.

Vörn Esau er að embættismenn hafi misnotað nafn hans og ráðherraembætti til að auðgast sjálfir. Saksóknari heldur fram aðild Esau að umboðssvikum.

RSK-miðlar þegja í hel frásögnina af dómsmálinu í Namibíu. Hún afhjúpar að fjölmiðlahávaðinn, sem hófst í nóvember 2019, var falsfréttamennska eins og hún gerist verst. Kristinn Hrafnsson ritstjóri Wikileaks, sá sem kom á sambandi milli Jóhannesar uppljóstrara og RSK-miðla, mætti glaðbeittur í viðtal á mbl.is. Eftir honum var haft:

Wiki­leaks birti í gær yfir 30.000 skjöl tengd starf­semi Sam­herja í Namib­íu, auk þess sem Stund­in og Kveik­ur fjölluðu ít­ar­lega um málið. Í um­fjöll­un­um þeirra er Sam­herji m.a. sagður hafa greitt hundruð millj­óna króna í mút­ur til ein­stak­linga tengd­um Bern­h­ard Easu, sjáv­ar­út­vegs­ráðherra Namib­íu, til að tryggja aðgang að fisk­veiðikvóta í land­inu.

Eina sem rétt er í efnisgreininni er að Wikileaks birti skjöl og Bernhard Esau var sjávarútvegsráðherra. Þúsundir skjala sýndu enga mútugreiðslur Samherja. Rannsóknir saksóknara á Íslandi og Namibíu fundu ekkert saknæmt hjá útgerðinni.

Margt bendir til að Kristinn og RSK-miðlar hafi vitað að þeir voru ekki með neitt mál í höndunum  en töldu sig hafa efni í fjölmiðlasýningu þar sem ásökun jafngilti sekt. Í fréttinni á mbl.is er haft eftir Kristni:

 „Þetta verk­efni sýn­ir nauðsyn þess að stunda góða, vandaða og yf­ir­grips­mikla rann­sókn­ar­blaðamennsku. Ég held líka al­mennt séð að þessi birt­ing og þessi um­fjöll­un sé ákveðinn próf­steinn og prófraun á ís­lenskt sam­fé­lag, og einnig á ís­lenska fjöl­miðla, hvernig þeir mat­reiða og verka þessi mál, sér­stak­lega með til­liti til þess hvernig eign­ar­haldið er þar víða.“

Matreiðsla og verkun á ósannindum, sem sagt, til að hlutirnir líti þannig út að saklaus sé sekur.

Með leyfi að spyrja: Dettur nokkrum með óbrjálaða dómgreind í hug að fjölmiðlar sem stunda siðlausa falsblaðamennsku eigi að fá ríkisfé til að halda lygafabrikkunni gangandi?