Katrín: EES er lélegur samningur

Katrín forsætis varð að biðja von der Leyen, forseta framkvæmdastjórnar Evrópusambandsins, að gleyma ekki Íslandi þegar þær stöllur hittust.

Samskipti Íslands og Evrópusambandsins fara í gegnum EES-samninginn. Á seinni árum ber æ meira á því að ESB lítur á Ísland sem hjálendu sína. Þriðji orkupakkinn er eitt dæmi og bann á bóluefnum til Íslands í farsóttinni er annað.

Með því að biðja von der Leyen vinsamlegast að gleyma ekki Íslandi er Katrín í raun að viðurkenna að EES-samningurinn þjónar ekki tilgangi sínum.

Evrópusambandið reyndi að beita Sviss sömu aðferð og Íslandi, og Noregi, sem einnig er í EES, en komst ekki upp með það. Sviss hafnaði að verða hjáríki ESB og byggir samskipti sín við sambandið á tvíhluta samningum.

Eftir Brexit fóru Bretar sömu leið og Svisslendingar, byggja á tvíhliða samningum. Bretar skoðuðu EES-samninginn og komust að raun um að hann gerði Bretland að hjáríki Evrópusambandsins.

Öll vötn falla til Dýrafjarðar. Ísland þarf að segja upp EES-samningnum og gera fríverslunarsamning við Evrópusambandið í staðinn.

Heiðarlegur Haraldur

Það er heiðarlegt af Haraldi Benediktssyni fyrsta þingmanni sjálfstæðismanna í Norðvesturkjördæmi að segja flokksmönnum sínum fyrirfram að hann muni ekki þiggja annað en fyrsta sætið á lista flokksins.

Haraldur sýndi stórmennsku þegar hann féllst á þau sjónarmið flokksformannsins, Bjarna Ben, að konu þyrfti í ríkisstjórnina og Þórdís Reykfjörð úr kjördæmi Haraldar fékk ráðherradóm.

Þegar valið er á lista alvöru stjórnmálaflokka fer í oddvitasætið sá sem flokksmenn vilja leiðtoga flokksins í kjördæminu.

Nú vita sjálfstæðismenn í Norðvesturkjördæmi að hverju þeir ganga. Heiðarlegt af Haraldi að tilkynna það áður en prófkjör gengur í garð.

Haraldur mun ekki þiggja annað sæti

Persónuvernd lekur í RÚV

Í stríði RÚV gegn Samherja er ekkert heilagt. Moldvarpa RÚV hjá Persónuvernd færði hagsmunahópnum á Efstaleiti þær upplýsingar í gær að Samherjamaður hafi leitað til Persónuverndar vegna einkahagsmuna.

,,Samkvæmt heimildum fréttastofu," segir í frétt RÚV. 

Það liggur í augum uppi að heimild RÚV getur ekki verið önnur en starfsmaður Persónuverndar.

Stofnunin þarf að gera hreint fyrir sínum dyrum. Annars er Persónuvernd ekki hæf til persónuverndar.

Nató, Rússland og Kína

Nató þvingaði Rússland í fangið á Kína með ágangi á vesturlandamæri Rússa. Þar er Úkraína skýrasta dæmið. Í stað þess að friðmælast við Rússland eftir kalda stríðið tóku vesturlönd upp herskáa stefnu gagnvart Rússum.

Náið bandalag Rússlands og Kína þjónar ekki vestrænum hagsmunum. Þegar Stoltenberg Nató-stjóri segist ekki í köldu stríði við Kína er hann óbeint að viðurkenna mistök í Rússlandsstefnu vesturlanda síðustu 30 ár.

Í Bandríkjunum eru samtök, US-Russia Accord, sem vinna að betri samskiptum Rússlands og Bandaríkjanna. Í opnu bréfi, m.a. undurrituðu Jack F. Matlock, fyrrum sendiherra Bandaríkjanna í Sovétríkjunum, er hvatt til vinsamlegri samskipta við Rússa.

Evrópuríki, þau sem starfa innan ESB, eru einnig að vakna til vitundar um skynsemi þess að leggja Rússagrýluna á hilluna.

Vonum seinna. 

Heimsbyggðin ekki á barmi kalds stríðs

Þingmenn Samfylkingar á krísufundi RÚV: hjálp frá útlöndum

Fréttamaður RÚV, Sigríður Dögg Auðunsdóttir, nýkjörinn formaður Blaðamannafélags Íslands, efndi til fundar í Norræna húsinu í dag fyrir hönd Helga Seljan og hagsmunahópsins á Efstaleiti. Í kynningu á heimasíðu BÍ er ekkert farið í grafgötur með tilganginn. Þar segir: ,,Hafa blaðamenn á hinum Norðurlöndunum upplifað viðlíka árásir á fréttamenn og Samherji hefur ástundað?"

Krísufundur RÚV var fámennur, kannski um 30 manns. Um 40 manns fylgdust með í beinni útsendingu á Facebook. 

Fundurinn var á ensku, enda ætlaður til útflutnings að útmála Ísland sem spilltasta ríkið á Norðurlöndum, líkt og er sérstakt áhugamál hagsmunahópsins á Efstaleiti.

Rósa Björk Brynjólfsdóttir þingmaður Samfylkingar var með ákveðið hlutverk í sviðsetningunni. Hún sat við hlið Helgu Völu og stóð upp þegar Helgi Seljan hafði flutt sína útgáfu af Samherjamálinu. Rósa Björk byrjaði á því að líkja Samherjamálinu við morðið á blaðakonu á Möltu fyrir nokkrum árum, jafn smekklegt og það er. Rósa Björk vakti athygli á því að stjórnvöld á Möltu tóku ekki til við að rannsaka morðið fyrr en eftir alþjóðlegan þrýsting. Síðan spurði þingmaður Samfylkingar hvort og hvernig mætti setja alþjóðlegan þrýsting á íslensk stjórnvöld í deilu RÚV við Samherja.

Aud Lise Norheim sendiherra Noregs stjórnaði þessum fundarlið. Hún áttaði sig strax á því að hér var þingmaður á alþingi Íslendinga kominn á hættulega braut, að biðja um alþjóðlegar aðgerðir gegn eigin stjórnvöldum, og sagði að þetta atriði mætti ræða á eftir í móttökunni - þegar engin upptaka væri í gangi. (Aud Lise, nefndi ekki þetta með upptökuna, en hún er líka diplómat).

Kosningabarátta Samfylkingar stendur og fellur með bandalaginu við RÚV. Samfylkingin og Píratar, Viðreisn að nokkru marki, gera gott mót í september ef það tekst að telja þjóðinni trú um að Ísland sé spilltasta ríki Norðurlandanna.

Krísufundur RÚV í Norræna húsinu í dag var til að leiða saman helstu hagaðila vinstrimanna, vinstriflokka á þingi og hagsmunahópinn á Efstaleiti.

Fyrirsögnin á frásögn RÚV er þessi: Norræn ríki í fremstu röð en Ísland eftirbátur þeirra.

Fleiri falsfréttir á Íslandi en Noregi - hvers vegna?

,,Íslendingar eru talsvert líklegri en Norðmenn til þess að rekast á falsfréttir," segir í viðtengdri frétt. Um þriðjungur Íslendinga ,,segist hafa myndað sér ranga skoðun á opinberri persónu vegna villandi upplýsinga."

Hvers vegna ætli það sé?

Getur verið að hér á Íslandi starfi ríkisfjölmiðill sem tekur upp á arma sína glæpamann sem hefur drukkið, dópað og vændiskeypt sig í gegnum afrískt smáríki og geri hann að siðapostula? Enginn slíkur ríkisfjölmiðill finnst í Noregi.

Getur verið að á Íslandi sé ríkisfjölmiðill hvers fréttamaður er dæmdur fyrir alvarlegt brot á siðareglum en yfirstjórn miðilsins gefur út yfirlýsingu að fréttamaðurinn megi áfram valsa um og framleiða þráhyggjufréttir að vild? Ekkert viðlíka í Noregi.

Getur verið að ritstjórn íslensks ríkisfjölmiðils geri út fréttamann til að yfirtaka samtök blaðamanna og beita samtökunum í áróðursstríði ríkisfjölmiðilsins? Engin dæmi um það í Noregi.

Getur verið að íslenskur ríkisfjölmiðill geri samsæri við opinbera stofnun um að knésetja atvinnufyrirtæki sem hagsmunahópur ríkisfjölmiðilsins hefur andúð á? Gerist bara á Íslandi, ekki í Noregi.

Þegar ríkisfjölmiðill býr til falsfréttir á færibandi er engin furða að almenningur rekist á falsfréttir í meira mæli en í öðrum löndum og myndi sér ,,sér ranga skoðun á opinberri persónu vegna villandi upplýsinga." 

Fleiri rekast á falsfréttir á Íslandi

Tölvur, veður og loftslag - og skáldskapur

Tölvur spá fyrir um veður. Við fáum þokkalegar spár tvo til fjóra daga fram í tímann og líklegt veður næstu 5-7 daga. Eftir það ágiskanir.

Tölvur, réttara sagt tölvumódel, spá hnattrænni hlýnun næstu áratugi vegna koltvísýrings, CO2. Um 750 gígatonn CO2 eru í andrúmsloftinu, maðurinn ber ábyrgð á þrem prósentum, já 3%, af því magni.

En það er ekki koltvísýringur sem skiptir mestu máli um hlýnun/kólnun jarðarinnar heldur vatnsgufa sem er til muna áhrifameiri gróðurhúsalofttegund en CO2.

William Happer, fyrrum prófessor við Princeton-háskóla, útskýrir á 5 mín. samhengið milli tölvumódela og loftslagsins og hvers vegna módelin eru fremur skáldskapur en vísindi.

Ekki mæður, heldur fæðingarfólk

Fulltrúi Biden-stjórnarinnar í Bandaríkjunum kom fyrir þingefnd og sagði orðið móðir mannréttindabrot á þeim sem hvorki eru karl eða kona. Það ætti að tala um ,,fæðingarfólk" í stað mæðra. Á ensku ,,birthing people".

Í Bretlandi er það að frétta að kona þurfti að fara fyrir dómstóla til að fá þann úrskurð að það væri ekki hatursorðræða að tjá þá skoðun að kynin væru tvo, karl og kona. Breska konan, Maya Forstater, missti vinnuna fyrir að hafa þá skoðun að maður gæti ekki breytt líffræðilegu kyni.

Maya Forstater segir í viðtali að karlar leiki þann leik að þykjast konur og fá aðgang að kvennaklósettum til þjóna eðli sínu með viðskeytið ,,trans" að vopni. Karlar sem þykjast konur taka gullið í kvennaíþróttum án þess að hafa mikið fyrir því. Um 40 prósent meintra kvenna á lesbískum stefnumótasíðum eru í raun transkarlar. Allt er þetta undir þeim formerkjum að maður geti sjálfur ákveðið af hvaða kyni maður er. Nonni getur sem sagt verið Jónína þegar hann vill á kvennaklósettið eða komast á verðlaunapall á Ólympíuleikunum. 

Dæmin tvö frá Bandaríkjunum og Bretlandi sýna helsta áhugamál frjálslyndra og vinstrimanna nú um stundir, að brjóta tungumálið undir ímyndun þeirra veruleikafirrtu.

Andrés Pírati: stöðvum eldgosið í Fagradal

Þingmaður Pírata vill ,,að Ísland nái að minnsta kosti 55% sam­drætti í los­un gróður­húsaloft­teg­unda árið 2030 miðað við los­un árs­ins 1990."

Það er því miður ekki hægt nema að stöðva eldvirknina á Reykjanesskaga. Gosið þar framleiðir ógrynni gróðurhúsalofttegundir, einkum vatnsgufu og koltvísýring, dag hvern. Eldvirknin hefur staðið í þrjá mánuði og ómerkir allar áætlanir um losun Íslands á gróðurhúsalofttegundum.

Ef Andrés Ingi pírati væri hreinskilinn myndi hann leggja fram frumvarp um að stöðva eldgosið á Reykjanesi og leggja blátt bann við frekari eldvirkni á Íslandi.

Náttúran afhjúpar loftslagskverúlanta.

Sakaði þingið um metnaðarleysi í loftslagsmálum

Samherjamönnum hótað lífláti - Jóhannes fékk 24 milljónir

Eftir að Jóhannes uppljóstrari Stefánsson var rekinn frá Samherja í júlí 2016, vegna áfengis- og vímuefnanotkunar annars vegar og hins vegar óreiðu í rekstri í Namibíu-útgerðinni, neitaði einvaldurinn að gefa eftir stöðu sína í Articnam Fishing þar sem Namibíumenn voru í meirihluta en Samherji í minnihluta.

Aðeins Namibíumenn eiga rétt til að fá kvóta í namibískri landhelgi. Í upphafi samstarfsins þar syðra, árin 2011 og 2012, stofnuðu Namibíumenn þrjú félög um réttindi sín, Sinco, Epango og Youkor. Til samans áttu félögin þrjú 51% í Articnam Fishing en Samherji 49%.

Félögin þrjú eru ekki hluti af spillingarrannsókn namibískra lögregluyfirvalda. Jóhannes átti trúnað namibískra meðeigenda Samherja og taldi þeim trú um að hægt væri að sækja meira gull í greipar norðlensku útgerðarinnar. Í raun skipti Jóhannes um vinnuveitendur sumarið 2016, og jafnvel fyrr, fór út þjónustu Samherja og hóf að vinna með namibískum kvótarétthöfum. Í Kastljósviðtali 11. desember 2019 segir Jóhannes eftirfarandi:

Fyrsta skrefið hjá mér var að upplýsa glæpi Samherja gagnvart kvótahöfum sem voru í samvinnu við þá. Svo þróaðist þetta lengra þegar ég fór að gera mér grein fyrir hvað var í gangi og hvað maður var hluti af.

En, óvart, þá var Jóhannes Samherji þegar stofnað var til samstarfsins og rekstur hófst. Eins og áður hefur verið rekið þá var Jóhannes bæði hugmyndafræðingurinn og sá um framkvæmdina á Namibíuverkefninu. En löngu seinna, þegar Jóhannes seldi þjónustu sína til RÚV, er hann voða hissa á hve Samherji lék Namibíumennina grátt. Fréttabörn hagsmunahópsins á Efstaleiti gleypa falsið hrátt og selja íslensku þjóðinni blekkinguna dýru verði.

En höldum áfram með söguna frá 2016. Samherji rak Jóhannes eftir að hann ætlaði að skipta út Samherja fyrir Ísfélagið. En áfram hafði einvaldurinn tögl og haldir í Articnam Fishing, studdist þar við namibíska kvótahafa. Karlinn sjálfur fluttist til nágrannaríkisins Suður-Afríku og var þar í slagtogi með Christian Yema, fyrrum hermann frá Kongó. 

Jóhannes sendi Yema til Namibíu að ræða við þá Samherjamenn sem reyndu að halda starfseminni gangandi eftir sviðna jörð verðandi uppljóstrara RÚV. Í Namibíuskjölunum segir Jón Óttar Ólafsson Yema hafi hótað sér lífláti og þar er einnig frásögn frásögn frá Agli Árnasyni um að Yema hafi setið fyrir honum á flugvelli.

Í desember 2016 sáu Samherjamenn þann kost vænstan að semja við Jóhannes, kaupa hann af sér. Gegn því að segði af sér stöðu sinni í Articnam Fishing og hætti líflátshótunum fékk einvaldurinn 200 þúsund bandaríkra dollara, um 24 milljónir króna, skrifar Jón Óttar í vitnisburði sínum.

Samherjamenn töldu sig lausan við einvaldinn. En svo var aldeilis ekki. Jóhannes kunni fleiri ráð til að gera sig gildandi. Hann gerðist uppljóstrari um sjálfan sig og Samherja og gekk í þjónustu spillingarlögreglunnar í Namibíu annars vegar og hins vegar RÚV.

Jóhannes, fyrrum einvaldur í Namibíu, síðar flóttamaður í Suður-Afríku, og verktaki í ófrægingarherferð hagsmunahópsins á Efstaleiti gegn Samherja, kemur fram í drottningarviðtali hjá Pírötum. Þeir sem nenntu að horfa á Siða-Sunnu mæra Jóa tóku eftir því að þegar almenningur átti að fá að spyrja fyrrum einvald um hans hlut komu upp tæknilegir örðugleikar í útsendingu. Skiljanlega.