Jóhanna Sig. hrapar - skiljanlega

Traust almennings var það sem bjargaði Jóhönnu Sigurðardóttur frá útskúfun forystu Samfylkingarinnar sem ætlaði að bola henni úr ráðherrastól fyrir hrun. Traust sem almenningur hafði á Jóhönnu er horfið vegna handahófskenndra vinnubragða, stefnuleysis og uppgjafar gagnvart auðmönnum.

Úr ráðuneyti Jóhönnu kom línan ,,saman hvaðan gott kemur" þegar til stóð að mylja undir Björgólf yngri og samfylkingarviðskiptafélaga hans sem ætla að byggja gagnaver.

Jóhanna Sig. er ráðalaus og í Icesave-deilunni var hún verri en enginn.

Sjálfstæðisflokkurinn eykur fylgi sitt verulega

Fávísi Finnur í Arion

Fávísi Finnur er bankastjóri Arion. Hann telur að Jói í Bónus og Jón Ásgeir sonur hans séu ábyggilegir rekstarmenn. Finnur ætlar að láta feðgana kennda við Baug eiga ráðandi hlut í verslunarstórveldinu Högum. Arion eignaðist Haga vegna þess að téðir feðgar skuldsettur félagið upp fyrir rjáfur.

Um helgina er samfelldur fréttaflutningur í Morgunblaðinu og RÚV um undanskot eigna og gjaldþrot félaga í eigu feðganna. Baugsmiðlar þegja þunnu hljóði en við hverju öðru er að búast?

Finnur fávísi er svo áfram um að Baugsfeðgar geri sig gildandi í íslensku atvinnulífi að hann tekur þátt í plöggi gagnvart lífeyrissjóðum sem feðgarnir vilja að leggi þeim til fjármuni.

Finnur fávísi er á ábyrgð ríkisstjórnar Jóhönnu Sigurðardóttur.

Lögmaður hrunverja dylgjar um Agnesi

Í gær var því spáð að hrunverjar í Sjálfstæðisflokknum myndu brátt láta til sín taka. Sólarhring síðar er mættur lögmaðurinn Sveinn Andri Sveinsson með pistil um að gagnrýnendur auðmanna séu ekki hótinu betri en útrásarhyskið.

Sveinn Andri dylgjar um að Agnes hafi þegið utanlandsferðir og fínerí frá auðmönnum og því sé henni sæmst að þegja um lygamerði úr hópi útrásargutta, en Agnes fjallaði um sannleiksást Þórs Sigfússonar.

Aðferð lögmannsins heitir spillingarjöfnun. Útrásarauðmenn og málafylgjumenn þeirra munu beita þessari aðferð trekk í trekk; nær allir tóku þátt í útrásarspillingunni og við skulum sópa öllu undir sama teppið og gleyma óþverranum.

Svarið er nei. Við munum ekki gleyma.

Tilveran eftir 6. mars

Vika er í kosningar um Icesave-frumvarp ríkisstjórnarinnar sem forsetinn sendi til þjóðarinnar. Enn er mögulegt að ekki verði kosið um frumvarpið. Ef Bretar og Hollendingar gera okkur snöggtum betra tilboð en hingað til og stjórnarandstaðan sér ástæðu til að samþykkja er líklegt að frumvarpið verði dregið tilbaka.

Ríkisstjórnarvaldið er í höndum stjórnarandstöðunnar næstu daga. Bjarni Ben og Sigmundur Davíð geta ekki leyft sér að samþykkja neitt sem ekki er verulega betri samningur. Jafnvel getur verið klókt að hafna betri samningi, fá nei-ið 6. mars og fella ríkisstjórnina. Eftir fall ríkisstjórnar fæst nokkurra vikna frestur og þá er hægt að semja á grundvelli sem liggur fyrir.

Ríkisstjórn Jóhönnu Sig. þarf að fella vegna þess að hún er landi og lýð til óþurftar. Í skjóli stjórnarinnar sanka auðmenn að sér fyrir eigum án skuldanna. Ríkisstjórnin heggur að grunnstoðum atvinnulífsins með fyrningarleiðinni í sjávarútvegi. Til að kóróna óskapnaðinn ætlar kvislingahjörðin í stjórnarráðinu að selja landið og miðin undir Stór-Evrópuríkið í Brussel.

Kannski vorar eftir 6. mars.

Stjórnmálaelítan óttast þjóðaratkvæði

Stjórnvöld munu gera allt sem í valdi þeirra stendur til að komast hjá þjóðaratkvæðagreiðslu um Icesave-frumvarpið eftir viku. Gangi þjóðaratkvæðagreiðslan fram mun hún breyta íslenskum stjórnmálum. Fordæmi verður komið fyrir því að endurskoða niðurstöðu alþingis.

Þjóðmálahreyfingar munu koma áhugamálum sínum á framfæri og krefjast þjóðaratkvæðagreiðslu. Alþingi verður veikari fyrir sem stofnun og framkvæmdavaldið sömuleiðis.

Þjóðin ætlar að fella Icesave-frumvarpið. Þegar ríkisstjórnarfrumvarpið er dæmt ónýtt af almenningi þarf ríkisstjórnin að axla sín skinn. Þótt fyrr hefði verið.

Bandalag hrunverja í Sjálfstæðisflokknum

Útrásarauðmenn og sumir þingmanna Sjálfstæðisflokksins eru áfram um að ljúka uppgjörinu við hrunið í snarhasti til að koma sér í hversdagstakt hins makráðuga; græða á daginn og grilla á kvöldin. Ráðning Ólafs Stephensen í ritstjórastól Fréttablaðsins er liður í bandalagi hrunverja. Ólafur er náinn samstarfsmaður fyrrum heilbrigðisráðherra Guðlaugs Þórs Þórðarsonar og í kallfæri við Þorgerði Katrínu Gunnardóttur varaformann.

Ólafur skrifaði sinn fyrsta leiðara í vikunni með þeim efnislegu skilaboðum að atvinnulífið eigi að hafa forgang umfram önnur málefni. Pilsfaldakapítalismi á Keflavíkurflugvelli, þar sem opinberu fé er ráðstafað í þágu einkareksturs, er dæmi um málflutning bandalags hrunverja.

Undir rós eru í Morgunblaðinu skrifaðar í dag tvær greinar gegn bandalagi hrunverja. Styrmir Gunnarsson fyrrum ritstjóri varar forystu Sjálfstæðisflokksins við að hlusta ekki á réttmæta reiði almennings sem krefst uppgjörs við auðræði síðustu ára. Agnes Bragadóttir skrifar upp eðliseinkenni hrunverja þar sem Þór Sigfússon fær kvittun fyrir lygavaðal sem hann hafði í frammi í stól forstjóra Sjóvá.

Bandalag hrunverja mun láta til sín taka á næstunni.

 

Íslandi vantar ekki peninga, heldur heiðarleika

Lendi Ísland í ruslflokki matsfyrirtækja er það í þágu langtímahagsmuna okkar. Ísland þarf ekki á útlendum peningum að halda, þeir voru hluti af vandanum fyrir hrun. Hærri vextir í útlöndum gerir útrásarafgöngunum hér heima erfiðara fyrir að leggja undir sig atvinnulífið að nýju.

Draumastaða útrásarviðrinanna er að íslenskur almenningur taki á sig Icesave-skuldirnar og þeir fái í staðinn aðgang að ódýru lánsfé sem fjármálaspillingarliðið í hálfopinberu ríkisbönkunum veitir áfram til viðrinanna.

Til að losa okkur við óværuna verðum við að horfast í augu við kaldan veruleikann: Uppgjörið hefur ekki farið fram. Glæpamennirnir ganga lausir.

Ísland á leið í ruslflokk

Engin forysta fyrir ESB-aðild

Móðursýkiskast Samfylkingar hrunveturinn 2008 til 2009 leiddi til þess að hugmyndin um að sækja um aðild að Evrópusambandinu komst á flug. Samfylkingin þurfti eitthvað stórt mál til að breiða yfir hlutdeild flokksins í hruninu.

Í kosningabaráttunni var ESB-aðild kynnt sem töfralausn; um leið og við myndum sækja um tæki krónan stökk upp á við; efnahagsvandinn yrði léttbærari og svo framvegis.

Löngu áður en atkvæðagreiðslan 16. júlí fór fram um hvort við ættum að sækja um var alþjóð orðið ljóst að ESB-aðild og uppgjör við hrunið væri tvö aðskilin mál og að umsókn myndi engu breyta um lífskjör hér næstu árin.

Samfylkingunni bauðst  málamiðlun, til dæmis að fara með í þjóðaratkvæði hvort við ættum að sækja um. Flokkurinn hafnaði samstöðu og situr uppi með óvinsælt mál sem hægt en örugglega kyrkir Samfylkinguna.

Egill Helgason vekur athygli forystuleysinu fyrir ESB-aðildinni. Hverjir ættu að veita dauðum málstað forystu? 

Jóhannes í Bónus er ekki glæpon

Jón Ásgeir sonur hans borgar alltaf allar sínar skuldir.

Wernersbræður eru bestu vinir.

Íslensku bankarnir voru traustir.

ESB umsóknin er í góðum farvegi.

Icesave-samningurinn er besti samningur sem nokkur ríkisstjórn hefur gert.

Jóhanna Sig. er ekki frekja.

Samfylkingin er ekki Baugsfylking.

Pálmi í Fons greiðir alltaf markaðverð fyrir flugfélögin sín.

Í dag er ekki föstudagur.

Þöggun i anda samræðustjórnmála

Samfylkingin ætlast til að Vinstri grænir þegi um sannfæringu sína að ísland eigi ekkert erindi inn í ESB. Yfirgangur Samfylkingarinnar er þekkt stærð í íslenskum stjórnmálum. Þeir fyrirskipuðu Sjálfstæðisflokknum að halda aukalandsfund til að skipta um skoðun í ESB-málum. Sjálfstæðisflokkurinn lyppaðist niður og það varð banabiti ríkisstjórnar Geirs Haarde. Eftirgjöf gagnvart yfirgangi elur á frekjunni.

Vinstri grænir gáfu eftir í stjórnarmyndunarviðræðum og þeir gáfu eftir í sumar þegar ályktun um umsókn var samþykkt. Af þeirri ástæðu finnst samfylkingarþingmönnum sjálfsagt að krefja þingmenn Vg um þögn.

Liðleskjur eins og Árni Þór Sigurðsson eru alltaf til í að sitja og standa í þágu valdsins. En í þingflokki Vg eru góðu heilli aðrar manngerðir.

„Í fullum rétti að tjá sig“