Lýðræðishalli ESB eykst

Um 72 prósent af lögum Evrópusambandsins eru samþykkt í fyrstu umræðu sem þýðir að embættismenn ásamt fáeinum þingmönnum á Evrópuþinginu afgreiða málið. Í Danmörku er umræða um að lýðræðishallinn í Evrópusambandinu sé orðinn slíkur að ekki verði við unað.

Danski þingmaðurinn Peter Juul Larsen hvetur Evrópunefnd danska þingsins að setja á dagskrá lýðræðishallann í Evrópusambandinu. Krafan um skilvirkni við lagasetningu hefur orðið til þess að lýðræðisleg aðkoma kjörinna þingmanna áð lagasetningu Evrópusambandsins þrengist stöðugt.

Sjá nánar umfjöllun Informasjon.

(Tekið af Heimssyn.is)

RÚV á bæn með Steingrími J.

Stjórnmálafrétt dagsins er uppnám í þingliði Vinstri grænna þar sem líkur eru á að fleiri en Lilja Móses þvoi hendur sínar af fjárlgafrumvarpi ríkisstjórnar Jóhönnu Sig. Fréttastofa RÚV gerðist spunadeild í Moskvu-armi Vg og afgreiddi málið sem smáfrétt.

Komi á daginn að fleiri en einn þingmaður Vinstri grænna sitji hjá við atkvæðagreiðslu um fjárlagafrumvarp ríkisstjórnarinnar hefur fréttastofu RÚV dreitt inni.

Sameinuð bæn RÚV og Steingríms J. er að uppreisnin í þingliði Vg hjaðni áður en faglegu og pólitísku orðspori verði skolað ofan í ræsið.

2007-rök; græðum á löstum

Framkvæmdastjóri hótelkeðju á Íslandi vill reka spilavíti og teflir fram þeim rökum að ríkið fái 700 milljónir í skatttekjur. Framkvæmdastjórinn blæs á afstöðu ríkisvaldsins að fjárhættuspil spilli lýðheilsu og segir spilavíti rekin erlendis og því hljóti það að vera í lagi hér.

Útlönd eru stór og þar má margt misjafnt finna s.s. löglegt vændi, frjálsa skotvopnaeign, lögleg eiturlyf og svo framvegis. Hvert samfélag reisir skorður við athöfunum þegnanna í samræmi við venjur og hefðir. Á Íslandi höfum við kosið að vera án spilavíta. 

Tilboð um að leggja af bann við spilavítum af því við græðum peninga á afnáminu er siðleysi í takt við hugarfar sem kennt er við 2007. Framkvæmdastjóri hótelkeðjunnar gæti næst komið með tilboð til okkar að lögleiða vændi af því það gæfi svo vel í aðra hönd.  

Icelandair hótel vilja reka spilavíti

Meginreglur og hagkvæmni í Icesave

Vextir eru lægri í fyrirliggjandi samningi um Icesave en í þeim sem hafnað var í þjóðaratkvæðagreiðslu í mars. Að því slepptu virðast samningarnir í meginatriðum sambærilegir. Áhættuþættir s.s. vegna innheimtu í þrotabú Landsbanka og gengisþróunar eru allir á okkar herðum. Þessa áhættu þarf að vega og meta á móti þeirri áhættu sem felst í að hafna kröfum Breta og Hollendinga um að bæta þeim ríkisábyrgð sem þeir einhliða settu á Icesave-reikninga Landsbankans.

Á bakvið býr spurningin um meginreglur og hagkvæmni. Eigum við í nafni hagkvæmni að undirgangast sátt og reiða fram tugmilljarða til að losna við ólögmætar kröfur eða standa keik á rétti okkar?

Björn Bjarnason ræðir á Evrópuvaktinni samhengið sem er á milli eymdarafstöðu ríkisstjórnar Íslands gagnvart ofríki Breta og Hollendinga og umræðunnar í Evrópu um banka sem fara sér geyst, tapa stórfé, og ætlast til að skattgreiðendur borgi brúsann.

Vextirnir eina stóra breytingin

90 prósent afskriftir til Kaupþingsfólks

Slitastjórn Kaupþings sendir kolröng skilaboð út í samfélagið með því að gefa yfirmönnum fallna bankans stórafslátt á skuldum. Til að bæta gráu ofan á svart er beinlínis tekið fram að enginn verði keyrður í gjaldþrot vegna kúlulánanna.

Ef regla slitastjórnar Kaupþings væri almenn regla í samfélaginu yrði fólk beinlínis hvatt til að skuldsetja sig upp í rjáfur og helst rúmlega það vegna þess að í boði væri 90 prósent afskriftir ef illa færi. Til viðbótar fengi fólk friðhelgi frá gjaldþroti.

Kaupþingsfólkið sem hér um ræðir var ekki hópur sakleysingja sem ekki vissi hvert stefndi. Um þetta fólk eiga að gilda almennar reglur en ekki sérúrræði.

Kaupþingsfólk semur við slitastjórn

Sjálfstæðisflokkur; auðrónar eða fullveldissinnar

Baráttan um Sjálfstæðisflokkinn er háð á mörgum vígstöðvum. Í dag birtust tvö álit um framtíð flokksins. Ólafur Arnarson óskar sér nýrrar hrunsstjórnar Sjálfstæðisflokks og Samfylkingar sem framlengi líf frjálshyggju lágra skatta, auðræðis og Evrópusambandsaðilar. Styrmir Gunnarsson bendir á leið fullveldissinna þar sem samstaða milli Vinstri grænna og Sjálfstæðisflokks væri lykilatriði.

Auðrónadeild Sjálfstæðisflokksins er með innanborðs fólk eins og Ólaf Stephensen ritstjóra Fréttablaðsins, Þorstein Pálsson fyrrverandi ritstjóra Fréttablaðsins, Guðlaug Þór Þórðarson þingmann, Þorgerði Katrínu Gunnarsdóttur þingmann, Þór Sigfússon fyrrum forstjóra Sjóvá og Árna Sigfússon bæjarstjóra í Reykjanesbæ. Auðrónar eiga kannski 10-15 prósent í Sjálfstæðisflokknum.

Fullveldissinnar eru þjóðlega íhaldið sem er hryggstykkið í Sjálfstæðisflokknum. 

Bjarni Benediktsson formaður Sjálfstæðisflokksins er ekki búinn að gefa upp hvoru megin sannfæring hans liggur.

 

Stjórnin tapar fyrsta slag um nýtt Icesave

Væntingar á stjórnarheimilinu stóðu til að stjórnarandstaðan fengist til að skrifa upp á frumvarp vegna nýrra Icesave-samninga. Ríkisstjórnin er logandi hrædd um að Ólafur Ragnar sendi Icesave-málið aftur til þjóðarinnar og vildi draga úr þeim líkum með breiðri samstöðu á þingi.

Stjórnarandstaðan gerir rétt í að þvo hendur sínar af samningnum og leyfa umræðunni að þróast í fáeinar vikur á meðan samningurinn er maulaður í skiljanlegt samhengi og fyrirvarar upplýstir og útskýrðir.

Meðferð ríkisstjórnar Jóhönnu Sig. á þeim samningi sem felldur var í þjóðaratkvæði var slíkur að draga þurfti út með töngum upplýsingar. Sporin hræða.

Icesave verður stjórnarfrumvarp

Köben, Moskva og Brussel

Utanríkisstefna vinstri flokka á Íslandi frá fullveldi er tengd þremur borgum. Alþýðuflokksmenn vildu ekki slíta á tengslin við Danmörku og unnu gegn stofnun lýðveldis á Íslandi; þeirra höfuðborg var Kaupmannahöfn. Kommúnistar gerðu gælur við Ráðstjórnarríkin og báðu um Sovét-Ísland.

Á síðustu árum er það Brussel sem orðin er andleg höfuðborg arftaka Alþýðuflokksins. Með stuðningi Moskvu-deildarinnar í Vinstri grænum var send vanhugsuð umsókn um aðild að Evrópusambandinu.

Hér er tilgáta til að skýra hjárænuhátt íslenskra vinstrimanna. Iðnvæðing og borgarmyndun var forsenda þróun vinstristjórnmála á Vesturlöndum. Hvorttveggja kom seint og um síðir til Íslands. Af því leiðir er íslensk vinstripólitík á anal-stigi. 

Samfylkingarjátning um Icesave og ESB

Guðmundur Andri Thorsson rithöfundur játar í dag mistök um síðustu áramót að styðja Icesave-samninginn sem var sirka 400 milljörðum verri en sá sem nú liggur á borðinu - sem aðeins fékkst eftir afgerandi niðurstöðu þjóðaratkvæðis um að sá fyrri væri óboðlegur. Játning Guðmundar Andra er fjarska merkilega orðuð.

Um það er þarflaust að þrefa: Okkur skjátlaðist. Við, þessi minnihluti landsmanna sem vildum ljúka Icesave-málinu um síðustu áramót, fá þetta út úr heiminum og halda áfram út úr kreppunni með hjálp annarra þjóða - okkur skjátlaðist, við paníkeruðum.

Orðalagið ,,með hjálp annarra þjóða" vísar til umræðu í fyrra í samfylkingarkreðsum að Evrópusambandið mynd koma okkur til bjargar ef afborganir til Breta og Hollendinga ætluðu okkur lifandi að drepa.

Það er að renna upp fyrir Guðmundi Andra að örvæntingin eftir hrun leiddi marga til að trúa á bjargir frá Brussel. Þær bjargir einar duga sem við veitum okkur sjálf. Þess vegna eigum við að draga tilbaka umsóknina um aðild að Evrópusambandinu, enda var hún augljóslega send í ,,panikk". Ekki satt Guðmundur Andri?

Land Crusier kreppan

Samkvæmt upplýsingum frá Toyota seldust 145 Land Crusier jeppar  í ár. Verðmiðinn er tíu milljónir króna og upp úr fyrir stykkið. Álykta má að þau heimili sem fjárfesta í slíku farartæki séu ekki á vonarvöl og þurfi hvorki á flatri skuldaniðurfellingu að halda né greiðsluaðlögun.

Smátt og smátt er að renna upp fyrir okkur hvers eðlis kreppan er sem þjóðin stendur frammi fyrir. Þrátt fyrir afskriftir upp á þúsundir milljarða er enn kappnóg af peningum í samfélaginu. 

Við þurfum bara að finna uppskrift Land Crusier-fólksins að ráðdeild og hvernig nýta má afgang til að kaupa jeppa.