Vinstriflokkar reyna fjárkúgun

Pólitísk fjárkúgun stjórnarandstöðunnar misheppnast með því að forsætisráðherra stendur fast á þeirri meginreglu að semja ekki við ófyrirleitna tækifærissinna.

Hótun stjórnarandstöðu um að slá Íslandsmet í málþófi verður henni sjálfri að fjörtjóni.

Stjórnarandstaðan er ekki með nein þau málefni sem eru henni skjól fyrir málþófið. Við blasir hreinn og klár vandalismi, tilgangslaus skemmdarverk. Forsætisráðherra vex með því að standa í ístaðinu og gefa ekki eftir gagnvart óaldarflokknum á alþingi.

„Við ætlum ekki að bjóða neitt“

Vinstrimenn hætta í stjórnmálum - vilja utanþingsstjórn

Vinstri græn­ir og Sam­fylk­ing­in eru með 9,4% fylgi. Báðir flokk­ar missa fylgi síðustu tvo mánuði. Fylgi Bjartr­ar framtíðar er stöðugt undir lágmarki til að fá fulltrúa kjörinn á alþingi, eða 4,6%.

Við þessar aðstæður stingur Róbert Marshall þingmaður fylgislausrar framtíðar upp á sameiningu vinstriflokkanna.

Stóra sameiningarmál vinstrimanna er að utanþingsstjórn taki völdin að loknum næstu þingkosningum. Tilboð vinstrimanna til þjóðarinnar: kjósið okkur til að aðrir stjórni landinu.

Píratar og Framsókn bæta við sig

Öfgajöfnuður sem bitnar á konum

Til eru Íslendingar sem segjast ekki búa hér á landi vegna þess að jöfnuður er of mikill. Til dæmis Björn Eydal Davíðsson aem kennir jöfnuðinn við fákeppni: ,,Önnur birtingarmynd þessarar fákeppni, sem birtist bæði meðal fyrirtækja og einstaklinga, er jöfnuður, bæði í verðlagi og launum."

Bjarni Benediktsson fjármálaráðherra vakti máls á því að mögulega er jöfnuðurinn kominn út í öfgar. Vinnandi fólk fær minna í laun en bótaþegar.

Einn angi öfgajafnaðar er kynjamisrétti. Í nafni jafnaðar er háskólamenntun gjaldfelld með því að laun menntaðs vinnuafls eru litlu hærri en ómenntaðs. Konur eru æ stærri hluti menntaða vinnuaflsins og verða því fyrir barðinu á þessari þróun á meðan ómenntaðir karlar hagnast.

 

Dagur: stærstu mistök Samfylkingar

Án þess að ætla sér það bendir Dagur B. Eggertsson á stærstu mistök Samfylkingar þegar hann segir

Að mínu mati er lyk­ill­inn að því að ná góðum ár­angri í næstu kosn­ing­um að sækja í þenn­an gamla grunn sem Sam­fylk­ing­in var stofnuð á; að vera breyt­inga­afl, já­kvæður og upp­byggi­leg­ur far­veg­ur fyr­ir brýn­ustu breyt­ing­arn­ar sem þarf að gera í sam­fé­lag­inu á grund­velli jafnaðar­stefn­unn­ar.

Almenningur hafnaði Samfylkingunni við síðustu þingkosningar vegna þess að flokkurinn ætlaði að farga stjórnarskránni og flytja fullveldið til Brussel.

Samfylkingin sem ,,breytingarafl" er annað orð yfir stjórnskipunarbyltingu. Það er einfaldlega engin eftirspurn er slíkri byltingu, nema hjá jaðarhópum samfélagins.

Samfylkingu sem ,,breytingarafli" fylgir orðræðan um ónýta Ísland. Réttlætingin fyrir að bylta og breyta er sótt í fordæmingu á því sem fyrir er.

Það segir heilmikla sögu um Dag B. sem stjórnmálamann að hann vill endurtaka stærstu mistök Samfylkingar og býst við allt annarri útkomu en síðast.

Dagur B. stefnir ekki á formannsframboð

Lygi, fullvissa og lífshætta

Enginn veit neitt með vissu um framtíðina, hvorki stjórnmálamenn, vísindamenn eða hversdagsfólk. Samt sem áður verjum við tíma okkar og fjármunum í ráðstafanir vegna framtíðarinnar.

Loftslagsráðstefnan í París, sem þykir marka tímamót, kveður á um tiltekin markmið í loftslagsmálum til næstu tíu til 15 ára. Forsendur ráðstefnunnar eru að maðurinn ráði miklu um loftslag jarðarinnar. Engu að síður er vitað að náttúrulegar sveiflur á loftslagi gerast án aðkomu mannsins og eru m.a. raktar til sveiflna í styrk sólarinnar. Engin vissa er fyrir því að stór og göfug markmið, gangi þau fram, muni breyta loftslagi á jörðinni til hins betra.

Ofmælt væri að segja að lygin ríkti ein í öllu sínu veldi þar sem ekki væri fullvissa. Það eru líkur, meiri eða minni, á tilteknar staðhæfingar séu sannar en aðrar ósannar.

Viðtekin sannindi eru oft aðeins þau sem breið samstaða er um að hafa fyrir satt. Til skamms tíma var það haft fyrir satt að múslímatrú og hryðjuverk væru tveir aðskildir hlutir. Ekki lengur. Æ fleiri hallast að þeirri skoðun að múslímsk trúarmenning veiti bæði réttlætingu og hvatningu til hryðjuverka. Voru fyrri sannindin þá lygi?

Oft er ekki langt á milli lygi og fullvissu. Hvort sem bilið er breitt eða mjótt vitum við að lífshættan liggur þar á milli.

„Allir stjórnmálamenn ljúga“

Vandræðalega gott ástand á Íslandi

Hagvöxtur, kaupmáttaraukning, nær ekkert atvinnuleysi, innanlandsófriður takmarkast við eirðarleysi góða fólksins; Ísland er í vandræðalega góðu standi.

Vandræðaleysið gerir toppurunum erfitt fyrir - þeir seilast sífellt lengra í himinblámann í leit að samjöfnuði þar sem hallar á Ísland.

 

Hæstu launin á Íslandi

Fundir sem trúarbrögð

Á fundi í París er eftirfarandi í húfi, samkvæmt viðtengdri frétt

Þar stend­ur yfir ein mik­il­væg­asta lofts­lags­ráðstefna SÞ til þessa, þar sem samn­inga­menn munu freista þess að smíða sam­komu­lag sem miðar að því að halda hlýn­un und­ir 2 gráðum.

Fundurinn í París er eflaust haldinn í góðri trú. Vegurinn til vítis er líka varðaður góðum áformum.

Blóð, sviti og tár

Skrílræði góða fólksins

Skrílræði nútímans gengur út á að virkja frumstæðar kenndir fólks til að kýla á ákvörðun sem ekki væri tekin af yfirlögðu ráði. Kenndirnar eru virkjaðar í samfélagsmiðlum og fá þar útrás.

Hvatirnar sem gera fólk að skríl eru í grunninn sjálfselskar. Fólk leitar að sjálfsupphafningu á kostnað útvalins skotmarks. Í umræðunni um albönsku flóttamennina kemur þetta eigingjarna eðli skrílsins skýrt fram.

Eggert Skúlason skrifar leiðara sem byrjar á fyrstu persónu eintölu: ,,Flesta daga er ég sáttur við að vera Íslendingur. Svo koma dagar þar sem ég er stoltur af því. En í gær, 10. desember, skammaðist ég mín..." Frey Bjarnason byrjar líka á sjálfum sér: ,,Ég þykist oft vera grjótharður..."

Eggert og Freyr krefjast þess að samfélagið taki breytingum út frá persónulegum hvötum þeirra sjálfra. Þeirra vanlíðan skal vera mælikvarði á opinbera stefnu. Eggert og Freyr leysa úr læðingi eigingjarnar frumhvatir til að vera með í bylgju á fjölmiðlum og samfélagsmiðlum sem á að breyta opinberri stefnu í málefnum flóttamanna.

Skrílræði er andstæða ígrundunar og yfirvegunar. Samfélag skrílræðis er uppskrift að óeiningu og sundurlyndi.

 

Um 5.500 krefjast afsagnar

Góða fólkið tekur móðursýkiskast

Albanía er ekki stríðshrjáð land og svokallaðir flóttamenn þaðan eru í leit að betri lífskjörum en ekki á flótta undan ofsóknum eða öðrum hörmungum.

Móðursýkiskast góða fólksins á samfélagsmiðlum vegna albönsku ,,flóttamannanna" er í besta falli grábroslegt - í ljósi þess að sama góða fólkið segir heilbrigðiskerfið á Íslandi ónýtt. Meginrök góða fólksins eru að albanirnir þurfi á heilbrigðisþjónustu að halda.

Góða fólkið heldur ekki lágmarkssamkvæmni í málflutningi sínum - enda móðursýkiskast sjaldnast sneisafullt af dómgreind.

„Óvægin“ og „röng“ umfjöllun

Rússar bjarga Evrópu

Rússar eru komnir í áhrifastöðu í mið-austurlöndum. Bandalag Rússa og Assad Sýrlandsforseta er sterkasti andstæðingur Ríkis íslam í Sýrlandi og Írak. Bandaríkjamenn og Nató styðja veika og sundraða uppreisnarhópa sem ekki eru í neinum færum að skapa þá festu sem er forsenda stöðugleika.

Evrópusambandið býr ekki að hernaðararmi sem orð á gerandi, þótt til séu viðbragðssveitir og vilji til að byggja ofan á þær. Á meðan Evrópuherinn er fjarlæg framtíð er rússneski herinn alvöru.

Evrópa getur illa staðið í deilum við Rússa um Úkraínu samtímis sem ESB biður um hernaðaraðstoð Rússa við að stemma stigu við upplausn í brotum ríkjum í Afríku og mið-austurlöndum. Flóttamannavandi Evrópu stafar einmitt af brotnum ríkjum við sunnanvert Miðjaðarhaf.

Fresta umræðu um refsiaðgerðir