Samfylkingin er sundrungarafl

Samfylkingin er flokkur ófriðar og sundurþykkju. Flokkurinn elur á andúð milli landsbyggðar og þéttbýlis; þjóðkirkju og almennings; skuldara og lánveitenda; kjósenda og stjórnmála. Samfylkingin er stofnuð sem hugsjónalaus valdatökuflokkur. Hertækni flokksins er að sá fræjum óánægju og upplausnar. Með þeim hætti er grafið undan tiltrú og trausti í samfélaginu. Samfylkingin þrífst í þessu umhverfi enda prisipplaus flokkur sem tekur sér sérhverja þá stefnu sem hentar til valda hverju sinni.  

Meirihluti fyrir aðskilnaði ríkis og kirkju?

Blaðamaður Baugs

Stjórnlagaþing Samfylkingarinnar er með blaðamann Baugs í oddvitastöðu. Þorvaldur Gylfason skrifaði og skrifar enn lygadálka í Baugstíðindi þar sem hann mærir útrásina og hellir skolpi yfir þá sem reyndu að koma böndum á viðrinin. Í frægum dálki skáldaði Þorvaldur sögu um sjálfan sig og ónefndan heimildarmann sem sagði honum þá sögu að aðförin að Jóni Ásgeiri Baugsstjóra hafi verið skipulögð af Davíð Oddssyni.

Lögreglan kallaði Þorvald til sín í skýrslutöku og þá bar hann við heimildavörn blaðamanna.

Þorvaldur sómir sér vel sem Baugsfylkingarmaður á stjórnlagaþinginu.

Þing allrar þjóðarinnar

Þjóðin í hlutfallinu 30/70

Þrjátíuprósent þjóðarinnar vilja fá almenna niðurfærslu skulda og láta lífeyrisþega spýta i púkkið. Sama hlutfall vill Ísland i Evrópusambandið. Litlu fleiri greiddu atkvæði í stjórnlagaþingskosningunum en það var álíka stór hópurinn og greiddi ekki atkvæði í Icesave-þjóðaratkvæðinu og sat heima ásamt Jóhönnu og Steingrími.

Og, vel á minnst, Samfylkingin fékk tæp 30 prósent atkvæða í síðustu þingkosningum.

Almenn skuldaniðurfelling dautt mál

Krafan um almenna niðurfellingu skulda er merkileg fyrir það eitt hve lengi hefur tekist að halda lífi í henni. Krafan er útrásarbólgin frekja fólks sem fór offari í fjármálasukki og vill að aðrir borgi. Krafan er jafnframt beint tilræði við samningsfrelsið í landinu því hún gerir ráð fyrir að suma samninga þurfi ekki að virða.

Þriðjungur þjóðarinnar vill almenna niðurfærslu skulda og láta lífeyrisþega borga.

Ánægjulegt er að 70 prósent þjóðarinnar virðist búa við þokkalega sterka siðferðiskennd.

43% á móti almennri skuldaniðurfellingu

Huglausa stjórnin leitar skjóls

Fylgislaus og rúin trausti leitar ríkisstjórnin skjóls hjá stjórnarandstöðunni með því að kynna henni þykjustuúrræði á skuldavanda heimila. Ríkisstjórnin var búin að lofa upp í ermina á sér.  Skötuhjúin Jóhanna Sig. og Steingrímur J. geta ekki komið hreint fram og sagt því miður er hvorki peningar né vilji til að lækka skuldir með allsherjarafskriftum.

Ríkisstjórnin býr til fund með stjórnarandstöðunni í því skyni að dreifa ábyrgðinni á eigin úrræðaleysi. Ríkisstjórn sem starfar í skjóli stjórnarandstöðu er ekki upp á marga fiska.

Pólitísk staða ríkisstjórnar Jóhönnu Sig. veikist dag frá degi. Forsætisráðherra einangrast, hefur t.d. ekki sagt múkk um stjórnlagþingsfloppið. Ekkert er í sjónmáli sem bjargað getur ríkisstjórninni frá gröfinni sem hún sjálf gróf sér. Spurningin er hver kastar rekunum á líkið.

 

Trúnaður um það sem ekkert er?

Jóhanna Sig. þegir stíft

Jóhanna Sigurðardóttir forsætisráðherra hvatti almenning til þátttöku í kosningum til stjórnlagaþings með greinaskrifum í dagblöð og fjölmiðlayfirlýsingum. Rétt rúmur þriðjungur kosningabærra manna hlýddi kalli forsætisráðherra. Jóhanna hefur ekki látið svo lítið að gefa álit sitt á kosningunum.

Stjórnlagaþingið átti að vera áfangi í vegferð ríkisstjórnarinnar til Brussel og kjaftshöggið sem þau Jóhanna og Össur fá með stjórnlagaþingsfloppinu staðfestir einangrun Samfylkingarinnar í íslenskum stjórnmálum.

Þögn Jóhönnu gefur kannski til kynna að forsætisráðherra játar ósigur sinn?

Talningu lýkur ekki í dag

Stjórnlagaþing drepur persónukjör

Kosningar til stjórnlagaþings voru persónukjör. Stjórnmálaflokkar og samtök voru víðs fjarri og þeir einstaklingar sem voru í framboði meira og minna áttu sviðið. Eftir hrun töldu margir að persónukjör ætti að koma í stað listakosninga í þingkosningum. Reynslan af kosningum til stjórnlagaþings sýnir að persónukjör er með verulegum annmörkum og ekki til þess fallið að glæða áhuga almennings.

Misheppnað stjórnlagaþing verður líklega upphafið að endurreisn stjórnmálaflokkanna, sem er svolítið fyndið í ljósi þess að hugmyndin með stjórnlagaþingi var að fara framhjá skipulögðu stjórnmálastarfi.

Mest og best er þó vitanlega að fikt við stjórnarskránna er slegið út af borðinu.

 

Írum lánað til að bjarga evru og ESB

Evrópusambandið lánar Írum til að forða eyjunni grænu frá gjaldþroti. Í umfjöllun Telegraph um ástæður lánsins er að finna þessa setningu úr yfirlýsingu fjármálaráðherra Evrópusambandsríkja

"Providing a loan to Ireland is warranted to safeguard financial stability in the euro area and the EU as a whole," a statement from EU finance ministers said.

Lán til Írlands er veitt með þeim rökum að tryggja fjármálastöðugleika á evrusvæðinu og Evrópusambandinu í heild.

Evran lækkar gengi þjóðríkja

Þýskaland ákveður framtíð Írlands. Um áramótin verða Portúgal og Spánn i sömu stöðu. Meðal evru-þjóðanna sextán er aðeins Þýskaland sem peninga til að bjarga ónýtum efnahag ríkja sem létu blekkjast til að halda að þýsk peningastefna hentaði öðrum en Þjóðverjum.

Lágir þýskir vextir á evrusvæðinu höfðu tvennt í för með sér. Í fyrsta lagi eignabólur og í öðru lagi almennar launahækkanir. Hvorttveggja var fjármagnað með lágum vöxtum. Nú er komið að skuldadögum. 

Þjóðverjar krefjast þess að lánadrottnar, bankar og fjármálastofnanir, taki á sig útlánatap í samræmi við óábyrga lánastefnu til Suður-Evrópuríkja og Írlands. Yfirvofandi krafa um afskriftir lána snarhækkar lánakostnað viðkomandi ríkja.

Tveir kostir eru í boði. Annars vegar að Þýskaland í gegnum Evrópusambandið taki varanlega undir sinn verndarvæng evru-ríkin sextán og þau verða í reynd þýskar hjálendur. Hins vegar að myntsvæði evrunnar liðist í sundur. Fyrri kosturinn er ekki pólitískt mögulegur.

Evrusvæðið er feigðinni merkt. Spurningin er aðeins hversu sóðalegur dauðdaginn verður.

 

Jóhanna biðji þjóðina afsökunar

Jóhanna Sig. forsætisráðherra ber höfuðábyrgð á stjórnlagaþingsfloppinu. Þjóðin kenndi maðk í mysunni og vildi ekkert hafa með stjórnlagaþingið að gera. Í skýrslu Evrópusambandsins um Ísland frá í haust segir þetta um stjórnlagaþingið

Legislation to elect an advisory constitutional assembly was adopted in June. The task of the assembly is to prepare a proposal to parliament for a new constitution. Among the issues to be addressed is delegation of powers by the State to international organisations.

Líklega hefur Össur utanríkisráðherra lofað framkvæmdastjórninni að liðka fyrir framsali fullveldis til Brussel með því að stjórnlagaþing afgreiddi dagskrá ríkisstjórnarinnar. 

Jóhanna á að biðja þjóðina afsökunar á þessu dæmalausa stjórnlagaþingsrugli og þar á eftir á hún að senda þau skilaboð til Brussel, að sorrí það verður ekkert úr því að Íslendingar samþykki innlimun i Evrópusambandið.

 

 

Úrslit kynnt annað kvöld