Elli og atvinnuleysi í boði ESB

Evrópa eldist hratt og álfan býr við langvarandi atvinnuleysi, meðaltal 9,5 prósent sem er tveim prósentustigum hærra en á Íslandi. Fæðingartíðni á Íslandi er nærri tvö börn á konu á meðan kynsystur þeirra á meginlandinu rétt merja að fæða eitt barn að meðaltali.

Atvinnulaust og náttúrulaust gamlingjasamfélag Evrópu sendi hingað fulltrúa til að gylla kosti þess að sækja um inngöngu. Vladimír Špidla, atvinnumálastjóri Evrópusambandsins, segir í fréttum RÚV að í Evrópu séu til áætlanir um að bregðast við atvinnuleysi, öldrun og náttúruleysi.

Gangi þessar áætlanir fram verður mannlíf í Evrópu sama marki brennt og fiskimið álfunnar, sem hafa í áratugi fengið að kenna á áætlanagerð Brussel.

Við bíðum eftir spuna frá Samfylkingunni um framhaldið.

Úrvinnslan eftir hrunið

Þjóðfundurinn er virðingarvert framtak til að búa vettvang fyrir fólk sem vill eiga samtal um hrunið og næstu skref samfélagsins. Fundurinn sýnir að það er ekki doði yfir fólki heldur er það tilbúið að horfa fram á veg, freista þess að ná samstöðu um hvað fór úrskeiðis og hvernig við ræktum garð okkar í framtíðinni.

Þjóðfundurinn er einn vettvangur af mörgum sem tekur hrunið til umfjöllunar. Sameiginlegt sjálfsprottnum vettvangi eins og þjóðfundinum og miðlum eins og blogginu er að þátttakan er ekki skipulögð ofanfrá, af stjórnvaldi eða pólitískum flokkum. Nauðsynlegt er fyrir samfélagið að eiga kost á margþátta samtali og uppgjöri við áratuginn sem kenndur er við útrásina.

Við erum ekki komin á leiðarenda í uppgjörinu en komin vel af stað.

 

Fólk logandi af áhuga

Útrásin úthýsti heiðarleika

Á tímum útrásar var heiðarleiki löstur sem tafði gróðabrallið. Rökrétt er að þjóðfundurinn vilji vinna heiðarleika sess í samfélaginu. Taumleysi útrásarinnar og óráðssía vekur til lífs dyggðir sem eru undirstaða siðaðs þjóðfélags.

Afleidd skilaboð þjóðfundarins er að ríkisbankarnir og lífeyrissjóðir eigi ekki að gefa útrásarauðmönnum annað tækifæri til að vega að undirstöðum samfélagsins. Þegar afskriftir eru ákvarðaðar og endurfjármögnun ráðgerð á að spyrja um siðferðilegt sakavottorð.

Þjóðin leggur áherslu á heiðarleika

Ólafur Ragnar hefði ekki orðið forseti 1992

Vigdís Finnbogadóttir ætlaði að hætta sem forseti 1992, samkvæmt nýrri bók Páls Valsonar. Ólafur Ragnar Grímsson hefði ekki orðið forseti ef Vigdís hefði ekki látið undan og setið fjögur á til viðbótar. Tækifæri fyrir Ólaf Ragnar kom 1996 og það var einstakt.

Árið 1992 var Ólafur Ragnar formaður Alþýðubandalagsins, í reglulegum erjum við forvera sinn Svavar Gestsson. Um þetta leyti var Ólafur Ragnar að leggja drög að útflutningsleiðinni sem hugmyndafræðilegur langafi útrásarinnar. 

Eflaust hefði útrásin orðið þrátt fyrir Ólaf Rangar. Skömm Íslendinga hefði á hinn bóginn orðið minni vegna þess að enginn myndi ganga jafn langt í þjónkun við auðmenn og Ólafur Ragnar.  

Risarækjueldi og REI

Pólitískir vafagemsar og spilltir embættismenn hafa gert að Orkuveitu Reykjavíkur að eymdarbúllu með því að veita milljörðum króna í ruglrekstur. Í leiðinni átti að veita milljónum til vafagemsana, útrásarvini þeirra og efri lög stjórnenda OR.

Spillingarsaga OR er í flestu ósögð. Táknmynd sögunnar er sjálft monthúsið, höfuðstöðvarnar.

Hætta á greiðslufalli OR

Morðgáta Steingríms J., Jóku og Domma

Annað hvort eru fjármálaráðherra og forsætisráðherra Íslands að segja ósatt eða framkvæmdastjóri Alþjóðgjaldeyrissjóðsins.

Steingrímur J. og Jóhanna Sig. hafa sagt okkur að lán frá Alþjóðagjaldeyrissjóðnum fáist ekki nema við fáum niðurstöðu í Icesave-deiluna við Breta og Hollendinga. Dominique Strauss-Kahn framkvæmdastjóri sjóðins segir engin Icesave-skilyrði af hálfu sjóðsins.

Lygin um Icesave er eins og morgáta. Fyrsta spurningin er hver græðir á lyginni. Fjármálaráðherra Íslands og forsætisráðherra sama lands hagnast margfalt á við þann hag sem framkvæmdastjórinn gæti hugsanlega, mögulega, kannski haft af því að ljúga til um skilyrði.

Lausn Icesave-deilunnar ekki skilyrði AGS

Klíkurökin; ESB, Afríka og Ísland

Klíkurökin fyrir aðild Íslands að Evrópusambandsins eru þau að klíkur ráðandi afla komi í veg fyrir skynsamlega stjórnarhætti. Af því leiðir að fullveldi Íslands sé betur borgið í Brussel en Reykjavík.

Rökin gefa sér tvennt. Í fyrsta lagi að engin klíkumyndun sé í Evrópu, hvorki þjóðríkjum álfunnar né í Evrópusambandinu. Í öðru lagi að þjóðríki sem verða fyrir manngerðum stóráföllum hljóti að leita ásjár hjá öðrum ríkjum eða ríkjasamböndum og flytja þangað forræði sinna mála.

Hvorttveggja er rangt. Klíkumyndun er í evrópskum ríkjum og í Brussel; heil framkvæmdastjórn ESB varð að segja af sér vegna spillingar sem mátti rekja til klíku.

Í Afríku slíta margar þjóðir með manngerðar hamfarir, svo sem víðtæka spillingu og ógegnsæi í stjórnarháttum. Andófshópar í þessum ríkjum kalla ekki eftir því að völd og forræði séu flutt til gömlu nýlenduríkjanna.

Ólíkt íslenskum aðildarsinnum eru afrískir með á hreinu að endurreisn þjóðar verður ekki gerð án fullveldis. 

Kjörþyngd Gróttumanna

Okkur Seltirningum sárnaði þegar íþróttafréttamaður gerði hróp að leikmönnum karlaliðs Gróttu og sagði þá yfir kjörþyngd. Allir vita að smávegis hold yfir beinin er nauðsynleg vörn gegn kulda, sérstaklega þegar búið er á næðissömu nesi.

Gróttumenn sýndu í kvöld að skriðþungi íþróttamanna er ekki háður holdafari heldur þreki og keppnisskapi og þeir rúlluðu yfir Fimleikafélag Hafnarfjarðar.

Áfram Grótta.

 

Grótta skellti FH í Kaplakrika

Ísland í flokki með Búlgaríu og Rúmeníu

Ísland er ekki og getur ekki verið ytri landamæri Evrópu nema fyrir undarlegasta milliríkjasamning sem við höfum gert og er kenndur við Schengen. Eyríki Bretland og Írland eru ekki aðilar að Schengen, þótt bæði séu í Evrópusambandinu, og við eigum sannarlega ekki að vera aðilar.

Þegar Búlgarar og Rúmenar ganga inn í Schengen eru þeir að auðvelda samskipti sín vestur á bóginn. Við gerum okkur lífið flóknara, erfiðara og dýrara með Schengen-samstarfinu. Hættum því.

Styttist í inngöngu Búlgaríu og Rúmeníu í Schengen

30 prósent kúga 70 prósent þjóðarinnar

Umsókn Samfylkingarinnar um aðild Íslands að Evrópusambandinu eitrar pólitíska umræðu. Samfylkingin hafði einn flokka í kosningunum í vor það á stefnuskrá sinni að sækja um aðild.  Samfylkingin fékk 29 prósent atkvæðanna.

Vinstri grænir létu Samfylkinguna kúga sig. Vg hafði lofað kjósendum andstöðu við inngöngu Íslands í Evrópusambandið. Í atkvæðagreiðslu 16. júlí kom fram að þingmenn Vg greiddu atkvæði þvert gegn samvisku sinni þegar þeir féllust á að senda umsóknina.

Umsóknin gerir vinnu við endurreisnina erfiðari vegna þess að ríkisstjórnin er reist á svikum. Þjóðin lætur ekki bjóða sér þessi vinnubrögð.