Jóhanna kaus, þjóðin sat heima

Meirihluti Íslendinga með kosningarétt greiddi atkvæði um Icesave-lögin. Jóhanna Sigurðardóttir og Steingrímur J. afþökkuðu að greiða atkvæði og sátu fýld heima. Jóhanna Sig. hafði aftur mætur á stjórnlagaþingi og gerði sér far um að auglýsa kosningarnar með greinaskrifum í dagblöð og yfirlýsingum í fjölmiðlum. Nær tveir af hverjum þrem kosningabærum ákvað engu að síður að mæta ekki á kjörstað.

Þjóðin er óðum að átta sig á því að ríkisstjórnin velur nær alltaf rangan málstað, s.s. í ESB-málum og Icesave-samningum og tekur sér öndverða stöðu.

Engin ríkisstjórn lýðveldisins hefur verið jafn oft löðrunguð af þjóðinni og ríkisstjórn Jóhönnu Sigurðardóttur.

36,77% kosningaþátttaka

Samfylkingarspuni um stjórnlagaþing

Í dag kennir Samfylkingin Davíð Oddssyni og Sjálfstæðisflokknum um lélega kosningaþátttöku til stjórnlagaþings. Í gær starfaði spunalið Samfylkingar á yfirtíð við að koma þeirra kenningu á framfæri að Sjálfstæðisflokkurinn sendi út tölvupóst til flokksmanna að kjósa tiltekna framboðjóðendur.

Mótsögnin sem allir sjá nema spunaliðar er að sama apparatið getur ekki í senn smalað fólki á kjörstað og haldið kjörsókn í lágmarki.

Vandræðalegur hjárænuháttur samfylkingarfólks breiðir ekki yfir þá staðreynd að fólk flest vill ekkert fikt við stjórnarskrá lýðveldisins. 

Skilaboð kosninganna eru þessi: Ekki breyta stjórnarskránni.

Evrópsk kosningaþátttaka í stjórnlagaþingsstórslysi

Tilraun ríkisstjórnar Jóhönnu Sig. til að auðvelda sér breytingar á stjórnarskrá lýðveldisins beið skipbrot. Um 40 prósent kosningaþátttaka er áþekkur áhuginn sem almenningur í Evrópu sýnir kosningum til Evrópuþingsins. Kosningar til Evrópuþingsins eru dæmi um mislukkaða lýðræðisvæðingu og stjórnlagaþing Jóhönnu og Samfylkingar fellur í sama flokk.

Nær allt sem ríkisstjórn Jóhnnu Sig. kemur nálægt floppar. ESB-umsóknin, Icesave-samkomulagið, kvótakerfisbreytingar, skjaldborg heimilanna og núna stjórnlagaþingið.

Ríkisstjórn Jóhönnu Sig. er gangandi stórslys.

 

Kosningaþátttaka líklega um 40%

500-framboða kjörsókn

Kjörsókn verður lítil vegna þess að framboðin eru jafn mörg og raun ber vitni í fyrsta lagi. Í öðru lagi er ekki tekist á um nein meginmál. 

Blæbrigði lýðræðis eru mörg. Eitt blæbrigðanna segir að offramboð af skoðunum dragi úr almennum áhuga.

21% höfðu kosið kl. 17

Fullveldið og stjórnlagaþingið

Álitamál sem stjórnlagaþing þarf að taka afstöðu til er fullveldið og hvort setja eigi skorður við framsali mála sem eru á íslensku forræði. Góðu heilli eru margir frambjóðendur til stjórnlagaþings sem lýsa stuðningi við fullveldið. Sumir þeirra, en ekki nærri allir, svöruðu opnum spurningum Heimssýnar um afstöðuna til fullveldisins.

Sjá hér.

Samningar og siðað samfélag

Án samninga er samfélagið ekki starfhæft. Foreldrar senda börn sín í skóla á morgnana í trausti þess að kennarar virði samninga og mæti í vinnuna. Fólk gerir ráð fyrir fá launin sín um hver mánaðarmót en þau eru greidd samkvæmt samningum.

Eftir hrun virðist sem það viðhorf hafi orðið ríkjandi um hríð að suma samninga þyrfti ekki að virða. Hugsunarhátturinn var ríkjandi meðal auðmanna á útrásartímum, sem gerðu samninga sem ekki stóð til að efna. Siðveilan smitaðist til annarra þjóðfélagshópa og eftir hrun komu viðbótarrökin um ,,forsendubrest". Annað eftirhrunshugtak, ,,greiðsluvilji," átti að réttlæta vanefndir samninga, einkum lánasamninga. Alþingi útbjó lög sem buðu upp á að fólk kæmist hjá samningsefndum og fórnaði í leiðinni eignarréttindum því að það gleymdist að eins manns skuld er annars eign.

Ef við ætlum að búa í siðuðu samfélagi þarf að virða samninga.

Bentu þingmönnum á veiluna í lögunum

Veik ríkisstjórn, sterkur forseti

Völd í stjórnmálum fara aðeins að hluta eftir embættum, lög og reglum. Stærsti hluti stjórnmálavalds er hvergi skráður. Snjallir stjórnmálamenn vita þetta og nýta sér til framdráttar. Á Íslandi ber Ólafur Ragnar Grímsson höfuð og herðar yfir alla aðra stjórnmálamenn.

Forsetinn kann að nýta sér stöðu sína og hefur umbreyst á undraskömmum tíma úr veislustjóra útrásarauðmanna í alþýðuhöfðingja sem veit og skilur hvað þjóðin hugsar.

Ólafur Ragnar sigraði íslensk stjórnmál og hug og hjörtu þjóðarinnar þegar hann gekk fram fyrir skjöldu og setti Icesave-lög ríkisstjórnarinnar í þjóðaratkvæði.

Ríkisstjórn Jóhönnu Sig. starfar í skjóli forseta Íslands. 

Guðni: Ólafur Ragnar gæti haldið áfram

Steingrímur J. og þingræðið; forsetinn og þjóðin

Forseti Íslands stígur fram á sjónarsviðið sem talsmaður lýðræðis gegn markaðsöflunum. Ítarleg viðtöl alþjóðlegra fjölmiðla sýna eftirspurn eftir lýðræðisumræðu Ólafs Ragnars Grímssonar. Steingrímur J. bregst fár við yfirlýsingu forseta að nýtt Icesave-samkomulag verði að fara í þjóðaratkvæðagreiðslu.

Samkvæmt Smugunni segir fjármálaráðherra

Síðast þegar ég vissi var þingræði á Íslandi, miðað við stjórnskipan Íslands getur hann ekki hafa sagt þetta.

Þingræðið hans Steingríms J. felur í sér að þjóðin veiti umboð í kosningum til fulltrúa sem kjörnir eru á grundvelli stefnumála. Þúsundir íslenskra kjósenda greiddu Steingrími J. og Vinstri grænum atkvæði sitt í því trausti að þingmenn Vg stæðu við kosningastefnuskrá flokksins um að Íslandi væri betur borgið utan Evrópusambandsins.

Steingrímur J. og nokkrir félagar hans í Vg fótum tróðu undirstöðunni undir þingræðinu þegar þeir sviku loforð gefin kjósendum. Stjórnskipan Íslands styðst annars vegar við skráðar reglur og hins vegar við hefð. Við pólitísk eldsumbrot breytast hefðir. Þingræðishefðin sem Steingrímur J. talar fyrir er sokkin ofan í djúpan pytt klækjastjórnmála þar sem hann sjálfur hefur lagt drjúgt til

Forseti Íslands er með athöfnum sínum og yfirlýsingum að skapa nýja hefð þar sem ríkisstjórnin, umboðslaus og rúin fylgi, er sett skör lægra en áður. Forsetinn talar í nafni þjóðarinnar en ríkisstjórnin aðeins fyrir sjálfa sig og svikula þingmenn.

Forsetinn snýst gegn bönkunum

Ólafur Ragnar ræður dagskrá stjórnmálanna

Umboðsleysi og eymdarstaða ríkisstjórnar Jóhönnu Sig. er undirstrikuð af forseta lýðveldisins. Ólafur Ragnar hafnar ESB-umsókn Samfylkingarinnar og hann stendur einnig með þjóðarhagsmunum í Icesave-deilunni. Ríkisstjórnin ræður ekki við stærri verkefnin og hefur enga stefnu til að berjast fyrir.

Ólafur Ragnar setur dagskrá íslenskra stjórnmála. Þjóðaratkvæðagreiðslan um Icesave var stórsigur fyrir forsetann og að sama skapi ósigur vinstristjórnarinnar. Ólafur Ragnar þarf ekki að bera mál undir ríkisstjórnin og þau Jóhanna og Steingrímur J. starfa í skugga Bessastaðabóndans.

Ríkisstjórn og alþingi eru án umboðs en þora ekki í kosningar. Á meðan það fjarar undan þingi og ríkisstjórn vex forsetaembættið að völdum og virðingu.

Lokaorðið hjá kjósendum segir forseti Íslands

Atvinnusköpun að ofan dauðanum merkt

Samtök atvinnulífsins keyptu heilsíðuauglýsingu í dag í Morgunblaðinu og báðu um samstarf við ábyrga aðila til að skapa 14 þúsund störf. Samtök atvinnulífsins eru í reynd að biðja um að atvinnustefna Árna Sigfússonar í Reykjanesbæ verði yfirfærð á allt landið.

Reykjanesbær er gjaldþrota vegna þess að Árni bæjarstjóri stundaði jöfnum höndum útrásarfjárglæfra og ríkissósíalisma. 

Atvinnusköpun á ekki að koma að ofan heldur þarf hún að spretta úr grasrótinni. 

Undirbúa þarf atvinnuuppbyggingu