Sjálfhætt er stuðningi við dauða stjórn

Formaður Vinstri grænna tók áhættu með myndun ríkisstjórnar sem eyddi öllu sína pólitíska kapítali á eitt mál; umsókn um aðild Íslands að Evrópusambandinu. Herfilegur mislestur Steingrímur J. á þjóðfélagsstraumana leiddu hann út í ófæruna. Vinnubrögðin við myndun ríkisstjórnarinnar voru notuð á ný í Icesave-málinu.

Samherjar Steingríms J. lærðu inn á hann og þjóðin sá í gegnum ESB-glýjuna og kunni formanni Vg litlar þakkir fyrir að svíkja stefnumál flokksins. Þegar kom að Icesave-málinu naut Steingrímur J. hvorki meðbyrs innan flokksins né í þjóðfélaginu.

Ríkisstjórn Jóhönnu Sigurðardóttur er strand. Sigmundur Davíð Gunnlaugsson sýndi í umræðum kvöldsins fram á mótsagnir stjórnarinnar sem í einn stað viðurkennir að skuldastaðan sé alltof slæm en krefst í hinu orðinu að við borgum Icesave-reikningana umyrðalaust til að fá ný lán frá Alþjóða gjaldeyrissjóðnum.

Ríkisstjórnin hefur engin skilaboð til þjóðarinnar. Stjórn sem ekkert hefur að segja við þær kringumstæður sem nú ríkja er sjálfdauð.

Hétu öll stuðningi

Hvað er líkt með Sollu og Jóhönnu?

Forsætisráðherra vísaði til Davíðs Oddssonar í þrígang beint og nokkrum sinnum óbeint til að leggja áherslu á hve vandamál eins og Icesave væru lítil í samanburði við fyrrverandi forsætisráðherra og Seðlabankastjóra.

Jóhanna Sigurðardóttir á það sameiginlegt með forvera sínum í formannsstól Samfylkingarinnar að stríða við Davíðsheilkennið.

Vill óráðsíu og græðgi burt

Útrásarsamtök biðjist afsökunar

Samtök atvinnulífsins og Viðskiptaráð herjuðu á ríkisvaldið með kröfum um aukið svigrúm og minna eftirlit. Einkavæðingarsöngurinn ómaði án ábyrgðar eða fyrirvara um að kannski væri fullgeyst farið. Þegar veislan endaði í hruni er eðlilegt að spyrja um ábyrgð félaga eins og Samtaka atvinnulífsins og Viðskiptaráðs. Hvers vegna heyrist hvorki hósti né stuna frá þessum klúbbum? Er ekki lágmark að beðist sé afsökunar á græðisvæddri heimsku undanfarinna ára?

Hættir sem formaður Viðskiptaráðs

Ögmundur vex, stjórnin minnkar

Afsögn Ögmundar afhjúpar stjórnmálalegt gjaldþrot ríkisstjórnarinnar. Stjórnin var reist á mótsögn sem aldrei var hægt að brúa. Í einn stað evrópskur undirlægjuháttur Samfylkingar og í annan stað þjóðleg staðfesta Vinstri grænna. Formaður Vg reyndi að beygja flokkinn niður í lágkúru Samfylkingarinnar og tókst það - en aðeins í skamma stund.

Undirlægjuhátturinn birtist í aðildarumsókninni annars vegar og hins vegar í Icesave-samingunum.

Viðbrögðin við afsögn Ögmundar sýna svo ekki verður um villst að frekjukennd undirlægjupólitík Samfylkingarinnar er komin á endastöð.

Ögmundur: Var stillt upp við vegg

Kurteist breskt nei

Fjármálaráðherra Bretlands er ekki tilbúinn að gefa ríkisstjórn Jóhönnu Sigurðardóttur afslátt af samningnum um uppgjör á Icesave-reikningum. Málið er dautt fyrir Steingrím J. og Jóhönnu. Eina leiðin fyrir Íslendinga að fá Breta og Hollendinga aftur að samningaborðinu er að ríkisstjórnin segi af sér.

Mistökin sem ríkisstjórnin gerði upphaflega þegar samið var um Icesave voru stórkostleg. Eðlilegt er að mistökin kosti eins og eina ríkisstjórn lífið.

„Mikilvægt að þetta sé í höfn“

Minnihlutastjórn um lágmarksverkefni

Ef Bretar og Hollendingar bjarga ekki ríkisstjórn Jóhönnu Sigurðardóttur með því að sjá sig um hönd og fallast á fyrirvara Alþingis við Icesave-samningana verður stjórnin að segja af sér. Icesave-samningurinn er milli ríkisstjórnar Jóhönnu við bresk og hollensk stjórnvöld með fyrirvara um samþykki Alþingis. Íslenski löggjafinn breytt veigamiklum atriðum í samningnum og ef viðsemjendur okkar fallast ekki á þær breytingar er samningurinn fallinn.

Núverandi ríkisstjórn getur ekki beðið um nýjar viðræður við stjórnvöld í London og Haag. Það verður að vera ný ríkisstjórn sem gerir það.

Steingrímur J. kemur eftir helgi úr leiðangri til Tyrklands þar sem hann hittir m.a. fjármálaráðherra Breta og Hollendinga. Áður hefur Össur hitt utanríkisráðherra sömu þjóða.

Komi Steingrímur J. tómhentur heim, eins og Össur, er morgunljóst að Icesave-samningurinn er fallinn.

Meginrök talsmanna ríkisstjórnarinnar fyrir því að hún skuli sitja áfram eru þau að enginn valkostur sé við sitjandi stjórn.

Sjálfstæðisflokkur og Framsóknarflokkur eiga að búa til þennan valkost með því að bjóða Vinstri grænum að verja minnihlutastjórn þeirra falli.

Minnihlutastjórn Vg yrði um lágmarksverkefni; ganga frá fjárlögum ársins 2010, fá nýja samninga við Breta og Hollendinga um Icesave, endurskoða samstarfið við Alþjóða gjaldeyrissjóðinn, ganga á milli bols og höfuðs á afgangi útrásarinnar og sjá um framkvæmd á skuldaaðlögun heimilanna.

Verkefnin yrðu unnin af ríkisstjórn Vinstri grænna sem fengi umboð til næsta vors en þá yrðu kosningar.

Hégómi, heimska og glassúr

Meðhlauparar auðmannanna gefa út bækur í framhaldi af hruni til að hirða krónur sem kunna að vera afgangs hjá næstum gjaldþrota þjóð. Bækurnar ætti að gefa út í safnriti undir heitinu Sögur af viðrinum. Þar ættum við að geta lesið um þjófóttu augu Sigga Einars, alkahólískt uppeldi á Jóni Ásgeiri, mæðrahyggju Hreiðars Más, eineltisheilkenni Bakkavararbræðra og svo framvegis.

Safnritið bíður kemur síðar. Þangað til fáum við á engilsaxnesku bulltexta meðhlaupara um glassúrvætta tilveru fábjánanna sem héldu að þeir gætu gengið á vatni.

ESB mútar og hótar Írum

Eftir að Írar höfnuðu Lissabonsáttmálanum í fyrri voru þeir knúnir til að endurtaka atkvæðagreiðsluna ári síðar. Evrópusambandið hótaði Írum öllu illu ef þeir samþykktu ekki sáttmálann. Í aðdraganda kosninganna komu peningasekkir frá Brussel til að kaupa velvilja kjósenda á eyjunni grænu.

Írar kusu um nákvæmlega sama sáttmálann og  þeir felldu fyrir ári. Engar breytingar voru gerðar á sáttmálanum sjálfum enda hefði það þýtt nýtt samþykktarferli í öllum ríkjum sambandsins. Írar fengu vilyrði fyrir því að væntanleg herþjónusta ESB yrði ekki látin gilda fyrir Írland og jafnframt að fóstureyðingarlöggjöf landsins fengi að standa óáreitt af Brussel.

ESB hlustar á það sem framkvæmdastjórnin er búin að ákveða að þjóðríkin eigi að segja.

ESB fært um að hlusta á fólkið

Eymd inná hvert heimili

Fjárlagafrumvarpið boðar lækkun launa og lífeyris en hækkun skatta, bæði beinna og óbeinna. Ríkisstjórnin vissi með löngum fyrirvara að fjárlagafrumvarpið myndi boða nær öllum eymd og volæði. Á meðan stjórnvöld ætlast til að almenningur kyngi ógeðsmeðalinu þegjandi er útrásarviðrinum leyft að stýra og eiga Exista, Haga, Iceland Express, Byr og 365-miðla.

Stjórnvöld láta undir höfuð leggjast að stika út framtíð án hrunverja. Ábyrgðin er á herðum ríkisstjórnarinnar sem ekki hefur lagt línurnar í uppgjörinu við útrásina. Í skjóli aðgerðarleysis yfirvalda ná viðrinin vopnum sínum og halda í sinni eigu og í fullum rekstri fyrirtækjum sem ættu að vera gjaldþrota.

Örendi ríkisstjórnar Jóhönnu Sigurðardóttur er þrotið. 

Ríkfátækalandið

Í Kastljósi fyrr í kvöld sagði dökkhærða hægrikonan að við ættum að spara við okkur að veita um einum og hálfum milljarði til þróunaraðstoðar. Þunnhærði Evrópusinnaði samfylkingarmaðurinn staðhæfði að þrátt fyrir kreppu værum við ein ríkasta þjóð heims og ættum að axla ábyrgð sem slík.

Hvorttveggja er rétt. Við erum blönk í þeim skilningi að ótaldir milljarðar þurrkuðust út í hruninu og við horfum fram á aukna skattheimtu og samdrátt.

Samt erum við ein ríkasta þjóð heims.

En ekki lengi enn ef við myndum ganga í Evrópusambandið. Skrifræðið í Brussel myndi reikna okkur niður í evrópskt meðaltal.