Venesúela, Pétursborg og Landsbankinn

Björgólfsfeðgar bjuggu sér til orðspor í Rússlandi og Austur-Evrópu þegar lögleysa var ráðandi í þessum heimshluta. Þeir komu heim, fengu Landsbankann fyrir slikk og lága útborgun lánaða hjá Búnaðarbanka.

Allt frá heimkomu feðganna hefur verið umræða um að bjórverksmiðja þeirra í Pétursborg hefði aldrei orðið jafn stór og raun bar vitni án samvinnu við ráðandi öfl. Og ráðandi öfl voru ekki löglega kjörin stjórnvöld.

Samkvæmt fréttum RÚV klukkan sex mætti Jón Gerald Sullenbergar með pappíra frá Venesúela í Landsbankann í ágúst 2006 sem grunur leikur á að hafi verið tilraun til peningaþvættis.

Landsbankinn sem þvottastöð? Tja, hvað skal segja.

 

Þökkum fyrir Lehman-gjaldþrotið

Misjafnt orð fer af útlenskum bankamönnum. Á Íslandi vitum við að þorri þeirra sem áttu og stýrðu íslensku bönkunum er illa gert fólk. Hjá þessu fólki fór saman hroki, græðgi og heimska. Þótt aðeins einn eða tveir dómar hafa fallið er nær öruggt að glæpaeðli er þáttur í geðslagi íslensku bankamannanna.

RÚV segir að nánast fyrir misskilning hafi Lehman orðið gjaldþrota í september 2008 en það leiddi til hrunsins hér heima þegar alþjóðlegir bankar lokuðu á íslensku áhættufíklana.

Ef rétt er ber að þakka forsjóninni fyrir misskilninginn. Ef bankaviðrinin á Fróni hefðu ekki verið sett í þrot haustið 2008 mynd skaðinn hafa orðið stærri síðar meir.

Ráðstefnunni í Davos að ljúka

Flokksþreytan staðfest

Stjórnmálaáhugi er aldrei meiri en í dag, það sést á umræðum í þjóðfélaginu, þátttöku í undirskriftarlistum og meðvitund um jafn flókin og leiðinleg mál og Icesave. Áhugi almennings á stjórnmálaflokkum og stjórnmálamönnum er á hinn bóginn lítill. Þátttaka í prófkjöri Samfylkingarinnar í Reykjavík  gær var 34 prósent. Útkoma Sjálfstæðisflokksins í borginni um síðustu helgi var álíka. Í Hafnarfirði er sömu sögu að segja, þótt hafnfirskir samfylkingarmenn hafi verið duglegri að mæta á kjörstað en sjálfstæðismenn.

Stjórnmálaflokkar standa höllum fæti vegna þess að þeir eru hluti af kerfinu sem brást í hruninu. Krafa um endurnýjun er hávær en það er seigt í flokkum sem komnir eru í ákveðna stærð. Fólk sem reynir fyrir sér í fyrsta sinn þarf tíma til að læra listina að vera frambjóðandi.

Gjáin sem staðfest er á milli stjórnmálaflokka og almennings er óheppileg en um margt eðlileg. Fólk finnur stjórnmálaáhuga sínum annan farveg. Stjórnmálaflokkum bíður á hinn bóginn það verkefni að sannfæra fólk um að þeir séu til einhvers nýtir.

 

Landbúnaður er málið í ESB

Um fjörtíu prósent af fjárlögum Evrópusambandsins taka til landbúnaðarmála. Landbúnaðarstefnan, CAP, er langstærsti einstaki þátturinn í starfsemi Evrópusambandsins. Rætur stefnunnar liggja til eftirstríðsáranna þegar matarskortur var í álfunni.

Landbúnaðarstefnan tekur til framleiðslu og markaðssetningu landbúnaðarafurða. Á síðari árum eru byggðamál fléttuð saman við landbúnaðarstefnuna. Samkvæmt könnun ESB telja nær níu af hverjum tíu Evrópubúum landbúnað og dreifbýli skipa veigamikinn sess í framtíð álfunnar.

Þrátt fyrir að landbúnaðarstefnan hafi lengi verið umdeild, m.a. vegna spillingar sem þrífst í skjóli hennar, er breiður stuðningur við landbúnaðarstefnuna í ríkjum sambandsins.

Hér er samantekt um viðhorf íbúa ESB til landbúnaðarstefnunnar.

Svikamylla 365 og Haga

Arion banki á Haga en leyfir Jóni Ásgeir Jóhannessyni og föður hans að reka matvörukeðjuna. Jón Ásgeir sölsaði undir sig 365 miðlum, Fréttablaðinu og Stöð 2, með kafbátaviðskiptum rétt eftir hrun. Feðgarnir láta Haga kaupa auglýsingar hjá Fréttablaðinu til að fríblaðsútgáfan gangi upp.

Þetta er sami leikur og feðgarnir léku þegar þeir keyptu undir fölsku nafni Fréttablaðið árið 2002. Þá var Baugur almenningshlutafélag sem þeir feðgar stýrðu. Auglýsingafé frá Baugi stóð undir útbreiðslu Fréttablaðsins.

Arion banki lætur sér vel líka að vera hafður af fífli og er með tvær stórar auglýsingar í Fréttablaðinu í dag.

 

Óvitarnir Steingrímur J. og Jóhanna

Það er af óvitaskap sem Jóhanna og Steingrímur J. hafa talað máli Breta og Hollendinga gagnvart Íslendingum. Skötuhjúin eru heimarík en lyppast niður utan túnfótar en hvorug verseruð í alþjóðastjórnmálum. Frammistaða Ólafs Ragnars erlendis sýnir að þar fer stjórnmálamaður sem kann sitt fag.

Til að við fáum nýjan Icesave-samning þurfa þau Jóhanna Steingrímur J. að segja af sér. Óvitaskapur er engin afsökun.

„Það er verið að kúga okkur"

Grikkjum bjargað frá gjaldþroti

Grikkjum verður bjargað frá gjaldþroti. Þjóðverjar í gegnum Evrópusambandið munu taka á sig reikninginn og spurningin er hvað þeir vilja fá í staðinn.

Síðustu daga hefur það orðið æ augljósara að Grikkland er fyrsta evrulandið sem stendur frammi fyrir raunverulegri hættu á gjaldþroti. Evruvæðing Grikklands vakti falskar vonir um betri tíð með blóm í haga. Þegar kaldur veruleikinn heimsótti Grikki rann upp fyrir þeim að evruvæðingin kom í veg fyrir að þeir færu sígilda leið þjóða í falskri velmegun og lækkuðu gengið til að bæta samkeppnisstöðu sína.

Stíffrosið hagkerfi evrulanda er komið að endimörkum. Eftir Grikkland kemur Portúgal og síðan Spánn. Jafnvel djúpir þýskir vasar geta ekki hóstað upp nægum fjármunum.

Þegar Þjóðverjar rétta Grikkjum hjálp verður það með skilyrðum sem hvorttveggja breyta Evrópusambandinu og stöðu Þjóðverja gagnvart bónbjargarliðinu í suðurhluta álfunnar.

Hér skrifar Brósi um gríska harmleikinn og svo

kemur Hugi með þessa samantekt sem tekur af öll tvímæli.

 

Fjármálahryðjuverk annarar kynslóðar

Ungu mennirnir sem sakaðir erum fjármálahryðjuverkið gegn krónunni lærðu til verka í Björgólfsbankanum Straumi Burðarás. Eftirhreytur hrunsins koma æ betur í ljós. Björgólfsfeðgar bera ásamt fáeinum öðrum ábyrgð á siðferðishnignun íslenskrar fjársýslu og eiga ekki að koma nálægt endurreisn landsins.

Fjárglæframennirnir sem stóðu að hryðjuverkinu munu svara til saka. Sporgöngumenn þeirra eiga ekki að fá stuðning stjórnvalda til að stunda atvinnustarfsemi hér á landi. 

Meint gjaldeyrissvik rannsökuð

Jóhanna vill smábreytingar á Icesave

Hagsmunir ríkisstjórnar Jóhönnu Sigurðardóttur eru að ekki fáist betri samningar við Breta og Hollendinga. Í hádegisfréttum RÚV segir Jóhanna blákalt að aðeins séu mögulegar smávægilegar breytingar á Icesave-samningnum. 

Íslendingar hafa ekki efni á að láta Jóhönnustjórnina fara með umboð okkar í samskiptum við aðrar þjóðir.

Í hádegisviðtalinu viðurkenndi Jóhanna að það hafi verið Bretar og Hollendingar sem báðu um að hitta stjórnarandstöðuna á Íslandi. Þeir vita sem er að ríkisstjórn Jóhönnu situr en stjórnar ekki.

Samfylkingin einangruð vegna ESB

Ferð flokksformanna Vinstri grænna, Sjálfstæðisflokks og Framsóknarflokks til Bretlands og Hollands til að ræða mögulegar lausnir á Icesave-deilunni undirstrikar að Samfylkingin hefur ekki fram að færa í málinu annað en að fallast á kröfur gömlu nýlenduþjóðanna.

Samfylkingin er tilbúin að greiða hvaða verð sem er til að komast í Evrópusambandið. Þar stendur Samfylkingin einn flokka, einangraður í öfgatrú á meint lífsgæði sem ESB-aðild veitir.

Samningsstaða okkar batnar gagnvart Bretum og Hollendingum þegar það rennur upp fyrir þeim að hótun um að standa í vegi fyrir aðildarumsókn Samfylkingarinnar um ESB aðild Íslands er sem ljúf tónlist í eyrum meirihluta landsmanna.

Hagsmunum Íslands er best borgið án Samfylkingar.

Allra augu á Íslandi