Björn er skýr valkostur

Pólitískur dauði Björns Bjarnasonar dómsmálaráðherra er ótímabær. Véfréttir um að hann sé á leið úr stjórnmálum eru sumpart óskhyggja andstæðinga hans og hinum þræðinum spuni úr Baugsmiðlum. Björn er valkostur fyrir hreinlynda hægrimenn sem aðhyllast borgaralegar lífsskoðanir með áherslu á hófstillingu markaðar og ríkisvalds.

Sjálfstæðisflokkurinn stendur á tímamótum á landsfundinum eftir rúmar tvær vikur. Í aðdraganda fundarins hafa undarlega margir trúnaðarmenn flokksins keppst við að vera í felum. Ekki Björn Bjarnason.

Björn andæfir uppgjafarmoðsuðu sjálfstæðismanna er liggja sem feitir þjónar á fleti og bíða húðflettingar kjósenda. Björn hefur stikað út stefnu sem er skýr og beitt. Á grundvelli þeirrar stefnu er hægt að bjóða fram lista - spurningin er hvort það verði listi Sjálfstæðisflokksins.

Ísrael, Palestína og Ísland

Palestínskt barn er jafn mikils virði og ísraelskt; sagt í samhengi kynþáttastríðsins í Mið-Austurlöndum: Arababarn er að jöfnu lagt við gyðingabarn. Frá þessari forsendu má leiða að Palestínumenn og Ísraelar eigi hvorirtveggja rétt á sjálfstæðu ríki. Fyrir nokkrum árum náðu þáverandi leiðtogar Palestínumanna og Ísraela samkomulegi um skiptingu landsvæðis fyrir tvö sjálfstæð ríki. Útaf stóðu um 2,5% af umdeildu landssvæði.

Og af því að arabar og Ísraelsmenn hafa frá stofnum Ísraelsríkis 1947 deilt um sjálfan tilverurétt þess ríkis voru þessi 2,5 prósent sem Arafat og Barak áttu eftir að semja um notuð til að halda átökum áfram.

Ísraelsmenn og arabar nota alþjóðleg ítök og samúð vítt og breitt um heimsbyggðina til að afla málstað sínum fylgis. Í nærliggjandi sveitum deiluaðila er eðlilega áhugi á málinu sem og hjá stórveldum er telja sig annað tveggja bera ábyrgð á úrlausn mála eða eiga hagsmuna að gæta. Jafnvel hjá forríkum frændum okkar, Norðmönnum, sem fjármögnuðu að hluta Oslóarsamkomulagið, er gengið um götur til að lýsa yfir stuðningi við málsaðila - samt aldrei ein ganga til stuðnings hvorumtveggja.

Ísraelar og arabar mjólka stuðning og fjármuni frá Vesturlöndum á ólíkum forsendum. En á meðan við nennum að hlusta á deiluaðila og fjármagna vitleysuna munu þeir halda áfram.

Og þá er það milljón króna spurningin: Hvernig í veröldinni dettur íslenskum stjórnmálamönnum að gera deilur fyrir botni Miðjarðarhafs að íslensku innanríkismáli?

Ekki ágreiningur í ríkisstjórn

Það sem sjálfstæðismenn fatta ekki

Pólitísk forsaga bankahrunsins er frjálshyggja Sjálfstæðisflokksins sem aftur var íslensk innleiðing á Thatcherisma og Reaganfræðum. Þegar Davíð Oddsson, þáverandi formaður, áttaði sig á græðgisuppvakningunni var of seint í rassinn gripið. Davíð reyndi að koma böndum á peningaofbeldið. Hann gerði það táknrænt þegar hann tók út af reikningi Kaupþings þegar honum ofbauð sjálftekt forstjóra og stjórnarformanns. Hann reyndi að setja lög á fjölmiðlaöfgar auðmannanna en var gerður afturreka.

Auðjöfrar sóttu sér pólitískt bakland í Samfylkingunni þegar formaður Sjálfstæðisflokksins vildi ekki spila með. Sjálfstæðisflokkurinn var skilinn eftir í kjölsogi nýauðvaldsins. Davíð kvaddi og Geir tók við keflinu og setti sér það markmið að halda sjó.

Bankahrunið afhjúpaði öfgar frjálshyggjunnar. Eftir situr Sjálfstæðisflokkurinn og veit ekki í hvorn fótinn hann á að stíga. Og hvað gerist þá? Jú, um að gera að drepa brýnum málum á dreif, tölum um Evrópu í nokkrar vikur. Evrópunefnd er sett á laggirnar og bókað að aðalefni landsfundar skuli vera umræða um inngöngu í Evrópusambandið. Útrásarglýjan víkur fyrir blekkingu frá Brussel.

Áramótaútgáfa Andríkis segir allt sem segja þarf um skynsemi Evrópuumræðunnar þegar hún tilefnir rökstyðjara ársins þingmann Sjálfstæðisflokksins:

 

Rökstyðjari ársins: Ragnheiður Ríkarðsdóttir lýsti því yfir að hún vildi ganga í Evrópusambandið. Jafnframt vildi hún að „farið verði í aðildarviðræður við Evrópusambandið, að kannaðir verði kostir og gallar þess sambands fyrir íslenska þjóð".

 

Það sem sjálfstæðismenn fatta ekki er eftirfarandi: Frjálshyggjan er dauð sem pólitísk stefna, bæði á Íslandi og Vesturlöndum. Borgaralegir flokkar, þ.e. þeir sem eru með ráði og rænu, fara í hugmyndahirslur sínar og leita að rykföllnum verðmætum. Borgaralegar dyggðir eins og ráðdeild, ábyrgð, hófsemi, þegnskapur verða viðbrögð við yfirfalli útrásarinnar.

Sjálfstæðisflokkurinn þarf að rekja sig tilbaka að grunngildunum og spyrja sig í leiðinni hvers vegna svona hrapallega tókst til. Á þeirri vegferð er hætt við að sumir heltist úr lestinni. Mistök á Richter-skala krefjast fórnarlamba. Valið stendur á milli þess að Sjálfstæðisflokkurinn taki til í sínum ranni eða að móðurflokkur íslenskra stjórnmála falli.

Banki í vasa Baugsmafíunnar

Sjónvarpið fletti í kvöld ofan af Nýja Landsbankanum og hvernig fyrrum aðstoðarforstjóri Baugs, Tryggvi Jónsson, vann að hagsmunum Baugs þegar hann var starfsmaður Nýja Landsbanka. Frétt Sjónvarpsins í kvöld sýnir svo ekki verður um villst að stjórnvöld og nýju ríkisbankarnir hafa ekkert lært af bankahruninu.

Bankahrunið varð vegna þess að ósvífnum og oft ólöglegum viðskiptaháttum var leyft að þrífast. Ef stjórnendur Nýja Landsbankans eru annað tveggja svo heimskir eða illa innrættir að þeir skilja ekki skriftina á veggnum þarf að skipta um stjórnendur.

Stjórnvöld bera þunga ábyrgð. Þau hafa látið undir höfuð leggjast að senda samfélaginu skýr skilaboð um að þau vilji taka á spillingunni og endurmennta íslenskt viðskiptalíf.

Hér gagnast ekkert hálfkák. Ríkisbankar og stjórnvöld eiga að keyra í gjaldþrot fyrirtæki útrásarauðmanna.

Þúsund eintök af Birni Inga

Björn Ingi Hrafnsson rekur einkafyrirtæki sem veltir tugum milljóna króna samtímis sem hann ýmist fjallar um viðskipti á ritstjórn Fréttablaðsins, tekur þátt í stefnumótun í stjórnarráðinu eða fer með ákvörðunarvald í borgarstjórn.

Að eigin sögn stundar Björn Ingi hlutabréfakaup í einkafyrirtækinu. Hann segir ekki hver veltan hefur verið en Orðið á götunni í Eyjunni birtir upplýsingar um að eignir félagsins hafi verið liðlega 30 milljónir króna árið 2006 og hagnaður tæpar 30 milljónir króna.

Í varnarskrift sinni segist Björn Ingi hafa farið að eins og tugþúsundir Íslendinga. Hann beitir alkunnri aðferð hryðjuverkamanna sem láta sig hverfa inn í fjöldann eftir unnin ódæði.

Það voru engir tugþúsundir Íslendinga í sporum Björns Inga að hafa ýmist með óbeinum hætti, í gegnum fjölmiðlastörf, áhrif á hlutabréfamarkaðinn eða bein áhrif sem pólitískur ráðgjafi ráðherra og borgarfulltrúi.

Björn Ingi er efnahagslegur hryðjuverkamaður sem reyndi í REI-málinu að sölsa opinberar eigur Orkuveitu Reykjavíkur undir fámennisauðvaldið sem keyrði þjóðina fram á bjargbrúnina.

 

Kjalar og Kaupþing, vitfirring auðmanna

Fjármálaeftirlitið neitar að segja frá innihaldi skýrslna endurskoðunarfyrirtækja um bankana sem hrundu í haust. Væntanlega fjalla skýrslurnar um samskipti eigenda við banka. Frétt um að helsti eigandi Kaupþings, Ólafur Ólafsson, hafi í gegnum fjárfestingafélag sitt Kjalar veðjað á fall krónunnar og gert samninga um það upp á hundruð milljarða króna gefur hugmynd um dýpt brjálsemi útrásarauðmannanna.

Til að undirstrika vitfirringuna krefst Ólafur uppgjörs samkvæmt gengisskráningu Evrópska seðlabankans þar sem evran er á  290 krónur á meðan evran er skráð á 166 krónur hér heima.

Pólitísk skilaboð fréttarinnar eru ótvíræð. Ef stjórnvöld ætla að gera sér minnstu von um frið innanlands eiga þau að nota öll tiltæk meðöl réttarríkisins til að ganga á milli bols og höfuðs á auðmönnum. 

 

Eiga 650 m. evra inni hjá gamla Kaupþingi

Félagsframsókn verður fjárplógsframsókn

Framsóknarflokkurinn var einu sinni félagsafl bænda og landsbyggðar. Þegar leifarnar af SÍS urðu gjaldþrota náðu öflugir fjárplógsmenn völdum í flokknum, vel að merkja án þess að setjast sjálfir í trúnaðarstöður.

Eftir því sem almennri skírskotun flokksins hnignaði treystu forystumenn flokksins á massívar auglýsingaherferðir fyrir kosningar, fjármagnaðar af fjárplógsmönnunum, og ísköld kosningaloforð eins og 95 prósent húsnæðislán.

Frami Björns Inga Hrafnsonar innan flokksins er lýsandi fyrir þróunina. Helsta verkefni flokksins var að færa framsóknarauðmönnum opinberar eigur á útsöluverði.

Frétt um að það sé hiti í framsóknarmönnum vekur spurningu um hvaða máli það skiptir hver verður fenginn til að kveikja undir kjötkötlunum.

 

Hiti á fundi framsóknarmanna

Fræðimaður og fjölmiðlakona kokka Brussel-óra

Stjórnmálafræðingur sem lætur í það skína að formaður Sjálfstæðisflokksins hafi það í hjáverkum að halda flokknum saman er ekki ýkja vel verseraður í íslenskum stjórnmálum. Fjölmiðlakona sem heldur að Sjálfstæðisflokkurinn beiti Samfylkinguna blekkingum í Evrópumálum er úti á þekju.

Flestir aðrir en Gunnar Helgi og Þóra Kristín eru búnir að sjá í gegnum málatilbúnað Evrópusinna. Tilgangurinn með Evrópuupphlaupinu var að draga athyglina frá bankahruninu og ábyrgð stjórnarflokkana.

Evrópusinnar eru á hröðu undanhaldi enda sér þjóðin í gegnum blekkingarvefinn sem spunninn var um að innganga í Evrópusambandið væri bjargráð.

Heimóttarskapur íslenskra Brusselsinna er með eindæmum. Evrópusambandið var ekki stofnað til að redda smáþjóðum frá fjármálaglæfrum. Evrópusambandið er valdablokk stóru meginlandsríkjanna sem gáfust upp á valdatogstreitu er leiddi til tveggja heimsstyrjalda. Eftir því sem fjær dregur meginlandinu verða þjóðríki fráhverfari sambandinu. Ísland er eina Evrópuþjóðin sem hefur heilt úthaf á milli sín og meginlandsins. 

Í fyrirsjáanlegri framtíð mun Ísland ekki ganga inn í Evrópusambandið. Óskhyggja stjórnmálafræðinga og fjölmiðlafólks breytir þar engu.

Taugastríð Geirs og Ingibjargar

Við gætum misst af kreppunni

Korktappahagkerfi Íslands gæti flotið ofaná í stórsjó alþjóðlegu fjármálakreppunnar. Vísbendingarnar eru fyrir hendi; fyrir örfáum vikum var spáð að jafnvel gæti þurft að hækka stýrivexti úr núverandi 18%. Núna er spáð lækkun stýrivaxta þegar í mars. Verðhjöðnun austan hafs og vestan með nánast núll prósent vöxtum vinnur með okkur.

Við skárum fitulagið af hagkerfinu, þ.e. útrásarbankana, með einu hnífsbragði og erum núna með litla og netta smábanka sem má treysta eins vel og geldingum í kvennabúri. Ónauðsynlegt vinnuafl er flutt til síns heima og innflutningur dregst saman á leifturhraða.

Verðbólgan lækkar hratt á næstu vikum og krónan styrkist með hækkandi sól.

Já, kannski þarf maður ekki á prósakkinu að halda, eftir allt saman.

 

Þagði Styrmir?

Í fréttinni segir að Bjarni og Styrmir hafi verið framsögumenn á fundinum og þannig var hann auglýstur. En af fréttinni sjálfri að dæma þagði Styrmir þunnu hljóði því ekki er vikið einu aukateknu orði að því sem hann sagði.

Viðbót hálftíma síðar: Jú, Styrmir talaði á fundinum og skrifuð var sérstök frétt um framsögu hans. 

Flokksforystan fái opið umboð