Bretar öfunda mjúkt íslenskt bankahrun

Breska bankakerfið riðar til falls en íslenska leiðin er lokuð bresku ríkisstjórninni. Smáríkið kemst upp með að setja sína banka í skilanefndir og gefa erlendum lánadrottnum langt nef, en Bretland þarf að axla ábyrgð. Á þessa leið er greining Ambrose Evans-Pritchard dálkahöfundar Telegraph.

Það myndi kosta Breta sex prósent af þjóðarframleiðslunni að endurfjármagna bankakerfið og svo væri það upp á guð og lukkuna hvort Bretland nyti alþjóðlegs lánstrausts sem ábyrgðaraðili fyrir skuldir bankanna.

Evans-Pritchard hefur eftir sérfræðingum að íslenska leiðin, setja gjaldþrota banka í skilanefndir, myndi í fyrsta lagi eyðileggja orðspor bresks fjármálalífs og í öðru lagi steypa alþjóðahagkerfinu í enn dýpri kreppu en þegar er orðin.

Lærdómurinn sem má draga af þessu skrifum er að íslenskir bankar munu ekki verða brúkleg útflutningsvara í nokkrar kynslóðir.

Evran veitir ekkert skjól

Evrulöndin Írland og Spánn glíma við efnahagssamdrátt, halla í ríkisfjármálum og sívaxandi atvinnuleysi. Hvorugt ríkið getur fellt gengið til að auka samkeppnishæfi - evran kemur í veg fyrir það. Niðurfærsla launa og langvinnt fjöldaatvinnuleysi verður hlutskipti Íra og Spánverja.

Þrátt fyrir eina mynt eru vaxtakjör evrulanda ólík. Írar greiða meira en 25% hærri vexti fyrir lán en þýski ríkissjóðurinn. Eftir að lánshæfi Spánar var lækkað verður dýrara fyrir Spánverja að slá lán.

Dálkahöfundur Telegraph telur ólíklegt að Spánverjar þoli til lengdar 20 prósent atvinnuleysi. Írinn David MacWilliams líkir írska bankahruninu við Enron-hneykslið í Bandaríkjunum. Samkvæmt trúarsetningu íslensku aðildarsinnanna er evran vörn gegn ónýtum ríkisfjármálum og bankahruni. Veruleikinn afhjúpar blekkinguna.

Brussel setur kvóta á sjóstangveiði

Framkvæmdastjórn Evrópusambandsins hyggst setja kvóta á sjóstangveiði strandríkja. Kvótinn verður reiknaður inn í heildarkvóta sem ríki frá úthlutað samkvæmt sameiginlegri fiskveiðistefnu sambandsins. Í vefútgáfu Scotsman er haft eftir breskum talsmanni sjóstangveiðimanna að tillögur framkvæmdastjórnarinnar séu fáránlegar og óframkvæmanlegar. Gert er ráð fyrir að Evrópuþingið taki tillögurnar til afgreiðslu í apríl.

Forystuskipti í Sjálfstæðisflokknum líkleg

Sjálfstæðisflokkurinn gæti þurft á stórum ákvörðunum að halda á landsfundi sínum um mánaðarmótin. Sýnt þykir að Evrópuleiðangurinn var án fyrirheits og flokksmenn mun ekki samþykkja tillögu um aðildarviðræður við Evrópusambandið. Til að freista þess að vinna tiltrú almennings er um það rætt að forystutvíeykið, Geir H. Haarde og Þorgerður Katrín Gunnarsdóttir, segi af sér. Bjarni Benediktsson er talinn líklegastur í formennsku.

Sjálfstæðisflokkurinn getur ekki látið ólguna í þjóðfélaginu sem vind um eyru þjóta. Geir H. Haarde hefur ekki ljáð máls á kosningum með þeim rökum að þingkosningar yrðu olía á eldinn sem kviknaði við bankahrunið. Landsfundurinn getur á hinn bóginn ekki komið saman við núverandi aðstæður og blessað stefnu og forystu miðað við það sem á undan er gengið. Flokkurinn liti út eins og nátttröll í dagsbirtu.

Róttæk breyting á forystu flokksins og ráðherraliði gæti skapað sóknarfæri. Vísbendingar eru um að Björn Bjarnason axli sín skinn og þá er líklegt að Árni Mathisen hverfi á braut.

Formannskjör Framsóknarflokksins er til marks um að núverandi ástand í þjóðfélagi umber ekki óbreytta stjórnmálaflokka. Pælingar um forystuskipti í Sjálfstæðisflokknum hófust fyrir fund framsóknarmanna en niðurstaðan þar jók líkur á uppstokkun.

Samsæri stjórnmálaflokka um að blekkja þjóðina

Í gær stóðu þrír stjórnmálaflokkar fyrir Evrópuumræðu. Framsóknarflokkurinn samþykkti tillögu um skilyrði fyrir aðildarumsókn sem felur í sér að Evrópusambandið þarf að breytast í grundvallaratriðum. Samfylkingin tilkynnti fundarherferð um Evrópumál en flokkurinn hefur hingað til ekki getað stunið upp samningsmarkmiðum Íslendinga. Og Evrópunefnd Sjálfstæðisflokksins fundaði í Valhöll.

Þessir þrír stjórnmálaflokkar bera mesta ábyrgðina á bankahruninu. Áróðursvélar flokkanna sameinast um að fá þjóðina í Evrópuumræðu til að pólitísk ábyrgð á bankahruninu verði ekki til umræðu.

Evrópuumræðan er aðferð til að sópa undir teppið aðkallandi umræðu um viðbrögð við efnahagsvanda þjóðarinnar.

Evrópuleiksýning þríflokksins auglýsir vangetu þeirra til að bjóða fram valkosti í stjórnmálum Stjórnmálakerfið er að þrotum komið.

Hringalaga þríhyrningur ESB-sinna

Veikir stjórnmálaflokkar leita að stórum hugmyndum til að breiða yfir lítið innihald. Samfylkingin var stofnuð sem lægsti samnefnari þriggja flokka. Framsóknarflokkurinn gafst upp á sögulegu erindi sínu sem málsvari landsbyggðar og náði aldrei fótfestu sem þéttbýlisflokkur. Báðir þessir flokkar fela sig á bakvið stærstu hugmyndina í samtímastjórnmálum: Evrópusambandsaðild.

Stórar hugmyndir eru hættulegar og því hættulegri sem þær fá veigameira hlutverk. Kommúnisminn lék íslenska vinstrimenn grátt upp úr miðri síðustu öld og frjálshyggjan stútaði orðspori margra hægrimanna haustdagana 2008 þegar bankarnir hrundu.

Margir þeir sem í orði kveðnu aðhyllast aðild Íslands að Evrópusambandinu vita að aðild hentar okkur engan veginn. Söguleg rök og fjárhagsleg, félagsleg rök og staðreyndir um fullveldisframsal mæla gegn inngöngu Íslands í Evrópusambandið.

Í hljóði hefur Samfylkingin viðurkennt að innganga í Evrópusambandið er ekki á dagskrá með því að setja ekki fram samningsmarkmið okkar þrátt fyrir flokkssamþykktir sem kveða á um skilgreiningu markmiða. Framsóknarflokkurinn ákvað í gær að ganga skrefinu lengra og setja það sem skilyrði að Ísland yrði undanþegið sjávarútvegsstefnu ESB.

Sjávarútvegsstefna ESB var ákveðin rétt fyrir upphaf aðildarviðræðna við Noreg, Danmörku, Írland og Bretland í byrjun áttunda áratugarins. Sjávarútvegsstefnan er með sömu markmið og landbúnaðarstefna ESB. Stefnan hefur verið áréttuð í sáttmálum sem sambandið hefur samþykkt síðar, nú síðast Lissabon-sáttmálanum.

Að biðja ESB um að undanskilja sjávarútvegsstefnuna í aðildarviðræðum við Ísland er að biðja um hringlaga þríhyrning. Samþykkt Framsóknarflokksins frá í gær undirstrikar að greindasta fólkið í íslenskum stjórnmálum býr á öðrum bæjum.

ESB-sinnar eru eins og þjófur sem í undirmeðvitund sinni vill vera staðinn að verki til að geta játað syndir sínar og hafið nýtt líf.

Við næstu kosningar mun þjóðin standa Samfylkinguna og Framsókn að verki.

Framsókn úr útrás í ESB

Kaupþing var framsóknarbanki í útrás sem gerði þjóðina nærri fjárhagslega gjaldþrota. Eftir efnahagslegt hrun er næsta skref Framsóknarflokksins að færa Íslendinga undir Brusselvaldið. Til hamingju framsóknarmenn.

 

 

Framsókn vill sækja um ESB

Írskt bankahrun vegna evru

Írsk stjórnvöld tilkynntu í kvöld að Anglo Irish bank yrði þjóðnýttur til að verjast gjaldþroti. Fjárlagahalli ríkissjóðs 10 prósent en á að vera innan við 3 prósent samkvæmt ákvæðum Maastrict-samkomulagsins fyrir evrulönd. Atvinnuleysi stefnir í 12 prósent.

Evran er að sliga Írland. Um fimmtungur af útflutningi Íra fer til Bretlands. Breska pundið hefur lækkað um 30 prósent gagnvart evru á síðustu mánuðum. Útflutningsgreinar eru rekar með stórfelldu tapi.

Til að bæta gráu ofaná svart ákvað tölvuframleiðandinn Dell að flytja starfsemi sína frá Írlandi til Póllands. Starfsemi Dell á Írlandi er um fjögur prósent af þjóðarframleiðslunni.

Með írskt pund hefðu Írar átt möguleika til aðlögunar sem þeir hafa ekki með evru.

Írska ríkisstjórnin fer þess á leit við opinbera starfsmenn að þeir samþykki launalækkun á línuna.

Þegar Írar ganga aftur í kjörklefana til að greiða atkvæði um Lissabon-sáttmálann sem þeir hafa einu sinni hafnað er líklegt að þeir hafni honum öðru sinni - þó ekki sé nema í þeirri von að þeim verði sparkað út úr Evrópusambandinu.

 

Anglo Irish Bank þjóðnýttur

Arabasnúningur Kaupþings

Kaupþingsmenn keyptu sér tiltrú með auglýsingu um að emírsfjölskyldan í Katar hefði keypt fimm prósent í bankanum í september þegar ljóst var að hverju stefndi. Það sem var tortryggilegt við þessi kaup var að þau voru skráð á félag sem gagngert var stofnað til að kaupa hlutinn. Það er svo íslenskt að stofna félag um kaup á hlut í banka. Brellukarlarnir í Kaupþingi létu svo heita að emírinn væri langtímafjárfestir.

S-hópurinn svokallaði sem voru Finnur Ingólfs, Ólafur Ólafs og fleiri framsóknarmenn keyptu Búnaðarbankann og þóttust hafa í liði með sér þýskan banka en það reyndist blekking. Búnaðarbankinn rann inn í Kaupþing og gerði nokkra menn milljarðamæringa.

Þegar frá líður hruninu og fleiri lygar komast upp á yfirborðið verður bert hvað þeir voru margir sem gengu vitandi vits ljúgandi um götur og torg.

 

25 milljarða króna greiðsla týnd

Þjóð ofar flokki, flokkur ofar ríkisstjórn

Pólitísk herstjórnarlist er annars vegar almenn strategía um langtímamarkmið og hins vegar sértækari ráð, taktík, til að bregðast við aðstæðum á vegferðinni. Langtímamarkmið sérhvers stjórnmálaflokks hlýtur að vera hagur og velferð umbjóðenda sinna. Enginn flokkur annar en Sjálfstæðisflokkurinn getur sakir stærðar og sögu talist þjóðarflokkur. Til Sjálfstæðisflokksins og trúnaðarmanna hans má þess vegna gera ríkari kröfur en til annarra.

Sjálfstæðisflokkurinn ber öðrum fremur almenna pólitíska ábyrgð á bankahruninu. Flokkurinn er með hartnær tvítuga samfellda stjórnarsögu að baki og boðberi frjálshyggju og einkavæðingu, einkum framan af þessu tímabili. Frjálshyggjan var ráðandi hugmyndafræði á Vesturlöndum og smitaðist langt inn í raðir vinstrimanna, samanber Verkamannaflokk Tony Blair.

Almenn pólitísk ábyrgð felur í sér að Sjálfstæðisflokkurinn verður að ræða sig í gegnum pólitík síðustu ára og fara í hugmyndafræðilega tiltekt. Flokknum ætti ekki að vera það tiltökumál. Borgaralegir flokkar eru ólíkir hugsjónaflokkum á vinstri kantinum með því að þeir fyrrnefndu byggja á almennari gildum og eiga fleiri vistarverur en róttækir flokkar.

Langtímamarkmið Sjálfstæðisflokksins er óháð hugmyndafræðilegri umræðu. Erindi Sjálfstæðisflokksins í íslensk stjórnmál er að vera kjölfesta í samsteypustjórnum sem hér tíðkast. Aðrir flokkar leggja til blæbrigði en Sjálfstæðisflokkurinn er svipfesta lýðveldisins.

Af sjálfu leiðir að Sjálfstæðisflokknum leyfist ekki að stunda tilraunir með grundvallarhagsmuni þjóðarinnar. Þess vegna var það fullkomið misráð, og herfileg missýn á strategíu og taktík, að formaður flokksins, Geir H. Haarde, boðaði hraðsoðna Evrópuumræðu í kjölfar bankahruns.

Teikn eru á lofti um að grasrótin í flokknum leiðrétti villukúrs formannsins og standi fast við grunngildi Sjálfstæðisflokksins um fullveldi og sjálfræði þjóðarinnar.

Sjálfstæðisflokkurinn getur ekki látið pólitíska fjárkúgun Samfylkingarinnar ráða ferðinni í stjórnarsamstarfinu.

Sjálfstæðisflokkurinn verður að setja langtímahagsmuni þjóðarinnar ofar skammtímahag í ríkisstjórnarsamstarfi. Á landsfundi eftir tvær vikur er brýnt að Sjálfstæðisflokkurinn staðfesti ábyrgð sína sem þjóðarflokkur.