BRICS, vestrið fær samkeppni

Leiðtogafundur BRICS-ríkjanna er nýlega afstaðin í Suður-Afríku. Auk fundarríkis eiga aðild Rússland, Kína, Indland og Brasilía. Leiðtogarnir buðu velkomin sex önnur ríki, m.a. Egyptaland, Íran, Sádí-Arabía og Argentínu. Fleiri eru á biðlista, t.d. Nígería.

Hugtakið BRIC varð til hjá forstjóra Goldman Sachs fjárfestingabankans um aldamótin og náði yfir nýmarkaðslönd með sérstaka vaxtarmöguleika. Vestrið, sem nýlega hafði sigrað kalda stríðið, var með BRIC-ríkin á matseðlinum, svo að segja. Nýmarkaðsríkin tóku forstjórann á orðinu; matseðilinn öðlaðist sjálfstætt líf.

BRIC-ríkin fimm stofnuðu félagsskapinn ekki fyrr en 2009. Tveim árum síðar bættist S-ið við, Suður-Afríka. Á næsta verða ríkin tólf. Helsti frumkvöðullinn er Pútín Rússlandsforseti.

Í frægri ræðu á öryggisráðstefnunni í Munchen árið 2007 boðaði Pútín margpóla heim sem valkost við einpóla veröld undir forystu Bandaríkjanna. BRICS er útfærsla á þeirri stefnu.

Viðskipti og gjaldeyrismál eru sem stendur höfuðviðfangsefni BRICS. Vegna ólíkrar menningar, sögu og landfræðilegrar stöðu aðildarríkja er engin hætta á samrunaþróun, líkt og ofin er í grunnþrætti Evrópusambandsins.

BRICS er andóf gegn vestrænu forræði í alþjóðamálum. Þeir sem tala fyrir vestrænni leiðsögn heimsbyggðarinnar, t.d. Daniel Hannan í Telegraph, óttast vöxt og viðgang samtakanna.

Úkraínustríðið litar heimspólitíkina. Vöxtur BRICS-ríkjanna á sama tíma og átökin á gresjum Garðaríkis standa yfir er stuðningur við málstað Rússa gegn vestrinu sem heldur uppi stríðsrekstri stjórnarinnar í Kænugarði.

Tilraunir á þessari öld til að vesturlandavæða heimsbyggðina sækja styrk sinn í hugmyndafræði sem varð til á tíunda áratug síðustu aldar, eftir fall Sovétríkjanna og þar með heimskommúnismans. Heimamenn í Afganistan, Írak og Sýrlandi keyptu ekki vestræna stjórnmálamenningu og lífshætti þótt hvortveggja væri á tilboðsverði. Vestrið nýtur ekki þeirra menningarlegu yfirburða sem margir vilja vera láta.

Úkraínu byggir klofin þjóð. Austurhlutinn er á menningarlegu áhrifasvæði Rússa en vesturhlutinn er hallur undir Evrópusambandið. Landamæri ríkisins endurspegla ekki vilja þeirra sem innan þeirra búa. Tvær leiðir voru mögulegar. Í fyrsta lagi sáttaleið. Eitt sambandsríki með sjálfsstjórn landshluta. Í öðru lagi stríð. Frá og með stjórnarbyltingunni 2014 var stefnt á stríð. Stjórnvöld í Kænugarði hefðu aldrei eins og sér undirbúið stríð. 40 milljón manna þjóð sigrar ekki 140 milljón manna þjóð. Stefnt var að stríði i krafti vestrænna yfirburða.  

BRICS er ekki heimskommúnisminn endurfæddur. Samtökin boða hvorki tiltekna hugmyndafræði, líkt og Evrópusambandið, né ein trúarbrögð eins og félagsskapur íslamskra ríkja, OIC. Enn síður veraldlega alheimstrú að manngerður koltvísýringur stjórni veðrum og vindum. Ekki heldur þá vestrænu sérvisku að kynin séu þrjú, fimm eða seytján.

BRICS er í stóra samhenginu afturhvarf til fornrar speki að hollur er heimafenginn baggi. 

 

 

Loftslagsvá er viðskiptamódel, byggt á blekkingu

Keyptir vísinda- og tæknimenn í þjónustu auðjöfra halda að almenningi, í samvinnu við fjölmiðla, þeirri blekkingu að loftslagsvá steðji að heimsbyggðinni. Allt er þetta viðskiptamódel, en ekki vísindi, og haldið gangandi til að skattpína almenning.

Á þessa leið skrifa Þjóðverjarnir Klaus-Dieter Döhler og Josef Kowatsch. Báðir eru umhverfisverndarsinnar og Döhler náttúrvísindamaður. Grein þeirra birtist í útgáfunni EIKE, hægt er að lesa hana í samantekt á ensku.

Loftslagsnefnd Sameinuðu þjóðanna, IPCC, er svo gengumspillt, skrifa Döhler og Kowatsch, að flestir náttúruvísindamenn hafa sagt sig frá störfum fyrir nefndina. Eftir sitja félagsfræðingar, hagfræðingar og stjórnmálafræðingar.

Eins og gefur að skilja vita félagsvísindamennirnir ekkert um loftslagsvá, sem sérfræðingar, en þess meira um hvernig eigi með óttastjórnun, peningagjöfum og áróðri að halda viðskiptamódelinu gangandi.

Á seinni tíð eru náttúruvísindamenn, sem sjá í gegnum blekkinguna, farnir að taka af sér silkihanskana, kalla hlutina réttum nöfnum og leggja til hliðar fræðilegt orðalag. Eðlisfræðingurinn John Clauser, sem fékk Nóbelsverðlaunin árið 2022, sagði nýlega skýrt og skorinort að loftslagsvísindi hafi breyst í falsvísindi í þjónustu trúarbragða. 

Tilfallandi hefur síðustu ár vitnað til fjölda náttúruvísindamanna, t.d. Judith Curry, Richard Lindzen, William Happer, Roy Spencer, John Christy, Lennart Bengtsson og fleiri sem þvertaka fyrir loftslagsvá. Allt eru þetta loftslagsvísindamenn. Svikamyllan áfram þótt náttúruvísindamenn sem standa undir nafni sýna með rökum keisarann klæðalausan.

Hvers vegna?

Stutta svarið er peningar.

Í viðtengdri frétt segir af fyrirtækinu Carbfix. Tilfallandi hefur áður fjallað um stórkostlegan árangur fyrirtækisins fyrr á þessu ári, sjá hér og hér. Kjarni málsins:

Landsvirkjun og OR eru á kafi í hókus-pókus hagfræðinni þar sem peningar vaxa á trjám. Öllu heldur: fjármagn er búið til úr koltvísýringi, CO2.

Dótturfélag OR, Carbfix, fær uppslátt í þýsku útgáfunni Die Welt fyrir að þróa aðferð að dæla koltvísýringi úr andrúmsloftinu ofan í jörðina. 

Eldgosið í Fagradalsfjalli losar um 10 til 11 þúsund tonn af koltvísýringi, CO2, á dag, segir Jarðvísindastofnun. Fyrsta og stærsta heildstæða lofthreinsi- og förgunarstöðin í heiminum við Hellisheiðarvirkjun fangar 4 þúsund tonn af CO2 á ári.

Jú, þið lásuð rétt. Minna en hálfsdags framleiðsla litlu eldsumbrotanna í Fagradalsfjalli fer ofan í holu á Hellisheiði Á EINU ÁRI.

Landsvirkjun selur fyrir milljarða á ári upprunavottorð, sem er nútímaútgáfa aflátsbréfa miðalda. Upprunavottorðin eru keypt af orkusóðum í Evrópu til að sýna fram á orkuvæna framleiðslu. Vegna sölu á upprunavottorðum/aflátsbréfum er íslensk orka ekki lengur græn nema gegn gjaldi.

Hókus-pókus hagfræðin býr til peninga úr þeirri firru að koltvísýringur sé okkur lifandi að drepa. Veruleikinn er sá að ef við útrýmum koltvísýringi úr andrúmsloftinu jafngilti það sjálfsmorðssáttmála, segir William Happer loftslagsvísindamaður.

Carbfix, og hugmyndin að baki, er milli steins og sleggju. Í einn stað skiptir engu máli þótt einhverju smámagni af CO2 er dælt ofan í jörðina. Í annan stað, ef svo stórundarlega vildi til, að Carbfix fyndi aðferð að taka úr andrúmsloftinu stóran hluta koltvísýrings stafaði lífríki jarðarinnar hætta af. Án koltvísýrings verður engin ljóstillífun. Trjám og plöntum yrði útrýmt, jörðin stæði eftir sem eyðimörk.

Ef menn græða á að trúa blekkingum þá trúa menn blekkingum. Carbfixið er örlítill hluti af viðskiptamódeli en segir nokkra sögu um blekkinguna að baki.

Hugmyndafræði á skjön við veruleikann gengur svo lengi sem henni er haldið uppi með valdi, fjármagni og trúarkreddum. Fyrr heldur en seinna sigrar raunheimur fantasíuna. Þeir verða margir meintir sérfræðingarnir sem endurskrifa ferilsskrána og þykjast hvergi hafa komið nærri vitleysunni sem fjármagnaði starfsframann.

Þróa nýja aðferð til að mæla bindingu koldíoxíðs

Ísland heimsþorp hælisleitenda

Rúmlega 100 milljónir manna eru flóttamenn í heiminum, skv. Flóttamannahjálp Sameinuðu þjóðanna. Þegar hælisiðnaðurinn fréttir að íslensk stjórnvöld bjóði upp á búsetuúrræði og velferðarþjónustu til frambúðar fyrir ólöglega hælisleitendur verður straumnum beint hingað.

Ekki þarf nema örlítið brot af 100 milljónum flóttamanna að koma til Íslands, 0,1 prósent er 100 þúsund, til að hér verði heimsþorp hælisleitenda.

Alþjóðlegi hælisiðnaðurinn á talsmenn hér á landi. Á alþingi starfa hælisþingmenn sem beint og óbeint hagnast á innstreymi hælisleitenda. Úr skjólstæðingi má fá sauðtryggan kjósanda, þegar búið er að útvega ríkisborgararétt.

Því lengur sem ólöglegur hælisleitandi dvelur hér á landi því hærri verður lögfræðiþóknunin. Skattfé almennings borgar allt; fæði, húsnæði, velferðarþjónustu og lögfræðiþjónustu. Fyrir ólöglega hælisleitendur.

Sigmundur Davíð formaður Miðflokksins skrifar færslu á Facebook af þessu tilefni:

Fólk sem hefur jafnvel dvalist hér í 3 ár með húsnæði, uppihald, þjónustu og lögfræðiaðstoð á kostnað skattgreiðenda og ítrekaðar áfrýjanir þar til kerfið hefur sig loks í að segja að rétturinn hafi aldrei verið til staðar.
Enginn í ríkisstjórninni virðist áhugasamur um að hugleiða eðli vandans, hvað þá taka á honum. [...]
Þetta ástand felur ekki í sér mannúð. Stjórnleysið og getuleysið kemur í veg fyrir að við nýtum möguleika okkar á að hjálpa sem flestum þeirra sem eru í mestri neyð.

Laukrétt hjá formanni Miðflokksins.

 

Vinnur að frumvarpi um búsetuúrræði með takmörkunum

Prigó­sjín, valdaránið og Pútín

Ef flugvél Prigó­sjín forsprakka Wagner málaliða var skotin niður rétt utan Moskvu eru allar líkur að valdaránstilraunin 24. júní hafi ekki verið sviðsett heldur föðurlandssvik. Drápið sé málagjöldin. 

Gagnrýni Prigó­sjín á yfirstjórn hersins gekk út á að rússneski herinn stígi alltof varlega til jarðar í Úkraínu. Ef frá eru taldar fyrstu vikur innrásarinnar, þegar beitt var leifturstríði, mallar rússneska hernaðarvélin hægt en stöðugt. Vestrinu og Úkraínu skal þrjóta fyrr örendið en Rússum er herfræðin. Engin meginbreyting er á herfræði Kremlarbænda eftir að stöðustríðið tók við af leiftursókninni í fyrravor.

Prigó­sjín er áhættusækinn og krafðist aukinnar hörku. Þar sem foringi Wagner-hópsins er ekki hermaður heldur herskár auðmaður er engin leið að sjónarmið hans fengju hljómgrunn nema með stuðningi valdamikilla einstaklinga í yfirstjórn hersins, - sem hefðu þá verið bandamenn hans í valdaránstilrauninni.

Færu Rússar halloka á vígvellinum gætu áhrifamenn í herstjórninni gripið til örþrifaráða. Stöðustríðið þróast Rússum í vil. Lítil efni eru til örvæntingar í þeirra herbúðum. Það eru ekki unglingar á gelgjuskeiði sem stýra hernum.

Surovíkin heitir hershöfðinginn sem fór fyrir hernaðaraðgerðum Rússa. Þangað til í síðustu viku að það spurðist út að Surovíkin væri fluttur til í starfi. Var hann bandamaður Prigósjín? Sé það tilfellið mun hann ekki kemba hærurnar. Landráð á stríðstíma er meira en brottrekstrarsök.

Eftir valdaránstilraunina fluttu Wagner-liðar til Hvíta-Rússlands, sem nánast er hjálenda Rússlands. Í herbúðum þeirra stendur yfir undirbúningur að endurnýjaðri aðild að stríðsátökum. Sjálfur valhoppaði Prigó­sjín milli landa, var oft í Rússlandi en fór líka til Afríku. Auðvelt skotmark í tvo mánuði eftir meinta tilraun til valdaráns. Hafi völd Pútín staðið tæpt 24. júní er 60 daga friðhelgi landráðamanns auglýsing um veikleika valdstjórnarinnar. Valdhafar opinbera ekki veikleika sína, síst á stríðstíma.

Engu að síður. Með Prigó­sjín í flugvélinni voru sex af æðstu yfirmönnum Wagner-liða. Hafi vélin verið skotin niður að undirlagi Pútín var í einum rykk gert út um helstu fyrirliða málaliðasveitarinnar. Trauðla gert nema Wagner-liðar ógnuðu öryggishagsmunum ríkisins. Vel að merkja, ekki er enn staðfest að Prigó­sjín sé meðal hinna látnu, aðeins að hann hafi verið á farþegaskrá.

En var flugvélin skotin niður? Ræma af hrapi vélarinnar sýnir að hún kemur niður í heilu lagi. Flugskeyti sem hittir flugvél ofar jörðu sprengir hana í lofti.

Tilfallandi telur enn að valdaránstilraunin 24. júní hafi verið sviðsett. Er þó ekki jafnviss í sinni sök og hann var 25. júní.

 

 

 

Tilgáta um aflýstan biskupsfund

Á föstudag boðaði biskup Íslands í samstarf við samtökin Engin landamæri (No Borders) til fundar vegna ólöglegra hælisleitenda, sem vísað hafði verið úr landi. Fundinn átti að halda í fyrradag, mánudag. Í samstarfi við fjölmiðla, sem fengu boðskort, átti að kúga stjórnvöld til að samþykkja ólöglega hælisleitendur. Hótunin, sem sveif yfir vötnum, var sú að tilgreindir ráðherrar yrðu úthrópaðir sem níðingar. Bannfæringarkraftur biskups átti að gera útslagið. 

En hvergi sjást fréttir um að fundurinn hafi verið haldinn. Ekki múkk frá biskupsstofu, No Borders-félögunum né fjölmiðlum. Fundinum var aflýst án skýringa.

Tilfallandi tilgáta er að viðtengd frétt frá mánudeginum sé skýringin. Þar segir að útlendingur hafi kveikt í heimilisbíl lögreglukonu.

Frekari rökstuðningur tilgátunnar er í Morgunblaðsgrein eftir Einar S. Hálfdánarson hæstaréttarlögmanns sem birtist í gær. Þar segir Einar

Útlendir glæpamenn, Sómalar, Palestínumenn og Albanar, eru farnir að hóta lögreglumönnum lífláti og fjölskyldum þeirra. „Við getum komist að hvar þú þú átt heima“ (sem reyndar ætti að vernda lögreglumenn gegn líkt og í öðrum löndum). Svo fylgja enn alvarlegri hótanir.

Tilgátan er þessi. Íkveikjan á bíl lögreglukonunnar tengist ólöglegum hælisleitendaiðnaði sem hefur fest rætur hér á landi. Ofbeldismenn og dólgar ganga lausum hala og þykjast á flótta. Ef ekki er farið að vilja þeirra er hótunum fylgt eftir. Biskup Íslands áttaði sig á að hann væri kominn í vafasaman félagsskap, svo vægt sé til orða tekið, og afboðaði aðild sína að fundi sem myndi blessa hryðjuverk. Þar með var fundinum sjálfhætt. Án biskups stóðu eftir öfgasamtök og meðreiðarsveinar.

Það rennir frekari stoðum undir tilgátuna að hælisþingmenn fara heldur hljótt, aldrei þessu vant. Höfuðmiðill hælisiðnaðarins, RÚV, er farinn að flytja fréttir um að fylgja eigi landslögum í málefnum hælisleitenda. Í gærkvöld fékk þó Helga Vala að þjóna sinni lund á Efstaleiti. Samhengið er að aflýsti fundurinn á mánudag er aftur kominn á dagskrá í dag. Hælisþingmenn, biskupinn og No Boarders-félögin heyktust á mánudagsfundinum en hafa unnið á bakvið tjöldin í tvo sólarhringa að skrapa saman í miðvikudagsmessu.

Enginn fjölmiðill varpar ljósi á hvað gerðist á bakvið tjöldin, hvers vegna ekkert varð úr blessun biskups á ólöglegu athæfi á boðuðum fundi í fyrradag. Dagana á undan kappkostuðu flestir miðlar að flytja fréttir um að stefna hælisiðnaðarins ætti að ráða en íslensk lög víkja. Nú ber svo við að fundurinn er aftur kominn á dagskrá. Engar skýringar, ekkert samhengi, aðeins sundurlausar uppákomur.

Þetta er orðið einkenni íslenskra fjölmiðla. Þeir starfa mest á bakvið tjöldin. Þingmenn, sem fara með fjárveitingavaldið, tryggja fjölmiðlum rekstarfé með ríkisframlögum. Krefjast á móti málafylgju í formi fréttaflutnings.

Fjölmiðlafréttir eru í æ meira mæli verkfæri pólitískra aktívista í blaðamannastétt, - sem víla ekki fyrir sér aðild að glæpum. Eins og dæmin sanna.

 

 

„Ég veit hvar börnin þín fara í skóla“

Hvers vegna varð að byrla Páli skipstjóra?

Ef síma Páls skipstjóra Steingrímssonar hefði verið stolið og komið í hendur RÚV, Stundarinnar og Kjarnans (RSK-miðla) sem myndu hafa nýtt sér gögn úr símanum til fréttaflutnings en síðan fargað símanum væri tilvera sakborninga í röðum blaðamanna öllu þekkilegri en hún er í dag.

Ekki er gott að eiga aðild að gagnastuldi. Öllu verra er aðkoma að byrlun, sem í besta falli er líkamsárás en í versta falli morðtilraun.

Hvers vegna tóku blaðamenn RSK-miðla þátt í ráðabruggi, stela síma skipstjórans, afrita og skila tilbaka, sem augljóslega fól í sér að skipstjórinn yrði gerðu óvígur í einn til tvo sólarhringa hið minnsta? Hvers vegna ekki að láta sér nægja símastuld?

Hugmyndin var að skipstjórinn yrði þess ekki var að síminn hefði komist í hendur óvandaðra einstaklinga. Fréttir upp úr símanum áttu að koma eins og þruma úr heiðskíru lofti. Þar sem um var að ræða tölvupósta var mögulegt að þeir kæmu frá minnst tveim aðilum (enginn sendir tölupóst á sjálfan sig) eða fleiri. 

Þess vegna var ekki nóg að stela síma og eyða honum. Það varð að skila honum tilbaka. Grunur átti ekki að vakna um stuld. Og jafnvel þótt grunur vaknaði átti ekki að vera hægt að sanna stuldinn - símtækið var jú í höndum skipstjórans. 

Páli var byrlað 3. maí 2021, símanum var komið í hendur blaðamanna daginn eftir. Ekki síðar en 5. maí voru blaðamenn búnir að gera sér grein fyrir innihaldi símans og gátu skrifað fréttir.

En engin frétt birtist fyrr en 21. maí þegar Stundin og Kjarninn birtu samtímis áþekka frásögn um meinta skæruliðadeild Samherja en þar átti skipstjórinn að vera höfuðpaurinn.

Hvers vegna biðu blaðamenn með fréttir sem voru tilbúnar 6. eða 7. maí en ekki birtar fyrr en tveim vikum síðar?

Í snjallsímum er staðsetningarforrit sem skráir ferðalag símans allt að tvær vikur aftur í tímann. Blaðamenn gerðu ráð fyrir að skipstjórinn tæki til við að nota símann eftir að hann kæmist til meðvitundar.

Blaðamenn vissu nákvæmlega hvenær skipstjórinn komst til meðvitundar enda voru þeir í reglulegu sambandi við eiginkonu hans þáverandi sem sá um byrlun og símastuld fyrir RSK-miðla. Páll lá milli heims og helju á gjörgæslu í tvo daga en fékk meðvitund 6. maí.

Frá 6. maí til birtingar á fyrstu fréttum þann 21. maí eru 15 dagar. Blaðamenn töldu víst að staðsetningarbúnaður símans hefði uppfærst reglulega og geymdi ekki lengur staðsetninguna þá daga sem tækið var í þjófahöndum.

Skipstjórinn hafði á hinn bóginn tekið eftir að eitthvað athugvert væri við símann og slökkt á uppfærslubúnaði. Hann kærði málið til lögreglu 14. maí, viku áður en fyrstu fréttir birtust.

Til að sími Páls yrði sem skemmstan tíma í höndum blaðamanna varð að gera ráðstafanir fyrir byrlun. Frá eiginkonu skipstjórans fengu blaðamenn upplýsingar um hvernig símtæki hann notaði. Þóra Arnórsdóttir á RÚV keypti í apríl samskonar síma og Páll notaði, af gerðinni Samsung.

RÚV-síminn, sem notaður var til afritunar, fékk númerið  680 2140. Sími Páls er með keimlíkt númer, 680-214X. Í yfirlitum símfyrirtækja yfir notkun á símum er tveim síðustu tölustöfum símnúmera sleppt af persónuverndarástæðum. 

Blaðamenn RSK-miðla töldu sig hafa búið svo um hnútana að engin leið væri að rekja slóðina. Blaðamenn ætluðu, ef á þá yrði gengið, að svara því til að nafnlaus heimildamaður hefði látið þeim í té gögnin og skáka í skjóli laga sem vernda heimildamenn. 

En þar sem atlagan var byrla-stela-skila, en ekki einfaldur þjófnaður, var morgunljóst þegar í upphafi glæpsins hver sá um framkvæmdina; alvarlega andlega veik þáverandi eiginkona Páls skipstjóra.

Tvennt vekur sérstaka furðu í málinu öllu. Í fyrsta lagi að blaðamenn, sem eiga að heita heilir á geði, telji sómasamlegt að hagnast á svívirðilegum glæp, þar sem fársjúk kona gerir lífshættulega atlögu að eiginmanni sínum og tekur eigur hans ófrjálsri hendi. Í öðru lagi, að enginn blaðamannanna skuli hafa stigið fram, eftir að málið opinberaðist, játað vitneskju sína og beðist fyrirgefningar.

Ekki ætti að þurfa að segja upphátt að blaðamennska er ósamrýmanleg glæpastarfsemi. 

 

 

Ráðuneyti aðstoðar í byrlunarmáli Páls skipstjóra

Utanríkisráðuneytið aðstoðar lögreglu að fá upplýsingar um tölvupóstsamskipti eiginkonu Páls skipstjóra Steingrímssonar við blaðamenn. Skipstjóranum var byrlað 3. maí 2021, síma hans stolið og hann afritaður. Efni úr símanum birtist samtímis í Stundinni og Kjarnanum 21. maí og daga og vikur þar á eftir.

Samskipti blaðamanna við eiginkonu Páls hófust áður en hún byrlaði honum. Lögreglan er með skrá yfir símtöl sem fóru á milli en ekki innihald þeirra. Tölvupóstum sem fóru á milli konunnar og blaðamanna var eytt eftir að lögreglurannsókn hófst í kjölfar kæru Páls skipstjóra 14. maí 2021. Þar sem konan er með google-tölvupóst er afrit geymt hjá tölvurisanum.

,,Já, Google er með gmail-ið. Við höfum ekkert farið í að skanna síma hjá blaðamönnunum. En við höfum áhuga á upplýsingum frá síma konunnar," segir Eyþór Þorbergsson saksóknari. Treglega gekk að fá tölvupósta konunnar og leitaði lögreglan til utanríkisráðuneytisins að hlutast til um að tölvupóstar eiginkonunnar yrðu afhentir.

Framan af beindist rannsókn lögreglu að meðferð blaðamanna á einkagögnum skipstjórans. Eiginkona Páls játaði að hafa byrlað honum, stolið síma hans og afhent blaðamönnum. Eftir afritun var eiginkonunni falið að skila símanum til Páls sem lá meðvitundarlaus á gjörgæslu.

Fjórir blaðamenn voru boðaðir í yfirheyrslu í byrjun árs 2022. Þórður Snær Júlíusson, Arnar Þór Ingólfsson, Aðalsteinn Kjartansson allir á Heimildinni sem varð til úr Stundinni og Kjarnanum, og Þóra Arnórsdóttir hjá RÚV. Síðar fékk Ingi Freyr Vilhjálmsson á Heimildinni stöðu sakbornings, líkt og fjórmenningarnir.

Þegar leið rannsókn málsins komu fram afgerandi vísbendingar um að blaðamenn hafi verið í sambandi við eiginkonu skipstjórans áður en hún byrlaði og stal. Þóra Arnarósdóttir keypti í apríl 2021 Samsung-síma, samskonar og Páll notaði, og fékk á símann óskráð númer 680 2140, en sími Páls er með keimlíkt númer, eða 680-214X. Samsung-síminn sem Þóra keypti var notaður til að afrita síma skipstjórans og til samskipta, m.a. við eiginkonu hans.

Eftir að uppvíst varð um kaup Þóru á Samsung-símanum, í byrjun árs 2023, hætti hún á RÚV og fékk stöðu hjá Landsvirkjun. Aðrir starfsmenn á fréttastofu RÚV sem látið hafa af störfum í skugga lögreglurannsóknarinnar eru Rakel Þorbergsdóttir fréttastjóri og Helgi Seljan fréttamaður. Tilkynnt var um starfslok Rakelar haustið 2021. Helgi kvaddi RÚV í byrjun árs 2022.

Páll skipstjóri Steingrímsson var í sumar í viðtali hjá Frosta Logasyni. Hann boðaði að í kjölfar rannsóknar lögreglu, væntanlegrar ákæru og dómsmáls, muni hann höfða einkamál á hendur blaðamönnum. Í viðtalinu spyr Frosti Pál hvers vegna hann hafi ekki komið fram í fjölmiðlum til útskýra sína hlið á málinu.  - Ég hef tvisvar boðist til að koma fram í RÚV, en verið hafnað í bæði skiptin, sagði skipstjórinn.   

Þau rannsóknargögn sem komin eru í umferð til sakborninga og brotaþola ná einkum yfir tímabilið frá ágúst 2021. Þau sýna veruleg samskipti blaðamanna við fyrrum eiginkonu skipstjórans, sem glímir við andlega vanheilsu og hefur oftar en einu sinni verð öryggisvistuð á sjúkrastofnun. Gera má ráð fyrir að samskipti blaðamanna við konuna hafi byrjað í mars eða apríl 2021 en skipstjóranum var byrlað 3. maí 2021, sem fyrr segir.

Í viðtalinu við Frosta rekur Páll skipstjóri atburði í lok apríl og byrjun maí 2021 sem leiddu til byrlunar og gagnastuldar. Hann víkur að þeirri sérkennilegu staðreynd að Aðalsteinn Kjartansson fréttamaður RÚV hætti fyrir hádegi á Efstaleiti þann 30. apríl og er orðinn blaðamaður á Stundinni eftir hádegi - þrem dögum fyrir byrlun. Á Stundinni sá Aðalsteinn um að skrifa fréttir upp úr síma skipstjórans. 

Vegna sumarleyfa og annarra anna hefur verið hægagangur í rannsókninni síðustu vikur. Nú þegar dregur að hausti tekur réttvísin til við að færa málið í endanlegan búning. 

Woke fellir Íslandsbanka og RÚV

Fyrir fjórum árum gerðist Íslandsbanki woke, sem er útlent orð yfir pólitískan rétttrúnað. Edda Hermannsdóttir, markaðs- og samskiptastjóri Íslandsbanka, útskýrði rétttrúnaðarstefnu bankans í grein á Vísi. Bankinn ætlaði framvegis að berjast gegn koltvísýringi í andrúmslofti, plasti og feðraveldinu í fjölmiðlum.

Við gerum þetta fyrir börnin og framtíðina, skrifaði samskiptastjóri Íslandsbanka.

Fjórum árum síðar er Íslandsbanki uppvís að mestri spillingu í sögu fjármálastofna hér á landi, sé mælikvarðinn stjórnvaldssektir.

Heilindi og pólitískur rétttrúnaður eru andstæður. Stofnun eða fyrirtæki sem tekur upp pólitískan rétttrúnað segir skilið við grunnstarfsemi sína en gefur sig á vald hugmyndafræði þar sem tilgangurinn helgar meðalið. 

Viðkvæðið verður: við erum að bjarga heiminum og höfum þar með heimild til að brjóta lög og reglur.

Í umfjöllun um stefnuyfirlýsingu Eddu samskiptastjóra fyrir fjórum árum var RÚV tekið sem fyrirmynd um woke-fræði í framkvæmd.

RÚV þverbrýtur reglur og viðmið um fréttaflutning til að bjarga heiminum. Fréttamenn RÚV eru sakborningar í lögreglurannsókn á byrlun- og gagnastuldi. Pólitískur rétttrúnaður réttlætir að andlega veikum einstaklingum er misþyrmt af fréttamönnum RÚV, sem þjóna hugmyndarfræði þar sem rangt verður rétt.

VR og ASÍ hafa sagt upp viðskiptum við Íslandsbanka. Þjóðin mun segja upp viðskiptum við RÚV í vetur, - þegar lögreglurannsókn afhjúpar spillingu og lögbrot á Glæpaleiti.

ASÍ hættir í viðskiptum við Íslandsbanka

Umboðslaus biskup félagi No Borders

Félagið Engin landamæri, No Borders, vill að hver sem er getið komið frá útlöndum og fengið frítt fæði og uppihald á kostnað íslenskra skattgreiðenda. Biskup Íslands er genginn til liðs við Engin landamæri.

Fer vel á því. Biskup Íslands er umboðslaus en lét undirmann sinn kvitta upp á ráðningarsamning. Trú, von og sjálftekt ríkisframlaga er Agnesarboðskapur til heimsbyggðarinnar.

Frá útlöndum munu þyrpast smælingjar á íslenska ríkisjötu í boði Agnesar biskups. Ferðaskrifstofan í Venesúela opnar útibú í öðrum ríkjum Suður-Ameríku, fyrst á Kúbu. Öreigasósíalista þyrstir í íslenska velferð.

Liðsmenn spámannsins heimsóttu Frón frá Norður-Afríku fyrir hartnær 400 árum að sækja sér verðmæti. Í boði biskups koma þeir nú á Saga Class. Gistingin er þegar til reiðu, í Hvalfirði. Meira þarf til. Á Ræningjatanga í Vestmannaeyjum mætti reisa viðeigandi húsnæði með útsýni til suðurs. Nafnið er þegar komið, Júlíborg, til að minnast heimsóknarinnar 16. júlí 1627.

Örlæti Agnesar á annarra fé og velferð verður ekki kynnt á fjöldasamkomu, samkvæmt fréttatilkynningu frá biskupstofu No Borders. 

Fund­ur­inn er ekki op­inn, hann er ætlaður þeim sem að hon­um standa, fjöl­miðlum og ráðherr­um viðeig­andi mála­flokka.

Skýtur hér skökku við. Hví má þjóðin ekki samfagna Agnesarboðskap? Skjólstæðingar Tryggingastofunnar ríkisins myndu ábyggilega flykkjast á samkomuna. Þeir vita manna best að af nógu er að taka þegar kemur að framlögum til bágstaddra og vildu glaðir gefa sitt til að frelsa heimsbyggðina frá ,,óöryggi og skorti á mannlegri reisn."

Agnesi án landamæra fer eins og hælisþingmönnum. Öryggi þeirra og reisn helst í hendur við aðgang að vasa náungans. 

 

 

Öryggi og mannleg reisn í hættu

Woke, íslam og stóri bróðir gegn tjáningarfrelsi

Réttur einstaklinga til frjálsrar tjáningar á vesturlöndum fékkst eftir harðvítuga baráttu við ríkisvald einveldis. Vegferð vesturlanda frá einveldi til lýðræðis hefði ekki verið farin án frjálsra orðaskipta.

Blikur eru á lofti. Frelsi manna til að tjá hug sinn er undir ágjöf innan vesturlanda, utan þeirra og frá þeim sem síst skyldi; lýðræðislega kjörnum stjórnvöldum.

Vestræna woke hugmyndafræðin, oft kölluð pólitískur rétttrúnaður, segir það hatursorðræðu ef andmælt er firrum eins og að hægt sé að fæðast í röngum líkama, að kynin séu fleiri en tvö og hægt sé að vera karl fyrir hádegi en kona síðdegis án þess að annað komi til en hugdetta. Trúarkredda woke er að ranghugmyndir um lífið og tilveruna eigi meiri tilverurétt en orðræða um einföld og augljós sannindi. Kreddan er orðin það viðtekin að fólk fer í felur með þekkingu sína og sannfæringu af ótta við einelti á samfélagsmiðlum.

Í trúarmenningu íslam er tjáningarfrelsið ekki hátt skrifað. Múslímar halda í hugmyndina um guðlast sem vestræn kristni varpaði fyrir róða. Í viðtengdri frétt er haft eftir danska utanríkisráðherranum að það sé ,,ekki í lagi að Dan­mörk fengi á sig það orðspor að Kór­an­brenn­ur væru þar stundaðar í boði rík­is­ins."

Sögulega varð tjáningarfrelsið ekki að mannréttindum fyrir tilstilli ríkisvaldsins heldur í krafti baráttu einstaklinga og félagasamtaka gegn alræði ríkisvaldsins. Ráðherra sem talar um frjálst orð ,,í boði ríkisins" snýr hlutunum á hvolf. 

Sjónarmið danska ráðherrans varpa heldur nöturlegu ljósi á stöðu frjálsrar orðræðu. Látið er eins og stóri bróðir, ríkisvaldið, hafi í hendi sér að kippa að sér hendinni, verja ekki rétt manna að tjá hug sinn, ef það valdi óþægindum, eða, guð hjálpi okkur, móðgi einhvern.

Engin ástæða er til að lofa bókabrennur, hvort heldur á helgiritum eða öðrum bókmenntum. En ósmekklega tjáningu verður að verja til að sú boðlega fái að lifa. Annars verður frjáls orðræða nafnið tómt, háð leyfisveitingu hins opinbera líkt og á tíma einveldis.

Lars Løkke Rasmus­sen utanríkisráðherra Dana gerir víðreist í leit að rökum gegn málfrelsi:

Sagði hann mik­il­vægt að stöðva brenn­ur trú­ar­rita, sér­stak­lega í ljósi stríðsins í Úkraínu sem sýni mik­il­vægi þess að eiga sterka banda­menn víðs veg­ar um heim.

Danska ríkisvaldið, líkt og það íslenska, styður stjórnvöld í Úkraínu. Úr þeirri stjórnarstefnu eru smíðuð rök sem banna fólki að brenna bækur af ótta við að móðga múslíma.

Líkt og aðrir stjórnmálamenn stendur Lars Lökke á berangri umræðunnar og leitar sér að haldreipum. Dagskrárvald umræðunnar er að stórum hluta komið í hendur öfgaafla sem gefa lítið fyrir undirstöðu allra mannréttinda, sem er málfrelsið, en þess meira fyrir réttinn til að hneykslast.

Byltingin étur börnin sín er viðkvæði úr frönsku stjórnlagabyltingunni. Mannréttindi, sem verða að móðgunarréttindum, éta undan sér.  

  

Íhuga bann við Kóranbrennum