17. júní mótmælin og pólitískt ástleysi Dags og Halldórs

Alla stjórnmálamenn dreymir um pólitíska ást almennings. Það er sú ást sem skilur á milli feigs og ófeigs í stjórnmálum, valda og valdleysis.

Sumir stjórnmálamenn verða svo ástsjúkir að þeir skilja dómgreindina eftir heima þegar þeir mæta í fjölmiðla að viðra sig upp við fólk. Fréttablaðið leiðir fram tvo slíka í dag. Dagur B. Eggertsson borgarstjóri vinstrimanna og Halldór Auðar Svansson háseti hans mæla 17. júní mótmælunum bót.

17. júní mótmælin voru gegn þjóðhátíðardegi Íslendinga. Þau voru hróp og öskur gegn stúlknakór, truflun á ljóðmæli fjallkonunnar og gjamm fram í ræðu forsætisráðherra.

Stjórnmálamenn sem taka undir mótmælasóðaskap af þessu tagi skipa sér í lið með þeim sem vanvirða og fyrirlíta sameign okkar. Að kaupa sér ást slíks safnaðar segir heilmikið um Dag og Halldór.

Athugasemdir

[Kristján Þorgeir Magnússon, 18.6.2015 kl. 11:32]

Viðbrögð Dags B. Eggertssonar voru fyrirsjáanleg.  Það voru jú skoðana- og flokkssystkin hans sem stóðu að skrílslátunum.  "Mótmælendur" úr hópi vinstri manna opinbera sig einatt sem vitfirrtan skríl.  Það gera þeir sem hægra megin eru aldrei.  Skrílslæti eru þeim einfaldlega ekki að skapi,- virðast almennt fágaðri.