Guðlaugur Þór hjálpar til að kála ríkisstjórninni

RÚV, 365-miðlar og DV eru í viku búnir að útmála ríkisstjórnina sem svikastjórn er þverbrýtur kosningaloforð. Spjótin standa einkum á Sjálfstæðisflokknum en Framsóknarflokkurinn fær einnig fyrir ferðina.

RÚV er sérstaklega ósvífið í málflutningi sínum og velur sjálfstæðismenn af kostgæfni sem hallmæla ríkisstjórninni og því að hún sé að framfylgja stefnu beggja stjórnarflokka og stjórnarsáttmálanum. Ekkert fer fyrir stuðningsyfirlýsingum við ríkisstjórnina sem þó eru fjölmargar frá ýmsum félögum sjálfstæðismanna.

Við þessar kringumstæður verða stjórnarþingmenn að standa saman ef ekki á illa að fara. Sumir sjá sér þó leik á borði að leika einleik og gefa stjórnarandstöðunni undir fótinn. Guðlaugur Þór Þórðarson þingmaður Sjálfstæðisflokksins tekur í skringilegu viðtali við RÚV að undir gagnrýni á ríkisstjórnina. 

Það er ekki í fyrsta sinn sem Guðlaugur Þór stundar undarlega pólitík. Hann fór fyrir hönd Baugsmanna gegn Birni Bjarnasyni þáverandi dómsmálaráðherra í prófkjöri Sjálfstæðismanna fyrir kosningarnar 2007 - þegar útrásarauðmenn vildu koma Birni fyrir kattarnef. 

Fylgi stjórnarflokkanna undir 40%

Lýðræðisbresturinn og pólitískur skæruhernaður

Í júní 2009 sögðust 76 prósent þjóðarinnar vilja þjóðaratkvæðisgreiðslu um það hvort Ísland ætti að sækja um aðild að Evrópusambandinu. Ríkisstjórn Samfylkingar og VG skellti skollaeyrum og sendi umsókn til Brussel mánuði síðar á grundvelli naums meirihluta á alþingi.

Pólitískt umboð skorti fyrir umsókninni 2009 enda Samfylkingin eini ESB-flokkurinn og fékk tæplega 30 prósent fylgi.

Ríkisstjórn Framsóknarflokks og Sjálfstæðisflokks er með skýrt pólitískt umboð til að afturkalla ESB-umsóknina enda báðir stjórnarflokkarnir með það á stefnuskrá sinni að hagsmunum Íslands er betur borgið utan Evrópusambandsins en innan þess.

Pólitískur skæruhernaður RÚV og 365miðla í samvinnu við Samfylkinguna getur ekki komið í veg fyrir að alþingi lagfæri lýðræðisbrestinn frá 16. júlí 2009 og afturkalli ESB-umsóknina.

Tæp 82% vilja greiða atkvæði

Eitthvað rotið í landi femínismans

Ein þekktasta baráttukona femínista hér á landi, Hildur Lillendahl, er uppvís grófu netofbeldi, sem skv. fréttum fól í sér hvatningu til líkamsmeiðinga og jafnvel manndrápa, auk þess að hæðast að holdafari kvenna.

Harpa Hreinsdóttir gerir prýðilega samantekt á Hildi og hvernig svona persóna verður til í heimi nýmiðlunar.

Einstaklingurinn Hildur Lillendahl er eitt en femínismi  annað. Engu að síður þurfa talsmenn femínisma að staldra við og spyrja sig hvernig það gat gerst að manneskja eins og Hildur varð að átrúnaðargoði.

Hildur beitti sjálf netofbeldi

BÍ svívirðir Vigdísi og tjáningarfrelsið

Tjáningarfrelsið er fyrir allar skoðanir, ekki aðeins þær sem Blaðamannafélag Íslands samþykkir fyrir hönd hagsmuna félagsmanna sinna sem lifa á auglýsingafé.

Vigdís Hauksdóttir er í fullum rétti að hvetja til þess að auglýsendur beini fjármunum sínum þangað sem þeir fá annað og meira en kvenfyrirlitningu fyrir peningana sína. 

Tjáningarfrelsið er ekki í þágu auglýsenda eða fjölmiðla heldur einstaklingsins og almannahags.

Blaðamannafélag Íslands er orðið að ómerkilegri sjoppu sérhagsmuna með þessari makalausu fordæmingu á tjáningarfrelsinu.

Vigdís vó að tjáningarfrelsinu

Uppgjöf ESB-sinna á Austurvelli

Á vefmyndavélum sést glöggt að fáir nenna að hlýða kalli formanns Samfylkingarinnar um liðssöfnun. Fáein hundruð mæta á Austurvöll að styðja eina ESB-flokk landsins, sem fékk 12,9 prósent fylgi í síðustu kosningum.

Samfylkingardeild sjálfstæðismanna gafst upp í morgun, með leiðara Ólafs Stephensen í Fréttablaðinu þar sem hann treysti sér ekki til að stofna ESB-flokk með þeim fáeinu tugum sjálfstæðismanna sem vilja segja okkur til sveitar hjá Brussel.

ESB-sinnar ættu núna að vinna heimavinnuna sína, sem þeir gerðu ekki áður en umsóknin var send umboðslaus sumarið 2009, og taka þátt í málefnalegri umræðu um Evrópumál en láta af pólitískum skæruhernaði.

Árni Páll boðar liðssöfnun

Lýðræðið 2009 og lýðræðið 2014

Í kosningunum vorið 2009 fengu tveir flokkar meirihluta á alþingi, Samfylking með tæp 30 prósent fylgi og VG með 22 prósent fylgi. Í kosningabaráttunni boðaði Samfylkingin að aðild að Evrópusambandinu en VG hélt þeirri stefnu á lofti að Ísland ætti að standa utan Evrópusambandsins.

Þegar aðeins einn flokkur á alþingi, með tæplega 30 prósent fylgi, vildi inn í Evrópusambandið hefði verið eðlilegt að spyrja almenning í þjóðaratkvæðagreiðslu. Meira en 76 prósent þjóðarinnar vildi fá tækifæri til að segja álit sitt á því hvort ætti að sækja um aðild að Evrópusambandinu.

En það var ekki hlustað á þjóðina og meirihlutinn á alþingi, sem myndaður var með svikum þingmanna VG við stefnu flokksins og nýgefin kosningaloforð, samþykkti með naumum meirihluta að senda umsókn til Brussel.

Í ár ætlar nýr meirihluti á alþingi að bæta fyrir þann lýðræðisbrest sem varð 16. júlí 2009 þegar ESB-umsóknin var án umboðs send til Brussel. Stjórnarflokkarnir báðir, Framsóknarflokkur og Sjálfstæðisflokkur, buðu fram skýra og ótvíræða stefnu um að ferlinu inn í ESB skyldi hætt og ekki endurvakið án þjóðaratkvæðagreiðslu.

Samfylkingin, sem fékk 12,9% fylgi í síðustu kosningum, reynir með öllum tiltækum ráðum að meirihlutavilji þjóðarinnar nái fram að ganga á alþingi. Orðsöfnuður og frammistaða þingmanna Samfylkingar sýnir að forysta flokksins skilur ekki grundvallarreglur lýðræðisins, hvorki 2009 né 2014.

Lýðræðið að engu gert

ESB-sinnar hafna reglum Evrópusambandsins

Ein meginröksemd ESB-sinna hér á landi er að laga- og regluverk Íslands sé verra en það sem Evrópusambandið býður upp á. Samkvæmt þessari röksemd ættu ESB-sinnar að samþykkja reglur Evrópusambandsins um hvernig farið er með aðildarumsóknir. Þar segir

    „Hugtakið „samningaviðræður“ getur verið blekkjandi. Aðildarviðræður snúast um skilyrði og tímasetningar umsækjandans fyrir samþykki, innleiðingu og beitingu ESB-reglna – um það bil 100.000 blaðsíðna af þeim. Þessar reglur (einnig þekktar sem acquis sem er franska og þýðir „það sem hefur verið samþykkt“) eru aftur á móti ekki umsemjanlegar. Fyrir umsækjendur snýst þetta einfaldlega um að samþykkja hvernig og hvenær þeir taki upp og innleiði reglur og málsmeðferðarreglur ESB. Hvað ESB varðar er mikilvægt að það fái tryggingu fyrir dagsetningu og skilvirkni innleiðingar reglnanna hjá hverjum umsækjanda“.

ESB-sinnar hafna á hinn bóginn þessum reglum Evrópusambandsins. Íslenskri ESB-sinnar  harðneita að fara aðlögunarleiðina inn í Evrópusambandið og vilja undanþáguleiðina. En sú leið er einfaldlega ekki til; aðlögunarleiðin er eina leiðin inn í Evrópusambandið.

Svikin loforð rædd um miðja nótt

Füle við Össur: engar varanlegar undanþágur

Það eru engar varanlegar undanþágur frá laga- og regluverki Evrópusambandsins, sagði Stefan Füle stækkunarstjóri ESB á blaðamannafundi með Össuri Skarphéðinssyni þáverandi utanríkisráðherra Íslands.

Hér er hlekkur á ræmu sem útskýrir  málið á rúmlega einni og hálfri mínútu.

Rúmlega sjö tíma hlé á þingi

Ögmundur gegn siðlausri ESB-tækifærismennsku

Í þingkosningum og skoðanakönnunum er margstaðfest að afgerandi meirihluti þjóðarinnar er andvígur aðild að Evrópusambandinu. Aðeins ein leið er inn í Evrópusambandið; aðlögunarferli þar sem umsóknarríki tekur jafnt og þétt upp laga og regluverk ESB. 

Ögmundur Jónasson kallar það siðleysi að þjóð sem andvíg er aðild að Evrópusambandinu haldi sér í aðlögunarferli sem ekki stendur til að ljúka vegna þess að enginn áhugi er fyrri því að ganga ferlið á enda - fara inn í ESB.

Eini tilgangurinn með því að halda ESB-umsókninni til streitu er að réttlæta tilveru Samfylkingarinnar, sem er eini ESB-flokkurinn á landinu.

„Mér finnst þetta ekki siðlegt“

Fækkar á Austurvelli; vinstriþingmenn fara á taugum

Á þriðja degi mótmæla á Austurvelli mættu um þúsund manns, vel innan við þriðjungur þess fjölda sem lét sjá sig á mánudag. Múgurinn á Austurvelli er andlegt eldsneyti þingmanna Samfylkingar og VG sem halda uppi málþófi á alþingi.

Þegar mótmælendum fækkar bresta taugar þingmanna með lélegasta málstaðinn fyrst. Og þess vegna hlaut það að koma í hlut samfylkingarþingmanns að lítillækka sjálfan sig með óhæfu orðbragði.

Þingmenn VG og Samfylkingar telja að svívirðingar séu besta leiðin til að viðhalda áhuga fólks á ESB-umsókn síðustu ríkisstjórnar. Og það segir nokkra sögu um málatilbúnaðinn í öndverðu.

Kallaði ráðherra „helvítis dóna“