Hitler-líking er snara í hengds manns húsi

Þýskur stjórnmálamaður sem líkir Krímtöku Pútíns hins rússneska við yfirtöku Hitler á þýskumælandi héruðum Tékkóslóvakíu fer strangt tekið með rétt mál. Í báðum tilvikum vildu íbúarnir verða hluti af Rússlandi Pútíns annars vegar og hins vegar Þýskalandi Hitlers.

Á hinn bóginn er ferill Hitlers slíkur eftir 1938, þegar Súdeta-Þjóðverjar voru innlimaðir, að sérhver samlíking vð hann ber í bætifláka fyrir óhæfuverk nasista.

Og að maður með reynslu eins og Wolfgang Schäble fjármálaráðherra Þýskalands skuli láta sér detta í hug þessi samlíking er ótrúlegt.

Líkti aðgerðum Pútíns við árásir Hitlers

Facebook-klofningur Sveins Andra

Sveinn Andri Sveinsson lögmaður fékk vettvang í RÚV í hádeginu (nema hvað)  til að auglýsa klofningshótun fáeinna sjálfstæðismanna á Facebook. Þeir vilja ekki una ítrekuðum landsfundarsamþykktum Sjálfstæðisflokksins um að aðlögunarferli Íslands inn í Evrópusambandið skuli hætt.

Sveinn Andri tók fram að hann ætlaði sjálfur ekki að veita klofningsflokknum forystu, en leita til manna eins og Þorsteins Pálssonar og Benedikts Jóhannessonar, besta frænda Íslandssögunnar, til að leiða klofninginn.

Stjórnmálaflokkur sem stofnaður er með það yfirlýsta markmið að kljúfa annan stjórnmálaflokk á meira skylt við pólitíska fjárkúgun en heiðarleg stjórnmál.

Ríkisafskipti og sanngirni

Skuldaleiðrétting heimilanna er ríkisafskipti á nokkuð stórum skala. Pólitísk umræða um kosti og galla ríkisafskipta hlýtur að eiga við skuldaleiðréttinguna.

Í samfélaginu er sátt um að þegar stórfelld áföll dynja yfir eigi ríkisvaldið að nota sameiginlega fjármuni okkar til að bæta skaðann eftir því sem kostur er.

Hrunið var stóráfall og flestum fannst sanngirnismál að þeir sem verst urðu út skyldu fá bættan skaðann - út á það gekk öll umræðan á síðasta kjörtímabili um  ,,skjaldborg heimilanna."

Umræðan leiddi í ljós að fjarska erfitt er að skilgreina sanngirni í samhengi við áhrif hrunsins á efnahag fólks - og því verr sem lengur leið frá hruni.

Skuldaleiðréttingin tekur mið af umræðunni enda líkist hún meira almennri efnahagsaðgerð en ríkisafskiptum í þágu afmarkaðs hóps. Og það eykur sanngirni skuldaleiðréttingarinnar.

 

 

Fríverslun utan ESB er betri kostur

Ísland gat gert fríverslunarsamning við Kína þar sem okkar hagsmunir eru sértækir. Evrópusambandið, sem gerir fríverslunarsamninga fyrir hönd allra aðildarríkja sinna, stendur vörð um víðtæka hagsmuni.

Innan Evrópusambandsins myndu íslenskir hagsmunir vera metnir í samhengi við hagsmuni 500 milljóna annarra íbúa ESB og gefur auga leið að hagsmuni okkar væru léttvægir.

Best fer á því að hver þjóð gæti sinna viðskiptahagsmuna en láti ekki miðstýrt alþjóðabákn sinna þeim.

Betri fríverslunarsamningar utan ESB

Vinstripólitík; í einum flokki en í framboði fyrir annan

Gísli Baldvinsson er félagi í Samfylkingunni en ætlar í framboð fyrir annan flokk í Kópavogi. Formaður Samfylkingar í Kópavogi bað Gísla að segja sig úr flokknum og vísaði til flokkslaga. Gísli neitaði.

Vinstrimenn ómerkja pólitískt starf með því að stofna fleira en eitt pólitískt framboð utan um sama hóp frambjóðenda, sbr. Bjarta framtíð og anga af sama tagi.

Dulargervin sem vinstrimenn klæðast rugla bæði kjósendur, og til þess er leikurinn gerður, en líka grafa þau undan lýðræðinu. 

 

Stór flokkur byggður á minnihlutasjónarmiðum

Nýr hægriflokkur Þorsteins Pálssonar og félaga á að verða leiðandi í stjórnmálum. Við höfum heyrt þennan áður.  Samfylkingin var stofnuð til að verða stór vinstriflokkur. Aðalmál flokksins varð minnihlutapólitíkin um að Ísland ætti að verða aðili að Evrópusambandinu.

Í síðustu þingkosningum fékk Samfylkingin 12,9 prósent út á minnihlutasjónarmiðið um Ísland í ESB.

Flokkur Þorsteins Pálssonar og félaga ætlar að bjóða upp á hægriútgáfu af Samfylkingunni. Sá flokkur getur ekki orðið leiðandi í stjórnmálum en kannski átt sína frægð í fimmtán mínútur eða svo.

Bandaríkin veikjast, ófriðarhorfur aukast

Á tímabilinu eftir fall Berlínarmúrsins voru Bandaríkin eina réttnefnda stórveldið og gátu meira og minna farið sínu fram á alþjóðavettvangi. Viðbrögðin við árásinni á tvíturnana í New York voru innrásir í Afganistan og Írak, - hvorttveggja á vafasömum forsendum.

Bandaríkin riðu ekki feitum hesti frá Miðausturlöndum og tiltrú þeirra beið hnekki. Þrátefli í innanlandsstjórnmálum, sem m.a. leiddi af sér að ríkisstofnanir urðu að loka vegna skorts á fjárheimildum, drógu upp þá mynd að Bandaríkin væru risi á brauðfótum.

Farsakenndar tilnefningar á peningamönnum í embætti sendiherra eru birtingarmynd af bandarískri stjórnsýslu, sem virðist ekki ráða við verkefnið sitt.

Veikari Bandaríki gefa mönnum eins og Pútín Rússlandsforseta tilefni til að prófa sig áfram og kanna hve langt er hægt að komast með hernaðarógn.

Sérfræðingar í sögu og eðli stríðsátaka, t.d. Michael Howard, segja okkur að stríð byrji aldrei vegna tilviljana eða skyndihugdettu ráðamanna. Ákvörðun um að hefja stríð byggir alltaf á rökhugsun og yfirvegun á sóknarfærum og áhættu.

Illu heilli stenst ekki ígrundunin í aðdraganda stríðs nema í helmingi tilfella. Sagan kennir okkur það.

Obama skipti út sendiherraefnum

Norðurslóðir forgangsmál stórveldanna

Skipan helsta sérfræðings Rússa í málefnum norðurslóða í sendiherraembætti á Íslandi staðfestir að landið er komið í þjóðbraut alþjóðastjórnmála.

Auðlindir fyrir norðan okkur og auknar siglingar vegna minni ísa stóreykur mikilvægi þessa heimshluta.

Íslendingar ættu að stórauka samvinnu við Grænlendinga, Færeyinga og Norðmenn til að mæta ásókn stórveldanna.

Vasiliev næsti sendiherra Rússa

Stjórnmálaflokkur Þorsteins Pálssonar

Með eða án vilja Þorsteins Pálssonar er skipulega kannað hvort fylgi sé við stjórnmálaflokki með hann sem formann.

Þorsteinn hlýtur að svara því hvort hann sé þátttakandi í þessari nýstárlegu tilraun til að stofna stjórnmálaflokk.

Þorsteinn og félagar hans í fámenna hópi ESB-sinna í Sjálfstæðisflokknum er búnir að brenna allar brýr að baki sér í flokknum með því að taka saman við Samfylkinguna í skipulegri aðför að formanni Sjálfstæðisflokksins.

Pawel og pólska paranójan

Pólverjar óttast Rússa frá gamalli tíð. Landvinningar Rússa í Úkraínu gera Pólverja dauðskelkaða enda óttast þeir að Pólland verði næst. Aðrir á meginlandi Evrópu, t.d. Helmut Schmidt, fyrrum kanslari Þýskalands, sýna Rússum skilning og vara við ofsóknarkenndum viðbrögðum.

Pawel Bartoszek er pólskættaður Íslendingur sem sér Pútín sem herskáan einræðisherra og skammar forseta Íslands, Ólaf Ragnar Grímsson, að dempa gagnrýni á Pútín en ber lof á Gunnar Braga utanríkisráðherra að sækja Úkraínu heim og sýna fórnarlömbum Pútíns stuðning.

Í Úkraínu, eins og alþjóð veit, takast tvö stórveldi á um áhrifasvæði; Evrópusambandið annars vegar og hins vegar Rússland. 

Pawel er ötull talsmaður þess að Ísland verði aðili að Evrópusambandinu. Ísland á hinn bóginn á ekki aðild að valdastreitu stórveldanna á meginlandi Evrópu. 

Það er ekki í þágu íslenskra hagsmuna að Ísland verði aðili að átökum meginlandsþjóðanna - hvort sem pólska paranójan á rétt á sér eða ekki.

 

Ekki á leið inn í Úkraínu