María Sigrún: Dagur gaf olíufélögum 7-13 milljarða

Dagur B. Eggertsson formaður borgarráðs og fyrrum borgarstjóri gaf olíufélögunum lóðir upp á 7-13 milljarða króna, segir fréttamaðurinn María Sigrún Hilmarsdóttir og vísar í gögn máli sínu til stuðnings. Gjöf sér til gjalda. Enn er ekki komið fram hvernig olíufélögin umbunuðu Degi og félögum.

María Sigrún vann frétt um gjafagjörning Dags og stóð til að fréttin yrði sýnd á Kveik. Á síðustu stundu var ákveðið að birta ekki fréttina, en hún var tilbúin um miðjan apríl. Stefán Eiríksson útvarpsstjóri var borgarritari og staðgengill Dags borgarstjóra þegar gjafagjörningurinn var undirbúinn og skipulagður. Síðar fékk Stefán stöðu útvarpsstjóra með stuðningi Dags.

Tilfallandi fjallaði um bræðralag Dags og Stefáns og sagði:

Dagur gaf Stefáni bestu meðmæli fyrir fjórum árum enda kærleikar miklir millum þeirra félaga. ,,Til hamingju Rúv og gangi þér allt að sólu, kæri Stebbi!," skrifaði Dagur. Nú endurgeldur kæri Stebbi fyrrum yfirmanni sínum greiðann með þegjandi stuðningi við millistjórnendur RÚV sem úthúða Maríu Sigrúnu er vogaði sér að afhjúpa spillingu í ráðhúsinu.

Eftir harða opinbera umræðu gaf yfirstjórn RÚV sig og setti frétt Maríu Sigrúnar á dagskrá í Kastljósi síðast liðinn mánudag. Kveiksmenn á RÚV þegja þunnu hljóði. Frétt Maríu Sigrúnar féll ekki að fordómum þeirra um hvar spillingu sé að finna í íslensku samfélagi.

Frétt Maríu Sigrúnar afhjúpar spillingu og fákunnáttu vinstrimeirihlutans í Reykjavík. Borgin stendur illa fjárhagslega og má illa við glötuðum tekjum. Það munar um 7-13 milljarða. Í fyrradag samþykkti borgarráð að hefja rannsókn á gjafagjörningi Dags borgarstjóra, sem núna gætir hagsmuna sinna sem formaður borgarráðs. Í embættinu hyggst Dagur stjórna rannsókn á eigin gjörðum. Gjafagjörningar til olíufélaga og spillt stjórnsýsla haldast í hendur.

María Sigrún fékk að heyra það frá millistjórnendum RÚV, líklega að undirlagi Stefáns útvarpsstjóra, um að hún kynni ekki fréttamennsku en væri skjáfríð. Dagur gjafmildi heggur í sama knérunn og segir fréttamanninn Staksteinahöfund í dulgervi. Aldrei þessu vant þegja femínistar þunnu hljóði er stallsystir sætir karlrembu af verstu sort.

Vinstrimenn og RÚV slá skjaldborg um spillta meirihlutann í ráðhúsinu. Þórður Snær ritstjóri Heimildarinnar, einn sakborninga í byrlunar- og símastuldsmálinu, er launaður álitsgjafi RÚV. Á þriðjudag, líkt og alla aðra þriðjudaga, var Þórður Snær mættur á Rás eitt að ræða efnahagsmál. Til umræðu var fjármál sveitarfélaga. Þórður Snær minnist ekki einu orði á gjafagjörning Dags. Þórður Snær er ,,vel að merkja er einmitt í miklu persónulegu vinfengi við ritstjórn Kveiks, í nútíð og fortíð," skrifar Sigurður Már Jónsson í umfjöllun sinni um skipulagðar tilraunir til að kæfa frétt Maríu Sigrúnar um spillta stjórnsýslu í ráðhúsinu og meðvirkni vinstrimanna.

Tilraunir til að þagga niður í Maríu Sigrúnu sýna þéttriðið valdanet vinstrimanna í stjórnsýslu og fjölmiðlum. Valdanetið er virkjað til að kaffæra þá sem voga sér að fletta ofan af spillingu og misbeitingu fárra á kostnað almannahagsmuna.

 

María Sigrún svarar Degi fullum hálsi

Athugasemdir

[Ragnhildur Kolka, 9.5.2024 kl. 08:27]

Afstæðishyggjan sem er leiðarljós Samfylkingarinnar leiðir nær undantekningar laust til siðleysis. Hinn vestræni heimur hefur verið undir áhrifum sósíaldemókrata í áratugi og við sjáum afleiðingarnar í hnignun gilda. Allt er nú afstætt og því allt leyfilegt. Þess vegna er stundum í lagi að gera vinum greiða á kostnað annarra og brjóta á konum þegar þurfa þykir. Blaðamannafélagið, RÚV og Reykjavíkurborg eru rekin undir þeim merkjum.

[Kristinn Bjarnason, 10.5.2024 kl. 11:02]

Enn ein ástæða til að loka RÚV. Það er ömurlegt að allir landsmenn séu neyddir til að greiða stórfé fyrir vinstri áróður ríkissjónvarpssins. Það er víst hægt að þakka Þorgerði Katrínu fyrir það.

Dæmigert fyrir vinstri menn sem telja fólki í trú um að þeir berjist fyrir smælingja en í raun og veru níðast á þeim.