Tilfallandi athugasemdir

Þriðjudagur, 9. ágúst 2022

RSK-miðlar þegja um Namibíumál

Sendiferð namibískra yfirvalda til Íslands í sumar var fréttaefni tveggja fjölmiðla í gær, Vísis og Fréttablaðsins. RSK-miðlar, RÚV, Stundin og Kjarninn, opnuðu Namibíumálið fyrir þremur árum með Jóhannesi uppljóstrara Stefánssyni þögðu. Hvers vegna?

Jú, fyrir það fyrsta er málið dautt hross. Enginn Íslendingur er ákærður þar syðra, aðeins heimamenn. Samherji veiddi fisk og seldi og það kallast lögmæt viðskipti.

Maðurinn sem heldur öðru fram, Jóhannes uppljóstrari, þverneitar að gefa sig fram við namibísk yfirvöld. Hann hefur heldur ekki lagt fram nein gögn sem sanna að Samherji hafi stundað mútur og spillingu í Namibíu.

Sendinefndin frá Afríku heimsótti Ísland til að kynna sér stöðu málsins hér heima. Jóhannes hefur gefið héraðssaksóknara skýrslu en ekkert saknæmt kom í ljós. Af pólitískum ástæðum getur héraðssaksóknari ekki hætt rannsókn. Embættið fékk sérstaka fjárveitingu frá alþingi til að rannsaka Samherja. Sem er ekki samkvæmt meginreglum réttarríkisins. Fái saksóknari sérstaka fjármuni til að rannsaka tiltekinn aðila er óheilbrigður hvati innbyggður í rannsóknina. Þetta gerist þegar óvandaðir RSK-miðlar eru í bílstjórasætinu.

Seinni ástæðan fyrir þögn RSK-miðla um Namibíumálið er að fjórir blaðamenn þaðan eru sakborningar í sakamáli kennt við Pál skipstjóra Steingrímsson og varðar byrlun og gagnastuld.

Blaðamennirnir fjórir hafa verið á hlaupum undan réttvísinni í hálft ár, beitt kærumálum til að komast hjá yfirheyrslu. En nú er líklega búið að tæma allar kæruleiðir og blaðamennirnir verða í mæta í yfirheyrslu í þessari viku eða næstu.

Af skiljanlegum ástæðum vilja Þórður Snær og Arnar Þór á Kjarnanum, Aðalsteinn á Stundinni og Þóra á RÚV ekki að Namibíumálið sé fréttaefni á eigin miðlum sömu dægrin og þau loksins, loksins drattast á lögreglustöðina. Í járnum ef ekki vill betur. Þögn RSK-miðla um sakborningana á Íslandi yrði svo himinhrópandi í samburði við alla rætnu umfjöllunina um saklausu Samherjamennina í Namibíu.

Flokkur: Dægurmál | Breytt s.d. kl. 08:05 | Facebook