Verktaki RÚV í eitrun og gagnastuldi

Verktaki RÚV eitraði fyrir Páli Steingrímssyni skipstjóra hjá Samherja og stal síma skipstjórans sem var lagður nær dauða en lífi á gjörgæslu 4. maí á liðnu ári. Verktakinn kom símanum til RÚV-ara sem afrituðu gögn úr tækinu og létu í hendur Stundarinnar og Kjarnans. Tilgangurinn var að koma höggi á Samherja.

Aðalsteinn Kjartansson á Stundinni, sem hætti á RÚV helgina fyrir atlöguna að Páli, og Þórður Snær Júlíusson ritstjóri Kjarnans unnu með stolnu gögnin í hálfan mánuð. Þann 21. maí birtu Stundin og Kjarninn samtímis fréttir sem urðu þekktar undir heitinu Skæruliðadeild Samherja. Daginn áður hringdu Aðalsteinn og Þórður Snær í Pál skipstjóra með tíu mínútna millibili. Símtölin voru yfirvarp, þeir vildu geta sagt í fréttum að þeir hefðu borið málið undir skipstjórann.

RÚV stjórnaði bæði atlögunni að Páli skipstjóra og birtingu frétta sem byggðu á stolnum gögnum. Lögbrotin voru framin af ásetningi og skipulögð á kaldrifjaðan hátt. Engu var eirt, hvorki heilsu, persónufrelsi né eignarétti. 

En hver var verktakinn sem sá um að eitra og stela? Það hefur verið einhver nákominn skipstjóranum, sést best á því að símanum var skilað eftir að gögnin voru afrituð. 

Á næstu dögum verða þeir einn af öðrum RÚV-arar kallaðir til lögreglu og kynnt niðurstaða rannsóknar að þeir séu sakborningar í væntanlegu sakamáli. Líklega verða þeir þrír, mögulega fjórir. Þjófsnautar á Stundinni og Kjarnanum gætu einnig átt von á boðun til lögreglu. Fréttir á þessum þrem miðlum verða á næstunni skrifaðar og fluttar skjálfandi hendi og titrandi rómi.

Verktaki RÚV í aðför að Páli skipstjóra Steingrímssyni verður afhjúpaður í beinu framhaldi. Ef þannig skyldi hátta til að milligöngumaður sé á milli RÚV og verktaka gæti málið orðið enn svæsnara. Og var það svæsið fyrir. 

Athugasemdir

[Halldór Jónsson, 6.2.2022 kl. 09:21]

Mér finnst þetta nú allt að einu morðtilraun ala Schripal

[Sigfús Ómar Höskuldsson, 6.2.2022 kl. 12:01]

RÚV-rýni höfundar hér er augljóslega að verða farsakennd, að því sögðu að höfundur hafi enn ekki lagt fram einn snefill af sönnunum fyrir sínum málflutningi.

Á meðan er höfundur að fara að dæmi bænda á snemmvorin, að dreifa skít.

En höfundur má það auðvitað.

Bíð spenntur eftir að sjá sönnun þess að það sem höfundur kallar "verktaki" hafi hlotið e-a greiðslu fyrir þann verknað sem höfundi er tíðrætt um, sem sannur samherji, að e-r aðili hafi tekið það að sér í umboði eða óumbeðinn að stela símtæki og komið því í hendur til starfsmanna RÚV.

Á meðan heldur höfundur líkllega áfram vorverkunum.

[Guðmundur Ásgeirsson, 6.2.2022 kl. 13:45]

Hvað eru margir "næstu dagar" í hverjum mánuði?

Kemur það kannski í ljós einhverntíma á næstu árum?