Engin Namibíufrétt á RÚV

Í þrjá daga heyrist hvorki hósti né stuna frá Efstaleiti um mál málanna. Enginn Íslendingur er ákærður í Namibíu. Ógrynni frétta á RÚV í tvö ár segja þá sögu að Samherjamenn og fyrirtæki þeirra verða ákærð fyrir stórfellda glæpi. En það fæðist ekki einu sinni lítil mús; engin ákæra. Það verður ekkert dómsmál þar sem deilt yrði um sekt eða sýknu Samherja. Núll, ekkert.

Hliðarfjölmiðill RÚV, Kjarninn, birti yfirlýsingu 26. okt sl., falda inn í frétt, og er svohljóðandi:

Í ákæru­skjali sem Kjarn­inn hefur undir höndum má sjá að á meðal ákærðra ein­stak­linga og félaga í mál­inu eru ekki Íslend­ing­arnir þrír sem Martha Imalwa, rík­is­sak­sókn­ari Namib­íu, hefur sagt að hún ætli sér að ákæra, né heldur namibísku félögin sem þeir stýrðu fyrir hönd Sam­herja.

Kjarninn og RÚV eru samstarfsaðilar namibískra fjölmiðla sem að líkindum hafa ákæruskjalið undir höndum og sendu það til Íslands.

En RÚV segir ekki orð. Ekki eitt aukatekið orð í þrjá daga um stærsta fréttamálið síðustu tveggja ára. Á engilsaxnesku er hugtak til um þessa háttsemi, ,,lie by omission", að ljúga með þögninni.

Í sálfræði er þekkt að lygi með þögninni viðheldur ranghugmyndum. RÚV var búið að ákveða að í Namibíu væri Samherji sekari en syndin. Ríkisstofnunin hefur eytt tugmilljónum króna í fréttamálið og veðsett orðspor sitt upp í rjáfur og raunar langt umfram það. Efstaleiti getur hreinlega ekki afborið þau tíðindi að engin ákæra verði gefin út á Samherja.

RÚV-arar eru vísast uppteknir á annarri deild en fréttadeildinni.

Engir Íslendingar ákærðir í Namibíu

Athugasemdir

[Gunnar Heiðarsson, 29.10.2021 kl. 07:34]

Nú bíður maður spenntur eftir því hvaða mál ruv býr til næst, gegn  Samherja. Seðlabankamálið tapaðist og þá var horft til Afríku. Nú er ruv búin að tapa því máli einnig. Hvað næst? 

Fréttastofa ruv hefur aldrei beðist afsökunar á framgöngu sinni í Seðlabankamálinu. Og fréttastofan mun ekki biðjast afsökunar í þessu máli. Þar á bæ er afsökunarbeiðni ekki til, þó fréttastofan krefji alla aðra um afsökun ef henni mislíkar. Það eru bara spunnir nýir (lyga)vefir, jafn skjótt og þeir eldri eru rifnir niður.

[Kristinn Bjarnason, 29.10.2021 kl. 09:40]

Er ekki þjóðráð að loka rúv. Ég get ekki betur séð en þeir ali þjóðina á hræðslu,neikvæðni og falsfréttum og þiggi fyrir það stórfé.

[Ragnhildur Kolka, 29.10.2021 kl. 12:46]

Skömm ruv er því meiri að þar á bæ biðjast menn ekki afsökunar á að hafa æruna af fólki. 

[Grímur Kjartansson, 29.10.2021 kl. 13:35]

Á RUV ríkir geðveik grafarþögn
fréttir eru ekki birta ef það hentar ekki 

Bara Ef Það Hentar Mér - YouTube

[Guðmundur Ásgeirsson, 29.10.2021 kl. 14:31]

Ríkissaksóknari Namibíu: Fyrirtæki Samherja ennþá undir í kyrrsetningarmálum

"Ákæra gegn starfsmönnum Samherja í Namibíu er enn möguleg auk þess sem namibísk yfirvöld eru í kyrrsetningarmálum gegn félögum Samherja. Þetta segir Martha Imalwa ríkissaksóknari Namibíu."

Ætla að ákæra Samherjamenn um leið og þeir verða handsamaðir

"Ís­lend­ing­ar sem störf­uðu í Namib­íu fyr­ir Sam­herja og áttu að­komu að mútu­greiðsl­um til þar­lendra áhrifa­manna eru ekki sloppn­ir við ákæru. Sak­sókn­ari þar í landi seg­ir ástæðu þess að nöfn þeirra sé ekki á nýju ákæru­skjali í mál­inu sé sú stað­reynd að ekki hafi tek­ist að færa þá fyr­ir dóm."

Lesist: Þeim verður birt ákæra þegar þeir skríða úr felum.

Þangað til verða þeir með stöðu flóttamanna frá réttvísinni.

[Páll Vilhjálmsson, 29.10.2021 kl. 15:40]

Guðmundur, þetta gengur ekki upp. Þú og Stundin segja að Samherja verði birt stefna/ákæra þegar til Samherja næst. En það er óvart kyrrsetningamál í gangi, þannig að búið er að ná í Samherja. Og þeim var ekki birt stefna vegna mútugreiðslna.

[Guðmundur Ásgeirsson, 29.10.2021 kl. 16:09]

Kyrrsetningarmál er ekki það sama og sakamál. Kyrrsetningin nær ekki til Samherja á Íslandi heldur eigna/fjármuna í Namibíu.

Ástæða þess að tilteknum starfsmönnum hefur ekki verið birt ákæra er að ekki hefur náðst til þeirra til að birta hana formlega.

Eins og saksóknarinn segir útilokar það ekki að ákæra á hendur þeim verði gefin út síðar, ef til þeirra næst til að birta hana.

[Páll Vilhjálmsson, 29.10.2021 kl. 16:35]

Guðmundur, fyrirtækin þarna úti svara ekki fyrir sig sjálf, heldur fulltrúar þeirra, lögmenn.

Það var tekið til varna í kyrrsetningamálinu eftir að stefnt var. Það sama hlýtur að gilda vegna stefnu á fyrirtæki/einstaklinga vegna annarra mála.

Vörnin, að ekki náist í meinta sakaraðila, stenst ekki.

Svo er hitt; næst heldur ekki í Jóhannes uppljóstrara, sem hlýtur að vera miðlægur í málinu?

[Jón Steinar Ragnarsson, 29.10.2021 kl. 16:36]

Undarlegt ef starfsmenn verða sakaðir um mútur en ekki vinnuveitandinn. Eru menn svo "company minded" þarna í Namibíu að þeir greiði götu atvinnurekandans úr eigin vasa?

[Páll Vilhjálmsson, 29.10.2021 kl. 16:53]

Málinu er sennilega þannig farið, Jón Steinar, að Samherji hefur kvittanir að hafa greitt fjármuni en þeir sem tóku við þeim fjármunum skiluðu þeim ekki á réttan stað.