Pútín, kristni og byltingin 1917

Rússneska byltingin fagnar aldarafmæli á næsta ári. Byltingarnar voru tvær, í febrúar, sem afgreiddi 300 ára keisaratíma Romanov-ættarinnar, og í október, sem leiddi til valdatöku Leníns og 70 ára tímabils kommúnisma.

Rússar eru klofnir í afstöðu sinni til byltingarinnar. Lenín liggur ljómaður í grafhýsi sínu en vesturgluggi Rússlands, borgin sem hét Leníngrad, fékk sitt gamla heiti eftir fall kommúnismans, Pétursborg.

Kommúnismi er evrópsk hugmyndafræði. Þýski gyðingurinn Karl Marx er aðalhöfundur hennar. Kommúnisminn tók við af annarri evrópskri hugmyndafræði sem Rússar ánetjuðust á víkingaöld, kristni.

Pútín forseti Rússlands er gagnrýninn á rússnesku byltinguna, samkvæmt Guardian, þótt ekki sé afstaðan einörð.

Rússneska rétttrúnaðarkirkjan er aftur ákveðinn í afstöðu sinni til fordæmingar á hugmyndafræði Marx. Hennar maður er Valdimar mikli sem stofnaði til kristni í Kænugarði 12 árum áður en Íslendingar kristnuðust. Sagt er að Valdimar tæki rétttrúnaðarkristni fram yfir þá rómversku til að bægja frá þýskum áhrifum. Karlamagnús og afkomendur hans í Frakklandi og Þýskalandi voru í trúarbandalagi við kaþólsku kirkjuna.

Trúarstemningin í Rússlandi er eins og víða fléttuð við þjóðerniskennd. Ívan grimmi réð Rússlandi á 16. öld. Hann myrti son sinn og stundaði fjöldamorð en þótti röskur í trúmálum. Leynilögreglu stofnaði Ívan grimmi til að halda óvinum trúar og ríkisvalds í skefjum. Ívan grimmi fékk styttu af sér afhjúpaða nýverið við fögnuð og lof ríkis sem kirkju.

Pútín Rússlandsforseti dregur dám af þjóðarsögunni. Hann ólst upp við kommúnisma og sá hann hrynja sem foringi í KGB í Austur-Þýskalandi þegar Berlínarmúrinn féll. Afleiðing er að Pútín er meira kristinn en kommúnískur. En fyrst og fremst er hann stjórnmálamaður.

Athugasemdir

[Wilhelm Emilsson, 19.12.2016 kl. 00:23]

Lenín stofnaði leyniþjónustuna, Cheka, sem kallaðist KGB þegar Pútín gekk í hana, eins og menn vita. Pútín var þjálfaður samkvæmt sovéskri hugmyndafræði og aðferðum, sem hann notar enn. Sögukennari ætti að sjá það eins og skot.

[Ómar Ragnarsson, 19.12.2016 kl. 01:52]

Rússland varð aldrei voldugra á heimsvísu en á Sovéttímum Stalíns, Krústjofs og Brésnefs. 

Þegar það veldi hrundi og Pútín var yfirmaður í leyniþjónustunni var að sjálfsögðu langlíklegast að hann saknaði veldis Rússlands á Sovéttímanum, en ekki á tíma kirkjunnar fyrir byltinguna 1917.