Aldir Íslandssögunnar

Þjóðveldisöld er lengsta öld Íslandssögunnar, frá stofnun alþingis 930 til Gamla sáttmála um miðja 13du öld. Á undan þjóðveldisöld var skemmsta öldin, kennd við landnám, og er um sextíu ár.

Á eftir þjóðveldisöld er norska öldin þegar Ísland var hluti af veldi sem náði frá Grænlandi yfir Færeyjar, Orkneyjar, Hjaltlandseyjar og Noreg. Enska öldin og sú þýska tóku við norsku öldinni. Frá byrjun 15du aldar til loka þeirrar 16du var býsna fjörug utanríkisverslun við stórþjóðir Evrópu þótt Ísland tilheyrði Kalmarsambandinu lengst af með konung sinn í Kaupmannahöfn.

Konungsvaldið danska náði yfirhöndinni gagnvart enskum fiskimönnum og þýskum kaupmönnum, stofnaði til einokunar 1602. Ísland var einangrað hjáríki evrópsks smáríkis í tvær aldir, 17du og 18du, og þær aldir taldar þær myrkustu í sögunni.

19da öld er endurreisnaröld og sú 20sta sjálfstæðisöld. Þökk sé afturköllun ESB-umsóknar á næstu dögum verða mistökin með Gamla sáttmála ekki endurtekin í bráð.

Athugasemdir

[Ómar Ragnarsson, 12.3.2014 kl. 11:17]

Gamli sáttmáli var afleiðing en ekki orsök. Sáttmálinn var afleiðing óbærilegs ástands, sem höfðingjar landsins höfðu leitt yfir þjóðina í versnandi árferði með skelfilegri óöld og rányrkju.

Landsmenn gátu ekki lengur haldið uppi siglingum til og frá landinu.

Eini ljósi punkturinn í myrkri Sturlungaaldar var ritun ómetanlegra bókmennta, sem urðu grundvöllurinn að endurheimt sjálfstæðis okkar.

[Ómar Bjarki Kristjánsson, 12.3.2014 kl. 13:07]

Þetta eru allt seinni tíma nafngiftir. Og ekkert klippt og skorið neitt. Það væri miklu frekar að tala um Kaþólsku/rómar öldina. Vegna þess að það að Ísland gerðist aðili að kristnisambandi Evrópu - það hafði þó gríðarleg og merkjanleg áhrif. Ísland fékk meir að segja veigamiklar undanþágur við aðild. Veigamiklar undanþágur. (Sem innbyggjar lögðu síðan niður sjálfir eftir að þeir siðvæddust smá saman svo sem undanþáguna um barnaútburð.)

Varðandi svokallaða ,,einokun" uppúr 1600 - þá er það seinni tíma mýta mestanpart.

Það voru íslendingar sem vildu einokunarfyrirkomulag. Framsóknarmenn og heimssýnarmenn þess tíma heimtuðu einokun.