Stjórnvöld og alþingi marklaus enda án umboðs

Veik staða ríkisstjórnarinnar og lítið traust almennings á alþingi endurspeglast í ákvörðun bankastjóranna þriggja að mæta ekki fyrir viðskiptanefnd þingsins. Æ betur kemur í ljós hversu stefna ríkisstjórnarinnar var röng í grundvallaratriðum. Í stað þess að einbeita sér að endurreisn innviða, eins og fjármálastofnana, og atvinnulífs héldust fíflska og ofmetnaður hönd í hönd á leiðinni til Brussel í gegnum stjórnlagaþing.

Ríkisstjórnin sveikst  um að vinna brýnustu verkefnin sem íslenskt samfélag stóð frammi fyrir og það hefnir sín. Almenningur snýr baki við ríkisstjórninni. Bankastjórar taka ekki mark á stjórnvöldum. Ekki einu sinni beinir undirmenn ráðuneytanna, ríkisforstjórarnir, fara eftir tilmælum ráðherra.

Umboð almennings til alþingis, og þar með stjórnarráðsins, hefur ekki verið endurnýjað í rúm tvö ár. Það er langur tími eftir hrun enda stórsér á trúverðugleika yfirvalda. Æ fleiri munu virða stefnumál ríkisstjórnarinnar og boðvald stjórnvalda að vettugi.

Bankastjórarnir mættu ekki

Athugasemdir

[Agla (IP-tala skráð) 8.3.2011 kl. 16:49]

Ég veit það er ekki kjarni málsins  en fréttin segir " Nefndarmenn í Viðskiptanefnd Alþingis höfðu reiknað með að bankastjórar bankanna myndu mæta á fundinn..."  "Þeir mættu hinsvegar ekki en millistjórnendur í bönkunum mættu hins vegar í þeirra stað."

Í fréttinni er líka sagt að "Boðaður hefur verið annar fundur á föstudaginn og þá er reiknað með að bankastjórarnir komi fyrir nefndina."

Þetta minnir mig svolítið á allar fréttirnar um "væntingar" ríkisstjórnarinnar og það læðist að mér sá grunur að fleiri í okkar stjórnsýslu þurfi að bæta sín vinnubrögð en aumingja vesalings forsætisráðherrann og ráðherrarnir hennar.