Heiðarlegir vinstrimenn segja stopp

Hjörleifur Guttormsson talar fyrir þann breiða fjölda almennra félagsmanna Vinstrihreyfingarinnar græns framboðs sem eru hryggstykkið í flokknum og mynda kjarnann í kjósendahópnum. Þegar Hjörleifur skrifar grein í Morgunblaðið og spyr á hvaða vegferð forysta Vg er í Evrópumálum er ljóst að komið er að krossgötum.

Klækjastjórnmál komu umsókninni um aðild að Evrópusambandinu inn í stjórnarsáttmálann og í gegnum alþingi. Hvorki í umsókninni sjálfri né ítarlegri greinargerð stjórnarmeirihlutans í utanríkismálanefnd er minnst aukateknu orði á aðlögunarferlið inn í Evrópusambandið.

Evrópusambandið býður aðeins upp á eina leið inn í sambandið og það er leið aðlögunar. Forysta Vg getur ekki horft aðgerðalaus upp á tilraunir Evrópusambandsins til að kaupa stuðning við aðild í gegnum fjármuni sem flæða inn í landið um stjórnarráðið.

Í Morgunblaðinu í dag er Hjörleifur einfaldlega að segja að flokkur með sögu og stefnumál Vg getur ekki leyft aðlögun Íslands að Evrópusambandinu. Fyrr mun Vg splundrast.

Athugasemdir

[Sigurður Sigurðsson, 9.9.2010 kl. 10:56]

Ég það á tilfinningunni að þér sé meinílla við Evrópusambandið. En hvenær ætlar þú að taka upp vitræna umræðu um kosti og galla aðildar.

Bara að pæla. Það getur bara ekki staðist að það séu eintómir anmarkar á aðild. 

Er það ekki ljóst að áður en að inngöngu verður þá hefur þjóðin síðasta orðið. 

Höfum við ekki gott af því að taka til í lagaumhverfinu hjá okkur og aðlaga okkur að alþjóðlegum reglum og reglugerðum. 

[Páll Vilhjálmsson, 9.9.2010 kl. 11:25]

Annmarkar eru fleiri en kostir við aðild, Sigurður. Því miður erum við ekki í almennum umræðum um hlutverk, sögu og framtíðarhorfum ESB heldur í aðlögunarferli þar sem tekist er á um réttmæti þess að umsókn var send og í framhaldi hvort umboðið sem alþingi veitti sé til viðræðna eingöngu eða aðlögunar.

[Hrafn Arnarson (IP-tala skráð) 9.9.2010 kl. 12:13]

Til upplýsingar. Í kafla sem heitir formlegar samningaviðræður í greinargerð meirihlutans er fjallað um þessi mál . Það er fullt starf að leiðrétta ruglið í þér Páll. Lesið sjálf. Á sérstökum vef utanríkisráðuneytisins er að finna allar þær upplýsingar sem þú hefur ekki haft tíma til að kynna þér Páll.

[Páll Vilhjálmsson, 9.9.2010 kl. 12:29]

Hrafn, það er ekki fjallað um aðlögun í greinargerðinni. Ef svo væri myndir þú vísa nákvæmlega í þann texta sem þú getur ekki vegna þess að hann er ekki til.

[Gísli Ingvarsson, 9.9.2010 kl. 13:41]

Hjörleifur er ekkert frekar vinstri maður en Styrmir Gunnarsson. Hann var austantjalds á námsárum sínum og það virðist hafa verið nóg til að hann átti hvergi frama annarsstaðar en hjá Alþýðubandalaginu. Hann er heldur ekki grænni en svo en að hann er einn af aðalarkítektunum á bakvið eitrunarherferð gegn lúpínunni. Trúverðugleiki Hjörleifs var aldrei hátt skrifaður af íslendka hægrinu á sínum tíma. Það er honum helst til málsbóta að hann vefengdi viðskiptahætti Álversins í eigu Ísal á sínnum tíma sem iðnaðarráðherra. Það var nú kannski "hækkun í hafi" þingræða sem hann hélt og fór fyrir brjóstið á Sjálfstæðismönnum forðum. Svo heldur hann að hann geti slegið keilur á því að Íslenska stjórnkerfið sé að aðlagast ESB þá hefur hann misst mikið úr því það hefur það gert allar götur síðan EES samningurinn tók gildi. Vissulega hefur Sjávarútvegsog landbúnaðarráðuneytin ekki haft þungar samningskvaðir á sér og það er þar sem skóinn kreppir fyrst og fremst. Aðildarviðræðurnar krefjast þess sem betur fer að þessi úreltu ráðuneyti taki til hendinni og ekki seinna vænna.

[Hrafn Arnarson (IP-tala skráð) 9.9.2010 kl. 14:04]

Sæll Páll, lestu sjálfur.

. Formlegar samningaviðræður.
    Eins og að framan greinir fara formlegar samningaviðræður fram á ríkjaráðstefnum á milli aðildarríkja ESB og umsóknarríkis. Viðræðurnar byggjast á hinni sameiginlegu samningsafstöðu sem aðildarríkin hafa einróma samþykkt á grunni tillagna framkvæmdastjórnarinnar. Má því í raun segja að framkvæmdastjórnin gegni lykilhlutverki í viðræðunum. Aðilar skiptast á samningsafstöðu þar til sameiginleg niðurstaða hefur náðst þannig að loka megi viðræðum með formlegum hætti, kafla fyrir kafla. Vinna samningamanna á einstökum sviðum með framkvæmdastjórn ESB miða að því að komast að niðurstöðu um einstök atriði þannig að afstaðan sem framkvæmdastjórnin leggur fyrir aðildarríkin á endanum falli eins vel að sjónarmiðum umsóknarríkis og kostur er.
    Sú breyting hefur orðið á stækkunarviðræðum að sérstök áhersla er nú lögð á að ríki hafi í raun uppfyllt tiltekin viðmið varðandi hvern og einn kafla áður en samningar um þá eru opnaðir og einnig áður en þeim er lokað. Í þessu felst að sem minnst er gefið af frestum til að uppfylla skilyrðin áður en köflum er lokað heldur er þeim ekki lokað fyrr en ákveðnum markmiðum er náð í framkvæmd og með innleiðingu löggjafar í viðkomandi ríki. Slíkt er að sjálfsögðu óháð þeim aðlögunartíma og undanþágum sem kann að semjast um.
    Meiri hlutinn bendir á að ekki er að fullu ljóst hvernig haldið yrði á málum í tilviki Íslands en ætla verður að þeim köflum viðræðna sem snerta atriði sem falla undir EES- og Schengen- samningana verði lokið tiltölulega fljótt. Þó má leiða líkum að því að Ísland uppfylli þegar öll þau skilyrði sem þar er að finna og því er ólíklegt að óska þyrfti aðlögunartíma, þótt slíkt sé ekki útilokað. Þeim köflum yrði þá lokað á fyrstu stigum. Framangreindur rammi yrði notaður um viðræður er lúta að málum sem falla utan þeirra samninga, t.d. landbúnaðar- og sjávarútvegsmálum, dóms- og innanríkismálum, gjaldmiðilsmálum, skattamálum, byggðamálum, tollamálum, utanríkismálum, öryggis- og varnarmálum, fjárhagsmálefnum, stofnunum og öðrum atriðum.

Kveðja, Hrafn

[Páll Vilhjálmsson, 9.9.2010 kl. 15:46]

Hrafn, tilvitnuð orð þín sanna mitt mál en ekki þitt. Meirihlutinn notar orðið ,,aðlögun" í því samhengi að Ísland kynni að óska eftir aðlögunartíma. Texti frá Evrópusambandinu sem gefinn var út árið 2007 útskýrir hvað aðlögun þýðir

First, it is important to underline that the term “negotiation” can be misleading. Accession negotiations focus on the conditions and timing of the candidate’s adoption, implementation and application of EU rules – some 90,000 pages of them. And these rules (also known as “acquis”, French for “that which has been agreed”) are not negotiable.

Aðlögun kallast það ferli sem ESB notar við að taka inn ný ríki þar sem ríkin taka jafnt og þétt upp lög og reglugerðir ESB. Í meðförum meirihluta utanríkisnefndar er talað um að Ísland kynni að sækja um fresti til að taka upp löggjöf og það kallað ,,aðlögunartími."

Samfylkingin og meðhlauparar hennar hafa frá upphafi staðið fyrir blekkingarleik þar sem látið er að því liggja að umsókn myndi leiða til óskuldbindandi viðræðna. Evrópusambandið býður ekki upp á neitt slíkt, aðeins aðlögun á forsendum ESB.

[Páll Vilhjálmsson, 9.9.2010 kl. 17:22]

Hér er hlekkur á texta ESB sem vísað er í að ofan

http://ec.europa.eu/enlargement/pdf/publication/enl-understand_en.pdf

[Hrafn Arnarson (IP-tala skráð) 9.9.2010 kl. 23:14]

Páll minn, þetta er orðið verulega vandræðalegt hjá þér. Þú byrjar á því að segja að meirihlutinn minnist ekki aukateknu orði á aðlögun. Þegar þér er bent á texta sem sannar hið gagnstæða þá útskýrir þú í hvaða merkingu meirihlutinn noti orðið aðlögun!!!!!Páll , læsi er þannig skilgreint að þú lesir og skiljir og getir gert öðrum grein fyrir því sem þú hefur lesið. Ert þú læs?Þú þarft að lesa:"Sú breyting hefur orðið á,,,," Ef þú skilur þennan texta ertu í góðum málum.

[Páll Vilhjálmsson, 9.9.2010 kl. 23:39]

Hrafn, ég held að flestir læsir sjái mun á því hvort samninganefnd Íslands biðji um aðlögunartíma, eins og segir í áliti meirihluta, og hins að ESB krefjist aðlögunar eins og kemur fram í riti ESB.

[Elle_, 10.9.2010 kl. 20:39]

Ætla bara að segja að Hjörleifur Guttormsson er trúverðugur og ofanverður Gísli hefur ekki efni á að kalla hann ótrúverðugan.