Blaðamannaverðlaun afturkallist

Fyrir tveim árum verðlaunaði Blaðamannafélag Íslands falsfrétt. RÚV og Stundin, Helgi Seljan, Aðalsteinn Kjartansson og tveir aðrir fengu verðlaunin. BÍ hlýtur að afturkalla sæmdina enda fékkst hún út á ósannindi.

Í umsögn dómnefndar segir að fréttamálið sé um

ásakanir á hendur Samherja um mútugreiðslur í tengslum við starfsemi fyrirtækisins í Namibíu. Umfjöllunin byggði á staðhæfingum fyrrum starfsmanns Samherja í Namibíu og miklu magni gagna...

Namibíumálið er ein stór falsfrétt hvað viðvíkur Samherja. Jóhannes uppljóstrari fór með staðlausa stafi. Samherji fékk enga ákæru á sig. Eina sem Samherji gerði í Namibíu var að veiða fisk og selja. Fullkomlega löglegt, síðast þegar að var gáð. ,,Rannsóknablaðamennska" Helga Seljan og félaga var að segja löglega starfsemi glæpsamlega. ,,Rannsóknin" var ekki annað en rætið slúður klætt í fréttabúning.

Sigríður Dögg Auðunsdóttir, formaður Blaðamannafélags Íslands, heimtar ríkisfé til fjölmiðla. Fjölmiðlar dunda sér við framleiðslu falsfrétta og verðlauna sjálfa sig fyrir ósómann. Formaður BÍ krefst opinberrar niðurgreiðslu á ósannindum. Almenningur er krafinn um greiðslu fyrir að láta ljúga að sér.

Án afturköllunar á téðum verðlaunum er félag blaðamanna ábekingur óheilinda og blekkinga. Tilgangur blaðamennsku er að segja satt og rétt frá tíðindum líðandi stundar. Blaðamenn eiga ekki að taka upp á sína arma ótrúverðugan ógæfumann með langsóttar samsæriskenningar um glæpi í framandi heimsálfu. Blaðamenn sem láta etja sér á slíkt forað eiga betur heima á annarri deild en ritstjórn.

Alþingi getur sóma síns vegna ekki veitt almannafé í svikamyllu verðlaunaðra ósanninda. Það stendur upp á Blaðamannafélag Íslands að gera hreint fyrir sínum dyrum og afturkalla verðlaun fyrir ,,rannsóknablaðamennsku" ársins 2019.