Lebensraum Samfylkingar

Í kvöldfréttum Sjónvarps sagði þingmaður Samfylkingar að Ögmundur Jónasson ætti ekki heima í ríkisstjórn Jóhönnu Sig. þar sem hann styddi ekki stjórnarstefnuna. Eftir innkomu Ögmundar þrengist lífsrými Samfylkingar og þegar viljayfirlýsing formanna stjórnarflokkanna er lesin virðist ljóst að gæluverkefni Össurar utanríkis er í uppnámi.

Í 20 tölusettum liðum er ekki minnst einu orði á umsóknina um aðild að Evrópusambandinu. Ekkir orð. Í öllum normal ríkjum er aðlögunarferli að ESB stærsta mál stjórnkerfisins. Hér er ekki minnst á það á verkefnalista stjórnarinnar. Aðdáendur Össurar hljóta að vera gráti næst og það er rétt hægt að ímynda sér skeifuna sem embættismenn utanríkisráðuneytisins setja upp þegar mótherjar þeirra í Brussel spyrja um 20 punkta yfirlýsingu forystu ríkisstjórnarflokkanna. 

Össur skipuleggur gagnsókn, sendir Stefán Hauk aðalsamningamann í Kastljós og út um þorpagrundir. Þá er fé borið á Háskóla Íslands til að fjalla á jákvæðan hátt um aðlögun að ESB í fundaröð. Æra Háskólans fæst fyrir lítið fé eftir að útrásarauðmenn hættu að kaupa sér ímynd þar.

Steingrímur J. sagði fyrir viku að umsókn um aðild að ESB væri ekki á vegum ríkisstjórnarinnar. Hann virðist ætla að standa við þessi orð sín. Sko kallinn.

 

 

Efnahagsbati þrátt fyrir ríkisstjórnina

Efnahagsbatinn stafar af því að Ísland er fullvalda ríki með eigin gjaldmiðil. Ríkisstjórn Jóhönnu Sig. vinnur að því öllum árum að koma fullveldinu fyrir kattarnef og fórna krónunni. Kreppan verður dýpri og mun vara lengur hjá evruþjóðum eins og Írlandi og Grikklandi.

Viðvarandi 10 prósent atvinnuleysi er í Evrópu og víða er yfirvofandi verðhjöðnunartímabil sem flestir hagfræðingar eru sammála  um að sé til muna verri kostur en verðbólga, að tvennu illu.

Ríkisstjórn Jóhönnu Sig. getur ekki státað sig af efnahagsbatanum. Aðgerðir ríkisstjórnarinnar hafa komið seint og illa. Í mesta lagi er hægt að þakka ríkisstjórninni að klúðra ekki málum meira en raun ber vitni.

Grunngerð íslensks samfélags sýnir að við getum tekið efnahagslegri ágjöf, jafnað okkur fljótt og vel og komist á skrið á ný. Umsókn Samfylkingar um  aðild að Evrópusambandinu er beint tilræði við grunngerð samfélagsins.

Alger viðsnúningur

Aðlögun leiðir til innlimunar í ESB

Aðlögun íslenskrar stjórnsýslu að kröfum Evrópusambandsins mun leiða til innlimunar Íslands án þess að þjóðin fá rönd við reist. Ráðgefandi þjóðaratkvæðagreiðsla í lok aðlögunar, eftir 3-5 ár, er markleysa þar sem Ísland væri í reynd orðið hluti af Evrópusambandinu.

Aðeins ein leið er inn í Evrópusambandið og það er leið aðlögunar. Eins og segir í útgáfu Evrópusambandsins, bls. 9 efst til hægri

First, it is important to underline that the term “negotiation” can be misleading. Accession negotiations focus on the conditions and timing of the candidate’s adoption, implementation and application of EU rules – some 90,000 pages of them. And these rules (also known as “acquis”, French for “that which has been agreed”) are not negotiable.

 

Hér segir Evrópusambandið skýrt og skorinort að orðið ,,viðræður" geti valdið misskilningi þar sem ferlið er aðlögun og viðræður snúist um tímasetningar á stjórnkerfisbreytingum. Í aðlöguninni felst að umsóknarríki taki upp 90 þúsund blaðsíður af ESB-reglum og þær eru ekki umsemjanlegar.

Alþingi gaf ríkisstjórninni ekki umboð til að fara í aðlögunarviðræður. Samfylkingarhluti ríkisvaldsins ætlar að reyna að halda ferlinu áfram. 

Samfylkingin ætlar kalt og yfirvegað að svíkja fullveldi þjóðarinnar í hendur Evrópusambandsins.

 

Aðeins aðlögun í boði, ekki viðræður

Aðildarsinnar keyptu könnun hjá Capacent þar sem spurt var :,, Ertu hlynnt(ur) eða andvíg(ur) aðildarviðræðum við Evrópusambandið?" Spurningin er staðleysa þar sem viðræður eru ekki í boði hjá Evrópusambandinu, aðeins aðlögunarferli eða ,,accession process" eins og það heitir.

Niðurstaða úr spurningunni er að 45,5 eru mótfallin viðræðum en 38,8 prósent hlynnt. Nærri má geta um niðurstöður ef spurningin hefði endurspeglað að Ísland er komið í aðlögunarferli Evrópusambandsins.