Samfylkingin: Konur eru afgangsstærð

Tvær konur með menntun og reynslu til að starfa í þágu almannaheilla í embætti umboðsmanns skuldara komu ekki til greina vegna þess að forysta Samfylkingarinnar var búin að taka embættið frá fyrir flokksmann.

Forysta Samfylkingarinnar talar fjálglega um jafnrétti í hátíðarræðum en minna fer fyrir efndum.

Í augum forystu Samfylkingarinnar eru konur og jafnréttismál afgangsstærð þegar úthluta þarf bitlingum.

Ingibjörg Sólrún og klærnar sem eru úti

Í venjulegu árferði væri þorra landsmanna ánægjuefni að fyrrum utanríkisráðherra lýðveldisins kæmi til greina í formennsku fyrir alþjóðlega nefnd á vegum Sameinuðu þjóðanna. Tímarnir eru ekki hversdags þessi misserin heldur sterklega litaðir af hruninu annars vegar og umræðu um hver ber þar ábyrgð og hins vegar framtíðarvegferð þjóðarinnar og hvort fullveldið haldist innanlands eða fari til Brussel.

Ingibjörg Sólrún er snar þáttur í hrunmenningunni. Hún gaf Baugi lögmæti í Borgarnesræðum og hún tók þátt í tækifærissinnaðri Evrópuumræðu innan Samfylkingar  sem leiddi til umsóknarinnar.

Ingibjörg Sólrún Gísladóttir er mætur einstaklingur en líður fyrir pólitískt dómgreindarleysi.

Kemur ekki að rannsókn SÞ

Vilhjálmur og bananalýðveldið

Bananalýðveldi eru ríki sem háð eru einhæfri landbúnaðarframleiðslu og undir hæl útlendra stórfyrirtækja. Hugtakið er ættað úr Suður-Ameríku þar sem bandaríska stórfyrirtækið United Fruit réð lögum og lofum í ríkjum á borð við Honduras.

Þegar formaður Samtaka atvinnulífsins, Vilhjálmur Egilsson, segir íslensku ríkisstjórnina tileinka sér stjórnsýslu bananalýðveldis með því að koma í veg fyrir útlenda yfirtöku auðlinda snýr hann veruleikanum á hvolf.

Vilhjálmur óskar sér bananalýðveldis. Útrásarauðmennirnir Hannes Smára og Jón Ásgeir, sem settu Vilhjálm í embætti, eru á flótta og Vilhjálmur þarf nýja herra. 

Fækkun banka forgangsmál

Landsbanki, Arion og Íslandsbanki eru endurreist þrotabú og það eru jafnframt Byr og Sparisjóður Keflavíkur. Öll þessi fjármálafyrirtæki eru sek um fyrirhyggjulausa útþenslu. Til að laga sig að breyttum aðstæðum þarf að fækka starfseiningum á fjármálamarkaði.

Nærtækt er að sameina Arion og Íslandsbanka og leggja niður Byr og Sparisjóðinn í Keflavík. 

Þar sem þess er kostur eiga sparisjóðir á landsbyggðinni að halda starfsemi sinni áfram.

Styðja ekki björgun bankanna

Ósjálfstæðisbarátta aðildarsinna

Uppgjafarrökin fyrir aðild að Evrópusambandinu eru til í nokkrum útgáfum. Grímur Atlason reiðir fram sína útlistun í bloggi.  Grímur gagnrýnir meint fámennisvald í útgerð og landbúnaði í einn stað en í hinu orðinu virðist hann biðja um aukna miðstýringu t.d. með fækkun sýslumanna og sveitarstjórna. En látum samkvæmnina liggja á milli hluta.

Grunnstef uppgjafarrakanna er að við höfum klúðrað okkar málum svo hressilega að nauðsynlegt sé að segja landið til sveitar hjá Brusselvaldinu. Grímur notar fámennisvald en klíkuskapur er vinsælt heiti á meintri meinsemd.

Aðildarsinnar, sem beita uppgjafarrökum fyrir vagn sinn, eru þeirrar skoðunar að íslensk þjóð kunni ekki fótum sínum forráð í bráð og lengd og að hefja verði innflutning á útlendum myndugleika til að koma skikki á landsmálin. 

Sjálfstæðisbarátta allra þjóða á öllum tíma snýst um að flytja heim forræði eigin mála. Fái aðildarsinnar hljómgrunn yrði til séríslenskt fyrirbæri í alþjóðastjórnmálum: Ósjálfstæðisbarátta.