Vinstri stjórnin fylgir frjálshyggjustefnu

Vinstri stjórn Jóhönnu fylgir sígildri frjálshyggjustefnu, laissez faire, sem þýdd hefur verið sem afskiptaleysissstefna. Sjálftökulið útrásarauðmanna rásar um bankana og hirðir tilbaka eigur sínar án skuldanna. Gengi lögfræðinga og endurskoðenda í skilanefndum skammtar sér fimm milljónir plús á mánuði.

Jóhanna forsætisráðherra og Gylfi ráðherra viðskipta segja nýju afskiptaleysisstefnuna mun betri en að hafa í frammi landsstjórnartilburði. Við erum hvort eð er á leiðinni í Evrópusambandið sem mun stjórna öllu heila klabbinu fyrir okkur.

Vinstri grænir? Jú, þeirra hugmynd um stjórnkænsku er að vera á móti Evrópusambandinu en sækja samt um, vilja uppbyggingu atvinnulífsins en drepa fyrirtækin. Það er ástæða fyrir því að Vinstri grænir voru til í tíu ár án þess að koma nálægt ríkisstjórn. Þeim sjálfum kom ekki til hugar að nokkur væri svo vitlaus að láta sér detta í hug að Vg yrði ríkisstjórnarhæfur.

Um ljósmynd

Bandaríski rýnirinn Susan Sontag gaf fyrir rúmum þrjátíu árum út ritlinginn On Photography. Þar tilgreinir hún aðferð til sáluhjálpar, sem bæði er notuð af kokkáluðum og svartagaldursfólki; að beita eggjárni á mynd af hatursviðfanginu. Tuttugustuogfyrstualdar útfærsla væri að frussa yfir tölvuskjáinn. Gert hér með.

Mynd á bloggsíðu vekur umtal

Samfylkingarpólitík Þorgerðar Katrínar

Varaformaður Sjálfstæðisflokksins, Þorgerður Katrín Gunnarsdóttir, hljóp á sig í síðustu viku þegar hún mætti á stofnfund Benedikts Jóhannessonar og félaga um sjálfstæða Evrópumenn. Þegar fundurinn var haldinn var Capacent að ganga frá könnun þar sem kom fram forsvarsmenn 60 prósent íslenskra fyrirtækja eru andvígir inngöngu í Evrópusambandið. Síðasta von aðildarsinna um stuðning í samfélaginu var farin.

Dómgreindarleysi varaformanns Sjálfstæðisflokksins er gígantískt. Sjálfstæðisflokkurinn er með þá stefnu að Íslandi sé best borgið utan ESB. Þegar varaformaður flokksins gengur í samtök sem vinna að aðild Íslands að ESB er það stríðsyfirlýsing gegn flokknum og kjósendum hans.

Þorgerði Katrínu er helst þakkað að mynda ríkisstjórn Sjálfstæðisflokks og Samfylkingar og eru það pólitísk mistök sem verða í minnum höfð. 

Þorgerður Katrín er ekki með neitt bakland fyrir samfylkingarpólitík sína. Þegar hún í viðtali við RÚV segir margt brýnna en ESB-innganga er hún að viðurkenna gönuhlaup. Þorgerður Katrín ætti að axla pólitíska ábyrgð og segja af sér þingmennsku og embætti varaformanns Sjálfstæðisflokksins.