Brotakennd framtíð ESB

Viðbrögð Evrópusambandsins við kreppunni eru hikandi og fálmkennd og hefur það orðið til þess að auka á taugaveiklun markaða gagnvart evrunni almennt og jaðarríkjum sérstaklega. Yfirmaður Alþjóða gjaldeyrissjóðsins, Strauss-Kahn, varar Evrópusambandið við ómarkvissum viðbrögðum við aðsteðjandi vanda.

Evrópusambandið er ekki með lýðræðislegt umboð og getur því illa gert víðtækar ráðstafanir til að mæta kreppunni. Allir sem fjalla um skuldavanda evru-ríkjanna sem óx úr bankakreppunni eru sammála um að róttækra ráðstafana sé þörf.

Evrópusambandið hefur þróast framhjá almenningi og valdhafar hafa læðupokast til að framselja auknar valdheimildir til embættismanna í Brussel. Þegar verulega þarf að taka á stórum málum er erfitt að smygla þeim inn í stofnsamþykktir án þess að almenningur verði þess var. Af því leiðir hik og fálm sem magnar kreppuna.

ESB-makríll á beit við Ísland

Ísland ætti að höfða skaðabótamál á hendur Evrópusambandinu fyrir að senda meira en milljón tonn af makríl úr lögsögu sinni inn í íslenska landhelgi án þess að biðja um leyfi. Makríllinn er á beit í íslenskri lögsögu og étur aðrar tegundir út á gaddinn.

Evrópusambandið bítur höfuðið af skömminni með því að krefjast veiðibanns á makrílinn á meðan hann étur sig feitan á íslensku hafsvæði.

Fáheyrður yfirgangur Evrópusambandsins í makrílmálinu kemur aðeins til af einu. Brusselvaldið telur sig hafa í fullu tré við Ísland sökum þess að hér á landi ríkir samfylkingarstjórn sem lét sér detta í hug þá endemis vitleysu að sækja um aðild að Evrópusambandinu. Drögum umsóknina tilbaka og þá fer Evrópusambandið að koma fram við okkur eins og fullvalda þjóð.

Skosk stjórnvöld krefjast aðgerða gegn Íslandi

Tvær frekjufréttir af Jóhönnu

Jóhanna Sig. forsætisráðherra sat í ríkisstjórn Alþýðuflokks og Sjálfstæðisflokks haustið 1993. Erfiðlega gekk að setja saman fjárlög vegna þess að Jóhanna þáverandi félagsmálaráðherra vildi meiri peninga í til sín og hafði auk þess sterk sjónarmið um atriði er heyrðu undir heilbrigðis- og menntamál.

Það vita allir mína afstöðu til húsaleigubótanna og ýmissa þátta varðandi heilbrigðis- og menntamálin og ef þau atriði verða eins og þau líta út núna mun ég ekki telja mig bundna af fjárlögum og þá hlýtur málið að vera í höndum forsætisráðherra og hugsanlega formanns Alþýðuflokksins," sagði hún [Jóhanna].

Allt á reiðiskjálfi í ríkisstjórninni og Alþýðuflokknum vegna þess að Jóhanna var með fyrirvara við fjárlög og seta hennar í ríkisstjórn í uppnámi, samkvæmt frétt nokkrum dögum síðar.

 

Varanleg kreppa í Evrópu

Björgunarsjóður Evrópusambandsins fyrir jaðarríki í neyð var settur upp sem skyndihjálp fyrir Grikki og Íra. Í vikunni var ákveðið að sjóðurinn yrði varanlegur sem þýðir að Brussel metur stöðuna þannig að evrusvæðið verði í varanlegu kreppuástandi næstu árin.

Tom Stevenson frjárfestingarstjóri hjá Fidelity býst við að lítill hagvöxtur og háar skuldir munu einkenna efnahag jaðarríkja evrusvæðisins. Óhjákvæmilegar afskriftir eru ekki framkvæmdar strax þar sem kerfisáhætta sé of mikil. Jaðarríkin Grikkland, Írland, Portúgal, Spánn og jafnvel Ítalía sitja í efnahagslegu svartholi vegna þess að lögeyrir þeirra, evran, er alltof hátt skráð.

Þjóðverjar njóta evrunnar enda lækkuðu þeir framleiðslukostnað sinn jafnt og þétt allan áratuginn. Ef að líkum lætur mun það taka jaðarríkin áratug eða meira að jafna metin við Þjóðverja. Og nærri má geta hvort þeir þýsku sitji með hendur í skauti ef samkeppnishæfni þeirra sé ógnað.

Efnahagskreppan í Evrópu mun fyrr heldur en seinna leiða til pólitískrar kreppu þar sem jaðarríkin gera uppreisn gegn því að vera dæmd í efnahagslegt svarthol.