Þjóðaratkvæði um aðlögun að ESB og Vigdís

Vigdís Hauksdóttir hafði frumkvæði að þingsályktunartillögu um að aðlögunarferlið að ESB sem samfylkingarhluti ríkisstjórnarinnar stendur fyrir verði borið undir þjóðaratkvæði. Tillagan gerði ráð fyrir að gengið yrði til þjóðaratkvæðagreiðslunnar samhliða kosningum til stjórnlagaþings í lok nóvember.

Nýsamþykkt lög um þjóðaratkvæðagreiðslur gera ráð fyrir þrír mánuðir hið minnsta skuli líða frá því að alþingi samþykkir að efna til þjóðaratkvæðagreiðslu og framkvæmd hennar. Vigdís viðurkenndi mistökin þegar henni var bent á þau.

Tillaga Vigdísar og sexmenningana sem eru með henni er jafngóð þótt dagsetningar séu færðar til. Þjóðaratkvæði um aðlögunarferlið í janúarlok eða febrúar er hið besta mál.

Þjóðaratkvæði um aðildarferlið er sáttaboð sem sérstaklega er beint til Samfylkingar og Vinstri grænna. Það væri óráð fyrir stjórnarflokkana að hafna boðinu. 

Vinstri grænir ræða Evrópumál

Vinstri hreyfingin grænt framboð heldur um komandi helgi málefnaþing um ESB og önnur utanríkismál í Hagaskóla í Reykjavík 22. - 23. október. Málþingið er opið félagsmönnum í VG en þátttakendur eru beðnir um skrá komu sína á netfangið [e-mail]

Í herbúðum Vg er undiralda, svo notað sé diplómatískt orðalag, vegna þess að ríkisstjórnarsamstarf við Samfylkinguna var keypt því verði að umsókn um aðild að ESB skyldi send til Brussel. Stanslaus ófriður er innan veggja Vg vegna málsins enda yfirlýst stefna flokksins að Íslandi sé betur borgið utan ESB en innan.

Á málþinginu munu talsmenn samninganefndar Íslands kynna umsóknarferlið, Ragnar Arnalds fyrrverandi formaður Heimssýnar og Brynja B. Halldórsdóttir formaður Ísafoldar flytja erindi og síðan fer fram hópastarf þar sem hver hópur tekur fyrir eina spurningu.

Meðal þeirra úrlausnarefna sem lögð verða fyrir hópana s.s. hversu vel núverandi ferli samrýmist stefnu VG og hvernig andstæðingar aðildar nái best fram markmiðum sínum. Formaður flokksins, Steingrímur J. Sigfússon, mun ásamt fleirum sitja fyrir svörum í pallborði.

Ungt fólk, eyðsluseggir og braskarar

Þeir sem tóku lán og geta ekki borgað af þeim eiga sumir  hverjir réttmæta kröfu á opinberri aðstoð. Ungt fólk sem keypti sína fyrstu íbúð þegar verðið á þeim var hvað hæst og framboðið af lánsfé hvað mest getur í nafni sanngirnissjónarmiða ætlast til leiðréttingar.

Eyðsluseggir sem veðsettu íbúðarhús sín upp í topp til að fjármagna neyslu eiga ekki kröfu á niðurfellingu skulda. Braskarar sem stóðu í sölutilfæringum með íbúðarhúsnæði sitt eiga heldur ekki kröfu um opinbera aðstoð.

Við öll eigum þá kröfu á hendur stjórnvalda að þau taki ekki Árna Pál á umræðuna um niðurfellingu skulda og láti eins og það sé hægt að afskrifa skuldir án þess að nokkur tapi á því.

Lífeyrissjóðir hefðu borið 75% kostnaðar við skuldalækkun

Joly, Cox og aðildarsinnar

Eftir því sem þeim fækkar á Íslandi sem vilja inn í Evrópusambandið eykst innflutningurinn á erlendu fólki sem aðildarsinnar telja málstað sínum til framdráttar. Eva Joly sagðist vilja Ísland inn í Evrópsambandið og Pat Cox frá Írlandi er hér til að hvetja Íslendinga til inngöngu.

Skiljanlega þurfa aðildarsinnar að leita út fyrir landsteinana að talsmönnum inngöngu Íslands i Evrópusambandið. Afgerandi meirihluti þjóðarinnar er andvígur aðild að ESB og helstu atvinnuvegir landsins eru mótfallnir inngöngu. Samfylkingarsöfnuðurinn sem vill inngöngu átti einu sinni hauk í horni Samtaka iðnaðarins - þar ríkir nú skömmustuleg þögn.

Ríkisstjórnin stefnir ekki á inngöngu, aðeins sá hluti ríkisvaldsins sem er í höndum Samfylkingarinnar ætlar í Evrópusambandið. Pat Cox og félagar eru steinhissa á því að Ísland hafi sótt um inngöngu með þetta bakland. Einhver þarf að kynna Cox fyrir Össuri Skarphéðinssyni.  

Össur og miðaldra konur

Össur Skarphéðinsson utanríkisráðherra gat sér til frægðar fyrir nokkrum árum að vera í beinni sjónvarpsútsendingu þegar miðaldra kona, þáverandi heilbrigðisráðherra Ingibjörg Pálmadóttir, fékk aðsvif. Sjónvarpsmyndavélarnar sýndu Össur laga á sér hálstauið og brosa framan í heiminn með konuna liggjandi í gólfinu.

Össur gerir sér enn dælt við miðaldra konur og í dag skrifar hann um Evu Joly í Morgunblaðinu. Eva lét þau orð falla í Silfri Egils um helgina að Ísland ætti heima í Evrópusambandinu. Össur, sem stendur einn uppi með umsókn Íslands að ESB, finnst þessi orð Evu himnasending.

Össur getur þess ekki í Morgunblaðsgreininni að Eva Joly vonaðist til þess að Ísland gengi í Evrópusambandið vegna þess að líkur eru fyrir því að Noregur kæmi í kjölfarið. Norðmenn hafa tvívegis í þjóðaratkvæði hafnað aðild að Evrópusambandinu.

Tækifærismennskan í orðum hinnar norsk-frönsku Evu fór auðvitað framhjá Össuri. Rétt eins og aðsvif Ingibjargar forðum.