Gluggasleikir Helgason bakkar

Baugsskáldið góðkunna Hallgrímur Helgason vann sér til háðungar í búsáhaldabyltingunni að leggjast oná húdd á ráðherrabíl forsætisráðherra til að sleikja framrúðuna. Eftir gjaldþrot Baugs er Gluggasleikir horfinn heim til föðurhúsa og gjammar fyrir Samfylkingu. Honum varð á í messunni í útvarpsviðtali og leiðréttingin er hér.

Samstaða með þjóðinni eða flokksvald

Val forseta stendur á milli þess að sýna samstöðu með ótvíræðum þjóðarvilja og skrifa ekki undir Icesave-frumvarpið eða fara í flokkspólitík og taka undir með vinstriflokkunum sem ekki hafa meirihluta á þingi til að hafna leið þjóðaratkvæðagreiðslu.

Forsetinn tók ákvörðun 2004 um að við sérstakar kringumstæður bæri forseta skylda til að vísa frumvarpi til þjóðarinnar. Þessar kringumstæður eru til muna meira afgerandi í Icesave en þær voru í fjölmiðlamálinu.

Til áherðingar afstöðu sinni ritaði forsetinn sérstaka yfirlýsingu sem er áfest fyrri Icesave-lögum um að lengra verður ekki komist með kröfur Breta og Hollendinga um bætur.

Af þessu leiðir að forsetinn á aðeins þann eina kost að neita undirskrift sinni á frumvarpið.

Darling réttlætir hryðjuverk á íslenskum bönkum

Icesave-frumvarpið færir Íslendingum engar bætur fyrir misnotkun breskra stjórnvalda á hryðjuverkalögum. Samkvæmt fréttum breskra fjölmiðla felldi breska stjórnin Kaupþing til að tryggja hagsmuni sína gagnvart Landsbankanum.

Óskammfeilni Breta á sér engin takmörk þegar þeir í ofanálag krefjast þess að við borgum þeim útgerðarkostnaðinn af ofstopanum.

Bresk stjórnvöld fóru á taugum og keyrðu banka í gjaldþrot. Ef ekki væri fyrir handvömm og vankunnáttu íslenskra stjórnvalda værum við ekki að ræða bætur til Breta vegna Icesave heldur skaðabætur frá Bretum vegna Kaupþings.

Icesave-samkomulag mikilvægt

Stjórnvöld án innistæðu

Dagarnir fjórir sem forseti tók sér til að íhuga hvort hann neitaði undirskrift sinni á Icesave-frumvarpið sýna ríkisstjórn án innistæðu hjá þjóðinni. Icesave-málið er stærsta mál ríkisstjórnar Jóhönnu Sigurðardóttur. Ef allt væri með felldu ættu rök stjórnarinnar að hljóma sem aldrei fyrr. En hvað gerist?

Jú, Hans Haraldsson hittir naglann á höfuðið þegar hann líkir málflutningi stjórnarsinna við landsmót í kjánaskap. Rökin fyrir málstað stjórnarinnar eru svo hjákátleg að menn fara hjá sér.

Í kringum sérhverja ríkisstjórn myndast kúltúr þar sem kristallast það erindi sem stjórnin á við samtíðina. Kúltúr ríkisstjórnar Jóhönnu Sigurðardóttir er frekjulegt dramb nývaldsins sem telur sig ekki þurfa réttlætingu. Í Icesave-málinu kemur stjórnin fram sem illa uppdreginn frekur krakki; belgir sig heima en lyppast niður þegar komið er út fyrir túnfótinn.

Ummæli, ættuð úr forsætisráðuneytinu, um að það sé sama hvaðan gott kemur, þegar til umræðu var lagasetning fyrir gagnaver Björgólfs Thors auðmanns og ábyrgðarmanns Icesave, undirstrikar að ríkisstjórnin á ekkert erindi við eftirhrunsþjóðafélagið.