Færsluflokkur: Dægurmál
Þriðjudagur, 26. ágúst 2025
Silja Bára rústar Háskóla Íslands
Frjáls tjáning er forsenda vísinda og fræða. Rektor Háskóla Íslands, Silja Bára Ómarsdóttir, styður ofbeldisaðgerðir gegn fræðimönnum. Gil S. Epstein, prófessor við Bar-Ilan-háskólann í Ísrael, sætti aðsúg háskólakennara og nemenda er hann reyndi að flytja fyrirlestur í gervigreind í Háskóla Íslands 6. ágúst síðast liðinn. Epstein hafði verið boðið að flytja fyrirlesturinn en sumum kennurum og nemendum þykir hann af óæskilegum uppruna. Epstein er gyðingur.
Silja Bára rektor greip ekki til varna fyrir tjáningarfrelsið og frjálsa orðræðu. Með þögninni samþykkir rektor ofbeldið.
Engum blöðum er um það að fletta að aðsúgurinn, sem gerður var að Epstein 6. ágúst, er hreint og klárt ofbeldi. Silja Bára skilgreindi sjálf ofbeldið, og kallaði það menntamorð, í innsetningarræðu sinni sem rektor í sumar:
Meðvituð eyðilegging menntainnviða verður ekki kölluð annað en menntamorð. Það er alvarlegt og þarf að fordæma. En önnur og lævísari birtingarmynd þess er hugmyndafræðilegt ofbeldi sem felst í því að brjóta niður tjáningarfrelsi og akademískt frelsi með því að refsa og ógna fræðafólki um allan heim. Það þarf hins vegar ekki alltaf að beita ofbeldi heldur er fræðasamfélaginu gert ljóst að betra sé að þegja en að stíga fram. Það er á ábyrgð okkar allra að verja akademískt frelsi. (feitletr. pv)
Innsetning Silju Báru í embætti rektors fór fram 30. júní. Fimm vikum síðar, þann 6. ágúst, er menntamorð og hugmyndafræðilegt ofbeldi framið á Gil S. Epstein. Í lok júní segir rektor að það sé á ,,ábyrgð okkar allra að verja akademískt frelsi" en í byrjun ágúst lyftir Silja Bára ekki litla fingri til að hindra - eða fordæma - menntamorð og hugmyndafræðilegt ofbeldi í fyrirlestarsal Háskóla Íslands.
Silja Bára varði ekki akademískt frelsi þegar á reyndi. Rektor lætur gott heita að menntamorð og hugmyndafræðilegt ofbeldi sé stundað í Háskóla Íslands. Grunnstoð menntunar er frjáls orðræða. Brotin grunnstoð er brotinn háskóli.
Dægurmál | Slóð | Facebook | Athugasemdir (2)
Mánudagur, 25. ágúst 2025
Kristrún skilur ekki muninn á Íslandi og Úkraínu
Úkraína var verkfæri Bandaríkjanna og ESB-Evrópu til að setja Rússland í úlfakreppu. Tilboð Nató til Úkraínu um aðild að hernaðarbandalaginu vorið 2008 hratt af stað atburðarás sem náði hápunkti með innrás Rússa í landið í febrúar 2022. Millileikur í valdaskakinu var stjórnarbylting í Kænugarði, að vestrænu undirlagi, árið 2014 og hertaka Rússa á Krímskaga í kjölfarið.
Eftir innlimun Krímskaga gaf þáverandi forseti Bandaríkjanna, Obama, út yfirlýsingu um að Rússland væri ekki stórveldi heldur staðbundin valdamiðstöð í Austur-Evrópu. Ellefu árum síðar býður Trump Pútín til Alaska og staðfestir þar með stöðu Rússlands sem stórveldis.
Munurinn á Rússlandi sem héraðsríki í Austur-Evrópu annars vegar og hins vegar Rússlandi sem stórveldi er sá að stórveldaklúbburinn starfar eftir óskráðum lögmálum um gagnkvæma virðingu aðildarríkja. Meginreglan er að eitt stórveldi ógnar ekki brýnustu öryggis- og varnarhagsmunum annars stórveldis - nema tilgangurinn sé að efna til stríðsátaka. Á dögum Sovétríkjanna reyndu þau að klekkja á Bandaríkjunum með uppsetningu eldflauga í Kastró-Kúbu. Aldrei komst heimsbyggðin nær kjarnorkustríði en einmitt i Kúbudeilunni 1962.
Trump þvær hendur sínar af Úkraínu með viðurkenningu á Rússland sem stórveldi. Eini bandamaður Úkraínu, sem vert er að nefna, er ESB-Evrópa, sem Trump telur ekki til stórvelda í hernaðarlegum skilningi heldur staðbundið héraðsríki vestast á landflæmi Evrasíu.
Úrslit Úkraínustríðsins eru ráðin, aðeins er spurning um hve stórt tapið verður Úkraínu og ESB-Evrópu. Örvænting ræður ríkjum meðal leiðtoga ESB-Evrópu (og Bretlands) sem sjá fram á sterkt Rússland á bæjarhlaðinu. Til að bæta gráu ofan á svart draga Bandaríkin jafnt og þétt úr viðbúnaði sínum í Evrópu. Áhöld er um hvort Nató-samstarfið lifi öllu lengur nema kannski að nafninu til.
Í viðtengdri frétt segir Kristrún forsætis að úrslit Úkraínustríðsins skipti Íslendinga ,,gríðarlegu máli". Nei, Kristrún, úrslit gresjustríðsins í Garðaríki hinu forna breyta sáralitlu fyrir Ísland sem liggur á miðju Norður-Atlantshafi fjarri vígaslóð í Austur-Evrópu. Fermingarstúlkan í forsætisráðuneytinu talar eins kaldastríðshaukur er missti af falli heimskommúnismans og hruni Sovétríkjanna fyrir 35 árum. Rússland er ekki á leiðinni inn í Vestur-Evrópu með skriðdreka. Pútín hefur hvorki áhuga á að standa undir öldrunarþjónustu aldurhniginna Evrópubúa né stemma stigu við innflæði múslíma í álfuna. Vestur-Evrópa er einfær um að tortíma sjálfri sér.
Höfuðmáli skiptir fyrir Ísland að færa ekki forræði íslenskra mála og utanríkisstefnu til höfuðstöðva ESB-Evrópu í Brussel. Þar virðist Kristrún vera að vitkast upp á síðkastið, lætur hafa eftir sér að ESB-aðild sé ekki í forgangi. Þó nú væri. Að færa Ísland inn í ESB-Evrópu væri eins og að flytja hænur í minkabú og búast við langlífi fiðurfjárins.
ESB er með á prjónunum áætlun um sókn á norðurslóðum, til að bæta upp tapaða vígstöðu í Austur-Evrópu. Tilfallandi skrifaði um hvernig vígður og smurður Brussel-agent, Þorgerður Katrín utanríkisráðherra, teflir í tvísýnu sambandi Íslands og Bandaríkjanna með þjónkun við ESB-Evrópu. Feigðarflan utanríkisráðherra verður að blása af áður en það er um seinan.
![]() |
Skiptir Íslendinga gríðarlegu máli |
Tilkynna um óviðeigandi tengingu við frétt |
Dægurmál | Slóð | Facebook | Athugasemdir (3)
Sunnudagur, 24. ágúst 2025
Kyn, hugsun og fáránleiki
Líffræðilegt kyn er áþreifanleg og sýnileg staðreynd. Nýburi er annað tveggja meyja eða sveinn. Tilvik óræðra kyneinkenna eru svo fá að ekki tekur að ræða þau. Enginn getur prófað að vera annað kyn en fékkst við fæðingu. Ekki frekar en hægt sé að prófa að vera í öðrum líkama en sínum eigin.
Meðvitundin kemur í heiminn með líkamanum og verður ekki aðskilin út ævina. Hægt er að krukka í líkamann á marga vegu með lyfjum og skurðaðgerðum en líkaminn verður alltaf í grunninn það sem hann er frá fæðingu, karlkyns eða kvenkyns, uns yfir lýkur.
Hugsun er helsta afurð meðvitundarinnar. Með hugsuninni getur fólk ímyndað sér hvað sem vera skal. Að það sé af öðru kyni, annarri tegund eða dauður hlutur, tannbursti eða bókahilla. Í leik barna er alsiða að fara í margvísleg hlutverk mannheima og dýraríkis, þykir þroskandi. Flestir vaxa upp úr hlutverkaleikjum æskunnar en fáeinir festast á þroskastigi kennt við anal.
Hugsanafrelsi telst til mannréttinda. Það felur í sér að hver og einn má ímynda sér hvað sem vera skal og hafa sjálfsmynd er lundinni þjónar; heimskur en þykjast gáfaður, leiðinlegur en telja sig hrók alls fagnaður; undirlægja en ímynda sér að vera leiðtogi. Manninum er gefið frjálst val. Sumir velja af kostgæfni og hafa auga með sjálfum sér á meðan aðrir lifa í lygi og haga sér eins og hálfvitar. Þannig er mannlífið.
Á móti einstaklingsfrelsi kemur að samfélagið þarf viðurkennd sannindi til að vera starfhæft. Grunnsannindi mannlífsins eru aldur og kyn. Einstaklingur verður sjálfráða við ákveðinn aldur og fær ýmis aldurstengd réttindi eins og bílpróf og ellilífeyri. Ef hver og einn mætti ráða skráðum aldri í þjóðskrá yrði óreiða. Einhver fimmtán ára segðist sjötugur og heimtaði ellilífeyri, áttræður segðist tveggja ára og vildi fá inni á leikskóla með bleyjuskiptum og barnaleikjum. Í stuttu máli yrði samfélagið óstarfhæft. Nóta bene: hugtakið trans-aldur er til.
Við umberum karla í konulíki og lyftum ekki brúnum þótt kerling þykist karl í krapinu. Við erum umburðalynt samfélag góðu heilli og sættum okkur við sérvisku, geðræna kvilla og almennan fávitahátt upp að vissu marki.
Sértrúarhópurinn með forskeytið trans getur átt samleið með venjulegu fólki að gefinni aðgreiningu á gervi og gagnreyndu. Sannindi eins og að karlar fái ekki legskoðun, þótt þeir segist konur, verða að halda. Jafnframt að karlar keppi ekki í kvennaíþróttum þótt þeir skeri undan sér. Álitamál, sem þyrfti að ræða betur, er hvort karl, sem lætur gelda sig, skuli eiga rétt á búningsklefa kvenna í sundlaugum án vottorðs um að slátrið sé farið.
Ekki ber mikið á þeim vanda að konur, sem þykjast karlar, krefjist aðgangs að karlarýmum. Vandinn er allur á hinn veginn, karlar með ímyndaða píku troða sér inn með góðu eða illu í rými ætlað konum. Hlálegt er þegar meintir femínistar taka karlperrum fagnandi út á það eitt að þeir segjast kerlingar. Ljúgandi karlar við slæma geðheilsu eru nokkru fleiri en karlar með eggjastokka.
Mikilvægast af öllu er þó að transliðið láti börn í friði. Fáránleikakenningar um að hægt sé að fæðast i röngum líkama og að kynin séu óteljandi má viðhafa í sérviskuklúbbum fullorðinna en eiga ekkert erindi í leik- og grunnskóla. Fíflin eiga sinn samastað í samfélaginu eins og aðrir. En við eigum ekki að láta viðundrin ráða ferðinni og alls ekki leyfa að þau komi að uppeldi og fræðslu barna.
![]() |
Snorri segir fólk ekki geta skipt um kyn |
Tilkynna um óviðeigandi tengingu við frétt |
Dægurmál | Slóð | Facebook | Athugasemdir (7)
Laugardagur, 23. ágúst 2025
Ólafur Þór undirbýr lok Namibíumálsins með leka í RÚV
Héraðssaksóknari, Ólafur Þór Hauksson, er vanhæfur í viðamestu rannsókn embættisins seinni ára, Namibíumálinu. Ólafur Þór undirbýr niðurfellingu Namibíumálsins í samráði við RÚV, sem hratt málinu af stað með alræmdum Kveiksþætti í nóvember 2019. Namibíumálið er ásakanir RÚV um að Samherji hafi stundað mútugjafir um miðjan síðasta áratug til að tryggja sér veiðiheimildir í namibískri landhelgi. Niðurfelling málsins er áfellisdómur yfir embættinu og náttúruhamfarir fyrir RÚV.
Í bréfi sem Ólafur Þór héraðssaksóknari skrifaði til embættis ríkissaksóknara 22. apríl í ár viðurkennir hann vanhæfi að rannsaka mál er tengjast Jóni Óttari Ólafssyni, fyrrum starfsmanni Ólafs Þórs. Vanhæfi héraðssaksóknara stafar af kæru sem hann lagði fram gegn Jóni Óttari 2012. Síðar starfaði Jón Óttar fyrir Samherja og varð sakborningur í Namibíumálinu árið 2020.
Tilefni bréfsins sem Ólafur Þór skrifaði 22. apríl er rannsókn ríkissaksóknara á leka frá embætti héraðssaksóknara, áður sérstökum saksóknara, og varðar persónuupplýsingar fjölda einstaklinga sem voru til rannsóknar vegna hrunmála.
Í bréfinu segir Ólafur Þór
verulegan vafa leika á að embætti héraðssaksóknara sé til þess bært að rannsaka málið [þ.e. ólögmæta dreifingu persónuupplýsinga] þar sem undirritaður stýrði því embætti sem gögnin eru talin stafa frá og kærði sömu aðila [Jón Óttar] fyrir brot á þagnarskyldu á sínum tíma.
Þar sem Jón Óttar er einnig sakborningur í Namibíumálinu gildir vanhæfi Ólafs Þórs sömuleiðis í því máli. Þetta er lögfræði 101.
Ólafur Þór tíundar í bréfinu samskipti sín við Helga Seljan fréttamann RÚV. Þeir tveir hafa unnið saman í áravís þar sem Helgi fær upplýsingar frá embættinu til að matreiða þannig að grunaðir fái sem verstu útreiðina í fjölmiðlaumræðunni er fylgir rannsóknum embættis héraðssaksóknara.
Allt frá hrunmálum starfar Ólafur Þór eftir formúlunni að sé skortur á sönnunargögnum í dómsmáli skuli menn teknir af lífi í fjölmiðlum. Jafnvel menn sem voru aðeins vitni í sakamálum fengu að kenna sérstakri starfsaðferð Ólafs Þórs. Einar Sveinsson í Sjóvá varð fyrir barðinu á skipulögðum leka. Tilfallandi fjallaði um starfsháttu Ólafs Þórs í þeim embættum sem hann hefur stýrt frá hruni, embætti sérstaks saksóknara og héraðssaksóknara, undir fyrirsögninni Sérstakur, RÚV og vinstrimenn:
Sérstakur hafði annan hátt á og lak skipulega upplýsingum til fjölmiðla sem skrifuðu sakfellandi fréttir. Til þess var leikurinn gerður, að búa til sekt í umræðunni. Það eykur líkurnar á sakfellingu fyrir dómi. Samkvæmt samantekt Jennýjar Stefaníu hér að ofan var árangurshlutfall sérstaks saksóknara um 50 prósent fyrir héraðsdómi. Það þýðir að önnur hver saksókn var röng af hálfu sérstaks, sýknað var í málinu. Nærri má geta hvort ekki hafi hjálpað til, aukið líkurnar á sakfellingu, ef fjölmiðlar fóru hamförum í aðdraganda réttarhalda og birtu sakfellandi fréttir. Vinstrimenn í sjálfboðavinnu á samfélagsmiðlum sáu um fréttadreifingu. Á alþingi kyrjuðu vinstrimenn sönginn um að sakamenn mættu ekki ganga lausir.
Er Ólafur Þór tilkynnti lok rannsóknar Namibíumálsins í byrjun júlí í sumar fékk RÚV fréttina beint frá embættinu en ekki aðrir fjölmiðlar. RÚV er helsta málpípa héraðssaksóknara og hefur verið í hálfan annan áratug
Í júlí í sumar veit Ólafur Þór að hann er vanhæfur í Namibíumálinu, rétt eins og hann er vanhæfur í persónuupplýsingamálinu - játaði það í bréfi til ríkissaksóknara 22. apríl í ár. Með réttu hefði héraðssaksóknari átt að tilkynna niðurfellingu Namibíumálsins, en ekki það eitt að rannsókn sé lokið. Hvers vegna tilkynnir Ólafur Þór ekki niðurfellingu þegar fyrir liggur að ekki verði ákært?
Jú, héraðssaksóknari ætlar í samvinnu við fjölmiðla, RÚV sérstaklega, að koma höggi á Samherjamenn í fjölmiðlaumræðunni. Ólafur Þór er vanhæft ákæruvald en stundar skæruliðahernað á bakvið tjöldin til að rétta sinn hlut. Í samkrulli við fréttamenn leitast héraðssaksóknari við að sýna saklausa menn seka.
Í lok júní, rétt áður en rannsókn lauk formlega, bætti Ólafur Þór nokkrum skýrslum við gögn málsins. Skýrslurnar eru gagngert hugsaðar til að sýna sakborninga í neikvæðu ljósi. Enginn dómstóll mun fjalla um trúverðugleika upplýsinganna í skýrslunum, einfaldlega vegna þess að það verður ekki ákært. Upplýsingunum, sem bætt var við gögn málsins, á síðustu metrum rannsóknarinnar, eftir að vanhæfi Ólafs Þórs lá fyrir, eru eingöngu ætlaðar sem fóður í fjölmiðlaumræðu er gengur út á það að sýna Samherjamenn seka þótt þeir sæti ekki ákæru - og eru þar af leiðandi saklausir.
Hér er um að ræða tilraun til dómsmorðs utan dómstóla. RÚV hefur sérstakan hag af því að Samherjamenn líti út í umræðunni fyrir að vera sekir þegar þeir í reynd eru alsaklausir. RÚV hratt Namibíumálinu úr vör fyrir sex árum. Aðeins ein heimild er fyrir ásökunum RÚV um mútugjafir í Namibíu. Heimildin er ógæfumaðurinn Jóhannes Stefánsson sem namibíska útgáfan Informanté kallar fíkil og ómerking. Vitnisburður Jóhannesar er hvergi tækur í dómsmálum, hvorki í Namibíu né Íslandi. Aðeins siðlausir fréttamenn RÚV taka mark á söguburði manns sem er svo illa gáttaður að hann fer rangt með eigin kennitölu í lögregluyfirheyrslu.
Tilfallandi spá er að næstu áramót verði Ólafur Þór Hauksson ekki lengur héraðssaksóknari. Starfsemin á Glæpaleiti heldur aftur áfram eins og ekkert hafi í skorist. Ríkisfjölmiðlinum stjórnar fyrrum lögreglustjóri sem kann ekki muninn á réttu og röngu og vílar ekki fyrir sér ósannindin. Spilltir embættismenn leika lausum hala hér á landi. Þeir vinna tjón á samfélaginu, grafa undan trausti með dómsmorðum utan laga og réttar í samvinnu við fjölmiðla sem þekktir eru fyrir að taka lögin í sínar hendur, samanber byrlunar- og símamálið.
Dægurmál | Slóð | Facebook | Athugasemdir (2)
Föstudagur, 22. ágúst 2025
RÚV segir frétt af síma, þó ekki byrlunarsímanum
Frétt á RÚV í fyrradag segir af lögreglu sem fær ekki að rannsaka síma. Landsréttur hafnar kröfu lögreglu, segir ekkert liggja fyrir um að síminn geymi upplýsingar er varði meint afbrot mannsins. Höfundur fréttarinnar er Brynjólfur Þór Guðmundsson fréttamaður.
Áhugi Brynjólfs Þórs á símum er valkvæður. Frægasti sími landsins er sími Páls skipstjóra Steingrímssonar. Næst frægasti síminn er Samsung-síminn í eigu RÚV sem notaður var til að afrita síma skipstjórans:
Þóra Arnórsdóttir ritstjóri Kveiks á RÚV keypti Samsung síma í apríl 2021 og skráði á hann númerið 680 2140 í sama mánuði. Síminn er sömu gerðar og sími Páls skipstjóra sem hefur númerið 680 214X. Aðeins munar síðasta tölustaf á númerunum tveim. Til afritunar var nauðsynlegt að hafa síma sömu gerðar og skipstjórans, Samsung. Símarnir eru lagðir saman og afritunarforrit er ræst. Aðgerðin tekur nokkrar mínútur.
Páli skipstjóra Steingrímssyni var byrlað 3. maí 2021, stuttu eftir símakaup Þóru. Nýr ónotaður sími með símanúmer líkt númeri skipstjórans beið á Efstaleiti. Ráðabruggið lá fyrir. Aðeins átti eftir að byrla og stela.
Brynjólfur Þór fréttamaður hefur skrifað fréttir um byrlunar- og símamálið en aldrei spurst fyrir um RÚV-símann sem Þóra keypti í apríl 2021 til að afrita síma skipstjórans. Enn síður að fréttamaðurinn velti upp þeirri spurningu hvort starfsfélögum hans hafi siðferðilega og lagalega verði heimilt að afrita síma skipstjórans. Upplýsingar um símann og meðferð hans eru þó á vinnustað Brynjólfs Þórs. Núverandi og fyrrverandi samstarfsmenn Brynjólfs Þórs, t.d. Helgi Seljan og Þóra, gætu líka verið fréttamanninum innan handar að upplýsa málsatvik.
Í vetur gerði Brynjólfur Þór fréttaskýringu um byrlunar og símamálið. Tilfallandi bloggaði undir fyrirsögninni RÚV þegir um hlut Þóru í skæruliðafréttinni:
Fréttin um skæruliðadeild Samherja frumbirtist samtímis í Stundinni og Kjarnanum, að morgni dags 21. maí 2021. Fréttin, efnislega samhljóða í báðum miðlum, vísaði í gögn úr síma Páls skipstjóra Steingrímssonar, einkum samtöl við samstarfsmenn. Þóra Arnórsdóttir ritstjóri Kveiks á RÚV fékk síma skipstjórans til afritunar 4. maí 2021.
Kveikur er fréttaskýringaþáttur. Hvers vegna notaði Þóra ekki efni úr síma skipstjórans í fréttaskýringu um skæruliðadeild Samherja? Hvers vegna var fréttin send á Stundina og Kjarnann til birtingar? Fjölmiðlar vinna aldrei þannig að einn fjölmiðill aflar heimilda, vinnur fréttina og sendir hana á aðra fjölmiðla til birtingar. Allir blaðamenn vita að svona vinnubrögð eru aldrei stunduð á fjölmiðlum.
Lifibrauð fjölmiðla er fréttir. Fjölmiðill sem situr einn að frétt en gefur hana frá sér til annarra fjölmiðla er augljóslega ekki að stunda fréttamennsku. Eitthvað annað en að upplýsa almenning býr að baki.
Af öllum fjölmiðlum á Íslandi ber RÚV mesta ábyrgð að upplýsa þjóðina, eiganda ríkisfjölmiðilsins, hvers vegna starfsmenn RÚV tóku við síma, sem fékkst með byrlun, afrituðu efni símans, unnu frétt og sendu tvær útgáfur hennar á Stundina og Kjarnann.
Í gærkvöld [24. jan. 2025] birti RÚV fréttaskýringu um staðfestingu ríkissaksóknara að lögreglurannsókn er hætt á hlut blaðamanna í byrlunar- og símamálinu. RÚV birtir mynd af Þóru ásamt öðrum sakborningum en fjallar ekkert um hlut hennar að málinu.
Brynjólfur Þór og RÚV telja síma og sakamálarannsóknir fréttaefni. En ekki tvo frægustu síma landsins, báða af Samsung-gerð, og annar þeirra í eigu RÚV.
Hvar er afritunarsíminn með númerið 680 2140 niðurkominn?
Dægurmál | Slóð | Facebook | Athugasemdir (0)
Fimmtudagur, 21. ágúst 2025
Gasa, Úkraína og sjálfstortíming ESB-Evrópu
Dræpu hryðjuverkamenn 15 þúsund Breta myndi breska ríkisstjórnin verðlauna hryðjuverkin með sjálfstæðu ríki ódæðismanna í nágrenni London? Þannig spyr Netanjahú forsætisráðherra Ísraels og vísar til 7. október 2023 er Hamas-liðar stóðu fyrir fjöldamorðum í Ísrael. Átökin í Gasa eru lóðbeint framhald af íslamskri villimennsku fyrir tveim árum.
Starmer forsætisráðherra Bretland og Macron forseti Frakklands verðlauna Hamas-hryðjuverkin með viðurkenningu á sjálfstæðu Hamas-ríki.
Uppgjöf ESB-Evrópu og Bretlands gagnvart Hamas er í fullkominni andstöðu við herskáa stefnu þeirra í Úkraínu. Þar vilja Starmer, Macron og Evrópuleiðtogar meira stríð, að Úkraínumenn berjist til síðasta manns. ESB-Evrópa og Bretland senda enga hermenn til Úkraínu en veita vopn og fjárhagsaðstoð. Til Gasa sendir ESB-Evrópa peninga til vopnakaupa Hamas og gröft neðanjarðarganga til hryðjuverka.
ESB-Evrópa og Bretland fylgja utanríkisstefnu sem kenna má við eftir-kaldastríðstímabilið, 1989-2022. Upphaf tímabilsins er fall Berlínarmúrsins, endalokin miðast við innrás Rússa í Úkraínu fyrir rúmum þrem árum. Ef einhver ein bók fangar hugmyndafræði tímabilsins er það Endalok sögunnar eftir Francis Fukuyama frá 1992.
Vestrænt forræði heimsbyggðarinnar var ráðandi viðhorf eftir kalda stríðið. Bandalagið milli Bandaríkjanna og ESB-Evrópu, með stuðningi alþjóðastofnana, skyldi lóðsa heiminn inn í bjarta nýja framtíð vestrænna gilda og stjórnarhátta. Borgaralegt lýðræði, kapítalismi með ríkisábyrgð og alþjóðahyggja var þríeinn guð hugmyndafræði sem um tíma virtist ósigrandi.
Vestrænir leiðtogar beggja vegna Atlantsála unnu kappsamlega að stofnun heimsþorpsins. Eitt stærsta verkefnið var viðskipta- og tollasamningur milli Bandaríkjanna og ESB-Evrópu, TTIP.
Þrjár meginástæður eru fyrir að heimsþorpið breyttist úr draumsýn í martröð. Í fyrsta lagi uppreisn almennings í tveim vestrænum meginríkjum sama árið, 2016. Um sumarið kusu Bretar útgöngu úr ESB-Evrópu, Brexit. Sama haust fékk Trump fyrst kjör sem forseti Bandaríkjanna. Í báðum tilvikum hafnað almenningur hornsteini heimsþorpsins, alþjóðahyggjunni. Engilsaxnesku þjóðirnar áttuðu sig á að heimsþorpið var verkefni sem þjónaði elítunni, rótlausum heimsborgunum, en ekki almenningi. TTIP dó drottni sínum.
Í öðru lagi reyndist vestræn stjórnmálamenning ekki sú útflutningsvara sem menn héldu. Tilraunir til að þvinga ofan á kokið á múslímaríkjum vestrænum gildum mistókst herfilega, í Írak, Afganistan og Sýrlandi. Í Austur-Evrópu gekk nokkru betur, ekki síst af þeirri ástæðu að kommúnisminn skildi þar eftir sig sviðna jörð. Austur-Evrópuríki hrúguðust inn í ESB og Nató árin eftir fall Berlínarmúrsins. ESB-Evrópa bauð ekki Rússlandi í félagsskapinn. Opin spurning er hvort Rússar hefðu þekkst slíkt tilboð. Vestræna hagfræðitilraunin, strax eftir fall Sovétríkjanna, gerði fáeina olígarka ofurríka en almenningur lapti dauðann úr skel. Hér er kominn lítt kunnur samnefnari Trump og Pútín. Báðir ná eyrum kjósendahópa í heimalöndum sínum sem hafa ímugust á valdaelítum. Vestræna alþjóðahyggjan er tekin með fyrirvara í Austur-Evrópu. Pólland og Ungverjaland vilja sem minnst vita af stefnu ESB-Evrópu í málefnum hælisleitenda sem streyma frá múslímaríkjum.
Þriðja ástæðan að heimsþorpið er núna eins og tjaldbúðir indíána eftir heimsókn Custer er að vestrið missti tökin á frásögninni. Á öðrum áratug aldarinnar hnignaði máttur ráðandi fjölmiðla að útlista heimsmálin. Dreifræði samfélagsmiðla jók tortryggni á heilindi valdastétta sem hefðbundnir fjölmiðlar voru hallir undir. Brexit, Trump og uppgangur AfD í Þýskalandi, svo dæmi séu tekin, hefðu ekki raungerst án samfélagsmiðla enda í berhögg við meginstraumsmiðla.
Í Úkraínustríðinu er tekist á um hvort Úkraína verði Nató-ríki eða ekki. Rússar segja nei en ESB-Evrópa já. Bandaríkin studdu ESB-Evrópu í nafni alþjóðahyggju en Trump afturkallaði þann stuðning. Eins og mál standa berst Úkraína fyrir lífi sínu sem sjálfstætt þjóðríki. ESB-Evrópa hefur hvorki styrk né pólitískan vilja til að taka við Bandaríkjunum sem helsti bakhjarl stjórnarinnar í Kænugarði. Rússneskur sigur í Úkraínu gerbreytir valdahlutföllum í Evrópu. Forræði Vestur-Evrópu, þar sem kjarnaríki ESB-Evrópu liggja, yfir austurhluta álfunnar verður hnekkt. Sú litla alþjóðahyggja sem var í Austur-Evrópu fjarar út.
Hvað gera leiðtogar ESB-Evrópu og Bretlands þegar heimsþorpið er í rúst og vestræn alþjóðahyggja heyrir sögunni til? Jú, þeir tileinka sér íslamska alþjóðhyggju, pan-arabisma, sem gengur út á tortímingu Ísraelsríkis. Múslímar eru stórir kjósendahópar í Vestur-Evrópu og fá æ meira vægi. Vinstrimenn, gömlu marxistarnir, eru við það heygarðshorn að vestræn menning sé til að skammast sín fyrir. Þeir viljandi drepa frjómagnið sem fyrir margt löngu gerði vestrið máttugt. Vinstrihugtök eins fjölmenning eru Trójuhestur múslíma inn í evrópskar borgir. Starmer, Macron en í minna mæli Merz í Þýskalandi, af sögulegum ástæðum, tala í þágu yfirráðastefnu múslíma, er þeir stuðla að falli Ísraelsríkis.
Innan fárra áratuga heita ráðamenn Vestur-Evrópu Muhammed, Abdulla, Ali og Salman. Múslímsk Vestur-Evrópa mun standa andspænis kristinni Austur-Evrópu. Sjálfstortíming ESB-Evrópu er í vinnslu án þess að margir gefi henni gaum.
![]() |
Telur hertöku leiða til frekari hörmunga |
Tilkynna um óviðeigandi tengingu við frétt |
Dægurmál | Slóð | Facebook | Athugasemdir (0)
Miðvikudagur, 20. ágúst 2025
Samtökin 78 búa til glæpi og ala á hatri
RÚV, auðvitað, flutti frétt í gærkvöldi fyrir Samtökin 78. Fréttamaður sagði fjölgun á ,,hugsanlegum hatursglæpum", úr fimm í sextán á milli ára. Talsmaður Samtakanna 78 fékk við sig viðtal til að krefjast að ,,hugsanlegir hatursglæpir" verði tilefni lagabreytinga til að hægt sé að refsa þeim sem andæfa trúarsetningum lífsskoðunarfélagsins um að sumir fæðist í röngu kyni og kynin séu ekki tvö heldur óteljandi.
Tilfallandi þekkir á eigin skinni hvernig Samtökin 78 misbeita, í samvinnu við ákæruvald, löggjöfinni eins og hún stendur í dag. Tilfallandi var stefnt fyrir dóm er hann gagnrýndi aðkomu Samtakanna 78 að leik- og grunnskólum. Strangari löggjöf í þágu lífsskoðunarfélagsins stóreykur líkurnar á dómsmorðum. Gagnrýni verður heft ef ekki bönnuð. Lögregla í verktöku hjá Samtökunum 78 hundeltir mann og annan fyrir að tjá heilbrigða skynsemi, að kynin séu tvö og ekki er hægt að fæðast í röngum líkama.
Samtökin 78 leika þann leik, iðulega í samvinnu við RÚV og Vísi, að setja á svið glæpi til að fá samúð - og strangari löggjöf. Tilfallandi fjallaði um sviðsetningu fyrir tveim árum:
Samtökin 78 tilkynntu um hatursglæp 26. september síðast liðinn [2023]. Útlendur maður á ráðstefnu samtakanna varð fyrir líkamsárás í miðborginni, að sögn. Í frétt RÚV er haft eftir Daníel E. Arnarssyni framkvæmdastjóra Samtakanna að maðurinn hafi borið merki hinsegin fólks og samtökin ,,geri ráð fyrir að árásin hafi verið hatursglæpur."
Strax var grunsamleg áherslan á hatursglæp. Hvernig gátu Samtökin 78 vitað um hugarfar að baki meintu afbroti? Hitt er augljóst að Samtökin 78 notuðu tilefnið til allsherjarútkalls í fjöl- og samfélagsmiðlum um að Ísland væri lífshættulegt hinsegin fólki. Tilfallandi bloggaði:
Á alþingi voru öryggismál félagsmanna Samtakanna 78 rædd og fordæmt að þeir geti ekki um frjálst höfuð strokið í íslenska haturssamfélaginu. Ráðherra kvaðst ,,svolítið hræddur" um líf og limi. Allt þetta vegna atviks sem enn er á huldu hvernig bar að og með hvaða afleiðingum. Enginn er grunaður; málið er á frumstigi rannsóknar. En ekki skortir stórkarlalegar yfirlýsingar, m.a. frá forsætisráðherra, sem gerir sér far um að ala á ótta og öryggisleysi og ásaka almenning um ofstæki.
Rannsókn lögreglu hófst þegar eftir tilkynninguna. Meintur brotaþoli fór úr landi hálfum öðrum sólarhring eftir atvikið, að sögn með tannskemmdir, og hefur ekkert til hans spurst. Eftir stendur tilkynning um alvarlegan glæp.
Grímur Grímsson yfirlögregluþjónn sagði rúmum tveim vikum eftir meintan atburð að ,,mjög óvanalegt" væri að líkamsárás af þessum toga væri ekki upplýst. Í viðtengdri frétt mbl.is, rúmum tveim mánuðum eftir atvikið, er málið enn óupplýst.
Líkur standa til þess að meintur hatursglæpur verði aldrei upplýstur. Einfaldlega af þeirri ástæðu að engin líkamsárás átti sér stað. Tilfallandi tilgáta er að útlendi ráðstefnugesturinn hafi orðið fyrir slysi, e.t.v. vegna rafhjóls, og það hafi í meðförum Samtakanna 78 orðið að hatursglæp.
Eftir að ofanritað var skrifað átti tilfallandi samtal við rannsóknalögreglumann sem tengist kæru Samtakanna 78 á hatursglæpnum. Mýgrútur er af myndavélum í miðborginni. Lögreglumaðurinn tjáði tilfallandi að í rannsókninni hefði verið sett saman myndskeið að meintu fórnarlambi, sem var sænskur maður. Aðeins í tæpa hálfa mínútu hefði sá sænski ekki verið í mynd, á ferð sinni frá samkomu Samtakanna 78 og inn á hótelið sem hann dvaldi. Engin árás var gerð á manninn. Sagan, og þar með kæran, er uppspuni frá rótum. Samtökin 78 stóðu að lygaherferð um hatur í Reykjavík.
RÚV-fréttin í gær er sennilega upptaktur af nýrri herferð Samtakanna 78 um að sértrúarsöfnuðurinn sæti ofsóknum og þurfi aukna lagavernd. Samtökin búa til glæpi í samfélaginu og ala á hatri. Það gefur svo vel í kassann. Samtökin 78 græddu 60 milljónir króna á glæpasögunni um sænska hinseginmanninn og ekki-hatursglæpinn í miðborginni fyrir tveim árum.
Áhugamenn um flökkusögur og samsæriskenningar bíða spenntir eftir næsta leikþætti frá alræmdasta lífsskoðunarfélagi samtímans.
Dægurmál | Slóð | Facebook | Athugasemdir (4)
Þriðjudagur, 19. ágúst 2025
Rektor á flótta undan menntamorði
Menntamorð var framið í Háskóla Íslands þegar gyðingi var meina að flytja fyrirlestur um gervigreind. Fyrirlesarinn var ekki af ,,réttu" þjóðerni og kom ekki frá ,,réttum" háskóla. Silja Bára rektor Háskóla Íslands svarar ekki blaðamanni sem vill spyrja hana um menntamorð, akademískt frelsi og hugmyndafræðilegt ofbeldi.
Í innsetningarræðu sinni í sumar skilgreindi Silja Bára menntamorð og akademískt frelsi:
Meðvituð eyðilegging menntainnviða verður ekki kölluð annað en menntamorð. Það er alvarlegt og þarf að fordæma. En önnur og lævísari birtingarmynd þess er hugmyndafræðilegt ofbeldi sem felst í því að brjóta niður tjáningarfrelsi og akademískt frelsi með því að refsa og ógna fræðafólki um allan heim. Það þarf hins vegar ekki alltaf að beita ofbeldi heldur er fræðasamfélaginu gert ljóst að betra sé að þegja en að stíga fram. Það er á ábyrgð okkar allra að verja akademískt frelsi. [...]
Þannig getum við styrkt vissu okkar um að háskólasamfélagið standi með gagnrýnum röddum, standi með rétti fræðafólks til að leita sannleika og þekkingar án óeðlilegra afskipta og ræða hugmyndir frjálst og án ótta við ritskoðun eða refsiaðgerðir, eins og kemur fram í nýlegri yfirlýsingu íslenskra háskólarektora um akademískt frelsi og sjálfstæði háskóla.
Gil S. Epstein, prófessor við Bar-Ilan-háskólann í Ísrael, fékk boð að halda fyrirlestur í Háskóla Íslands um gervigreind miðvikudaginn 6. ágúst. Er Epstein hóf fyrirlesturinn gerðu háskólakennarar og nemendur aðsúg að honum og varð Epstein að hætta vegna ,,hugmyndafræðilegs ofbeldis" sem Silja Bára gerði að umtalsefni mánuði áður en Epstein hélt fyrirlesturinn.
En viti menn, Silja Bára lætur gott heita að menntamorð sé framið í Háskóla Íslands þar sem hún er rektor og ber ábyrgð á akademísku frelsi, sannleiksleit og þekkingu. Hún lætur hugmyndafræðilegt ofbeldi og gyðingaandúð grassera í skólanum án þess að segja orð. Rektor svarar ekki fyrirspurnum frá fjölmiðlum, grefur sig í neðanjarðarbyrgi vestur á Melum eins og Hamas-félagsbræðurnir á Gasa. Hamas myrðir og tekur gísla; Silja Bára hylmir yfir menntamorð og tekur tungumálið í gíslingu.
Hvernig í veröldinn gat það gerst að Silja Bára fékk kjör rektors þjóðarskóla Íslendinga? Andverðleikar tröllríða húsum hér á landi - einkum opinberum byggingum.
![]() |
Silja Bára lætur ekki ná í sig |
Tilkynna um óviðeigandi tengingu við frétt |
Dægurmál | Slóð | Facebook | Athugasemdir (1)
Mánudagur, 18. ágúst 2025
ESB-Evrópa betlar Trump um meira stríð
ESB-Evrópa og Bretland vilja halda áfram stríðinu í Úkraínu. Leiðtogar Evrópu mega ekki til þess hugsa að friður verði á milli Úkraínu og Rússlands. Evrópuleiðtogar hyggjast fylkja liði með Selenskí Úkraínuforseta á fund með Trump og biðja um meira stríð.
Í upphafi átaka við Rússland, sem má tímasetja við Búkarestfund leiðtoga Nató árið 2008 (já, þú last rétt, fyrir 17 árum) var hugmyndin að nota Úkraínu til að knésetja Rússland. Markmiðið var að Rússland yrði forðabúr ESB-Evrópu, skaffaði olíu og gas og aðra hrávöru. Fyrir miðja síðustu öld töluðu Þjóðverjar um lebensraum, lífsrými, í austri. Að breyttu breytanda keyrði ESB-Evrópa sömu stefnu og austurríski liðþjálfinn með frímerkjaskeggið. Helsti munurinn er sá að þýska hernum blæddi út á austurvígstöðvunum; nú eru það Úkraínumenn einir sem færa mannfórnir fyrir vestrænt hagrými í austri.
Þangað til Trump kom til skjalanna hafði ESB-Evrópa stuðning Bandaríkjanna í Úkraínu-verkefninu. Viðskiptin voru þau að vestrið útvegaði fjármagn og vopn en Úkraína mannskap. Vestrið bjóst við snöggum sigri, að Rússar myndu annað tveggja gefast upp eða bylting yrði gerð líkt og í fyrra stríði.
Alaskafundur Trump og Pútín á föstudag var myndbirting á umpólun Washington gagnvart ESB-Evrópu almennt og Úkraínustríðinu sérstaklega. Bandaríkin vilja eðlileg samskipti við Rússland. Forsenda er að Úkraínustríðinu linni. ESB-Evrópa vill aftur fresta fram í rauðan dauðann afleiðingum af misheppnuðum austurvíkingi. Tilhugsunin um sterkt Rússland fær Brussel til að skjálfa á beinunum. Til að bæta gráu ofan á svart bendir flest til að Bandaríkin hverfi frá meginlandi Evrópu með herlið sitt. Nató-samstarfið er í uppnámi en þar borga Bandaríkin brúsann og standa undir mesta varnarviðbúnaðinum.
Verði samskiptin við Rússland vinsamlegri er enn minni ástæða fyrir Bandaríkin að ábyrgjast ytri landamæri ESB-Evrópu. Það veldur hryllingi á meginlandinu sem býr enn að minningunni um seinna þrjátíu ára stríðið 1914-1945. Í sögubókum er tímabilinu skipt í fyrra og seinna stríð. Í báðum tilvikum komu Bandaríkjamenn Evrópu til bjargar, stöðvuðu blóðbaðið - með dyggu stuðningi Rauða hersins í seinna stríði.
Trump á það til að vera sammála síðasta ræðumanni. Ef Selenskí og leiðtogum Bretlands og ESB-Evrópu tekst vel upp er ekki að vita nema friðarferlið taki að hökta og skrölta.
Það yrði skammgóður vermir. Rússar hafa yfirhöndina á vígvellinum. Tíminn vinnur með þeim, ekki Úkraínu og ESB-Evrópu. Vestrænir fjölmiðlar hlynntir Úkraínu vekja athygli á þverrandi baráttuþreki úkraínska hersins, að ekki sé talað um skort á mannskap. Eftir því sem Rússar leggja undir sig meira úkraínskt land versnar samningurinn sem Selenskí og ESB-félögum býðst.
Eftir Alaskafund Trump og Pútin er búið að blása af vopnahlé sem undanfara friðarsamninga. Á diplómatísku þýðir það að endanlegur friðarsamningur þarf að liggja fyrir áður en vopnin þagna. Valið stendur á milli friðarsamnings núna eða uppgjafar síðar. Hvort heldur sem verður munu stríðslok í Úkraínustríðinu valda straumhvörfum í Evrópu. Líkt og uppgjöf Þjóðverja vorið 1945.
Meginkröfur Rússa eru að Úkraína verði hlutlaust ríki utan hernaðarbandalaga með takmarkaðan herstyrk og að austurhéruð landsins verði hluti af Rússlandi ásamt Krímskaga. Hingað til hefur ekki verið tekið í mál að svo mikið sem nálgast sjónarið Rússa. Á fundi Trump og Pútín á föstudag voru útfærslur ræddar en þær ekki gerðar heyrinkunnar. Í dag, er Selenskí og evrópskir leiðtogar hitta Trump, spyrst út hvaða drög að samkomulagi Trump og Pútín urðu ásáttir um.
Herská ESB-Evrópa stendur andspænis friðarboðskap Trump. Sjaldan eða aldrei í valdapólitík á alþjóðavísu er stærri gjá staðfest á milli pólitísks vilja og vanmáttar. ESB-Evrópa vill stríð í álfunni en krefur Bandaríkin um herstyrk í hildarleikinn.
![]() |
Leiðtogar Evrópu sitja fund Selenskís og Trumps |
Tilkynna um óviðeigandi tengingu við frétt |
Dægurmál | Slóð | Facebook | Athugasemdir (4)
Sunnudagur, 17. ágúst 2025
Háskóli Íslands fyrir hunda, ketti og páfagauka
Ég ,,vil að Háskóli Íslands verði fyrir öll" segir Silja Bára rektor. Á íslensku segir maður ,,öll dýrin" en við tölum um ,,alla menn." Málnotkun rektors felur í sér að Háskóli Íslands sé dýraskóli.
Öll dýrin í skóginum fá skráningu í menntastofnun sem sett var á fót fyrir rúmri öld og nefnd þjóðarskóli Íslendinga. Ekki hvarflaði að nokkrum manni að búfé ætti í framtíðinni aðgang að æðsta menntasetri landsins. Málleysingjar eiga vitanlega sín réttindi á guðs grænni jörð - en nýmæli er akademísk menntun handa kvikfé.
Ekki eru tveir mánuðir síðan Silja Bára fékk innsetningu í embætti rektors. Á stuttum tíma hefur Silju Báru tekist að myrða menntun og skepnuvæða háskólann. Margur fengi sparkið fyrir minni yfirsjónir.
Hvað er á milli eyrna þeirra er studdu Silju Báru til rektors? Höfðu ferfætlingar og fiðurfé atkvæðisrétt í rektorskjöri?
Dægurmál | Slóð | Facebook | Athugasemdir (4)