Tölvumaður saksóknara í verktöku hjá RSK-miðlum

Sakborningur í lekamáli héraðssaksóknara, tölvumaðurinn Heiðar Þór Guðnason, er starfsmaður embættis héraðssaksóknara. Hann er einnig verktaki hjá RSK-miðlum og veitti upplýsingar um Namibíumálið til blaðamanna RÚV og fylgimiðla, Kjarnans og Stundarinnar, sem nú heita Heimildin. Tölvumaðurinn gæti einnig hafa aðstoðað blaðmenn í byrlunar- og símamálinu.

Í nýrri frétt Heimildarinnar segir að Heiðar Þór hafi í október í fyrra fundið ný gögn í tölvu Jóhannesar Stefánssonar uppljóstrara, sem er upphafsmaður Namibíumálsins. Gögnin eru smáskilaboð milli Jóhannesar og Þorsteins Más þáverandi forstjóra Samherja. Heiðar Þór fann gögnin sem starfsmaður héraðssaksóknara. Heiðar Þór framseldi gögnin strax til Helga Seljan, sem þá var blaðamaður á Heimildinni. Helgi Seljan og Aðalsteinn Kjartansson, sakborningur í byrlunar- og símamálinu, birtu saman frétt í Heimildinni 18. október í fyrra undir fyrirsögninni Lögreglan á nýrri slóð: Fundu skilaboð Þorsteins. Í fréttinni er talað um að gögnin hafi fundist nokkrum dögum áður af tölvumanni hjá embætti héraðssaksóknara. Atburðarásin liggur fyrir og er staðfest í fréttum Heimildarinnar. Tölvumaður embættis héraðssaksóknara flytur gögn til fjölmiðla, Heimildarinnar, um leið og þau verða til hjá embættinu.

Verktakaþjónusta Heiðars Þórs, starfsmanns héraðssaksóknara, í þágu RÚV og Heimildarinnar samrýmist ekki lögum og reglum. Heiðar Þór hefur lögregluheimildir til að rannsaka gögn sem starfsmaður embættis héraðssaksóknara. Hann hefur ekki heimild að framselja þau gögn til fjölmiðla. Spilling er vægt orð í þessu samhengi. Alvarlegt brot í starfi er nærtækara. Helgi Seljan, sem flutti sig af Heimildinni á RÚV í vor, kallar það þjófnað þegar gögnum héraðssaksóknara er lekið - en ekki þegar hann sjálfur er þjófsnauturinn. Þá heitir það upplýsingamiðlun. 

Fjölmiðlar, með RSK-miðla í broddi fylkingar, saksækja Samherjamenn í opinberri umræðu og vísa í upplýsingar héraðssaksóknara  sem eru trúnaðarmál þangað til að sakamálarannsókn lýkur og málið er annað tveggja fellt niður eða fer fyrir dóm með ákærum. Trúnaðarupplýsingar úr rannsókn héraðssaksóknara nota blaðamenn til að rægja og sakfella menn sem hvergi hafa hlotið dóm að lögum en eru ofsóttir af RSK-miðlum. Upplýsingar sem blaðamenn nota eru meira og minna rusl sem héraðssaksóknari þorir ekki að leggja fram sem rökstuðning fyrir ákæru. Blaðamenn róta í ruslinu og nota það í fjölmiðlaumræðu til að hafa æruna af saklausum mönnum og bendla þá við alvarlega glæpi. Æðsti dómstóll þeirrar umræðu heitir Glæpaleiti.

Innihald tölvupóstanna hefur ekki verið opinberað, aðeins að textaboð hafi farið á milli uppljóstrara og forstjóra. Líklega er innihaldið nauðaómerkilegt. Jóhannes uppljóstrari og  Þorsteinn Már eru tengdir fjölskylduböndum. Fyrrverandi eiginkona Þorsteins Más og Jóhannes eru systkinabörn. Kannski var Jóhannes að spyrja um vöxt og viðgang frændsystkina sinna tveggja, barna Þorsteins Más? Það má bóka að ef eitthvað saknæmt hefði farið fram á milli Jóhannesar og forstjóra Samherja væri það óðara frétt í RÚV og Heimildinni. Engar slíkar fréttir hafa birst, aðeins að textaboð fóru á milli manna. RSK-miðlar stilla málinu þannig upp að lesendur dragi þá ályktun að fjöldi textaboða gefi til kynna eitthvað misjafnt. ,,Berðu mig samt ekki fyrir því," er aðferð Gróu á Glæpaleiti.

RSK-miðlar eru aðalgerendur í byrlunar- og símamálinu, líkt og í Namibíumálinu. Páli skipstjóra Steingrímssyni var byrlað 3. maí 2021. Þáverandi eiginkona hans, í samráði við blaðamenn, byrlaði og stal síma skipstjórans sem hún færði Þóru Arnórsdóttur ritstjóra Kveiks á RÚV. Á RÚV var símtækið afritað á Samsung-síma, samskonar og skipstjórans, er var til reiðu áður en byrlun og þjófnaður fóru fram. Tvær samhljóða fréttir voru skrifaðar og sendar til birtingar á Stundina og Kjarnann.

Eftir að lögreglurannsókn hófst sumarið 2021 var Þóra í reglulegu sambandi við konuna, sem glímir við alvarleg andleg veikindi. Blaðamenn leituðust við að fela slóðina sem liggur á milli glæpa og fjölmiðla. Þóra Arnórsdóttir brýndi fyrir konunni í sms-skilaboðum þann 24. ágúst 2021 að ,,breyta ÖLLUM lykilorðum alls staðar." Þóra er kominn í samband við tölvumann sem hún vill að skoði síma andlega veiku konunnar. Þóra skrifar sms-skilaboð:

Hann vill helst ekki hittast (mjög varkár maður, skiljanlega) en spyr hvort þú treystir honum fyrir símanum einn dag?

Það skyldi þó aldrei vera að ,,mjög varkár maður" sé enginn annar en Heiðar Þór Guðnason, tölvusérfræðingur hjá embætti héraðssaksóknara og nú sakborningur í lekamálinu?

Í lokin er rétt að spyrja: hversu lengi verður Ólafur Þór Hauksson héraðssaksóknari í embætti? Það er á hans vakt sem embættið verður ólögleg lekasmiðja fyrir RSK-miðla. Fær Ólafur Þór, eftir starfslok sem saksóknari, stöðu á Glæpaleiti hjá Stefáni Eiríkssyni fyrrum lögreglustjóra - með meðmælum Helga Seljan? 

 

Saksóknari lýsir sig vanhæfan

Translögregla í Bretlandi og á Íslandi

Transhugmyndafræðin, að fólk fæðist í röngu kyni og kynin séu óteljandi, er alþjóðleg hreyfing. Starfsaðferðirnar eru þeir sömu í Bretlandi og Íslandi. Transvæddri lögreglu er sigað á frjálsa borgara sem gagnrýna hugmyndafræðina.

Emmy-verðlaunahafinn Graham Linehan var handtekinn af fimm vopnuðum lögreglumönnum á Heathrow-flugvelli í Lundúnum í byrjun viku. Ástæðan er tíst frá í apríl á X sem þykja niðrandi fyrir transhreyfinguna.

Á Íslandi skrifar lögreglan út ákærur eftir pöntun frá Samtökunum 78. Tilfallandi var ákærður af lögreglustjóranum í Reykjavík, eftir kæru frá Samtökunum 78 - en var sýknaður í héraðsdómi. Eldur Smári Kristinsson, Helga Dögg Sverrisdóttir og Friðgeir Sveinsson fengu einnig tilkynninu frá lögreglu að mæta í yfirheyrslu. Friðgeir er formlega ákærður, mál hans verður tekið fyrir í héraðsdómi í byrjun nóvember. Í öllum tilvikum er um að ræða gagnrýni á starfsemi Samtakanna 78 í leik- og grunnskólum þar sem haldið er að börnum bábiljukenningum um að sumir séu fæddir í röngum líkama og að kynin séu óteljandi. Lögreglan gengur erinda transhugmyndafræðinnar og stefnir frjálsri orðræðu fyrir dóm, krefst fangelsunar og fjársekta.

Breskir fjölmiðlar fjalla um transvæðingu lögreglunnar þar í landi. Dálkahöfundur Telegraph, Michael Deacon, skrifar undir fyrirsögninni Handtaka Graham Linehan sannar að transhugmyndafræðin ógnar okkur öllum. Pistill Deacon byrjar svona:

Höfum eitt á hreinu. Ef síma þínum er stolið gerir lögreglan ekkert. Ef brotist er inn á heimilið þitt aðhefst lögreglan ekkert. Ef dóttir þinni er nauðgað af barnaperrum situr lögreglan hjá aðgerðalaus. En ef þú skrifar eitthvað á samfélagsmiðil sem móðgar transfólk máttu búast við að vera handtekinn af fimm vopnuðum lögreglumönnum.

Deacon segir framferði lögreglunnar skammarlegt, Bretland líti út eins og alræðisríki. Hann vekur athygli á að systursamtök Samtakanna 78 í Bretlandi, Stonewall, tóku þá afstöðu fyrir áratug að transhugmyndafræðina mætti ekki ræða - aðeins framfylgja. Sama viðhorf ríkir á Íslandi. Snorri Másson, þingmaður Miðflokksins, lét þau sjálfsögðu sannindi í ljós, að kynin séu tvö og enginn fæðist í röngum líkama, og fékk óðara yfir sig vanstillta transara og fylgismenn þeirra sem heimtuðu málfrelsið tekið af þingmanninum. Jafnvel biskup Íslands gekk í lið með skrílnum.

Snorri nýtur þinghelgi, verður ekki sóttur til saka af lögreglu. En tilfallandi, Eldur Smári, Helga Dögg og Friðgeir, eru ekki tekin neinum vettlingatökum heldur saksótt eins og glæpamenn. Fyrir það eitt að andmæla transkennslu í skólum ætluðum börnum 2-16 ára.

Transhugmyndafræðin snýst ekki um frelsi einstaklinga að skilgreina sjálfa sig. Menn geta kallað sig hvað sem er og tileinkað sér sjálfsmynd eftir hentisemi. Sumir fá sér tattú, aðrir limlesta kynfæri sín í nafni hugmyndafræði. Verði þeim að góðu, við búum í frjálsu landi. En, bíðum við, nei, við búum hvorki í frjálsu landi né réttarríki þegar kemur að trans. Í nafni hugmyndafræðinnar er málfrelsið tekið af mönnum með lögregluvaldi.

Transhugmyndafræðin er veraldlegt trúarofstæki sem alltof lengi hefur fengið að grassera. Tímabært er að frjálshuga menn taki höndum saman og setji ofstækinu stólinn fyrir dyrnar. Brýnast er að úthýsa transhugmyndafræðinni úr leik- og grunnskólum. Börnin eiga rétt á friðhelgi. Foreldrar á Akureyri sýna virðingarvert fordæmi.

Í framtíðinni verður spurt hvernig í veröldinni það gat gerst að heilu stjórnmálaflokkarnir ásamt ríki og sveitarfélögum létu það viðgangast að sértrúarfólk fékk óáreitt að valsa inn í leik- og grunnskóla með þann boðskap að börn væru af röngu kyni, að kynin séu óteljandi og kynlífstal fullorðinna við börn sé sjálfsagður hlutur. Hvaða illu öfl samfélagsins leyfa að níðst sé á græskulausri æskunni?

 

 

Handtekinn fyrir færslur um trans fólk

Tíðaverkir Dags B.

Ég er kona, getur karlinn sagt við sjálfan sig, og staðið á því fastar en fótunum. En það er aðeins meðvitundin á eintali við sjálfa sig. Meðvitund - ég-ið - eiga allir fyrir sjálfa sig, enginn fer í annars meðvitund. Stundum bilar meðvitundin, tileinkar sér skoðun sem stenst ekki.

Þegar við tölum um heiminn utan sjálfsins vísum við út fyrir meðvitund okkar. Sjálfsblekkingin gildir ekki lengur. Ég-ið er sjálfhverft, segir aðeins að til sé hugsun, en ekki hvort hún haldi máli. Descartes sýndi fram á það með snjallri setningu, ,,ég hugsa, ég er." Ef Descartes hefði verið í vafa um kyn sitt hefði hann einfaldlega gripið í klofið, fundið slátrið, og sagt: Cogito ergo maskulin. Saga vestrænnar menningar hefði orðið önnur, áhöld væru um hvort konur hugsuðu. En, sem sagt, setningin er Cogito ergo sum.

Í samskiptum við aðra er ekki nóg að segja ,,ég hugsa að ég sé kona." Jafnvel fáráðlingar hugsa, þó á öðrum brautum en heilbrigðir. Til að hugsunin ,,ég er kona" standist þarf að vísa í veruleika utan meðvitundarinnar. Til dæmis líkamans.

Um leið og karlinn, sem segist kona, fer út fyrir sjálfið og krefur aðra um viðurkenningu á sjálfsblekkingunni skapast vandræði. Sjálfsblekking, eins eða fárra, er ekki sannindi. Á samkomum sértrúarsafnaða tíðkast aftur að trúa sérvisku, taka ímyndun fyrir sannindi.

Þegar við tölum um veröldina fyrir utan meðvitund okkar þurfum við sannindi. Annars er heimurinn merkingarlaus nema fyrir lokaða meðvitund hvers og eins - sem getur verið sneisafull af ranghugmyndum (og er það oft). Lífsskoðunarfélög eins og Samtökin 78 eru í fullum rétti á samkomum sínum að boða ímyndaðan kynjaheim, líkt og Ásatrúarfélaginu er heimil fjölgyðistrú á sinum vettvangi. Dettur einhverjum í hug að láta Ásatrúarfélagið annast trúarkennslu í leik- og grunnskólum?

Samfylking, Viðreisn og aðrir vinstriflokkar vilja gera samfélagið í heild sinni að sértrúarsöfnuði er trúir á bábiljur. Hægrimenn eru jarðbundnari og heilbrigðari, láta sér fátt um finnast fáránleikafræði vinstrimanna. 

Í viðtengdri frétt er haft eftir Degi B. Eggertssyni þingmanni Samfylkingar, auðvitað, að það sé ,,gamaldags viðhorf" að hafa fyrir satt að kynin séu aðeins tvö og að ekki sé hægt að fæðast í röngum líkama. Dagur ku læknismenntaður. Ef hann fengi karlkyns sjúkling sem kvartaði undan verkjum í eggjastokkum myndi Dagur skera punginn undan manninum og láta gott heita? Læknir er stendur undir nafni vísar karli með ímyndað móðurlíf til geðlæknis. Ranghugmyndir þarf að lagfæra, ekki strjúka meðhárs.

Líkamsburðir og kynfæri aðgreina karla frá konum. Hvað er undir Degi B. Eggertssyni? Varla kúlur.

  

Framganga Snorra „vandræðaleg og gamaldags“

Heilbrigðir foreldrar, hinsegin fjölmiðlar

Enginn meginstraumsmiðlanna segir fréttina af foreldrahópnum á Akureyri sem kærir starfsemi Samtakanna 78 í leik- og grunnskólum. Tifallandi sagði frá kærum foreldrahópsins til Akureyrarbæjar annars vegar og hins vegar menntamálaráðuneytis. Dæmi eru tilfærð um skaðlegan boðskap lífsskoðunarfélagsins:

• börnin eru mötuð á lífsskoðun Samtakanna 78 sem er á skjön við viðurkennda þekkingu og oft argasta klám.
• notað er refsivert myndefni og texti af verulega grófum og viðurstyggilegum toga. 
• fjallað um að kynlíf sé eins og upplifun í tívolíi. 
• efasemdarfræjum er sáð í sálu og sinni barna, þau látin efast um að vera í réttum líkama.
• talað er um kynþokkafull börn, sexí og æsandi, sem gefur barnagirnd lögmæti.

Enginn stóru fjölmiðlanna segir frá foreldrahópnum á Akureyri sem biðst undan að sérviska fámenns lífsskoðunarfélags fullorðinna, Samtakanna 78, sé haldið að börnum. Aðeins Fréttin og Nútíminn sögðu tíðindin.

Stóru fjölmiðlarnir eru allir hinsegin. Þeir taka undir boðskap Samtakanna 78 að sumir fæðist í röngum líkama og kynin séu óteljandi. Ekki aðeins þegja fjölmiðlar um gagnrýni á lífsskoðunarfélagið heldur flytja þeir falsfréttir í þágu Samtakanna 78 um að hatursglæpir séu vaxandi á Íslandi.

Þannig flutti RÚV frétt nýverið í þágu Samtakanna 78, og veitti talsmanni þeirra viðtal. Í fréttinni kemur fram að ,,hugsanlegir hatursglæpir" á Íslandi árið 2024 gagnvart kynvitund hafi verið 6, já sex. Fimm af þessum meintu hatursglæpum eru kærur sem lögmenn á vegum Samtakanna 78 sendu á lögregluna. Eldur Smári Kristinsson fékk á sig tvær kærur, Helga Dögg Sverrisdóttir, Friðgeir Sveinsson og tilfallandi Páll Vilhjálmsson eina hver. Samtals 5 meintir hatursglæpir þar sem kynvitund kemur við sögu.

Meintir hatursglæpir eru tilbúningur Samtakanna 78 sem bjuggu til glæpina með kærum. Frétt RÚV er falsfrétt sem hagsmunaaðili bjó til í þágu málstaðarins. Engin hatursglæpur var framinn af hálfu tilfallandi. Með dómi er tilfallandi sýknaður af ákæru um hatursorðræðu. Samtökin 78 hafa ekki enn beðið tilfallandi afsökunar á opinberri ásökun sem engin innistæða var fyrir. Lífsskoðunarfélagið fær tugi milljóna króna árlega frá ríki og sveitarfélögum og notar fjármagnið til að ofsækja frjálsa borgara er andmæla sértrúarhópnum. Hér er á ferðinni ríkisstyrktur skoðanafasismi.

Hinsegin fjölmiðlarnir ættu að hugsa sinn gang og taka með fyrirvara falsfréttum sem Samtökin 78 koma á framfæri. Þá ættu hinsegin fjölmiðlarnir að leggja hlustir við raddir eyfirskra foreldra sem tefla fram rökum fyrir þeirri sannfæringu sinni að lífsskoðunarfélag fullorðinna sérvitringa eigi ekkert erindi með boðskap sinn í leik- og grunnskóla.

 

 

RÚV og Helgi Seljan upplýsa ekki lögbrot

Fréttastofa RÚV og Helgi Seljan vita hver lak gögnum frá sérstökum saksóknara, nú héraðssaksóknara. Heiðar Þór Guðnason, tölvumaður hjá embættinu, og Ólafur Þór Hauksson héraðssaksóknari, áður sérstakur saksóknari, höfðu báðir aðgang að gögnunum.

Ólafur Þór hefur verið staðinn að því að afhenda RÚV upplýsingar sem hann veitir ekki öðrum fjölmiðlum. Í viðtengdri frétt segir að Helgi Seljan hafi afhent Ólafi Þór héraðssaksóknara ,,gögn frá heimildarmönnum sínum" þegar Ólafur Þór óskaði eftir því. Þessi gögn gætu allt eins verið upphaflega komin frá Ólafi Þór sjálfum.

Þriðji maðurinn, sem fræðilega er mögulegt að hafi lekið gögnunum, Jón Óttar Ólafsson, er svarinn óvinur Helga Seljan og hefði engan hag af gagnaleka til fjölmiðla. Þvert á móti, gagnalekinn er Jóni Óttari í óhag. Helgi Seljan og Ólafur Þór hafa í samvinnu sín á milli dregið upp þá mynd að Jón Óttar sé skúrkur.

Bandalagið milli Helga Seljan og Ólafs Þórs liggur fyrir í fréttaflutningi RÚV. Þeir eiga ríkra sameiginlegra hagsmuna að gæta. Namibíumálið sem byrjaði með Kveiks-þætti Helga í nóvember 2019 hefur verið til rannsóknar hjá Ólafi Þór i sex ár. Málið er ein samfelld misþyrming á réttlætinu. Upplognar ásakanir fyllibyttu og fíkils voru teknar trúanlegar, fyrst af Helga síðan af Ólafi Þór. Kostnaðurinn hleypur á hundruðum milljóna króna ef ekki milljörðum. Er þá ótalið að saklaust fólk hefur haft réttarstöðu sakbornings í sex ár og mátt þola linnulaust fréttaeinelti af hálfu RÚV. Namibíumálið er enn í fanginu á Ólafi Þór, hann þorir ekki að láta það frá sér en er búinn að játa sig vanhæfan.

RÚV gerði frétt upp úr afhjúpun Morgunblaðsins um að tölvumaðurinn Heiðar Þór Guðnason væri grunaður í lögreglurannsókn að hafa lekið upplýsingum úr gömlum hrunmálum. Í frétt RÚV er talað við Heiðar Þór sem ber af sér sakir.

Hvers vegna spyr RÚV ekki Helga Seljan hvar hann fékk gögnin? Þau ættu að vera hæg heimatökin. Helgi er starfsmaður ríkisfjölmiðilsins og veit hvernig hann fékk gögnin og frá hverjum.

RÚV er ríkisfjölmiðill og á samkvæmt lögum að starfa í þágu almannahags. Ríkir almannahagsmunir eru að upplýsa um gagnaleka frá héraðssaksóknara, áður sérstökum saksóknara. Það tekur ekki tali að persónuupplýsingar úr gömlum sakamálum - efni gagnalekans er 12 ára og eldri - séu á flakki án þess að upplýst sé hver standi að baki. 

RÚV og Helgi Seljan ættu að gera grein fyrir gagnalekanum, upplýsa afbrot og siðleysi í opinberri stofnun. Tveir menn liggja undir grun, annar er formlega með stöðu sakbornings. Hinn er Ólafur Þór Hauksson héraðssaksóknari, sem líklega hefur stöðu vitnis í yfirstandandi lögreglurannsókn.

RÚV og Helgi geta ekki teflt fram þeirri mótbáru að upplýsingarnar, 12 ára og eldri, eigi erindi við almenning. Hér er um að ræða persónuupplýsingar sem meiða einstaklinga en upplýsa ekkert. Öll sakamálin eru til lykta leidd. Meðal persónugagna sem eru í umferð eru samtöl hjóna þar sem annað var vitni en ekki sakborningur. Ríkir almannahagsmunir eru að upplýsa hver stóð að ólögmætri dreifingu persónuupplýsinganna. En RÚV þegir, hylmir yfir afbrotið.

Í gagnaleikamálinu opinberast enn og aftur að RÚV starfar ekki í þágu almennings. RÚV er valdamiðstöð sem vinnur með illa fengnar upplýsingar, iðulega einkamál, og misnotar þær til að skapa ugg og ótta í samfélaginu. RÚV stundaði sömu vinnubrögð í byrlunar- og símamálinu. Páli skipstjóra Steingrímssyni var byrlað og síma hans stolið, með vitund og vilja RÚV. Á Efstaleiti var sími skipstjórans afritaður á síma í eigu RÚV. Fréttir voru skrifaðar á RÚV en sendar til birtingar á Stundina og Kjarnann - til að hylja glæpaslóðina.

Hvenær ætla menn að átta sig að RÚV er krabbamein á íslensku samfélagi? Stofnunina þarf að skera upp og fjarlægja meinið.

Afhenti gögnin á minnislykli

Foreldrar kæra samstarf skóla við Samtökin 78

Lífsskoðunarfélagið Samtökin 78 hefur ekki ,,neina þá menntun eða viðurkenningu til þess að taka að sér kynfræðslu á vettvangi grunnskóla," segir í kæru foreldra vegna aðkomu Samtakanna 78 að skólastarfi í leik- og grunnskólum. Í fyrsta sinn hér á landi taka foreldrar höndum saman og biðjast undan að börnin séu mötuð á lífsskoðun Samtakanna 78 sem er á skjön við viðurkennda þekkingu og oft argasta klám.

Samtökin 78 hafa með samningum við sveitarfélög komið ár sinni fyrir borð í leik- og grunnskólum og boða skringilega hugmyndafræði um að sumir fæðist í röngum líkama og að kynin séu óteljandi. Kynlífsfræðsla Samtakanna er þess eðlis að foreldrar, sem kynna sér málið, telja ótækt að halda henni að börnum.

Foreldrar á Akureyri hafa fengið lögfræðing, Loga Kjartansson, til að reka mál sitt gagnvart bæjaryfirvöldum á Akureyri annars vegar og hins vegar menntamálaráðuneytinu.

Í erindi til Akureyrarbæjar er þess krafist að samningi við Samtökin 78 sé sagt upp. Rakin eru dæmi um kennsluefni ættuðu frá lífsskoðunarfélaginu sem ekki undir neinum kringumstæðum á erindi til barna. Þar er um að ræða kennsluefni á veggspjöldum og bókum. Í greinargerð til bæjaryfirvalda segir að þar sé að finna ,,beinlínis refsivert myndefni sem og texta og það af verulega grófum og viðurstyggilegum toga." Tilfærð eru dæmi:

fjallað um að kynlíf sé eins og upplifun í tívolíi. Þau börn sem hafa farið í tívolí er ljóst að eftir slíka skemmtiferð vilja börn þangað aftur og aftur. Samkvæmt þessu er 7-10 ára börnum bent á af fulltíða fólki, kennara í opinberu starfi, að líkja megi kynlífskönnun við tívolí. Börn eru [...] hvött eða beinlínis blekkt og nörruð inn á könnunarbraut kynlífs eins og um sé að ræða einhvern skemmtigarð. Ungum börnum er bent á sömu síðu að kanna málið betur, það geti verið skemmtilegt og stundum ógnvekjandi þegar kemur að kynlífi og kynlífsathöfnun. (feitletr. pv)

Á bls. 74-75 er efasemdarfræjum bersýnilega dreift inn í sálu og sinni barna sem lesenda þegar rætt er um hvað foreldrar kölluðu þig þegar þú fæddist. Gert er lítið úr því að kynið sé annað hvort strákur eða stelpa eins og það sé möguleiki á einhverju öðru. Á bls. 77 stendur „Stundum sjá þau stóran sníp og halda að það sé typpi. Stundum sjá þau lítið typpi og halda að það sé snípur. Stundum eru þau ekki viss.” (feitletr. pv)

Á bls. 126-130 er talað um sexí og æsandi, í kynferðislegri merkingu við börn á yngra og miðstigi (7-12 ára). Reynt er að snúa út úr merkingu orðsins sem þýðir kynþokkafullur. Hver talar um kynþokkafull börn á þessum aldri nema haldinn sé barnagirnd? (feitletr. pv)

Samningur Akureyrarbæjar, segir í erindinu, brýtur gegn lögmætisreglu, hlutlægnireglu og jafnræðisreglu grunnskólalaga og íslensks réttar með því að veita lífsskoðunarfélagi með vafasaman tilgang aðgang að börnum.

Foreldrahópurinn sendi einnig stjórnsýslukæru til mennta- og barnamálaráðuneytis vegna fánaflöggunar í Síðuskóla, þar sem hinsegin fáninn er að húni, og óviðeigandi samsömunar skólans við ,,hugmyndafræði og lífsskoðana" sem geta engin veginn átt erindi við börn og ,,allra síst á þeim verndarstað og þroskavettvangi sem grunnskólar teljast gildandi lögum samkvæmt."

Foreldrahópurinn á Akureyri er fyrsta dæmið um að foreldrar leik- og grunnskólabarna taki höndum saman og andmæla að lífsskoðunarfélag með vafasaman tilgang eigi aðild að skólastarfi. Dæmin sem rakin eru í erindunum sýna svart á hvítu að kyndugar hugmyndir jaðarhóps fullorðinna um kyn og kynlíf eiga ekkert erindi í heilbrigt skólastarf.

Næsta vor verður gengið til sveitarstjórnarkosninga. Í kosningabaráttunni verða flokkar og frambjóðendur spurðir um afstöðu til skólastarfs lífsskoðunarfélags með jaðarhugmyndir um lífið og tilveruna. Spurt verður hvort rétt sé að kenna börnum að kynlíf sé eins og að fara í tívolí, hvort eðlilegt sé að láta börn efast um að þau séu af réttu kyni og hvort fullorðnir eigi í leik- og grunnskólum að flokka börn eftir kynþokka.

 

 

Helgi Seljan og Ólafur Þór plottuðu saman njósnamálið

Helgi Seljan fréttamaður keyrði af stað PPP-njósnamálið í apríl í vor í samvinnu við Ólaf Þór Hauksson héraðssaksóknara sem er vanhæfur í stærstu rannsókn embættisins hin síðari ár, Namibíumálinu. Fréttaplottið hafði þann tilgang að sýna saklausa menn seka í fréttum RÚV. 

Sá sem tengir saman Namibíumálið og njósnamálið er Jón Óttar Ólafsson fyrrum starfsmaður Ólafs Þórs. Jón Óttar átti PPP-fyrirtækið í félagi við annan mann, sem nú er látinn. Jón Óttar er sakborningur í Namibíumálinu vegna starfa sinna fyrir Samherja við rústabjörgun í Namibíu eftir að Jóhannes uppljóstrari Stefánsson skildi þar eftir sig sviðna jörð um miðjan síðasta áratug - og hljóp svo í fang Helga Seljan með skáldskap um mútugjafir, bjó þar með til Namibíumálið.

PPP-njósnamálið/gagnalekamálið, sem Helgi Seljan hleypti af stokkunum í apríl í vor, snýst um persónuupplýsingar í hrunmálum. Upplýsingarnar eru að stofni til tólf ára og eldri. Frétt Helga frá í vor er gamalt vín á nýjum belgjum eins og tilfallandi benti á:

Í gær [þ.e. 19. maí 2025] birti Ingi Freyr Vilhjálmsson frétt á RÚV upp úr sama gagnalekanum. Frétt Inga Freys er samhljóða frétt sem hann skrifaði í Stundina fyrir fimm árum - eða árið 2020. Í RÚV-fréttinni í gær viðurkennir Ingi Freyr að hún sé gömul Stundarfrétt:

Áður hefur verið fjallað um þessa upptöku af fundinum með Jónasi í íslenskum fjölmiðli. Það var árið 2020 í Stundinni, nú Heimildinni.

Ingi Freyr skrifaði sjálfur fréttina í Stundina fyrir fimm árum. Þá var hann með gögn úr sama gagnalekanum og Helgi Seljan gerði að stórfrétt fyrir tæpum tveim vikum. Helgi Seljan og Ingi Freyr unnu saman á Stundinni og eru núna samherjar á RÚV. Helstu fréttirnar sem þeir gætu sagt væru af gagnalekanum sjálfum; hver lak og í hvaða tilgangi? En þær fréttir eru ósagðar. Samstarfsfélagarnir koma fram undir þeim formerkjum að þeir þjóni almannahagsmunum. En svo er ekki. Hagsmunir almennings eru að réttarkerfið og fjölmiðlar vinni heiðarlega. Skipulagður leki til valdra blaðamanna um einkahagi fólks er ekki heiðarleg starfsemi, hvorki af hálfu ákæruvalds né RÚV.

Hvers vegna hafði Helgi Seljan fyrir því að endurvinna eldgamla frétt í vor og kynna sem nýjasta nýtt? Helgi á Jóni Óttari grátt að gjalda. Jón Óttar afhjúpaði Helga með upptöku á samtali þeirra þar sem Helgi viðurkennir að skálda upp heimildir til að koma höggi á Samherja. Helga er einnig í mun að endurgjalda Ólafi Þór héraðssaksóknara margvíslega greiðasemi í gegnum árin. Þá var njósnamálið liður í að endurræsa ferli Helga hjá RÚV en hann var látinn fara þaðan áramótin 2021/2022 vegna byrlunar- og símamálsins og fékk nýlega endurráðningu.

Njósnamálið sprakk í höndunum á Helga og Ólafi Þór héraðssaksóknara. Það var ekki Jón Óttar sem lak upplýsingum í Helga og þar áður í Inga Frey á Stundinni. Mögulega var lekinn skipulagður ofan frá. 

Hegðun Ólafs Þórs héraðssaksóknara er sérkennileg svo ekki sé meira sagt. Ólafur Þór fær Helga til sín inn á skrifstofuna í vor og tekur þátt í fréttaleikriti, sem tilfallandi fjallaði um:

Í þessu samhengi er ein sena úr seinni frétt Helga sérstaklega athyglisverð. Þar situr Helgi nánast í fangi Ólafs Þórs Haukssonar héraðssaksóknara og flettir gögnum upp í fartölvu. Ólafur Þór þykist voða hissa. Klippt er á Ólaf Þór einan í mynd, ekki lengur með fréttamanninn í fangi sér, og héraðssaksóknari er látinn segja: ,,þetta er reiðarslag." Senan er hönnuð og stílfærð, fremur í ætt við uppákomu sem almannatengill skipuleggur en fréttainnslag. Ólafur Þór hegðar sér ekki eins og embættismaður heldur statisti í fréttaleikriti.

Sá er gæti veitt afgerandi upplýsingar um hvernig í pottinn er búið með gagnalekann heitir Heiðar Þór Guðnason. Heiðar Þór er tölvumaðurinn hjá embætti héraðssaksóknara og var það líka þegar embættið hét sérstakur saksóknari. Einnig vann hann fyrir PPP, fyrirtæki þeirra Guðmundar Hauks og Jóns Óttars Ólafssonar.

Ólafur Þór má vera meira en lítið blautur á bakvið eyrun ef hann grunaði ekki samstarfsmann sinn um græsku í lekanum. Í viðtalinu við Helga leggur Ólafur Þór sig fram um að renna stoðum undir falskar og lítt duldar ásakanir Helga í garð Jóns Óttars. Héraðssaksóknari er óheiðarlegur, svo ekki sé dýpra í árinni tekið, þar sem hann er nýbúinn að játa fyrir ríkissaksóknara að hann sé vanhæfur í málum er tengjast Jóni Óttari.

Ólafur Þór skrifar bréf til ríkissaksóknara 22. apríl í vor og játar vanhæfi að rannsaka mál er tengjast Jóni Óttari. Vanhæfi héraðssaksóknara stafar af kæru sem hann lagði fram gegn Jóni Óttari 2012 fyrir brot á þagnarskyldu. Kæran var felld niður, Jón Óttar var saklaus af gagnaleka 2012. En Helgi Seljan í samvinnu við Ólaf Þór reynir að klína sök á Jón Óttar með raðfréttum í vor - 13 árum eftir niðurfellingu á kæru um gagnaleka.

Ólafur Þór segir í bréfinu

verulegan vafa leika á að embætti héraðssaksóknara sé til þess bært að rannsaka málið [þ.e. ólögmæta dreifingu persónuupplýsinga] þar sem undirritaður stýrði því embætti sem gögnin eru talin stafa frá og kærði sömu aðila [Jón Óttar] fyrir brot á þagnarskyldu á sínum tíma.

Á sama tíma og Ólafur Þór héraðssaksóknar játar vanhæfi sitt er hann í samskiptum við Helga Seljan að búa til fréttaumfjöllun sem gengur út á að sýna Jón Óttar sem sekan mann í njósnamálinu/gagnalekanum. Bréfið er skrifað 22. apríl og Helgi byrjar raðfréttir sínar viku síðar, 29. apríl. Viðtalið á skrifstofu héraðssaksóknara er tekið þessa sömu daga.

Skömmu eftir að starfsmaður Ólafs Þórs, tölvumaðurinn Heiðar Þór Guðnason, fær stöðu sakbornings í njósnamálinu/gagnalekamálinu ákveður héraðssaksóknari að loka rannsókn Namibíumálsins en þar er Jón Óttar sakborningur ásamt öðrum. Hvers vegna loka rannsókn á þessum tímapunkti? Málið hefur verið í rannsókn í sex ár. Óttast Ólafur Þór að málið yrði tekið af honum og óhlutdrægara ákæruvald kæmist á snoðir um óheilbrigt, að ekki sé sagt ólöglegt, samsæri héraðssaksóknara og RÚV um að sýna saklausa menn seka í fréttaumfjöllun?

Namibíumálið og gagnalekamálið/njósnamálið sýna að á Íslandi er rekið tvöfalt réttarkerfi. Annað réttarkerfið fer að lögum en hitt er rekið af RÚV og lýtur hvorki lögum né siðaðra manna háttum. Í Namibíumálinu og gagnalekamálinu/njósnamálinu starfar viðurkennda réttarkerfið með RÚV. Fréttafölsun er beitt til að sýna saklausa menn seka. Æðsti yfirmaður RÚV er fyrrverandi lögreglustjóri, Stefán Eiríksson, sem þykist ekkert vita um Samsung-síma í eigu RÚV er notaður var til að afrita skipstjórasíma sem fenginn var með byrlun og þjófnaði. Á meðan glæpir þrífast á æðstu stöðum sneiðist um réttlætið á Íslandi.

Vann fyrir PPP og saksóknara

Silja Bára segir ofbeldi frjálsa tjáningu

Rektor Háskóla Íslands, Silja Bára Ómarsdóttir, talar í framhjáhlaupi um óhæfuna 6. ágúst þegar Gil S. Epstein varð fyrir öskum og aðsúgi kennara og nemenda háskólans er hann flutti fyrirlestur sem brátt verð um. Epstein hafði það eitt til saka unnið að vera af röngum uppruna. Hann er gyðingur og prófessor við ísraelskan háskóla.

Í haustávarpi sem barst til nemenda með tölvupósti í gær nefnir Silja Bára aðsúginn að Epstein og segir að

öllu frelsi fylg­ir ábyrgð og það er eðli­legt að við spyrj­um okk­ur einnig hvenær frelsi eins til að tjá skoðanir sín­ar í formi mót­mæla geng­ur á tján­ing­ar­frelsi ann­ars.

Silja Bára segir að aðsúgurinn og öskrin sem Epstein varð fyrir séu ,,skoðanir" sem njóti verndar Háskóla Íslands. Eina álitamálið sé hvort frelsið til að öskra og hleypa upp fyrirlestri rekist á við tjáningarfrelsi þess sem hefur orðið. Nýmæli eru að rektor við vestrænan háskóla leggi að jöfnu ofbeldi og orðræðu. Skrílslæti jafngilda ekki vitsmunum og hafa aldrei gert.

Í innsetningarræðu Silju Báru 30. júni kvað við annan tón en í tölvupóstinum til nemenda í gær. Í ræðunni tók hún afdráttarlausa afstöðu með frjálsri tjáningu og þóttist á móti menntamorðum og hugmyndafræðilegu ofbeldi. Hér eru hennar eigin orð:

Meðvituð eyðilegging menntainnviða verður ekki kölluð annað en „menntamorð“. Það er alvarlegt og þarf að fordæma. En önnur og lævísari birtingarmynd þess er hugmyndafræðilegt ofbeldi sem felst í því að brjóta niður tjáningarfrelsi og akademískt frelsi með því að refsa og ógna fræðafólki um allan heim. Það þarf hins vegar ekki alltaf að beita ofbeldi heldur er fræðasamfélaginu gert ljóst að betra sé að þegja en að stíga fram. Það er á ábyrgð okkar allra að verja akademískt frelsi. (feitletr. pv)

Tvöfeldnin er yfirgengileg. Í rektorsræðunni varar Silja Bára við ,,hugmyndafræðilegu ofbeldi sem felst í því að brjóta niður tjáningarfrelsi og akademískt frelsi." Í tölvupósti til nemenda er á hinn bóginn frelsi til ofbeldis, að öskra og gera aðsúg, orðið jafngilt frjálsri tjáningu. Hugmyndafræðilegu ofbeldi undir yfirskini mótmæla var beitt í Háskólanum til að taka af gyðingi bæði málfrelsi og akademískt frelsi. Rektor blessar ofbeldisfulla gyðingaandúð, segir athæfið eitt ,,form mótmæla". Var Auschwitz ,,eitt form" lystigarðs?

Aðeins doktor fáviti trúir að ofbeldi og orðræða sé sami hluturinn. Silja Bára segir eitt um málfrelsi og akademískt frelsi í setningarræðu en allt annað í tölvupósti til nemenda. Í meðförum Silju Báru verður akademískt frelsi að nýmælinu akademískt ofbeldi. Ofbeldisfrelsi rektors Háskóla Íslands er eins fjarri menntun og menningu og hugsast getur. Háskóli Íslands með Silju Báru í stafni hæðist að frjálsri orðræðu, leggur hana að jöfnu við öskur og aðsúg að fræðimönnum. Skrílmenning Silju Báru er opinber stefna Háskóla Íslands á meðan hún situr i embætti rektors. 

  

Rektor skrifar um atvikið 6. ágúst

Bitlingar til ráðherrabarna

Logi menningarráðherra lét son flokkssystur og samráðherra, Ölmu Möller, fá opinberan bitling, formennsku í nefnd sem útdeilir peningum úr ríkissjóði til þurfalinga í kvikmyndagerð. Sonurinn hefur það líka með sér að vera samfylkingarmaður eins og mamma og Logi.

Daði Már fjármálaráðherra ber þá skyldu að gæta að meðferð fjármuna ríkissjóðs, sem að stærstum hluta er skattfé almennings. Hann gaf út reglur í byrjun árs um opinberar skipanir í stjórnir. Í reglunum segir m.a. að:

stjórnarmenn veljist á grundvelli hæfni, menntunar eða reynslu.

Logi ráðherra menntunar telur þá reynslu mikilvægasta að vera ráðherrabarn. Hæfnin, sem skiptir máli, er að hafa starfað í Samfylkingunni. Þegar um er að ræða kvikmyndagerð þarf vitanlega rétta menntun. Jónas Már Torfason, sonur Öldu ráðherra, er lögfræðingur. Í lagadeildum er auðvitað ítarlega fjallað um að gera bíó.

Vinstriflokkarnir starfa eftir meginreglunni um frændhygli. Opinberum gæðum er skipt á milli vina og vandamanna, almenningur éti það sem úti frýs.

Sonur ráðherra formaður nefndar sem fer með milljarða

Þögn RÚV um árásina á tjáningarfrelsið

RÚV þegir þunnu hljóði um menntamorðið í Háskóla Íslands, framið með velþóknun nýkjörins rektors Silju Báru Ómarsdóttur. Gil E. Epstein var meinað að flytja fyrirlestur þar sem hann þótti af óæskilegu þjóðerni. Háborg fordómanna vestur á Melum tekur málfrelsið af gyðingum.

Í vor, þegar Silja Bára fékk kjör sem rektor, birti ríkisfjölmiðillinn viðtal við hana. Í viðtalinu kemur m.a. fram:

Það er verið að fremja menntamorð um heim allan að mati Silju Báru og hún vill beita sér fyrir samstöðu á alþjóðavísu, efla samstöðu og draga fram hvernig sé verið að misbeita valdi gegn rannsóknum.

Í máli Epstein sýnir Silja Bára samstöðu með menntamorðingjum sem myrtu málfrelsið um hábjartan dag í fyrirlestrasal Háskóla Íslands. RÚV telur ekki ástæðu til að spyrja rektor hvað valdi sinnaskiptum. Í vor segist Silja Bára ætla að beita sér ,,á alþjóðavísu" gegn menntamorðum en undir hennar stjórn lætur Háskólinn viðgangast morð á menntun. Í stað þess að ,,draga fram" misbeitingu valds gegn akademísku frelsi hylmir rektor yfir óhæfunni.

Vel að merkja, hugmyndin um menntamorð og misbeitingu valds til að ganga milli bols og höfuðs á málfrelsinu, er nýjum rektor sérlega hugleikin. RÚV-viðtalið er tekið í byrjun apríl. Silja Bára ítrekar í innsetningarræðu sinni í lok júní að skelfingin sem blasir við vísindum og fræðum sé ,,hugmyndafræðilegt ofbeldi," ,,menntamorð" og ,,misbeiting valds". En svo í ágúst fellur rektor á prófinu, lætur sér vel líka að skelfingin raungerist í Háskóla Íslands. Silja Bára hleypur í felur og er ekki rukkuð um skýringu.

Morgunblaðið fjallar um menntamorð Silju Báru í fréttum og leiðara, einnig Vísir, Nútíminn, Fréttin og DV. En ekki RÚV. Fyrst eftir morðið á málfrelsi Epstein, þegar RÚV hélt að Silja Bára kæmist upp með tilræðið, bauð ríkismiðillinn stuðningsmanni rektors, Finni Dellsén, í hljóðver að ræða við annan háskólakennara, Kolbeinn Hólmar Stefánsson, sem taldi brýnt að Silja Bára fordæmdi verknaðinn. Eftir að öllum mátti vera ljóst að Silja Bára kæmist ekki upp með tiltækið þóttist Efstaleiti hafa öðrum hnöppum að hneppa en að sinna tjáningarfrelsinu og fréttum af hugmyndafræðilegu ofbeldi í Háskóla Íslands.

Í Vísi skrifar Róbert H. Haraldsson prófessor að í aðsúgi að Epstein hafi siðareglur Háskóla Íslands verið þverbrotnar:

Í siðareglum Háskóla Íslands segir undir kaflaheitinu „Akademískt frelsi og vönduð vinnubrögð“: „Við virðum frelsi hvers annars til rannsókna OG TJÁNINGAR á fræðilegri þekkingu og sannfæringu okkar.“ (ákvæði 3.1., leturbreyting hér).

Ekki þarf frekari vitnanna við. Menntamorðið 6. ágúst er óverjandi. En Silja Bára þegir og RÚV sýnir af sér meðvirka þögn. RÚV er ekki þjóðarmiðill frekar en að Háskóli Íslands sé þjóðarskóli.

RÚV og HÍ eru miðstöðvar lágkúrulegrar dygðaflöggunar þar sem algildur sannleikur í dag er argasta lygi á morgun, allt veltur á hver á í hlut. Útlenskur gyðingur skal svo sannarlega ekki ganga að vísu málfrelsi í Háskóla Íslands. Þar ráða Hamas-vinir ríkjum er réttlæta fjöldamorð á konum, körlum, börnum og gamalmennum. Menntamorð, hugmyndafræðilegt ofbeldi og misbeiting valds til þöggunar var í gær hryllingur en þykir í dag réttmæt aðgerð gegn gyðingi sem vogaði sér þiggja boð að halda fyrirlestur um gervigreind í Háskóla Íslands.

Í fréttum er ekki helst að geðsjúklingarnir tóku yfir mannaforráð spítalans.