Viðræðusinnar tapa manni - og glórunni

Samfylkingin veðjaði á að Vilhjálmur Bjarnason yrði talsmaður ESB-sinna í þingflokki Sjálfstæðisflokksins. Vilhjálmur ætlar ekki að standa gegn slitum á viðræðum við ESB um umsókn Samfylkingar frá síðasta kjörtímabili.

Viðræðusinnar, sem er feluheiti ESB-sinna um þessar mundir, áttu erfiðan dag. Ásmundur Einar Daðason skrifaði grein í Morgunblaðið og dró rökrétta niðurstöðu af þeim málflutningi að ríkisstjórn andvíg ESB-aðild eigi engu að síður að halda aðlögunarferlinu áfram.

Ásmundur Einar var sakaður  um landráð og að vinna gegn þingræðinu. Viðræðusinnar eru raunar dálítið sérstakar týpur; þeir virðast gleyma hvaða skoðun þeir hafa frá einum tíma til annars en gefa samt út á bók skoðanagumsið sitt.

„Miklu betra að slíta viðræðunum“

Vinstristjórnin víti til varnaðar

Vinstristjórn Jóhönnu Sig. tók illu heilli þá ákvörðun sumarið 2009 að senda til Brussel umsókn um aðild Íslands að Evrópusambandinu. Samfylkingin fékk þá um vorið 29 prósent fylgi í þingkosningum og var þá eins eins og nú eini flokkurinn sem boðar að bjargir Íslands séu ESB-aðild.

VG var með 22 prósent fylgi 2009 og fékk það fylgi m.a. út á andstöðu við ESB-aðild. Svik VG við kjósendur leiddu til klofnings.

Hvorki gekk né rak hjá ríkisstjórn Jóhönnu Sig. með ESB-umsóknina á síðasta kjörtímabili vegna andstöðu á alþingi. Engar líkur eru á því að ESB-umsóknin kæmist spönn frá rassi þetta kjörtímabil þegar afgerandi meirihluti þings er mótfallinn aðild.

Alþingi ber að núllstilla ESB-ferlið með því að afturkalla ESB-umsókn Samfylkingar frá 16. júlí 2009. Þeir sem enn láta sig dreyma um aðild að Evrópusambandinu verða að vinna heimavinnuna sína og tryggja sér meirihluta í almennum þingkosningum.

„Þessi ríkisstjórn vill ekki ganga í ESB“

Brussel býður aðstoð við inngöngu í ESB

Evrópusambandið gengur ekki til samninga við umsóknarríki um að aðild að sambandinu. Stækkunarstjóri ESB útskýrir aðlögunarferlið með eftirfarandi orðum

Ef einhvern tímann verður tekin ákvörðun um að halda ferðinni áfram í átt að inngöngu í Evrópusambandið ættum við að vera reiðubúin að aðstoða Íslendinga á þeirri vegferð.

Á þessari ,,vegferð" tekur Ísland jafnt og þétt upp laga og regluverk Evrópusambandsins, samtals 100 þúsund blaðsíður.

,,Vegferðinni" lýkur með því að Ísland er búið tileinka sér ESB lög og reglur, og er því í reynd búið að afsala sér fullveldinu til Brussel, áður en þjóðaratkvæðagreiðsla er haldinn um aðildarsamninginn.

,,Vegferðin" er í raun innlimum fullvalda ríkis inn í Evrópusambandið. Í gamla Austur-Þýskalandi einnig tíðkað að nota falleg orð til að fela grimman veruleika. Þar hét austur-þýskt valdasvæði, sem lokaði þegna sína inni, ,,demokratischer sektor." 

Íslendingum stendur til boða vegferð inn Brussellýðræði þar sem kommisarar stjórna í fullu umboði þegnanna. Eða þannig.

Öflugt samstarf óháð umsókninni

Réttur einstaklinga til að rústa samfélagi

Málsvörn auðmanna og meðhlaupara þeirra er innblásin vandlætingu um að ekki megi ganga á ,,rétt einstaklingsins." Málsvörnin lætur liggja á milli hluta að einstaklingsréttur auðmanna var nýttur á tímum útrásar til að eyðileggja samfélagið.

Á tímum útrásar fór auðmenn ránshendi um samfélagið. Þeir beygðu og brutu lög og reglur og rændu banka innan frá, líkt og skýrt kemur fram í rannsóknaskýrslu alþingis. Auðmenn báru fé á stjórnmálamenn og stjórnmálaflokka og keyptu fjölmiðla til að stjórna umræðunni. Veldi auðmanna óx stofnunum samfélagsins yfir höfuð.

Eftir hrun náði samfélagið áttum og hóf rannsókn á framferði auðmanna. Eins og við var að búast var víða maðkur í mysunni. Og þá hófst söngurinn um ,,rétt einstaklingsins."

Málsvörn auðmanna sækir skotfæri sín í frönsku mannréttindayfirlýsinguna frá 1789, sem lagði grundvöll að mannréttindaumræðu seinni alda. 

Franska mannréttindayfirlýsingin ber það með sér að vera skrifuð af borgurum fullsöddum af einveldi konungs og forréttindum aðals og klerka. Engu að síður eru í yfirlýsingunni tvö atriði sem málsvörn auðmanna lítur alltaf framhjá. Í þriðju grein segir að allt fullveldi sé hjá þjóðinni og í sjöttu grein að lögin túlki almannaviljann.

Enginn þarf að velkjast í vafa um það að almannaviljinn á Íslandi stendur til þess að útrásarauðmenn fái makleg málagjöld. 

Réttur einstaklinga til að rústa samfélagi getur aldrei staðið ofar rétti samfélagsins að verja sig.

 

Bretar vilja kljúfa ESB í 18 evru-ríki og tíu með aukaaðild

Fjármálaráðherra Breta segir sameiginlega vegferð 28 ríkja Evrópusambandsins senn á enda. George Osborne fjármálaráðherra segir þörf evru-ríkjanna á nánara samstarfi til að bjarga gjaldmiðlinum ekki fara saman við sannfæringu meirihluta Breta að miðstjórnarvaldið í Brussel sé þegar orðið alltof mikið.

Í ræðunni sagði Osborne að enginn vilji væri til þess í Bretlandi að taka upp evru. Evrópusambandið yrði að breytast til að Bretlandi gæti áfram verið þar innanborðs. Í Íhaldsflokknum í Bretlandi er uppreisn gegn yfirvaldi Evrópusambandsins í breskum málefnum.

Breska ríkisstjórnin óttast að almennir þingmenn með stuðningi grasrótarsamtaka kippi Bretlandi út úr Evrópusambandinu í gegnum þjóðaratkvæðagreiðslu. Ræða Osborne var öðrum þræði ætluð til að sefa flokksmenn.

Krafa Breta um minni miðstýringu í Brussel í algerri mótsögn við sannfæringu evru-þjóðanna 18 um að aðeins stóraukin fjármálasamruni forði evrunni frá tortímingu.

Samtímis er ekki hægt að auka miðstýringu og draga úr henni. Þess vegna er fjármálaráðherra Breta að boða tvískipt Evrópusamband; evru-ríkin 18 verði í kjarnasamstarfi og hin tíu taki þátt í sameiginlegum markaði.

Útfærslan á þessum hugmyndum, ef þær verða að veruleika, tekur líklega 10 til 15 ár.

Pyntingar í beinni og heimurinn situr hjá

Maður var pyntaður í mosku og hátalarakerfið, sem notað er til að kalla múslíma til bæna, útvarpaði sársaukaöskrum fórnarlambsins til að allir þorpsbúar mættu heyra. Böðlarnir voru liðsmenn Assad Sýrlandsforseta, að sögn Evrópuþingmannsins Daniel Hannan, sem heyrði frásögnina í flóttamannabúðum í Tyrklandi.

Hannan og félagar heyrðu fleiri sögur af skelfilegum afleiðingum borgarastríðsins í Sýrlandi sem ekki sér fyrir endann á.

Og verst er, segir Hannan, það er ekkert hægt að gera. Assad forseti er böðull en andstæðingarnir eru ekki beinlínis kórdrengir, þar fara fyrir trúarofbeldismenn sem virða hvorki mannúð né Genfarsáttmálann um hernaðarátök.

Shía og Súnní múslímar berast á banaspjótum í Sýrlandi í tilgangslausu ofbeldi. Vesturlönd vita af fenginni reynslu í Afganistan og Írak að stórveldainnrás er uppskrift að enn verra ástandi.

Stundum er engin lausn, skrifar Hannan.

Samfylkingarvæðing RÚV

Fyrrum framkvæmdastjóri Samfylkingar, Karl Th. Birgirsson, stekkur til varnar óbreyttu ástandi á RÚV enda þjónar stofnunin hagsmunum Samfylkingar sérstaklega og vinstriflokkunum almennt í fréttaflutningi.

Karl talar um RÚV sem ,,frjálsa fjölmiðlun" og tekur vara á breytingum í átt að flokksvæðingu. Sannleikurinn er sá að RÚV, fréttastofna sérstaklega, þjónar Samfylkingunni sem flokksmálgagn og hefur lengi gert.

Eðlilega vilja samfylkingarmenn óbreytt RÚV. Þeir mun krefjast þess að fá nýjan útvarpsstjóra úr röðum ESB-sinna og reyna eflaust í því skyni að ná bandlagi við litla ESB-hópinn í Sjálfstæðisflokknum sem Þorsteinn Pálsson fer fyrir.

Velferðartúrismi og þanþol þjóðríkja

Almenningur í efnaðri hluta Evrópusambandsins óttast að straumur velferðartúrista frá Búlgaríu og Rúmeníu sprengi velferðarþjónustuna og keyri jafnvel ríkissjóði Norður-Evrópuríkja í gjaldþrot.

Af hálfu þeirra sem ráða ferðinni í Brussel er velferðartúrisminn eðlilegur hluti af samrunaþróun Evrópusambandsins.

Velferðartúrisminn mun ekki auka samstöðu ESB-ríkjanna heldur þvert á móti efla þau pólitísku öfl sem líta á Evrópusambandið sem vandamál en ekki lausn. 

Í kosningum til Evrópuþingsins eftir nokkrar vikur mun kjósendur í Norður-Evrópu senda þau skilaboð til Brussel að þanþol þjóðríkja gagnvart samrunaþróuninni sé að bresta.

858% fleiri frá A.-Evrópu á framfæri Dana

Dómsvísindi eru ímyndun; réttlæti er það ekki

Lögfræði er ekki vísindagrein sem tekur við hráum staðreyndum lífsins og skilar óvefengjanlegum niðurstöðum. Helstu iðkendur lögfræði, lögmenn og dómarar, eru ekki vísindamenn sem standa frammi fyrir mælanlegum veruleika, heldur eru þeir hluti af samfélagi þar sem tekist er á um siðagildi og skilgreiningar; bæði um hvað er rétt og rangt og réttlætið sjálft.

Samfélagið rekur dómstóla fyrir eigin reikning til að stuðla að réttlæti. Jafngömul hugmyndinni um réttlæti er togstreitan milli einstaklingsréttar og réttar samfélagsins til að verja hornsteina sína. Sjálfur Sókrates, sem vissi sitthvað um réttlæti, galt fyrir með lífi sínu að Aþenubúar höfðu aðrar hugmyndir en hann um rétt samfélagsins gagnvart einstaklingnum.

Eftir samfélagsleg stóráföll á borð við hrunið 2008 verður óhjákvæmilegt endurmat á siðagildum og þar með réttlæti. Atburðirnir sjálfir knýja fram endurmatið fremur en að um sé að ræða niðurstöðu tilgreindra aðila, einstaklinga eða stofnana.

Í réttlæti eftirhrunsins er hægt að koma auga á eitt dómsmál þar sem málatilbúnaður var einelti fremur en réttmæt saksókn. Það er landsdómurinn yfir Geir H. Haarde sem ranglega var einn látinn svara fyrir stjórnmálakerfi lýðveldisins. 

Önnur dómsmál og niðurstöður þeirra bera, í það minnsta séð úr fjarlægð, saksókn og dómum fagurt vitni um ástundun réttlætis. 

 

Í samningum við ESB er aðeins eitt í boði

Aðeins ein leið er inn í Evrópusambandið og sú leið heitir aðlögun. Aðlögun felur í sér að umsóknarríki tekur upp laga- og regluverk ESB á meðan á ferlinu stendur. Í útgáfu ESB á aðlögunarferlinu segir á bls. 9

The term "negotiation" can be misleading. Accession negotiations focus on the conditions and timing of the candidate's adoption, implementation and application of EU rules - some 100,000 pages of them. And these rules (also known as the acquis, French for "that which has been agreed") are not negotiable.

Á íslensku: Hugtakið ,,viðræður" getur verið misvísandi. Aðildarviðræður eru með áherslu á skilyrði og tímasetningar á því hvernig umsóknarríki aðlagar sig að reglum ESB - sem telja 100 þúsund blaðsíður. Og þessar reglur (einnig kallaðar acquis, sem er franska og þýðir ,,það sem hefur verið samþykkt) er ekki hægt að semja um.

ESB-sinnar á Íslandi vilja ekki skilja einföldustu atriðin í Evrópuumræðunni og helst af öllu vilja þeir að andstæðingar aðildar tileinki sér valkvæða heimsku ESB-sinna.

Í samningum við ESB er aðeins eitt í boði: aðild að Evrópusambandinu.

ESB er og verður deilumál