Ísland á ekki aðild að Úkraínu-deilunni

Evrópusambandið og Rússland takast á um áhrif í Úkraínu. Stjórnvöld í landinu eru lengi búin að vera gerspillt. Þegar Rússland hirti Krímskaga af Úkraínu, sem fékk skagann gefins á tímum Sovétríkjanna, töldu málsmetandi menn í Evrópu, t.d. Helmut Schmidt, fyrrum kanslari Vestur-Þýskalands, það réttmæta aðgerð.

Evrópusambandið ætlar sér sterk ítök í Úkraínu. Í vestrænum fjölmiðlum er jafnvel talað um síðnýlendustefnu ESB gagnvart Úkraínu. Vaxandi ítök ESB tortryggir Rússa og það með rökum. Stórríki Vestur-Evrópu, Frakkland og Þýskaland, sendu óvíga heri til Rússlands á 19. og 20. öld. 

Ísland á ekki aðild að Úkraínu-deilu Rússlands og Evrópusambandsins og ætti að halda sig til hlés.

Ísland ekki á bannlista Rússa

Betra er vont yfirvald en alls ekkert

Assad Sýrlandsforseti er harðstjóri líkt og var Saddam Hussein alráður í Írak. Báðir komust þeir til valda á innlendum forsendum, voru vont yfirvald en veittu jafnframt stjórnskipulega kjölfestu. Bandaríkjamenn veltu Hussein af stóli og Írak er að gliðna í sundur. Bandaríkjamenn studdu andstæðinga Assad í Sýrlandi en varpa núna sprengjum á þá.

Arabíska vorið, sem ásamt hernaðaríhlutun Bandaríkjanna í Írak, átti að færa arabalöndum lýðræði gerði það alls ekki heldur braut niður stjórnskipun og leiddi til stjórnleysis.

Bandaríski stjórnarerindrekinn Christopher R. Hill segir Bandaríkin ábyrg fyrir upplausninni í Sýrlandi og Írak þar sem ríkisheildir liðast upp í ættbálkaerjur og trúarstríð.

Bandaríkin, þótt stórveldi séu, eru ekki í færum að byggja upp lífvænlega stjórnskipun í Sýrlandi eða Írak. Það verður ekki gert nema á innlendum forsendum.

 

Bretar ætla ekki til Íraks

Vinstripólitík í vanda: Björt framtíð leiðir uppgjörið

Björt framtíð er stærsti vinstriflokkurinn með tæp 22 prósent fylgi. Samfylking kemur fimm prósentustigum neðar og Vg er með helminginn af fylgi Bjartar framtíðar.

Björt framtíð er mildríður íslenskra stjórnmála, vill engan styggja og starfar bæði til vinstri og hægri, eins og kom á daginn eftir sveitarstjórnarkosningarnar.

Sterkt fylgi við Bjarta framtíð lýsir andúð kjósenda á öfgapólitík Samfylkingar (ESB-aðild eða dauðinn) og hatursorðræðu Vg, sem einkum er í boði varaformannsins. 

Fylgi Framsóknar eykst lítillega

Stjórnmál, Danmörk og Sýrland

Dönsk stjórnmál eru leiðinleg. Flokksformaður hættir og það eru lítil tíðindi; annar tekur við og ólíkleg að hann  breyti nokkru enda flest í föstum skorðum. Stjórnmál í Sýrlandi eru á hinn bóginn spennandi með átökum, ofbeldi og draumsýn um  nýtt kalífadæmi á landssvæði Sýrlands og Írak.

Stjórnspekingurinn David Runciman skrifaði nýverið bók sem heitir Stjórnmál. Í kynningu á bókinni segir að hún sé fyrir þá sem vilja vita hvers vegna betra sé að búa í Danmörku en Sýrlandi.

Stutta svarið er að stjórnmál eru leiðinleg í Danmörku, sem er forsenda fyrir þægilegu lífi almennings; stjórnmál í Sýrlandi eru lífshættulega spennandi með tilheyrandi ömurleika fyrir fólk flest.

Hættir sem formaður Íhaldsflokksins

Þjóðaratkvæðagreiðsla um aðild að Noregi

RÚV hlýtur að stökkva til og krefja stjórnmálamenn svara um hvenær efnt verður til þjóðaratkvæðagreiðslu um aðild Íslands að Noregi.

Taka má undir með Andríki sem segir segir

Krafan um aðildina að Noregi uppfyllir líklega sömu kröfur og hugmyndin um aðild að ESB. Meirihluti Íslendinga er andvígur, meirihluti þingmanna er gegn hugmyndinni, ríkisstjórnin er ekki bara andvíg heldur vill hún skiljanlega ekki standa í aðlögun sem hún er andvíg, Norðmenn vilja ekki sýna „samninginn“ og alls ekki hefja „viðræður“ um sjávarútveg nema byrlega blási í könnunum. 

Á virkilega að halda þessu máli frá þjóðinni?

 

Jafnréttisstofa: 7 konur á móti 1 karli

Jafnréttisstofa er opinber stofnun með það hlutverk að ,,annast stjórnsýslu á sviði jafnréttismála á Íslandi í samræmi við lög um jafna stöðu og jafnan rétt kvenna og karla."

Starfsmenn Jafnréttisstofu eru átta og skyldi ætla að stofnun með skilgreint hlutverk í jafnréttismálum gætti að jafnrétti í mannaráðningum. En það er öðru nær. Af átta starfsmönnum eru sjö konur en einn karl.

Þessi skökku kynjahlutföll (87,5 prósent konur en 12,5 karl(ar)) eru í hróplegu ósamræmi við eftirfarandi hlutverk Jafnréttisstofu

Verkefni sem Jafnréttisstofa annast eru m.a. að: hafa eftirlit með framkvæmd laga um jafna stöðu og jafnan rétt kvenna og karla, miðlun upplýsinga um jafnrétti kynjanna, fræðsla og ráðgjöf til einstaklinga, félaga, fyrirtækja, stofnana og stjórnvalda á öllum stigum. Þá skal Jafnréttisstofa fylgjast með þróun jafnréttismála í þjóðfélaginu, m.a. með upplýsingaöflun og rannsóknum.

Þegar Jafnréttisstofa getur ekki haldið eðlilegu kynjahlutfalli á eigin stofnun er tæplega hægt að gera ráð fyrir að stofnunin búi að slagkrafti til að jafna stöðu kynjanna úti í þjóðfélaginu. 

Gunnar Smári, Quisling og nafnlausa burðardýrið

Gunnar Smári Egilsson kveðst í viðtali við norskan fjölmiðil telja líklegt að honum verði jafnað við Vidkun Quisling fyrir að stofna feisbúkk-hóp utan um þá hugmynd að Ísland verði hluti af Noregi.

Gunnari Smára er alveg saman hvort hann sé frægur eða alræmdur, eins lengi og hann fái sviðið, og þá er um að gera að nefna sjálfan sig í sömu andrá og þekktasta föðurlandssvikara sögunnar.

Í viðtalinu boðar Gunnar Smári að Íslendingar verði ríkir á því að Noregur yfirtaki landið og miðin. Hann segir Íslendinga ekki standa undir því að reka velferðarþjóðfélag. Rökin eru þessi

Það er eins og þegar tveir einstaklingar reyna að flytja píanó upp á þriðju hæð. Það er dæmt til að mistakast. Við verðum að velja á milli velferðar og fullveldis. (Det er som når to personer forsøker å bære et piano opp i tredje etasje. Det er dømt til å mislykkes. Vi må velge: velferd eller selvstendighet )

Ólíklegt er að Gunnari Smára verði jafnað við Vidkun Quisling. Einhver gæti minnst hans fyrir innsæið að líkja fullveldi við að tveir menn beri á milli sín píanó; undir þeim formerkjum að vera nafnlaust burðardýr ónýtra hugmynda.

Blaðamaður DV: ég fyrirlít Sjálfstæðisflokkinn

,,Ég fyr­ir­lít Sjálf­stæðis­flokk­inn," sagði Jóhann Páll Jóhannsson blaðamaður á DV í viðtali. Jóhann Páll dró í land samdægurs, þegar rann upp fyrir honum hve illa hann var búinn að laska trúverðugleika sinni.

Jóhann Páll er ásamt Jóni Bjarka Magnússyni blaðamanni aðalhöfundur að raðfréttum DV þar sem dylgjað og slúðrað er um innanríkisráðherra, Hönnu Birnu Kristjánsdóttur. Björn Bjarnason hefur bent á að Jón Bjarki kom fram á samstöðufundi No Borders, sem er málsaðili að svokölluðu lekamáli. Þeir Jóhann Páll og Jón Bjarki eru algjörlega ótrúverðugir sem blaðamenn í lekamálinu.

Félagarnir ásamt Reyni Traustasyni ritstjóra eru skrifaðir fyrir nýjustu DV-rokunni, um að lögreglustjóri höfuðborgarsvæðisins hafi skipt um starf vegna afskipta innanríkisráðherra. Engu breytir fyrir DV að lögreglustjóri hafnar málflutningi blaðsins.

Reynir talar um ,,pönk" og að ,,taka fólk niður" þegar hann ræðir blaðamennsku DV og er það vinnulag sem enginn sómakær fjölmiðill gerir að sínu.

Svokallað lekamál er að stærstum hluta tilbúningur DV og er rekið áfram af öðrum hvötum en virðingu fyrir sannleikanum.

 

Bjarni: Hanna Birna nýtur trausts

Almenningur niðurgreiði 200 störf fjármálamanna

Fjármálafyrirtækja sem selja lífeyrissparnað framhjá gjaldeyrishöftum krefjast þess að almenningur niðurgreiði störf 200 fjármálamanna, sem eru í vinnu við að grafa undan gjaldeyrishöftum.

Gjaldeyrishöft eru í þágu almennings. Vegna haftanna getur almenningur ferðast erlendis og keypt þjónustu þaðan en samt búið við hagfellt gengi krónunnar. 

Fjármálafyrirtækin sem selja lífeyrissparnað í gjaldeyri skáskjóta sér framhjá gjaldeyrishöftunum. Vitanlega á að loka þessari starfsemi. Og það er næga vinnu að hafa hér á landi.

Dólgafemínismi vill þöggun

„Ég hef skrifað nokkr­ar grein­ar í Kvenna­blaðið þar sem ég gagn­rýni kven­hyggju og femín­ist­ar hafa sam­band við rit­stjórn, lýsa hneyksl­un sinni og krefjast þess að grein­in verði fjar­lægð. Þær fá alltaf sama svarið: Ykk­ur er vel­komið að svara. En þær svara ekki. Ég fæ enga mál­efna­lega gagn­rýni, bara þögg­un­ar­til­b­urði og full­yrðing­ar um að ég viti ekki hvað ég sé að segja, ég mis­skilji femín­ismann og sé með út­úr­snún­inga, án þess að nokk­ur geti út­skýrt í hverju þeir út­úr­snún­ing­ar eða mis­skiln­ing­ur fel­ist,“ segir Eva Hauksdóttir.

Athyglisvert.

Segir dólgafemínisma ekki vinsælan