Illugi til formennsku í Samfylkingu, Helgi hræddur

Illugi Jökulsson kannar stuðning við formannsframboð í Samfylkingunni en sitjandi formaður, Árni Páll Árnason, þykir ekki gera sig. Egill Helgason og Gunnar Smári Egilsson eru áhugasamir um framboð Illuga sem kynnti hugmyndina með færslu á fésinu.

Fésbókarsíða er komin í loftið til að kanna stuðning við framboðið. Þar segir

Þegar Illugi hefur látið undan þrýstingi fjöldans munu hér birtast hvatning hans {til] Samfylkingarfólks og stefnan út úr ógöngum flokks og þjóðar.

Þingmenn Samfylkingarinnar eru í erfiðri stöðu enda stendur flokkurinn illa og líklegt að þingsætum fækki í næstu kosningum. Helgi Hjörvar er þegar farinn að bera í víurnar í óstofnaðan hægriflokk Benedikt Jóhannessonar.

Samfylkingin er þreyttur flokkur enda endurnýjaðist þingmannaliðið ekkert í síðustu kosningum sem skiluðu flokknum 12,9 prósent fylgi.

Illugi Jökulsson er duglegur að smala fólki á Austurvöll til að mótmæla hinu og þessu og gæti þótt heppilegur í fylgissmölun ógæfusama aldamótaflokksins.

Helgi Hjörvar óskar inngöngu í Viðreisn

Helgi Hjörvar þingmaður Samfylkingar óskar sér nýs hægriflokks til að berjast fyrir ESB-aðild Íslands. Skilaboð Helga eru að Samfylkingin (12,9%) klúðraði málinu og nú sé komið að hægriflokki að reyna sig.

Helga liggur svo á að hann er tilbúinn stofna þingflokk ESB-sinna þótt enginn sé enn stjórnmálaflokkurinn enda Benedikt Jóhannesson ekki búinn að stofa Viðreisn þótt lógóið sé komið.

Þrjá þingmenn þarf í þingflokk, eins og Helgi veit. Útspilinu er beint að Ragnheiði Ríkharðsdóttur og Vilhjálmi Bjarnasyni þingmönnum Sjálfstæðisflokksins sem gera reglulega ESB-gælur.  

Alþjóðasinnaðir hægrimenn heimilislausir

Þríeykið dautt á 45 sek.; Pútín gæti fengið neitunarvald í Brussel

Yanis Varoufakis fjármálaráðherra Grikkja drap þríeykið (Alþjóða gjaldeyrissjóðinn, Evrópska Seðlabankann og ESB) sem stjórnar leiðangri Grikkja til sjálfshjálpar úr efnahagshruni. Drápið náðist á ræmu og tók ekki nema 45 sekúndur.

Leiftursókn fjármálaráðherra Grikkja, ásamt Tsipras forsætisráðeherra, skorar stórt í umræðunni. Félagarnir er búnir að króa af Angelu Merkel kanslara sem neitar Grikkjum afskrift af lánum sem þeir geta ekki borgað. Í Telegraph segir að Merkel verði að gefa eftir.

Münchau í Spiegel gengur enn lengra og segir ef Merkel hrindi Grikkjum í faðm Rússa þá verði Pútin kominn með neitunarvald í Evrópusambandinu enda væru landsmenn Sókratesar þá orðnir að strengjabrúðum trúbræðra sinna í austri.

Öll Evrópa er í uppnámi vegna þess að tíu milljón manna þjóð tekur evruna í gíslingu. Sannarlega er það rétt að evran er pólitískt verkfæri - að því er virðist til sjálfstortímingar Evrópusambandsins.

Vill samkomulag fyrir lok maí

Skelfing Árna Páls; Vg eina huggunin

Samfylkingin hlaut ömurlega kosningu undir forystu Árna Páls Árnasonar 2013, eða 12,9%. Samfylkingin ætti að vera með um 30% fylgi miðað við hvernig til var stofnað um aldamótin.

Daginn sem Árni Páll tilkynnti áform sín um endurkjör fékk hann þær fréttir að Samfylkingin stæði í 18 prósent fylgi og væri í tapferli. Eina huggun Árna Páls og félaga er að Vg stendur enn verr með 11 prósent fylgi.

Vinstriflokkarnir ná ekki til fólks. Píratar eru á hinn bóginn á flugi enda öðruvísi og ábyrgðarlausir.

Samfylking og Vg eru gagnkvæmt útilokandi flokkar, nema í undantekningatilfellum, eins og rétt eftir hrun. Eina leið Samfylkingar til að stækka er með aukinni hægripólitík en þá lekur vinstrafylgið yfir til Vg. Og ef Vg reynir að efla sig með aukinni róttækni flýja hófsamir til Samfylkingar. Gagnkvæm gíslataka vinstriflokkanna á fylgi hvors flokks er leiðarstef í sögu þeirra.

Einkennisorð Samfylkingar og Vg eru: sælt er sameiginlegt skipbrot.

Árni Páll sækist eftir endurkjöri

Promens reynir fjárkúgun, fær stuðning Samfylkingar

Promens vildi niðurgreiddan gjaldeyri til að fjárfesta erlendis en fékk ekki og hótar nú að flytja höfuðstöðvarnar úr landi.

Á mannamáli heitir þetta fjárkúgun.

Ekki kemur á óvart að Samfylkingin styðji Promens.

Vildi gjaldeyri á afslætti

Grikkland og Kýpur án evru í faðm Rússa

Alexi Tsipras forsætisráðherra Grikkja heimsótti starfsbróður sinn á Kýpur, sem er álíka gjaldþrota og Grikkland, gagngert til að auglýsa að sameiginlegt brotthvarf þeirra beggja úr evru-svæðinu myndi setja Suðaustur-Evrópu í uppnám.

Til að ekkert færi á milli mála sagði Tsipras að Grikkir og Kýpverjar gætu miðlað málum milli Evrópusambandsins og Rússlands vegna Úkraínu-deilunnar. Undirliggjandi hótun er að Rússum verði hjálpað að opna nýja víglínu í Suðaustur-Evrópu í gegnum Grikkland/Kýpur ef ESB lætur ekki undan kröfum Grikkja um stórfelldar afskriftir af skuldum.

Bæði Tsipras og fjármálaráðherra hans, Yanis Varoufakis, eru sagðir plotta á mörgum hæðum. Þeir ýmist hóta eða lofa, biðjast vægðar eða hnykla vöðvana í valdaskaki. Vandinn við slík plott, eins og gamlir Alþýðubandalagsmenn vita, er að halda þræði milli hæða. Ef þráðurinn slitnar fer illa fyrir Tsipras og Grikkjum.

Obama stendur með Grikkjum

Lífeyrissjóðirnir og sósíalistaríkið Ísland

Hávaðinn í húsnæðisumræðunni er skipulagður í tengslum við lausa kjarasamninga. Ætlunin er að mjólka ríkið í þágu verktaka annars vegar og hins vegar kaupenda.

Í ljósi þess að lífeyrissjóðirnir eru þegar á fasteignamarkaði, í gegnum ýmsa vaxtasjóði, og hafa þar með stuðlað að fasteignabólu, er eðlilegast að þeir komi sjálfir að átaki í húsnæðismálum.

Meginþungi krafna verkalýðshreyfingarinnar beinist ekki að viðsemjendum, Samtökum atvinnulífsins, heldur að ríkissjóði. Þetta segir forseti ASÍ

Hann seg­ir það vera fyrst og fremst í hönd­um rík­is­stjórn­ar­inn­ar að búa svo um hnút­ana að þjóðarsátt gæti skap­ast. Gylfi nefn­ir í því sam­bandi skatt­kerfið, vel­ferðar­kerfið, bæði hús­næðismál og heil­brigðismál, og eins mennta­kerfið.

Samkvæmt orðum forseta ASÍ er Ísland orðið að sósíalistaríki þar sem ríkisvaldið skipar fyrir um kaup og kjör á vinnumarkaði. Næsta skrefið er áætlunarbúskapur með fimm ára áætlunum.

„Allt á eftir að loga hérna“

Össur og pólitík heimskunnar

Evrópusambandið er í stríði við Rússa vegna Úkraínu og í innanlandsófriði vegna ósamkomulags um efnahagsstjórnun annars vegar og hins vegar út af deilum um flóttamannpólitík. Í ofanálag er veruleg hætta á að Bretland segi skilið við Evrópusambandið.

Össur Skarphéðinsson segir ekkert, nákvæmlega núll, um stöðu Evrópusambandsins. En hann er uppfullur af kenningum og sjónarmiðum um hvað gerist ef ríkisstjórnin afturkallar umboðslausu umsóknina um aðild að Evrópusambandinu frá 16. júlí 2009.

Össur er stjórnmálamaður þeirra greindarskertu.

ASÍ veit hvað kaupið má hækka

Hagdeild ASÍ er beintengd við stærstu fyrirtæki landsins í gegnum eignarhlut lífeyrisjóðanna í Icelandair, Högum, Össuri, Marel og öðrum skráðum fyrirtækjum í Kauphöllinni.

Forseti ASÍ getur dundað sér við að hamast á kaupi lækna og kennara en það breyti ekki þeirri staðreynd að kaup ASÍ-launþega kemur frá fyrirtækjum að stórum hluta í eigu verkalýðshreyfingarinnar.

Forseti ASí ætti að ráðgast við hagdeildina sína og spyrja hvað fyrirtæki verkalýðshreyfingarinnar geta hækkað kaupið án þess að til vandræða horfi.

ASí gæti líka gert okkur öllum greiða og skellt á svona tveggja mánaða allsherjarverkfalli til að kæla hagkerfið. Eftir það yrði verulegt atvinnuleysi sem myndi lækka kaup og kaupkröfur; málið væri leyst.

 

Útafkeyrsla við samningaborðið

Tsipras er And-Merkel; sæmdin í gríska harmleiknum

Angela Merkel kanslari er hagsýna húsmóðir evru-heimilisins sem krefst þess að endar nái saman og heimilið safni ekki ósjálfbærum skuldum. Alexi Tsipras forsætisráðherra Grikkja er töffarinn (kallaður sexý Alexi) sem segir nóg komið af hallærislegum húsráðum miðaldra þýskrar kerlingar, nú sé kominn tími skuldaafsláttar svo að Grikkir fái tilbaka sæmd sína.

Þýska tímaritið Spiegel rekur eitt fyrsta embættisverk Tsipras, að leggja blóm við minnismerki grískra andspyrnumanna sem Þjóðverjar tóku af lífi í seinni heimsstyrjöld. Pólitísku skilaboðin eru ótvíræð, samstaða gegn Merkel í dag í nafni samstöðunnar gegn Hitler fyrir 70 árum.

Sæmd Grikkja mun kosta stórt. Die Welt segir skuldaafsláttinn, sem Tsipras krefst, vera þann langstærsta í gervallri sögu afskrifta af skuldum þjóðríkja.

Til að knýja á um sæmd Grikkja er Tsipras orðinn nýjasti vinur Pútíns Rússlandsforseta á vesturlöndum. Þar er marxistinn Tsipras kominn í félag með öfgahægriflokk Maríu Le Pen í Frakklandi. Grikkland er á Balkanskaga þar sem fyrir hundrað árum braust út fyrri heimsstyrjöld. Sæmd Serba var í húfi og Rússar tóku ábyrgð á henni andspænis særðu þýsku stolti með sögulegum afleiðingum.

Sæmd Grikkja er annað heiti á grískum lífstíl, sem er að eyða í dag og borga skuldir eftir minni. Þýskur lífstíll er að spara í dag til að eiga fyrir útgjöldum á morgun.

Evran bindur saman gagnólíka efnahagsmenningu. Annað tveggja hlýtur að gefa eftir, efnahagsmenning Þjóðverja eða sjálf evran. Sá sem veðjar á að sæmd Grikkja fari með sigur af hólmi er áhættufíkill.

 

„Þurfum tíma til að anda“