Auðmenn með feril úr Búnaðarbanka í Kaupþing

Kaupþingsmennirnir, sem fengu dóm í gær, eru ekki nýgræðingar í faginu. Einn stærsti eigandi Kaupþings, Ólafur Ólafsson, var aðalmaðurinn á bakvið kaup S-hópsins svokallaða á Búnaðarbankanum.

Þá átti að heita að þýski bankinn Hauck & Aufhäuser Privatbankiers KGaA væri aðili að kaupunum, en samkvæmt skýrslu alþingis var það til skrauts og engu haldbærari en viðskiptin við Al Thani síðar meir.

Auðmenn eins og Ólafur og félagar skópu þá ímynd að viðskipti þeirra væru hafin yfir lög og rétt. Dómur Hæstaréttar jarðar þá ímynd.

Mikilvægt að ekki skapist friðhelgi

Ísland er réttarríki; sekir fá makleg málagjöld

Auðmenn geta ekki keypt sig frá réttvísinni, hvorki með brögðóttum lögmönnum né beinu eða óbeinu eignarhaldi á fjölmiðlum. Þetta er meginniðurstaða Al Thani-málsins.

Kaupþingsmenn brutu lög siðaðs samfélags og fá núna makleg málagjöld.

Ísland er betri staður að búa á eftir 12. febrúar 2015.

 

Hæstiréttur leggur línurnar

Femínistum ratast satt orð í munn

Barneignir eru ekki mannréttindi, ekki fremur en það eru mannréttindi að vera yfir 1,80 á hæð. Þeir sem eru í þeirri stöðu að geta ekki fætt barn eiga möguleika á ættleiðingum.

Staðgöngumæðrun felur í sér lán eða leigu á æxlunarfærum kvenna og það er ekki löggjafans að heimila slíkt.

Aldrei þessu vant eru femínistar með hárrétta greiningu á brýnu samfélagsmáli.

Barneignir ekki sjálfsögð mannréttindi

Stríðsógnin hangir yfir Evrópu

Evrópusambandið og Bandaríkin sérstaklega eiga erfitt með að viðurkenna mistökin sem voru þegar þegar stefnan var tekin á útþenslu Nato í austurátt eftir fall kommúnismans á tíunda áratug síðustu aldar.

Með kommúnismanum féll ekki valdapólitík Evrópu, þótt sumir vestur í Washington virðast halda það.

Evrópusambandið (les: Frakkar og Þjóðverjar) verða að finna lausn á sambúðarvanda við Rússa sem tekur mið af gagnkvæmum öryggishagsmunum. Á meðan það er ekki gert hangir stríðsógnin yfir Evrópu.

Skilyrði Rússa óásættanleg

Lýðræðið og Evrópusambandið er hvítt og svart

Öll stjórnarandstaðan á Ítalíu er á móti Evrópusambandinu og evrunni. Á Spáni er Podemos, systurflokkur gríska stjórnarflokksins Syriza, kominn í forystu og þar verða kosningar í nóvember í ár.

Stjórnmálaöfl sem draga til sín fylgi eru á móti Evrópusambandinu og evrunni sökum þess að lífskjör versna í jaðarríkjum ESB sem látin eru bera hitann og þugann af kostnaðinum við evru-samstarfið.

Almenningur styður til valda stjórnmálaflokka sem hafna efnahagsstefnu Evrópusambandins og gríska Syriza bandalagið er fyrirmynd. Elítan í Brussel má ekki til þess hugsa að Syriza heppnist að leiða Grikki út úr sjö ára kreppu, - hvort heldur innan eða utan evru-samstarfsins.

 

Fyrsta árs nemi sem langar að gera hjartaaðgerð en kann það ekki

Úkraína, Grikkland og lömuð Evrópa

Evrópusambandið stendur ráðþrota í tveim deilumálum sem yfirskyggja allt annað á alþjóðavettvangi: Úkraínudeilunni við Rússa annars vegar og hins vegar evru-deilunni við Grikki.

Evrópusambandið leitar á náðir Bandaríkjaforseta að þvinga Rússa að samningaborði vegna Úkraínudeilunnar. Bandaríkin bera raunar þunga ábyrgð á Úkraínudeilunni enda knúðu bandarískir hagsmunir á um að Úkraína sliti sig frá rússnesku forræði. Evrópusambandið spilaði með og ætlaði Úkraínu á sitt áhrifasvæði en á enga innistæðu fyrir slíkri stöðutöku í Austur-Evrópu, - sem berlega kom í ljós þegar Rússar tóku að vopna uppreisnarmenn gegn stjórninni í Kænugarði.

Í evru-deilunni vð Grikki er þrátefli milli Brussel og Grikkland. Grikkir hóta að leita á náðir Rússa ef þeir fá ekki afskrifaðar skuldir við ESB. Jeremy Warner á Telegraph telur þjarkið við Grikki ESB skeinuhættari en Úkraínu-deilan og segir líklegt að Bandaríkin verði að bjarga Evrópu í þriðja sinn á 100 árum - með vísun í fyrra og seinna stríð.

Annar Telegraph höfundur, Evans-Pritchard, segir Grikki jafnvel leita eftir stuðningi hjá Kínverjum, ef ESB-ríkin fallast ekki á afskriftir skulda.

Í báðum deilumálunum sýnir Evrópusambandið sig vera risa á brauðfótum. ESB býr að ógnarsterkri stöðu sem kerfisveldi og framleiðir ógrynnin öll af lögum og reglugerðum. Slík pappírstígrisdýr duga skammt þegar á reynir, líkt og í Úkraínu og Grikklandi. 

 

Obama hringdi í Pútín

Háværi minnihlutinn boðar uppnám

ESB-sinnar á Íslandi eru minnihlutahópur og hefur alltaf verið. En hópurinn er frekur og ósvífinn. Þegar færi gafst, þann 16. júlí 2009, þegar þjóðin var að sleikja sárin eftir hrun knúðu ESB-sinnar þingmenn Vg til að svíkja stefnu flokksins og nýgefin kosningaloforð.

Án umboðs frá þjóðinni og með beinum svikum á alþingi var ESB-umsóknin send til Brussel fyrir bráðum sex árum. Umsóknin strandaði á skeri áramótin 2012/2013 þegar vinstristjórn Jóhönnu Sig. hætti öllum tilraunum til að aðlaga Ísland að ESB, - sem er forsenda fyrir framgangi umsóknarinnar.

Þjóðin kaus andstæðinga ESB-aðildar til meirihluta á alþingi vorið 2013. Framsóknarflokkur og Sjálfstæðisflokkur eru með skýra og ótvíræða stefnu um að afturkalla ESB-umsóknina.

Þegar til stendur að efna niðurstöður lýðræðislegra kosninga, þá boðar háværi minnihlutinn uppnám.

Í uppnáminu felst að taka alþingi í gíslingu málþófs. Ef við látum ESB-sinna ráða ferðinni þá er illa komið fyrir okkur.

Færri andvígir inngöngu í ESB

Úkraína; Víetnam eða Afganistan?

Samherji Rússlandsforseta segir Úkraínu geta orðið nýtt Víetnam fyrir Bandaríkin, hefji þau bein afskipti af deilu uppreisnarmanna í austurhluta landsins, er njóta stuðnings Rússa, og stjórnvalda í Kænugarði sem Bandaríkin og Evrópusambandið styðja.

Í Kænugarði eru menn, segir Spiegel, sem vonast til að Úkraína verði nýtt Afganistan fyir Rússa og þeir leggi upp laupana fyrr heldur en seinna, smáðir og sigraðir.

Hvort ætli sé líklegra?

Víetnam var langt í burtu stríð sem bandarískur almenningur skildi ekki. Markmið Bandaríkjanna voru óljós og herfræðin þar af leiðandi tilviljanakennd á móti einbeittum andstæðingi. Tilgangur Rússa með innrás í Afganistan var að treysta völd vinveittrar ríkisstjórnar sem ekki stóð sterkt meðal almennings - en fæstar ríkisstjórnir Afgana njóta lýðhylli í margsplundruðu samfélagi. Í Afganistan misstu Rússar um 14 500 hermenn á tæpum áratug en Bandaríkjamenn um 58 þúsund á rúmum áratug í Víetnam.

Úkraína er langt í burt frá Bandaríkjum. Landið er eins og Afganistan sundurtætt í innbyrðis átökum klíkuvelda og landshluta. Stjórnvöld í Kænugarði tala aðeins fyrir hluta þjóðarinnar, líkt og Saigon-stjórnin í Víetnam á sjöunda áratug síðustu aldar.

Rússar eru með sterkan stuðning í austurhluta Úkraínu. Ef Rússar skyldu fara halloka í átökum við Bandaríkin/ESB, sem er ólíklegt, yrði þeim í lófa lagið að opna víglínu á önnur ESB-ríki, s.s. Eystrasaltsríkin.

Niðurstaða: mun meiri líkur eru á að Úkraína yrði Víetnam Bandaríkjanna/ESB en Afganistan Rússa.

Vopnasending gæti leitt til allsherjarstríðs

Aðeins 19% fyrirtækja vilja í ESB

Innan við eitt af hverjum fimm fyrirtækjum í Félagi atvinnurekenda vill Ísland inn í Evrópusambandið. Þá eru fleiri fyrirtæki mótfallin upptöku evru en þau sem hlynnt eru að skipta út krónu fyrir evru.

Þessi niðurstaða er rothögg fyrir það sjónarmið að atvinnulífið vilji í ESB.

Færri fyrirtæki vilja taka upp evru

Össur afneitar rökum, boðar uppþot

Stjórnmálamenn eru á framfæri almennings til að standa fyrir pólitískri umræðu. Hornsteinn lýðræðis er rökleg umræða sem leið skal fram bestu kostina í hverju máli. Lítið álit þjóðarinnar á stjórnmálamönnum stafar af vangetu þeirra í umræðunni og ofurkapp á leiðindi.

Össur Skarphéðinsson gengur öðrum stjórnmálamönnum framar í viðleiti að gera stjórnmál að sirkus.

Össur boðar skýrt og skilmerkilega að hann ætlar ekki að ræða með rökum boðaða þingsályktunartillögu ríkisstjórnarinnar um afturköllun ESB-umsóknar, sem vel að merkja, var send til Brussel án þjóðaratkvæðagreiðslu.

Tillögunni verður mætt með ,,mætt með eldi og brennisteini" segir Össur og boðar þar með málþóf á þingi og mótmæli á Austurvelli. Þá er sjá hve margir hlýða kallinu að draga stjórnmálin í svaðið með Össuri og kó.