Jónas, femínistalöggur og Dirty Harry

Jónas greinir þróun glæpasagna:

Nýjar hetjur, magrar rannsóknarlöggur, fráskildar með smábörn, til skiptis kynóðar eða á trúnó með vinkonum. Þessar mögru kerlur eru fjörugri en feitu karlarnir og endast enn, taka bófana haustaki og rota þá á nóinu. Samsvara tíðarandanum, femínisma, og munu endast enn um sinn.

Dirty Harry sá þessa þróun fyrir í sígildu atriði, kvikmyndað fyrir hálfum mannsaldri eða svo.

 

Monty, Dagur og einfaldleiki sigra

Liðin eru 73 ár frá innrásinni í Normandí, þegar herir bandamanna lögðu til atlögu við meginland Evrópu undir stjórn Hitler. Breski marskálkurinn Bernard Montgomery útfærði innrásina, sem var undir yfirstjórn Dwight Eisenhower.

D-dagurinn 6. júní 1944 fól í sér innrás 160 þúsund hermanna á strönd Frakklands. Flókið verk er að hleypa slíku fyrirtæki af stokkunum. En leiðin til árangurs er að koma auga á einfaldleikann í flækjunni. Hernaðaráætlun Monty komst fyrir á einu blaði þar sem stóð neðst í hægra horni: lykilatriði er einfaldleiki.

Dagur Sigurðsson gerði, öllum að óvörum, Þýskaland að Evrópumeisturum í handbolta fyrir rúmu ári. Skipulag Dags í úrslitaleiknum er á einu blaði. Meginskilaboðin voru þau sömu og hjá Monty: höfum þetta einfalt.

Til að finna einföldu leiðina til sigurs þarf innsýn í flókin ferli og ekki síst vandaðan undirbúning. Dagur og Monty kunnu til verka. Heiður sé þeim.

 

Smáþjóð lítilsvirt á Evrópuþinginu

Innan við tíu prósent þingmanna Evrópuþingsins mættu í vinnuna til að hlusta á umræðu um formennsku Möltu í leiðtogaráði Evrópusambandsins.

,,Þetta er fáránlegt," sagði Jean-Claude Juncker forseti leiðtogaráðsins. Ef einhver af stórþjóðunum hefði verið að afhenda formennsku sína væri salurinn fullur.

Smáþjóðir eru ekki hátt skrifaðar í Evrópusambandinu.

Sósíalistaútgáfa Gunnars Smára gjaldþrota

Fréttatíminn er gjaldþrota. Útgáfufélagið er komið í hendur skiptastjóra, skv. frétt Kjarnans. Gunnar Smári, fyrrum ritstjóri og helst eigandi, varð sósíalisti á síðustu dögum útgáfunnar og stofnaði sósíalistaflokk 1. maí sl.

Þekktir auðmenn, eins og Árni Hauks­­­­son, Hall­­­­björn Karls­­­­son og Sig­­­­urður Gísli Pálma­­­­son, veittu Gunnari Smára brautargengi í útgáfunni. Árni og Hallbjörn áttu einnig hlut í Fréttblaðinu á meðan Gunnar Smári var handlangari Jóns Ásgeirs Baugsstjóra í útgáfumálum.

Milljón króna spurningin er þessi: verður maður sósíalisti eftir kynni af auðmönnum eða nægir að maður fokki upp slatta af fyrirtækjum til að sjá roðann í austri?

Macron stælir Trump og Pútín

Eftirspurn er eftir sterkum leiðtogum. Macron nýkjörinn Frakklandsforseti leitar i smiðju tveggja slíkra, Pútín og Trump, til að koma skilaboðum sínum á framfæri.

Franska útgáfan að sterkum leiðtoga sækir fyrirmyndina til stórveldistíma Frakka. Macron hélt boð í höll sólkonungsins, Lúðvíks 14da, í Versölum í tilefni af ávarpi sínu um stöðu frönsku þjóðarinnar.

Þjóðverjar, sem þekkja vel merkingu sterkra leiðtoga, tóku fram að sólkonungsvísunin væri ekki brandari. Spiegel rifjar upp áletrun í einu horni speglasalarins í Versölum: konungurinn stjórnar - og enginn annar.

Breska vinstriútgáfan, Guardian, er aftur gagnrýnni og greinir frá efasemdum um konungakomplex Macron. Bretar voru líka á undan Frökkum að hálshöggva sinn konung, 1649, á meðan Frakkar biðu allt til 1793 af setja Lúðvík 16da undir fallöxina.

Sterkir leiðtogar á vesturlöndum þurfa nú um stundir ekki að óttast aftöku nema í óeiginlegri merkingu í kosningum. Til skamms tíma bjuggust margir við að fyrirmynd Macron, Trump, yrði auðvelt skotmark í næstu umferð. En annað hljóð er komið í strokkinn.

Guardian dregur upp martröðina: hvað er Trump nýtur velgengni og fær endurkjör? Samkvæmt Guardian nær Trump til þeirra kjósendahópa sem ráða úrslitum í kosningum þótt hann sé hataður af fjölmiðlum.

Í dag er þjóðhátíðardagur Bandaríkjanna. Vörumerki sveipa sig með þjóðrækni í anda Trump, sem til dæmis má sjá í þessari auglýsingu Budweiser.

Menn tárast af minni tilefni.

Vill fækka þingmönnum um þriðjung

Reiðir vinstrimenn - ánægðir íhaldsmenn

Vinstrimenn eru reiðir yfir fylgisleysi og eigin eymd. Illugi Jökulsson er sagður ,,æfur" yfir ástandinu og kennir auðvitað farsælum leiðtoga móðurflokks íslenskra stjórnmála um bágt ástand vinstriflokka.

Fyrir íhaldsmenn er sitjandi ríkisstjórn hreinn unaður. Hún er of veik til að gera eitthvað róttækt, sem er prýðisgott fyrir sanna íhaldsmenn, en nógu sterk til að koma í veg fyrir að vinstrarugl komist á dagskrá.

Rúsínan í pylsuendanum er að Sjálfstæðisflokkur styrkist en aukaflokkarnir staðfesta sig sem grænmetið með steikinni.

Stjórnin með tæplega 37% fylgi

Lömbin þagna í ferðamannalandi

Hópur útlendra ferðamanna stelur lambi og sker á háls á Austurlandi. Annar útlendur ferðamaður gengur berserksgang í Herjólfi.

Og ferðaþjónustan harðneitar að greiða skatt til samfélagsins til samræmis við aðrar atvinnugreinar.

Hér er eitthvað málum blandið.

Sauðaþjófar skáru lamb á háls

Byltingarsjónvarp múslíma - tveir vondir kostir

Katar hýsir sjónvarpsstöðina Al-Jazeera og fjögur nágrannaríki landsins krefjast þess að stöðinni verði lokað. Ástæðan er, segir höfundur bókar um sjónvarpsstöðina, er að Al-Jazeera boðar múslímska byltingu í arabaríkjum.

Hugh Miles skrifar í Guardian að hópar eins og Múslímska bræðralagið og Hamas séu líklegir að ná völdum í flestum arabaríkjum, annað hvort með byltingu eða í kosningum. Einræðisvaldhafar í nágrannaríkjum Katar telja Al-Jazeera styðja þessa hópa.

Á vesturlöndum er almenna viðhorfið að frjálsir fjölmiðlar séu nauðsynlegir lýðræðinu. Frá sjónarhóli valdhafa í arabaríkjum, sem ekki eru lýðræðislega kjörnir, eru frjálsir fjölmiðlar ógn við stöðugleika.

Samkvæmt greiningu Miles styður arabískur almenningur herskáa íslamista til að losna við spillt stjórnvöld.

Lýðræði í vestrænum skilningi kemur hvergi við sögu. Valið stendur á milli einræðis og íslamista sem boða einhverja útgáfu af múslímsku trúarríki. Ef þessi greining er rétt er viðbúið að vandræðin í múslímaríkjum verði varanleg næstu áratugina.

Katarar óttast ekki afleiðingarnar

Bretar eignast landhelgina eftir Brexit

Bretar eignast fiskveiðilandhelgina sína að nýju eftir Brexit. Þeir taka fyrstu skrefin með því að segja sig frá fiskveiðisáttmála frá 1964 sem var felldur inn í sameiginlega fiskveiðistefnu Evrópusambandsins.

Bretar urðu að búa við það, sem ESB-ríki, að fiskveiðikvótar voru ákveðnir í Brussel og öðrum þjóðríkjum veittur aðgangur að breskri lögsögu.

Enskir sjómenn fagna fullveldi yfir landhelginni og skoskir starfsbræður þeirra taka í sama streng.

Fiskveiðistjórnun Evrópusambandsins er samfelld hörmungarsaga.

Bretar taka aftur stjórnina á miðunum

Ísrael bjó til Palestínuríkið, sem klofnaði

Ísraelsríki var stofnað 1948. Þá var ekki til neitt Palestínuríki og engar sögulegar heimildir til um slíkt ríki - ólíkt Ísrael sem á að baki 3000 ára sögu.

Ísraelar leyfðu stofnun Palestínuríkis 40 árum eftir stofnun Ísraelsríkis, árið 1988.

Palestínumenn eru í raun með tvö ríki. Eitt á Gaza-ströndinni, þar sem hryðjuverkasamtökin Hamas ráða ríkjum, og annað á Vesturbakkanum þar sem Fatah-samtökin fara með yfirvaldið.

Palestínuarabar eiga eftir að hysja upp um sig brækurnar og ákveða hvort þeir ætla að hafa eitt ríki eða tvö eða alls ekkert. Enda kjósa margir þeirra að búa í Ísrael þar sem þeir eru 20 prósent ísraelskra ríkisborgara.

Hernám Palestínu í 50 ár