Þórður Snær með pólitískt líf Kristrúnar í hendi sér

Kristrún formaður Samfylkingar lét þriðja sætið á lista sínum í Reykjavík norður í hendur sakbornings, Þórðar Snæs Júlíussonar fyrrum ritstjóra Kjarnans/Heimildarinnar. Kristrún gerði samkomulag við Þórð Snæ að styðja hann til þingmennsku gegn því að hann skæri hana úr snörunni vegna skattsvika sem hún varð uppvís að.

Kristrún var hagfræðingur Kviku banka áður en hún var kosin á þing fyrir Samfylkinguna í síðustu kosningum, haustið 2021. Hjá Kviku fékk Kristrún kaupauka upp á 101 milljón króna á þeim þrem árum sem hún starfaði í bankanum, 2018-2021. Kaupaukinn er í formi réttinda til að kaupa hlutabréf í bankanum á gengi sem almenningi býðst ekki.

Kaupauki Kristrúnar komst í fréttir fimm dögum fyrir þingkosningarnar 25. september 2021. Morgunblaðið og Viðskiptablaðið fengu upplýsingar um fjármál verðandi formanns flokksins. Kristrún hóf gagnsókn, skrifaði langa Twitter-færslu undir yfirskriftinni Uppgjöf og örvænting íhaldsins. Hún sakaði blaðamenn Morgunblaðsins og Viðskiptablaðsins um pólitíska herferð gegn sér.

Í Twitter-færslunni 20. september 2021 neitar Kristrún að um kaupauka hafi verið að ræða heldur ,,tilboð um fjárfestingu." Almenningur fékk ekki slíkt tilboð, aðeins útvaldir. Kaupaukar í formi hlutafjárkaupa, á lægra gengi en markaðsvirði, tíðkast hjá fyrirtækjum skráðum á hlutabréfamarkaði. Kristrún segir að um áhættufjárfestingu hafi verið að ræða og hún og eiginmaðurinn hafi nýtt sparnað sinn í kaupin. En þau hjón voru nýkomin heim frá námi. Fæstir nýkomnir úr námi eiga sparnað. Enda er kaupréttarfyrirkomulagið sjaldnast útfært þannig starfsmenn leggi fram peninga. Yfirleitt er dregin af launum starfsmanna fjárhæðin sem fer í hlutafjárkaupin. Kristrún blekkti í Twitter-færslunni og sagði með þjósti: „Síðast þegar ég vissi mega fleiri en sjálfstæðismenn taka þátt á hlutabréfamarkaði.“

Hér var ekki á ferðinni áhættufjárfesting, eins og formaður Samfylkingar vill vera láta, heldur kaupauki fyrir fáa útvalda. Kristrún tók enga áhættu, hún var bæði með belti og axlabönd á fjárfestingunni, gat ekki tapað, aðeins grætt. Almennum hlutafjárkaupendum bjóðast ekki þessi kjör.

Í Twitter-færslunni segir formaður Samfylkingar þessa merkilegu setningu:

ég er stuðningskona þess að fjármagn sé skattlagt meira.

Kristrún hagnaðist um 101 milljón króna af hlutabréfunum í Kviku. Ef hún í raun og sann er stuðningsmaður hærri skatta á fjármagn hefði hún talið hagnaðinn fram sem launatekjur og greitt 46 prósent skatt. En Kristrún svindlaði, bæði á yfirlýstri sannfæringu sinni og Skattinum, sem er töluvert alvarlegra. Hún taldi 101 milljón króna kaupauka fram sem fjármagnstekjur og borgaði aðeins 22 prósent skatt. Með svindlinu sparaði Kristrún sér 25 milljónir króna. Það eru tvenn árslaun framhaldsskólakennara og gott betur. En Kristrún segist jafnaðarmaður og vill hærri skatta á fjármagn, bara ekki á hennar prívatkapítal.

Nú fer að koma að Þórðar þætti Snæs.

Skatturinn var með fjármál Kristrúnar til rannsóknar veturinn 2022-2023. Um vorið fékk hún bréf frá Skattinum að hún hefði talið rangt fram, komið sér undan skattgreiðslum. Í daglegu tali kallast þetta skattsvik. Kristrún var fljót að gera upp við skattinn, borgaði þær 25 milljónir sem hún stakk undan. Óvíst er hvort Kristrúnu hafi verið gert að greiða 25 prósent álag, sem tíðkast í tilfelli skattsvika. Kristrún mátti vita að fyrr heldur en seinna kæmist upp um skattsvikin og þau yrðu fréttaefni. Í þetta sinn ætlaði hún að vera á undan fjölmiðlum, fá til liðs við sig einhvern óprúttinn sem tilbúinn var í viðskipti. 

Þórður Snær Júlíusson hefur lengi gengið með þingmanninn í maganum. Helsti bakhjarl hans er auðmaðurinn Vilhjálmur Þorsteinsson, fyrrum gjaldkeri Samfylkingar. Vorið 2023 leitaði Kristrún formaður Samfylkingar til Þórðar Snæs með vandræði sín. Þórður Snær var í þeirri stöðu að krefja Kristrúnu um allar upplýsingar skattsvikanna til að búa þeim trúverðuga málsvörn. Síðan bjuggu þau til ráðagerð sem gekk út á ítarlega frétt er tæmdi málið. Eftir þá frétt liti út eins og Kristrún hefði lagt spilin á borðið, ekkert væri meira að segja. Fréttin myndi lifa í einn til tvo daga sumardagana fyrir rúmu ári. Síðan ekki sögunni meir. Formaður Samfylkingar væri búinn að gera hreint fyrir sínum dyrum. Ekkert væri ósagt. 

Til að fronta fréttina fékk Þórður Snær ritstjóri Arnar Þór Ingólfsson blaðamann á Heimildinni til verka. Arnar Þór er liðtækur í skítverkin með Þórði Snæ; báðir eru sakborningar í byrlunar- og símamálinu. Fréttin um skattsvik Kristrúnar birtist 29. júní í fyrra. Orðið skattsvik kemur ekki fyrir í fréttinni. Talað er um að endurgreiðslu vegna ,,tilmæla" frá Skattinum. Eins og skattayfirvöld sendi út óskir um að framteljendur greiði vangoldinn skatt, svona þegar þeim henti. Eins og lagt var upp með endurbirtu fjölmiðlar vinstrimanna fréttina á sömu forsendum. RÚV notar meira að segja sömu fyrirsögn og Heimildin. Engin skattsvik, aðeins smávegis leiðrétting. Lesendur geta rétt ímyndað sér hvort uppslátturinn hefði ekki verið annar ef formaður Sjálfstæðisflokks eða Framsóknarflokks hefðu átt hlut að máli. Þegar Morgunblaðið ætlaði að þýfga formann Samfylkingar síðdegis sama dag og fréttin í Heimildinni birtist svaraði Kristrún: ,,Málinu er lokið fyrir mína parta." Áætlun Kristrúnar og Þórðar Snæs heppnaðist fullkomlega. Málið tæmt, dautt.

Þórður Snær gerir ekkert ókeypis. Hann fékk loforð frá Kristrúnu um stuðning við þingmennsku. Ritstjórinn fyrrverandi er undirförull; sést á því að hann reyndi að sölsa undir sig yfirráð yfir Heimildinni á bakvið tjöldin. Upp komst og Þórði Snæ var sparkað. Eftir ráðabruggið vorið 2023, til að bjarga pólitísku lífi formanns Samfylkingar, er Þórður Snær kominn með upplýsingar sem hann getur hvenær sem er lekið til vinveittra blaðamanna. Þar með yrði saga Kristrúnar formanns öll. Kristrún er vel meðvituð um stöðu sína gagnvart ritstjóranum sem einskins svífst til að koma ár sinni fyrir borð.

Þórður Snær er sakborningur í alvarlegu refsimáli, byrlunar- og símamálinu. Enginn stjórnmálaflokkur með réttu ráði teflir fram til þingsetu manni sem grunaður er um glæp. En það gerir Samfylkingin. Skýringin er sú að formaðurinn þar á bæ sætir pólitískri fjárkúgun vegna skattsvika.

 

Stuldur úr síma glæpur í Bandaríkjunum, verðlaunaður á Íslandi

Í Bandaríkjunum er glæpur að stela gögnum úr síma, sbr. viðtengda frétt. Hér eru slíkir glæpir verðlaunaðir. Þórður Snær blaðamaður og þingmannsefni státar af tvennum verðlaunum fyrir stolin gögn. Fyrst fékk hann verðlaun Blaðamannafélags Íslands. Í gær verðlaunaði Samfylkingin Þórði Snæ, lét hann hafa líklegt þingsæti á lista flokksins.

Þórður Snær var fullkomlega meðvitaður um að hann hefði þýfi í höndunum þegar hann birt undir sínu nafni fréttina Skæruliðadeild Samherja þann 21. maí 2021. Þórður Snær skrifaði sem ritstjóri og ábyrgðarmaður Kjarnans:

Ábyrgðarmenn Kjarnans vilja taka fram að umrædd gögn sem eru grundvöllur umfjöllunar miðilsins bárust frá þriðja aðila. Starfsfólk Kjarnans hefur engin lögbrot framið...

Í rammagreininni kemur einnig fram að Þórður Snær viti frá fyrstu hendi að gögnum frá Páli skipstjóra Steingrímssyni var stolið á meðan eigandinn lá á gjörgæslu. Þingmannsefni Samfylkingar talar um að ,,þriðji aðili" hafi skaffað gögnin. Þriðji aðilinn er Þóra Arnórsdóttir á RÚV er tók við símanum frá andlega veikri eiginkonu hans, sem hefur játað byrlun og stuld.

Játning Þórðar Snæs, að hann sé þjófsnautur, leiddi til þess að hann varð sakborningur í lögreglurannsókn á byrlun, stuldi og broti á friðhelgi. Þórður Snær er enn sakborningur og verður á meðan ríkissaksóknari er með málið til meðferðar. Engu að síður fær sakborningurinn úthlutað þriðja sæti Samfylkingar í Reykjavík norður. Efst á listanum er Kristrún Frostadóttir formaður Samfylkingar.

Sá sem skipar annað sætið, milli Kristrúnar og Þórðar Snæs, er Dagur-sem-enginn-vill fyrrum borgarstjóri. Best er að strika hann út segir Kristrún, Dagur sé ,,aukaleikari". Við það verður sakaborningurinn Þórður Snær aðalleikari. Kannski næsti dómsmálaráðherra?

Það skyldi þó ekki vera að Þórður Snær hafi þau tök á Kristrúnu formanni að hún beinlínis var knúin til að taka sakborninginn á framboðslistann? Nánar um það á morgun.

Reyndu að nálgast gögn í síma Trumps

Forysta Samfylkingar vill sakborning í þingmennsku

Einn af sakborningunum í byrlunar- og símamálinu, Þórður Snær Júlíusson ritstjóri, er þingmannsefni Samfylkingarinnar í Reykjavík. Samkvæmt fréttum skipar Þórður Snær þriðja sætið í Reykjavík norður, á lista Kristrúnar formanns. Sitjandi þingkona, Dagbjört Hákonardóttir, var látin víkja sæti til að sakborningur kæmist á þing.

Lögreglan felldi niður rannsókn á byrlunar- og símamálinu með sakfellandi yfirlýsingu. Lögreglan segir hreint út að afbrot voru framin en ekki tókst að sanna óyggjandi hvaða blaðamenn frömdu hvaða afbrot.  Brotaþolinn, Páll skipstjóri Steingrímsson, kærði niðurfellinguna til ríkissaksóknara, sem hefur þrjá mánuði til að úrskurða framhald málsins. Á meðan er réttarstaða Þórðar Snæs og fimm annarra blaðamanna óbreytt, þeir eru sakborningar í refsimáli er varðar byrlun, þjófnað og brot á friðhelgi.

Sakborningur, samkvæmt skilgreiningu, er grunaður um glæp. Stjórnmálaflokkur sem teflir frambjóðanda til þings er hefur stöðu sakbornings grefur undan réttarríkinu. Þingmenn setja landinu lög. Þingmaður grunaður um glæp er ekki til þess fallinn að auka virðingu fyrir löggjafanum. Má alþingi þó illa við að veikja tiltrú almennings á þjóðarsamkundunni. En Samfylkingin ætlar að veita Þórði Snæ uppreist æru á meðan hann er enn undir sakamálarannsókn.

Á meðan Þórður Snær var starfandi blaðamaður og ritstjóri var hann vel meðvitaður að orðspor og heiðarleiki væri höfuðkrafa gagnvart mönnum í trúnaðarstöðum. Fyrir tveim árum voru nafngreindir menn í viðskiptalífinu ásakaðir um kynferðisbrot. Athugið; þeir voru ásakaðir en ekki ákærðir og ekki sakborningar í lögreglurannsókn. Þórður Snær skrifaði fréttaskýringu í Kjarnann þar sem hann rakti hvernig hann sem blaðamaður hafði samband við stjórnir lífeyrissjóða og spurði hvort ekki yrði gripið til ráðstafana vegna ásakaðra manna er sátu í stjórnum fyrirtækja sem lífeyrissjóðir áttu hlut í. Þórður Snær beið ekki eftir málalokum - mennirnir voru aldrei ákærðir - heldur hélt hann fram strangri siðferðiskröfu gagnvart mönnum í valdastöðum.

Fyrir tveim árum, og bæði fyrr og síðar, er Þórður Snær með siðavöndinn á lofti og krefst að sakleysi sé hafið yfir allan vafa. Enginn með skemmt orðspor, beina eða óbeina aðild að lögbrotum, skal sitja í trúnaðarstöðu. Núna ætlar sakborningurinn Þórður Snær að fá kjör á alþingi. Í skjóli Samfylkingar.

Einhver skýring hlýtur að vera á valdastöðu sakbornings í Samfylkingunni. 

 

Fíkill, RSK-miðlar og saksóknari

Jóhannes uppljóstrari Stefánsson er fíkill, segir nýlega í fyrirsögn dagblaðs í Namibíu. Á Íslandi er í fimm ár rekið sakamál er byggir einvörðungu á framburði fíkils. RSK-miðlar (RÚV, Stundin og Kjarninn) bjuggu málið í hendur héraðssaksóknara með Kveiksþætti um Namibíumálið 12. nóvember 2019.

Einn blaðamanna RSK-miðla, Ingi Freyr Vilhjálmsson, átti bróðir í embætti héraðssaksóknara, Finn Þór Vilhjálmsson. Finnur Þór fór fyrir Namibíurannsókninni þangað til í fyrra að hann flæmdist frá embætti héraðssaksóknara og fékk stöðu dómara við héraðsdóm Reykjavíkur. Þar héldu hörmungarnar áfram. Landsréttur dæmdi að Finnur Þór gerði alla dómara héraðsdóms vanhæfa í Namibíumálinu. Bróðir hans, Ingi Freyr, er meðal sakborninga í byrlunar- og símamálinu.

Viðtengd frétt fjallar um baráttu Örnu McClure, eins sakborninga í Namibíumálinu, til að fá afléttri réttarstöðu sinni. Að liggja undir grun um glæp er íþyngjandi, eins og sakborningarnir sex úr röðum blaðamanna í byrlunar- og símamálinu hafa reglulega minnt á. Byrlunar- og símamálið er þriggja ára. Namibíumálið er fimm ára.

Án blaðamanna RSK-miðla hefði aldrei orðið neitt Namibíumál. Jóhannes fíkill var rekinn frá Samherja árið 2016. Í Namibíu skildi hann eftir sviðna jörð. Það er háttur fíkla, bæði i starfi og einkalífi. Hann gekk á milli íslenskra fjölmiðla og reyndi að selja þá sögu að Samherji hefði greitt mútur í Namibíu. Enginn vildi neitt að hafa með Fíkla-Jóa. Nema RSK-miðar, með Helga Seljan sem oddamann. Með falsi og spillingu var embætti héraðssaksóknara virkjað í þágu siðlausra blaðamanna sem skálduðu ásakanir í samvinnu við eiturlyfjasjúkling. 

Starfsferill helstu hvatamanna Namibíu- og byrlunar og símamála segir nokkra sögu. Finnur Þór hrökklaðist frá héraðssaksóknara, Þóra Arnórsdóttir ritstjóri Kveiks var selflutt af Glæpaleiti á Landsvirkjun, Þórður Snær ritstjóri Kjarnans/Heimildarinnar leitaði á náðir Samfylkingar, Rakel Þorbergsdóttir fréttastjóri hvarf úr starfi og nú síðast er úttaugaður Helgi Seljan kominn á götuna. Jói uppljóstari heldur til í útlöndum, þó ekki Namibíu.

Tvær ríkisstofnanir eru miðlægar í Namibíumálinu, embætti héraðssaksóknara og RÚV. Undanfari málsins kennt við Afríkuríkið er seðlabankamál. Þar brugguðu launráð Seðlabanki Íslands og RÚV.

Ríkisfjölmiðillinn er miðstöð upplýsingaóreiðu sem misnotar fíkla og andlega veika til að koma á framfæri falsfréttum.

Vilja skoða tölvu Jóhannesar

Vísir neitar Páli skipstjóra um að svara sakborningum

Tveir sakborningar í byrlunar- og símamálinu, Aðalsteinn Kjartansson og Þóra Arnórsdóttir, mættu ásamt lögmanni í pallborð Vísis miðvikudag í síðustu viku. Blaðamaður Vísis, Hallgerður Kolbrún, sagði í upphafi pallborðsins að brotaþola, Páli skipstjóra Steingrímssyni, yrði boðið að segja sína hlið málsins. En síðan er liðin vika og ekki hefur skipstjóranum verið boðið að svara sakborningum.

Þóra Arnórsdóttir fyrrum ritstjóri Kveiks á RÚV tók við stolnum síma skipstjórans þann 4. maí 2021. Þáverandi eiginkona Páls hafði byrlað honum nóttina áður. Er eiginkonan afhenti Þóru símann lá eiginmaðurinn milli heims og helju í öndunarvél á gjörgæslu Landspítalans. Í pallborðinu fyrir rúmri viku var Þóra spurð um viðtöku símans. Eftirfarandi er samantekt á Vísi:

Hallgerður Kolbrún E. Jónsdóttir þáttastjórnandi spurði Þóru hreint út hvernig hennar hlutur í málinu væri til komin, með að hún hafi keypt síma sambærilegan þeim sem skipstjórinn átti, tekið við honum upp í RÚV og afritað? Þóra sagði þetta merkilega umræðu en vildi taka upp þráðinn þar sem Aðalsteinn skildi við hann. [...]
Þóra sagði þetta ekki koma sér við, kannski hafi hún tekið við síma, kannski ekki en því gæti hún bara ekki svarað...

Þóra var í reglulegum samskiptum við eiginkonu skipstjórans. Konan glímir við alvarleg andleg veikindi. Eftir að lögreglurannsókn hófst bað Þóra konuna að láta af hendi símkort og einkasíma - væntanlega til að eyða fyrri samskiptum þeirra á milli. Áður en skipstjóranum var byrlað hafði Þóra keypt Samsung-síma, sams konar og skipstjórans, sem var til taks á RÚV þann 4. maí er veika konan mætti á fund Þóru.

Vísir bauð sakborningum í pallborð og lofaði áhorfendum að Páll skipstjóri yrði fenginn til að tjá sig um sína hlið málsins. Ekki stendur til að efna það loforð. Vísir tók í raun að sér einhliða málsvörn fyrir sakborninga en lét lönd og leið fagleg sjónarmið um hlutlæga blaðamennsku, jafnræði og sanngirni.

Fáheyrt er að fjölmiðill leggist á sveif með sakborningum í alvarlegu refsimáli en meini brotaþola að taka til máls. Ritstjórn Vísis tekur hagsmuni blaðamanna grunaða um glæpi fram yfir brotaþola með hreinan skjöld og óflekkað mannorð. Eitthvað er rotið á ritstjórn Vísis.

Þórunn í bílskúrinn

Fyrsti þingmaður Samfylkingar í Kraganum, Þórunn Sveinbjarnardóttir, hrapar niður í þriðja sæti lista flokksins fyrir komandi þingkosninga. Þingmaðurinn segir gjaldfellinguna að eigin ósk, vegna ,,kröfu um endurnýjun." Stefán Einar Stefánsson blaðamaður deilir frétt Vísis af þeim fáheyrðu tíðindum að þingmaður afsali sér ráðherrastól í skotfæri. Stefán Einar skrifar færslu á Facebook:

Af hverju getur fólk ekki einfaldlega sagt satt í þessum aðstæðum? Þetta er eins og þegar augljóslega brottreknir forstjórar halda því fram að þeir hafi allt í einu fundið fyrir óstjórnlegri þörf fyrir að taka til í bílskúrnum heima hjá sér.

Þórunn varð þingmaður ári fyrir aldamótin og gerði garðinn frægan sem umhverfisráðherra í hrunstjórninni 2007-9. Frægust varð hún þó fyrir ummæli sem hún lét falla í fréttaviðtali á RÚV eftir hrun á Austurvelli. Þórunn talaði þar máli ríkisstjórnar Jóhönnu Sig. og ónafngreindur vegfarandi kallaði tvisvar inn í viðtalið ,,óþjóðalýður". Á hljóðupptöku mátti heyra viðbrögð Tótu:

Segðu frænda þínum að hoppa upp í rassgatið á sér.

Hrunárin kölluðu fram það besta í vinstrimönnum. Þórunn tók sér hlé frá þingmennsku síðasta áratug, fékk launað starf hjá Samfylkingu og síðar formennsku í stéttafélaginu BHM. Fyrir þrem árum hófst seinna þingmennskutímabilið. Þóra lagði Guðmund Andra rithöfund í baraáttunni um fyrsta sætið í Kraganum.

En nú, sem sagt, ákveður Þórunn að gefa frá sér, ,,ekki undir neinum þrýstingi", oddvitasætið í Kraganum. Ástæðan er ,,ákall um endurnýjun". Ef svo er; hvers vegna endurnýjaði þingmaður sig ekki neðar á listann? Þriðja sætið gæti orðið baráttusæti en líklega þó ávísun á varaþingmennsku.

Þórunn valdi sjálf bílskúrinn, segir hún. Þar ígrundar hún, fjarri öllum hljóðnemum, hver ætti að hoppa hvert.

Þórunn færist niður í þriðja sætið

Stefán á Glæpaleiti í skjóli Framsóknarflokksins

Stefán Eiríksson útvarpsstjóri fékk endurráðningu stjórnar RÚV með minnsta mögulega mun. Fjórir af níu manna stjórn vildu auglýsa stöðuna. Fimm studdu Stefán til stjórna áfram vettvangi afbrota; afritunar á einkasíma sem fenginn var með byrlun og stuldi. Fulltrúi Framsóknarflokksins réð úrslitum.

Stefán kom til starfa á ríkismiðlinum árið 2020. Árið eftir hófst byrlunar- og símamálið. Páli skipstjóra Steingrímssyni var byrlað til að blaðamenn fengju aðgang að síma hans. Andlega veik þáverandi eiginkona skipstjórans færði fréttamönnum RÚV Samsung-síma skipstjórans síðdegis 4. maí 2021. Rétt fyrir byrlun keypti Þóra Arnórsdóttir ritstjóri Kveiks Samsung-síma, samskonar og skipstjórans, sem var til reiðu er veika konan mætti með feng sinn. Símreikningur Þóru og RÚV fyrir símann í apríl var 692 kr. Á meðan afritun fór fram lá skipstjórinn í öndunarvél á gjörgæslu Landsspítala í Fossvogi, steinsnar frá Efstaleiti.

RÚV birti enga frétt upp úr síma skipstjórans. Það gerðu aftur jaðarmiðlarnir Stundin og Kjarninn sem voru í leynilegu samráði með ritstjórn Kveiks á RÚV. Byrlun og stuldur eru brot á almennum hegningarlögum. Leynilegt samráð fjölmiðla um að ein ritstjórn skipuleggi aðdrætti, sæki með ólögmætum hætti heimildir fyrir fréttum, en sendi öðrum fjölmiðlum efnið til birtingar er beinlínis játning á glæp. Ef allt hefði verið með felldu, engin afbrot og ekkert siðleysi, hefði RÚV birt fréttirnar upp úr síma skipstjórans en ekki flutt þýfi fengið með byrlun á milli fjölmiðla.

Stefán lokaði augunum fyrir augljósum afbrotum undirmanna sinna. Eftir að lögreglurannsókn hófst tók útvarpsstjóri til við að losa sig við helstu málsaðila. Rakel Þorbergsdóttir fréttastjóri tilkynnti starfslok í nóvember 2021; um áramótin 2021/2022 hætti Helgi Seljan og í febrúar 2023 lét Þóra Arnórsdóttir skyndilega af störfum - eftir að uppvíst varð um kaup hennar á Samsung-símanum í apríl 2021.

Stefán hélt lengst hlífiskildi yfir Þóru Arnórsdóttur. Úrslitaatkvæði yfir endurráðningu Stefáns átti Silja Dögg Gunnarsdóttir fulltrúi Framsóknarflokksins og formaður stjórnar RÚV. Silja Dögg er samstarfsmaður Svavars Halldórssonar eiginmanns Þóru. Þau starfa saman hjá Algalíf. Silja Dögg er fyrrum þingmaður Framsóknarflokksins. Framsóknarmenn eru löngum liðtækir í spillingunni. Í baráttunni um aðgengi að dagskrárvaldi RÚV munar um að hafa öll ráð útvarpsstjóra í hendi sér.

Niðurstaða lögreglurannsóknar staðfestir að afbrot voru framin á Efstaleiti:

Í málinu liggur fyrir að sakborningur sem náði síma af brotaþola kveðst hafa afhent fjölmiðli símann þar sem síminn var afritaður. [...] Sakarefni samkvæmt 228. og 229. gr. alm. hgl. lýtur að brotum á friðhelgi einkalífs meðal annars með því að hnýsast í, afrita, sýna, skýra frá, birta eða dreifa í heimildarleysi skjölum, gögnum, myndefni, upplýsingum eða sambærilegu efni um einkamálefni viðkomandi. Þar er afstaða Lögreglustjóraembættisins á Norðurlandi eystra að allir sakborningar í málinu gætu hafa sýnt af sér atferli sem getur flokkast undir brot á framangreindum ákvæðum.

Viðbrögð Stefáns útvarpsstjóra, að láta róa fréttamenn tengda byrlunar- og símamálinu, sýna ótvírætt að hann er vel meðvitaður um að afbrot voru framin á Efstaleiti vorið 2021. En Stefán hefur ekki lyft litla fingri til að upplýsa aðild starfsmanna RÚV að alvarlegum afbrotum. Er Stefán þó fyrrum lögreglustjóri og ætti að bera lágmarksvirðingu fyrir lögum og reglu.

Á Glæpaleiti er eitrað andrúmsloft óupplýstra glæpa. Stjórn RÚV gat loftað út og auglýst stöðu útvarpsstjóra. En, nei, meirihluti stjórnarinnar taldi réttast að Stefán stýrði áfram vettvangi óupplýstra afbrota. Aðrir hagsmunir en almannahagur ráða ferðinni hjá meirihluta stjórnar RÚV.

Stjórn RÚV klofnaði við ráðninguna

Jóhannes uppljóstrari: þarf að passa mig og vera edrú

Þrír fulltrúar frá embætti héraðssaksóknara fóru nýverið til London og tóku skýrslu af Jóhannesi Stefánssyni uppljóstrara í Namibíumálinu. Málið gengur út á ásakanir Jóhannesar og RSK-miðla að Samherji hafi stundað mútugjafir í Afríkuríkinu um miðjan síðasta áratug. Kveiksþáttur á RÚV í nóvember 2019 hratt málinu af stað. Stundin og Kjarninn, nú Heimildin, fylgdu málinu eftir og, auðvitað, héraðssaksóknari. Skýrslutakan í London gefur til kynna að líði að málalokum, með ákæru eða niðurfellingu.

Namibíumálið stendur og fellur með framburði Jóhannesar Stefánssonar sem var stöðvarstjóri Samherja í Namibíu. Jóhannes er tengdur fjölskylduböndum inn í fyrirtækið. Hann og fyrrum eiginkona Þorsteins Más forstjóra eru systkinabörn. Jóhannes var rekinn frá fyrirtækinu 2016 vegna óreglu. Þremur árum síðar hóf hann samvinnu RSK-miðla um að ásaka Samherja, og í leiðinni sjálfan sig, um mútugjafir þar syðra til að fá veiðirétt i landhelgi Namibíu. Engar sannanir hefur uppljóstrarinn lagt fram, aðeins ásakanir.

RSK-miðlar með ríkisfjölmiðilinn í fararbroddi fela skipulega orðsporið sem fer af Jóhannesi sem ógæfumanni. Nýverið sagði namibískt dagblað að Jóhannes væri eiturlyfjafíkill og ómarktækur eftir því. Tölvupóstur sem Jóhannes skrifaði í október 2014 til vinar síns staðfestir að hann átti bæði í vandræðum með drykkju og efni í nös. Tölvupósturinn hefur ekki birst áður, jafnvel þó blaðamenn RÚV og Heimildarinnar hafi haft hann undir höndum. RSK-miðlar stinga undir stól upplýsingum sem falla ekki að myndinni sem þeir draga upp, að Jóhannes sé trúverðug heimild. Tölvupósturinn er svohljóðandi í heild:

08.10.2014 kl. 09:17, JS: Sælir, hvernig gengur. Búið að vera jákvætt hérna og ljóst að maður þarf að passa sig og vera edrú. Traustið er mikið hérna og menn vilja byggja enn frekari upp í Namibíu. Ingvar talaði við mig um málið í Cape Town og ég sagði honum að ég hafi tekið nokkrar stikkprufur en væri hættur. Væru bara töfftímar sem að maður væri að ganga í gegnum. Hann skildi það vel og ekkert mál.

Jóhannes þarf að passa sig að vera edrú en leyfði sér að taka ,,nokkrar stikkprufur". Slíkar prufur eru duft en ekki drykkur. Samt væri Jóhannes ,,hættur". Hann hætti vitanlega ekki og hélt áfram líferni sem fer ekki saman við heilbrigða dómgreind. DV sagði frá stjórnlausri kókaínneyslu og öðru miður fallegu í aðdraganda þess að Jóhannes keyrði sjálfan sig og Samherja í þrot í Namibíu.

Þrotamaðurinn Jóhannes gerði, þremur árum eftir brottrekstur með skömm, bandalag við Helga Seljan, Þóru Arnórsdóttur, Aðalstein Kjartansson og Þórð Snæ Júlíusson um að þau myndu endurreisa orðspor hans og æru, gera fíkil að uppljóstrara. Í staðinn níddi Jóhannes skóinn af Samherja sem hann fékk vinnu hjá sökum fjölskyldutengsla. Eftir Namibíumálið sneru blaðamennirnir sér að andlega veikri konu og úr varð byrlunar- og símamálið.

Jóhannes er ógæfumaður. Orðin sem eiga við blaðamennina eru ekki prenthæf. 

 

 

Alma, Víðir og borgaraleg Samfylking

Oddvitasæti Samfylkingar í tveim kjördæmum fara til Ölmu landlæknis og Víðis viðbragðsforingja almannavarna. Bæði eru landsþekkt, einkum fyrir að vera tveir þriðju þríeykisins sem meira og minna stjórnaði landinu á tímum farsóttar.

Áður en Alma og Víðir komu fram sem frambjóðendur hafði Kristrún formaður Samfylkingar kynnt kosningastefið ,,stolt þjóð" sem er í anda Miðflokksins.

Stefna, slagorð og mannval Samfylkingar vísar í borgaralega átt. Kristrún formaður leggur sig fram um aðgreiningu frá öðrum vinstriflokkum, aktívisma og upphlaupum. Alma og Víðir eru kerfisfólk og tala fyrir sérfræðiveldi. Kennivaldið sem þau bjóða upp á er ekki jafn óumdeilt og það var fyrir kófið. Vaxandi tortryggni er í garð sérfræðinga og þeir oftar grunaðir um að vera meira haldnir af hugmyndafræði en vísindalegri hlutlægni.

Allt frá stofnun er Sjálfstæðisflokkurinn miðstöð borgaralegra stjórnmála. Þegar mesta fjörið var í vinstrimennskunni, fyrstu árin eftir hrun, urðu kratísk áhrif meira áberandi en eldri speki um lága skatta og taumhald á ríkisafskiptum af lífi borgaranna. Þjóðhyggja lét undan alþjóðahyggju.

Vöxtur Miðflokksins síðustu misseri stafar ekki síst af óánægðum sjálfstæðismönnum sem lýsa stuðningi við Sigmund Davíð í skoðanakönnunum. Þjóðleg ára Miðflokksins er nokkuð heilsteyptari en flokksins sem kennir sig við sjálfstæði. Andspyrna gegn falsvísindum um manngert veður og transfáránleika, að hægt sé að fæðast í röngu kyni, er einnig meiri í Miðflokki en værukærum Sjálfstæðisflokki.

Er Samfylking Kristrúnar tekur snarpa hægribeygju er tvennt í stöðunni. Að aðgerðin lukkist og Samfylking hirði fylgi af Sjálfstæðisflokki og Miðflokki og standi með pálmann í höndunum eftir kosningar. Hitt er mögulegt að borgaralegu flokkarnir nái vopnum sínum og Samfylkingin tapi fylgi til vinstri. Hvort heldur sem verður má tæplega gera ráð fyrir öðru en þriggja flokka stjórn. Borgaraleg Samfylking reisir ekki víggirðingu gegn hægri stjórn. Þvert á móti.

 

 

Víðir verði oddviti Samfylkingar í Suðurkjördæmi

Byrlunar- og símamálið felldi Helga Seljan

Vorið 2021 er Páli skipstjóra Steingrímssyni var byrlað og síma hans stolið til afritunar á Efstaleiti var Helgi Seljan fréttamaður á RÚV undir ritstjórn Þóru Arnórsdóttur á Kveik. Helgi gat lítt haft sig i frammi, nýbúinn að fá úrskurð siðanefndar RÚV um alvarlegt brot á siðareglum.

Helgi vann á bakvið tjöldin vorið 2021. Handtökin voru nokkur þessa maídaga á Glæpaleiti. Sími skipstjórans var kominn í hús og afritaður. Eftir var að fara í gegnum efnið og finna eitthvað til að festa hendur á. Helgi er þekkur fyrir skapandi blaðamennsku s.s. að skálda skjöl, eins og hann gerði í Seðlabankamálinu. Líklega er það hann fremur en Þóra sem bjó til ,,skæruliðadeild Samherja." Tvær samstofna fréttir voru skrifaðar á Efstaleiti og birtust samtímis lítt breyttar í Stundinni og Kjarnanum 21. maí 2021. Allt samkvæmt skipulagi.

Hagur Helga versnaði á RÚV er leið á árið 2021. Lögreglurannsókn var hafin á byrlunar- og símamálinu. Um miðjan október mætti Helgi úrvinda í föstudagsþátt Gísla Marteins á RÚV og sagðist hafa orðið að leggjast inn á geðdeild. Tíu dögum fyrir þáttinn var fyrsta yfirheyrslan yfir andlega veikri konu sem játaði að byrla og stela í þágu blaðamanna. RÚV var tilbúið með stiklu um bágborið ástand Helga til skapa samúðarbylgju með Don Kíkóta íslenskrar blaðamennsku. Stiklan fór ekki í umferð. Hvort tilfallandi blogg um leikritið hafði áhrif skal ósagt. Hitt er vitað að bloggið fór verulega illa í mannskapinn á Glæpaleiti sem kröfðust aðgerða gegn höfundi.

Um áramótin 2021/2022 var Helga gert að axla sín skinn á ríkismiðlinum. Stefán útvarpsstjóri taldi ekki óhætt að hafa lengur innanbúðar blaðamanninn sem sérhæfði sig í slagsmálum við vindmyllur norðlenskar. Stefán var raunarlegur í orðum í kveðjuskyni og sagði í Fréttablaðinu:

Hvað Helga Seljan varðar sérstaklega þá er það sigur fyrir íslenska þjóð og blaðamennsku að þessi öflugi blaðamaður haldi áfram sínum störfum.

Rúmu ári síðar er Stefán losaði sig við Þóru Arnórsdóttur ritstjóra Kveiks og yfirmann Helga voru engir gullhamrar slegnir, kveðjan fyrir 25 ára starf var snubbótt fréttatilkynning. Á árinu sem leið á milli brotthvarfs Helga og Arnórsdóttur áttaði útvarpsstjóri sig á að byrlunar- og símamálið gæti orðið honum sjálfum að falli.

Helgi fór á Stundina sem sameinaðist Kjarnanum undir nafni Heimildar. Þá voru komnir í eina sæng skæruliðamiðlarnir í þjónustu RÚV. Heimildina skorti trúverðugleika með fjóra sakborninga innanborðs og náði sér ekki á strik.

Í sumar reyndi Þórður Snær, fyrrum ritstjóri Kjarnans, að sölsa undir sig Heimildina. Hann tapaði í valdabaráttu hluthafa og sækist nú eftir þingsæti á lista Samfylkingar.. Tilfallandi bloggaði í ágúst með fyrirsögninni ,,Þórður Snær tapar valdabaráttu, dagar Helga taldir". Niðurlag bloggsins:

Þórður Snær og Kjarnaliðið varð undir. Frekari tíðinda er að vænta af lífróðri Heimildarinnar. Komist fleyið í var verður Helgi Seljan ekki í áhöfninni. 

Ráðandi hluthafar á Heimildinni biðu eftir hentugu tækifæri að láta róa blaðamannariddarann sjónumhrygga. Tækifærið kom í gær er Helgi og Aðalsteinn Kjartansson birtu í Heimildinni langa umfjöllun um 1500 sms-skeyti í Namibíumálinu en vitnuðu ekki í eitt einasta þeirra. Don Kíkóti og skjaldsveinninn töpuðu strax í fyrirsögn og inngangi enn einni orustunni við norðlenskar vindmyllur.  

 

Helgi hættur hjá Heimildinni