Trump - Bill Gates; opið eða lokað samfélag

Blaðamannafundur Trump í garði Hvíta hússins gæti hafa verið svanasöngur forsetatíðar hans. Samkvæmt opinberri talningu liggur forsetinn 0,3 til 0,9 prósent undir Biden í fimm lykilríkjum. Samtals skilja á milli örfáir tugir þúsunda atkvæða.

Blaðamannafundurinn var um málið sem fellir forsetann af stalli, Kínaveiruna. Forsetinn er í sama liði og Bill Gates, æðstipáfi frjálslyndra vinstrimanna: milljarðamæringur, hatar Trump og vill bólusetja heimsbyggðina. Í leiðinni eru Bill Gates og félagar uppspretta endalausra samsæriskenninga um að bóluefnið sé annað og meira en vörn gegn Kínaveiru, heldur aðferð til að gera almenning að þægum þjónum valdsins.

Það sem skilur að Trump annars vegar og hins vegar Gates, Biden forsetaefni og frjálslynda vinstrið er að sitjandi forseti harðneitar að loka samfélaginu. Lokanir eru fyrsti kostur frjálslyndra og vinstrimanna, bæði í Bandaríkjunum og á Íslandi.

Meta-rökin, þau ósögðu, eru að frjálslyndir vinstrimenn séu fasistar í veirugæru. Þeir sjái fyrir sér alheimsvald alþjóðasinna með bóluefni í annarri hendinni en hin höndin er langur armur lögregluríkisins sem sektar, eða fangelsar, þá sem láta sjá sig á almannafæri án leyfis yfirvalda.

Það er flugufótur fyrir samsæriskenningunum. Frjálslyndir vinstrimenn sýna fasíska tilburði með skoðanakúgun rétttrúnaðarins, fórnarlambavæðingu og almennum hálfvitahætti í orðræðu um vald mannsins yfir náttúrunni; með því að trúa Grétu Thunberg og hafna þeim augljósu sannindum að loftslag jarðarinnar breytist eftir lögmálum náttúrunnar sem maðurinn þekkir ekki nema að litlu leyti.

Hálfvitahætti á ekki að svara í sömu mynt, þótt það sé freistandi. Greining, íhugun og andmæli, já. En ekki trúa því að Bill Gates sé dr. Strangelove endurborinn.

Sagði tímann leiða úrslitin í ljós

Einkavæðingarstjórn Viðreisnar, Samfylkingar og Pírata

Þingflokksformaður Pírata óskar sér ríkisstjórnar með Samfylkingu og Viðreisn. Þorgerður Katrín formaður formaður Viðreisnar slær tóninn: einkavæðum heilbrigðiskerfið.

Í kjölfarið kæmu lög um innflutning á pólskum konum í einkavæddar íslenskar fóstureyðingar.

Til að bæta mannlífið yrðu dyrnar opnar á gátt fyrir hælisleitendur.

Innganga í Evrópusambandið yrði sett á dagskrá til að leysa öll önnur vandamál.

Skemmtilegt yrði að greina skammhlaupið í þjóðarsálinni sem leiddi þríflokkinn til valda.

Kallar eftir aukinni aðkomu einkageirans

Glæpir, skúrkar og hetjur í lýðræði

Lýðræðislegur dómstóll dæmdi Sókrates til dauða 399 f. Kr.; lýðræði fleytti Hitler til valda 1933; innrásin í Írak 2003 var í nafni lýðræðis.

Lýðræði er engu að síður skásta hugmyndin að stjórnarfyrirkomulagi sem maðurinn hefur látið sér detta í hug. 

Undanfari glæpa lýðræðis er yfirleitt lausung og lygi. Töpuð stríð valda lausung. Dómsmorðið á Sókratesi var framið af Aþeningum rétt eftir tapið gegn Spörtu í Pelópsskagastríðinu; uppgjöf Þjóðverja í fyrra stríði leiddi til Hitler til valda. Sigur í stríði er líka viðsjárverður lýðræðinu. Vesturlönd voru nýbúin að fá sigur í kalda stríðinu þegar þau lögðu upp í hernað í Írak og víðar í miðausturlöndum.

Lausung og lygi tröllríða stjórnmálum vestrænna ríkja um þessar mundir. Bandarísku forsetakosningarnar eru yngsta dæmið. Ekki er hægt að kenna um stríðsátökum í hefðbundnum skilningi.

Stríðið sem skýrir viðsjár samtímans er kennt við menningu. Yfirstandandi menningarstríð snýst um sjálfsmynd hins vestræna manns, hvort hann sé skúrkur eða hetja.

Skúrkaímyndin sem hefur vinninginn sem stendur. Verði það endanleg úrslit hrynur vestræn menning. Það yrði stærsti glæpur lýðræðisins. Jafnframt sá síðasti.

 

Obama segir lýðræði eiga undir högg að sækja

Þorgerður Katrín enn á golfvellinum - núna í Póllandi

Formaður Viðreisnar lætur ógert það sem ber að gera, borga skuldir sínar; gerir það sem á ekki að gera, spila golf í blóra við sóttvarnarreglur, og blanda því saman sem er aðskilið, íslenskum málefnum og pólskum.

Hvort pólsk yfirvöld hafa þessa eða hina regluna um fóstureyðingar er ekki íslenskt málefni. Íslenskir þingmenn eiga ekkert tilkall til að skipta sér af pólskum, grænlenskum eða norskum innanríkismálum.

Hvernig væri nú að Þorgerður Katrín gerði það sem hún á að gera, léti ógert það sem ekki ber að gera og kveikti á þeirri staðreynd að hún er umboðslaus í innanríkismálum erlendra ríkja.

Sakaði Þorgerði Katrínu um „þvætting“

Trump lifir - og það er frétt

Fyrirsögnin ,,Trump kemur aftur opinberlega fram" gefur til kynna að ár og dagar séu síðan forsetinn var með lífsmarki. En það er sem sagt vika.

Í millitíðinni jörðuðu fjölmiðlar Trump og köstuðu minningunni um hann út í ystu myrkur. Hljómar eins og fjölmiðlar séu fórnarlömb eigin skáldskapar.

Hvernig sem kosningarnar fara þá er Trump forseti til 20. janúar 2021. Og það er ekki frétt, - heldur staðreynd.

Trump kemur aftur opinberlega fram

Eru fatlaðir óhlýðnir? Hverjum?

,,Haft er eft­ir Þuríði Hörpu Sig­urðardótt­ur, for­manni Öryrkja­banda­lags­ins, að stefna stjórn­valda sé enn að svelta fatlað fólk til hlýðni."

Hverjum eiga fatlaðir að hlýða? Hver hefur boðvald yfir fötluðum? Eiga fatlaðir ekki sömu mannréttindi og ófatlaðir og mega derra sig út og suður með blammeringum um allt og alla?

Ekki verður betur séð en fatlaðir nýti sér þann rétt og það ríkulega.

 

„Fatlað fólk er svelt til hlýðni“

Hvar mætast smitkúrfan og bóluefnakúrfan?

Skurðpunkturinn á milli lækkandi smitkúrfu Kínaveirunnar og tímakúrfunni þegar bóluefni yrði aðgengilegt verður augnablikið sem alheimsfarsóttinni er aflýst.

Líkur eru á að margir bíði ekki eftir rétta augnablikinu og aflýsi faraldrinum fyrr en skyldi.

Heilbrigðisyfirvöld, bæði hér heima og erlendis, eru ekki í öfundsverðri stöðu að finna kúrsinn milli skers og báru.

Aðgengi Íslands að bóluefni Pfizer tryggt

RÚV er frekjan á ríkisheimilinu

RÚV hótar öllu illu ef það fær ekki nammipening úr sjóðum almennings. Freka barnið á ríkisheimilinu hótar brjálæðiskasti ef það fær ekki að áfram að brjóta mannasiði, lög og reglur, sem aðrir heimilismenn verða að hlíta.

Frekjuvald RÚV byggir á ráðandi stöðu á fjölmiðlamarkaði. Efstaleiti rekur sjónvarps-, útvarps- og netmiðla sem mala kvörnina allan sólarhringinn og er stærsti einstaki miðillinn sem skilgreinir opinbera umræðu.

RÚV úthýsir þeim sem gera sig líklega til að hemja yfirganginn og umbunar þeim sem eru gólftuskur frekjunnar. Fréttir eru samdar til samræmis við hagsmuni RÚV, herferðir eru skipulagðar en önnur mál þögguð. Húsvinir Efstaleitis fá boð í umræðuþætti á meðan andmælendum er gert að naga þröskuldinn.

Lagasniðganga RÚV, sem Óli Björn ræðir í Moggagrein í dag, er kurteist orð yfir frekjubarnið á Efstaleiti sem aldrei vex úr grasi.

Vill endurskipuleggja RÚV

Trump-fyndnar vinstriútgáfur

Vinstriútgáfan Guardian kvartar undan því að dómsmálaráðherra Bandaríkjanna hefji rannsókn á kosningasvindli þótt ,,engar sannanir liggi fyrir."

Þingrannsókn demókrata á afskiptum Pútín Rússlandsforseta af kosningunum 2016 byggði auðvitað traustum sönnunargögnum.

Sér grefur sér gröf þótt grafi.

 

 

Trump enn sannfærður um sigur

Valdarán fjölmiðla og Biden

Biden forsetaefni tilkynnti á kjördag að öll atkvæði skyldi telja. Fimm dögum síðar taldi Biden óþarfi að telja atkvæðin, hann væri sigurvegari samkvæmt fjölmiðlum.

Líkt og bylting er valdarán lögmætt þá og þvi aðeins að það heppnast. Meginforsenda er að sitjandi valdhafi gefist upp, flýi eða drepist. En Trump gafst ekki upp, flúði ekki og er enn með jarðvist. Þeir sem hafa hagsmuni af því að forsetinn haldi völdum vakna til lífsins.

Á þriðjudegi eftir valdaránshelgina er komin óvissa í stað sigurvissu í herbúðum Biden og fjölmiðla. Það veit ekki á gott að sitjandi forseti nái vopnum sínum.

Næstu sólarhringar skera úr um hvort valdaránið renni út í sandinn. Varaáætlun Biden og demókrata er að fá völdin með lögmætum hætti 20. janúar 2021 þegar öll atkvæði eru talin og vafamál útkljáð fyrir dómstólum. Í því ferli verður misheppnaða valdaránið eins og myllusteinn um háls Biden. Öldungurinn þarf á öllum sínum lyfjum að halda til að bugast ekki. 

McConnell á bandi forsetans