Talibanar hér og þar

Taliban er nemandi í hreinni trú. Hreintrúarstefna getur bæði verið veraldleg og annars heims. Sameiginlegt bókstafstrú er ofstæki enda hafa þeir trúuðu höndlað sannleikann og leita að villutrúarmönnum að kveikja í, krossfesta, skjóta eða niðurlægja opinberlega.

Upprunaland talibana er Afganistan og þeir tala pastú. Hreintrúarstefna og bókstafstrú eru aftur fyrirbæri sem kunna mörg tungumál.

Til dæmis íslensku.

Nató eftir Afganistan

Nató verður að aftengja sig dómgreindarbresti Bandaríkjanna, segir þýskur öryggismálasérfræðingur, og forðast afganskt ástand í Írak í árslok.

En hvað er Nató yfir höfuð að þvælast í Afganistan og Írak? Nató var stofnað í upphafi kalda stríðsins að verjast kommúnisma og ásælni Sovétríkjanna. Kommúnisminn er dauður, Sovétríkin sömuleiðis en Nató sprelllifandi og þykist heimsveldi í miðausturlöndum og Asíu.

Afganistan sýnir svart á hvítu að vesturlönd vaða ekki inn á skítugum skónum og búa til vestrænt ríki í andstöðu við þjóð sem ekki er vestræn.

Vestræna hrokahugmyndin um eitt samfélag fyrir alla heimsbyggðina er dauð. En Nató lifir. Það er mótsögn.

 

Flugskeytum skotið að flugvellinum í Kabúl

Um félagslega ábyrgð nauðgana

Einstaklingar brjóta af sér kynferðislega. Það er ekki fjölskylda, vinir, skóli eða vinnustaður sem ber ábyrgð á afbrotinu, - heldur gerandinn.

Hvorki réttarríkið né siðareglur samfélagsins myndu virka ef gert yrði ráð fyrir félagslegri ábyrgð á kynferðisafbroti. Gerandinn fengi þá málsvörn í hendur að hann væri leiksoppur félagslegra kringumstæðna. Bæri ekki ábyrgð á eigin gerðum. 

Þegar notuð eru hugtök eins og ,,nauðgunarmenning" er þeirri hugsun gefið undir fótinn að nauðgun og kynferðisbrot séu á ábyrgð samfélagsins. Nauðgari gæti borið við þeirri málsvörn að vera félagslega mótaður í leik- og grunnskóla og teflt fram ótal fræðiritum um að félagsmótun fari einmitt þar fram. Konur eru yfir 90 prósent leik- og grunnskólakennara.

Einstaklingurinn ber ábyrgð á eigin gerðum. Ábyrgð samfélagsins er að rannsaka meint brot og eftir atvikum ákæra og úrskurða um sekt eða sýknu. Dómstóll götunnar notar aftur skáldskap eins og ,,nauðgunarmenningu" í pólitískum tilgangi. Mannlífið verður ekki farsælla þegar dómstóll götunnar ræður ferðinni.

 

 

Nauðgunarmenning - ábyrgð kvenna

Ef það er til nauðgunarmenning bera konur sinn hluta ábyrgðarinnar á henni. Konur móta menninguna til jafns við karla. Í okkar menningu, þeirri íslensku, er konum gert hærra undir höfði en körlum. Þær eru ráðandi í sérfræðistéttum landsins, stjórna forsætisráðuneytinu, dómsmálum, lögreglunni, menntakerfinu, stærri hluta bankakerfisins og svo má áfram telja.

En það verður bið á því að kona stígi fram og játi ábyrgð á nauðgunarmenningunni.

Hvers vegna? Jú, orðið er pólitískt hugtak, tilbúningur sem á sér ekki stoð nema í umræðunni. Hugtakið er notað til að leggja ábyrgð á nauðgunum á valda staði í samfélaginu. Nauðgunarmenningu er hentugt að klína á sérvalin heimilisföng þar sem karl er í fyrirsvari.

Eins og dæmin sýna er karl sekur nánast um leið og hann er ásakaður um að hýsa nauðgunarmenningu. Pólitísk hugtök eru skæð vopn í höndum þeirra sem kunna með að fara.

Með nauðgunarmenningu er hægt að láta afmarkaða hópa, t.d. Vestamannaeyinga og fótboltastráka, sitja uppi með skömm og siðferðilega ábyrgð á afbrotum einstaklinga. Og það er gert miskunnarlaust. Enginn spyr um ábyrgð mæðra, systra, dætra og eiginkvenna gerenda. Sterkara kynið er stikkfrí.

Katrín og Logi - eldgos og bílaumferð

Á 5 mánuðum hefur eldgosið í Fagradal losað meiri koltvísýring, CO2, í andrúmsloftið en allar vegasamgöngur á Íslandi losa í eitt og hálft ár. Ef aðrar gróðurhúsalofttegundir eru teknar með í reikninginn losar gosið við Grindavík álíka og bílaumferð í 3-4 ár.

Gosið er fimm mánaða, þykir lítið og er enn að.

Katrín í Vinstri grænum og Logi í Samfylkingu telja koltvísýring í andrúmslofti, og aðrar gróðurhúsalofttegundir, vera spurningu um líf og dauða.

Hvorki Katrín né Logi ræddu framlag jarðeldanna en varð tíðrætt um að fólk ætti að skattleggja ef það notaði bíla. Útblástur bíla er aftur aukaatriði í loftslagsframlagi Íslands.

 

Beint: Ræða Katrínar á landsþingi VG

Samfélagsofbeldið gegn drengjum

Skipulagt ofbeldi er stundað gagnvart drengjum og ungum karlmönnum sem rænir þá lífsgæðum. Ofbeldið hefst þegar í grunnskóla.

Helga Hannesdóttir geðlæknir skrifar í Læknablaðið:

Í meira en áratug hafa konur verið um 70% af þeim sem ljúka háskólaprófi á Íslandi. Á þetta rætur að rekja til vanda í grunnskólanámi drengja eða eru þetta samfélagsleg áhrif? Brottfall drengja er um 50% meira en stúlkna í framhaldsskólum, sem eykur líkur á að háskólar verði kvenlægar stofnanir.

Menntun er lífsgæði sem æ stærri hluti drengja fer á mis við. Karlar verða hægt en örugglega ólæsir á menninguna. Þeim er vísað á jaðar siðmenningarinnar, fá verra atlæti og sagt að skammast sín fyrir það sem þeir eru.

Hvað gerist þegar ungum karlmönnum er sagt að þeir séu óalandi og óferjandi frummenn? Nú, vitanlega, þeir fara að haga sér sem slíkir.

Hefur áhyggjur af geðheilsu nemenda

Prósentuvísindi

Einhver prósenta sem fær Codvid-19 deyr. Prósentan er hærri hjá þeim sem eru óbólusettir. Einhver prósenta, eða brot úr prósenti, af þeim sem fá bólusetningu fær aukaverkanir sem í geta jafnvel endað með dauða - en þar eru líkurnar afar litlar.

Út frá þessum prósentum keppist fólk við að mynda sér skoðun á Kínaveirunni og bólusetningum við henni. Töluverður hávaði er skoðanaskiptum andstæðra hópa.

Hér er önnur prósenta til að pæla í. Í venjulegu árferði deyr prósenta sjúklinga á heilbrigðisstofnunum landsins ótímabærum dauðdaga.

Samt dettur engum í hug að best væri að leggja af heilbrigðiskerfið, enda þótt það valdi ótímabærum dauðdaga prósentubrots sjúklinga.

Lyginni líkast er hve margir tapa dómgreind í prósentuvísindum. 

Eina 100% örugga vitneskjan um lífið er að við deyjum öll áður en yfir lýkur.

 

Hinir látnu voru erlendir ferðamenn

Fleiri framboð en minni áhugi

Almenningur sýnir stjórnmálum minni áhuga en pólitískum framboðum fjölgar. Hvernig er hægt að skýra þessa mótsögn?

Jú, auðveldara er en áður að efna til framboðs. Munar þar mestu um samfélagsmiðla. Sérviskuframboð geta með litlum tilkostnaði náð til fámennra kverúlantahópa sem þó eru nægilega stórir til að skila fimm prósentum og þingflokki.

Þess vegna höfum við pólitísk furðufyrirbæri eins og Pírata, Ingu og Gunnar Smára.

Minnsta fylgishreyfing getur haft víðtæk áhrif

Sigmundur Davíð og tilboðið: valdeflum almenning

Sigmundur Davíð og Miðflokkurinn gera almenningi tilboð sem vert er að íhuga. Á hverju ári verði afgangi ríkissjóðs skipt í tvo hluta. Almenningur, þ.e. sérhver íslenskur ríkisborgari, fær helminginn en helmingurinn fer annað tveggja til lækkunar opinberra skulda eða í varasjóð.

Almenningur fengi með þessu fyrirkomulagi tvöfaldan ávinning. Í fyrsta lagi beingreiðslu einu sinni á ári - ef það er afgangur af ríkissjóði. Í öðru lagi stæði almenningur betur að vígi gagnvart stjórnmálamönnum, þingi og framkvæmdavaldi, Árlega gæti almenningur krafið stjórnvöld um útskýringu á hvernig gengi að reka ríkissjóð.

Stjórnmálamenn munu keppast um að þegja í hel tilboð Sigmundar Davíðs og Miðflokksins. Hvers vegna skyldi það vera?

Vill skila afgangi úr ríkissjóði til almennings

Tíminn, kynin og Katrín

Líffræðileg kyn eru tvö, kennd við karl og konu. Án tveggja kynja verður líffræðileg þróun óskiljanleg. Þróunarkenning Darwins um uppruna tegundanna er merkingarleysa ef við gefum okkur að kyn sé val einstaklingsins og félagslega skilgreint. Fyrir miðja síðustu öld var til hugmyndafræðin félagslegur Darwinismi. Allir með eitthvað á milli eyrnanna forðast þá hugmyndafræði.

Lög sem segja kyn valkvætt eru andvísindaleg og brjóta gegn heilbrigðri skynsemi. Katrín forsætis og Vinstri grænir telja sig sjálfsagt gera góðverk með lagasetningunni. Öðru nær, því miður. Ef við hættum að taka gott og gilt sem blasir við og er undirstaða skilnings okkar á lífinu og tilverunni er hætt við að fleira fari í súginn.

Við mælum aldur í dögum, vikum, mánuðum og árum, jafnvel mínútum ef því er að skipta. Ólíkt kynferði, sem er gefin stærð í náttúrunni, eru mælieiningar tímans mannlegur tilbúningur. Samt dettur engum í hug að leyfa fólki að ákveða sjálft hversu gamalt það er. 84 ára kraftlyftingakona getur með rökum sagt sér líða ekki deginum eldri en sextugt. Ætti hún að fá heimild til að breyta aldri í þjóðskrá? Vitanlega ekki.

Við þurfum fastar afmarkaðar staðreyndir í tilverunni til að heimurinn sé skiljanlegur. Fastar afmarkaðar staðreyndir eru hornsteinar. Án þeirra blasir við merkingarleysa og óreiða. Ef karl í dag getur orðið kona á morgun er heimurinn óskiljanlegur.

Líffræði verður ekki breytt með lögum. Að stjórnvöld sæmilega upplýstrar þjóðar skuli reyna það segir ókræsilega sögu um dómgreind stjórnvalda. 

Katrín svarar Sigmundi um fjölda kynja