Íslendingar í sumarleyfi í Afganistan

Ungur breskur námsmaður komst í heimsfréttirnar þegar hann fór í sumarleyfi til Afganistan ,,á versta tíma."

Tvær íslenskar fjölskyldur gerðu betur; fóru með börnin að sóla sig í landi talibana, samkvæmt viðtengdri frétt.

Fjölmiðlar hljóta að sitja um íslensku fjölskyldurnar og fá ferðasögu þeirra og óvenjulegt sumarleyfi. 

Fyrir allan almenning yrði frásögnin lærdómsrík. Og hlutverk fjölmiðla er að upplýsa. Eða er ekki svo?

Íslendingar í danskri vél frá Afganistan

Tölfræði gróðurhúsakenninga hrynur

Í meira en 20 ár notar loftslagsnefnd Sameinuðu þjóðanna, IPCC, gallaða tölfræðigreiningu á rannsóknir um áhrif gróðurhúsalofttegunda á hlýnun jarðar.

Tölfræðigreiningin, kölluð AT99, eftir höfundum og ártali, er notuð til að sannprófa áhrif gróðurhúsaloftegunda á hitastig jarðar. 

Ross McKitrick sýnir fram á að AT99-greiningin er gölluð tölfræði. McKitrick birtir niðurstöðu sína í ritrýndu vísindatímariti en hefur fengið umfjöllun víðar, sjá hér og hér.

Gróðurhúsakenningin og framleiðsla mannsins á koltvísýringi, CO2, er kjarni loftslagsumræðunnar. Þegar tölfræðin að baki reynist gölluð í grundvallaratriðum er kenningin ósönnuð - henni verður að hafna.

En, auðvitað, við sem höfum nennt að fylgjast með umræðunni vitum ósköp vel að hún snýst ekki um að skilja náttúruna með vísindum heldur nota vísindin í pólitískum tilgangi. Ronan Connolly tekur saman ferlið hvernig pólitík tók lofslagsvísindi í gíslingu.

Blair segir Biden imba - fótspor Trump

Ekki er ofsagt að gagnrýni Tony Blair fyrrum forsætisráðherra Breta á Joe Biden forseta Bandaríkjanna sé persónuleg. Í endursögn Telegraph, sem að jafnaði er hófstillt útgáfa, segir Blair Biden imba.

Imbar eru samkvæmt skilgreiningu óhæfir til mannaforráða. Enda er flýtur forræði heimsmála í stórfljótum frá Bandaríkjunum til Rússlands og Kína. Bretar leita til Pútín og Kínverja að hafa hemil á talibönum. Bandaríkin eru úr leik með imba sem forseta.

Allt er með ólíkindum í þróun mála eftir fall Afganistan. Biden forseti fylgdi í fótspor Trump sem með breiðum stuðningi bandarísku þjóðarinnar, en ekki elítunnar í Washington, ákvað að hætta hernaðarævintýrum í útlöndum.

Biden fékk kjör sem Ekki-Trump en hélt stefnu forvera síns til streitu í utanríkismálum. En á meðan utanríkismál voru styrkur Trump, hann tapaði kosningunum 2020 á kófinu og kynþáttaóeirðum, reynist utanríkisstefna Trump banabiti Biden.

Hvernig má þetta vera? 

Ein skýring er að af Biden var ætlast að vera Ekki-Trump og hefja ágenga utanríkisstefnu til vegs á ný í anda eftirmálanna frá 11. september 2001. En það var aldrei í kortunum. Í útþenslu sem byggist á hernaðarmætti eru Bandaríkin búin á því. Og það var ekki Trump sem bjó til þá stöðu heldur veruleikinn sjálfur. Hvorki hafa Bandaríkin sjálf lyst á hlutverkinu alheimslögga né heimsbyggðin almennt. Útþenslan frá 2001 er klúður ofan á klúður: Írak, Líbýa, Sýrland, Úkraína og nú Afganistan.

Trump sýndi undanhald Bandaríkjanna sem styrkleika. Gerum Ameríku máttuga og öll sú ræða. Biden á hinn bóginn er miðjusoðinn mildingur, ekki með aðra stefnu eða ásýnd en að vera andhverfa Trump. Andstæðan við stórt er lítið.

Maður finnur til með Biden. Hann varð forseti vegna mótsagnar.

 

 

 

Blair fordæmir brotthvarf hersins

Frægustu ummæli Styrmis - samhengið

Styrmir Gunnarsson er allur. Hann er af kaldastríðskynslóðinni, ólst upp og tók út þroska þegar heiminum var skipt í austur og vestur, kommúnisma og borgaralegt samfélag, rangt og rétt.

Í tvípóla heimi er lítið gráa svæðið milli svarts og hvíts. Maður er réttu megin í pólitísku tilverunni eða á röngunni. Leikreglur samfélagsins taka mið af því.

Styrmir hringdi í mig þegar ég starfaði á Vikublaðinu, sem Alþýðubandalagið gaf út. Þetta hefur verið um 1994. Við þekktumst ekkert. Ég hafði fjallað um fréttaflutning Morgunblaðsins og m.a. hringt í blaðamenn þar að spyrja um viðbrögð. Styrmir var allt annað en kátur. Það var ekki hluti af leikreglunum að blaðamenn skrifuðu fréttir um blaðamennsku - og allra síst blaðamennsku á öðrum fjölmiðlum. Ég var ósammála. Ég punktaði niður hjá mér eftir Styrmi: það sem stendur í Morgunblaðinu, það stendur, það sem stendur ekki í Morgunblaðinu, það stendur ekki. Þetta var útgáfa Styrmis af slagorði New York Times; all the news that is fit to print. Leikreglur sem sagt.

Ekki löngu síðar bauð Styrmir mér í kaffi og sýndi mér Moggasetrið við Kringluna. Mögulega naut ég þar eiginkonunnar sem var blaðamaður hjá Styrmi í áratugi. En þegar ég falaði starf hjá Styrmi tveim eða þrem árum síðar fékk ég vinsamlegt afsvar. Menn eru á réttunni eða röngunni.

Um áratug síðar og litlu betur hitti ég Styrmi nokkrum sinnum á vettvangi Heimssýnar, félags andstæðinga aðildar Íslands að Evrópusambandinu. Styrmir hætti sem ritstjóri Morgunblaðsins sumarið 2008. Hann og Björn Bjarnason ráku um þetta leyti Evrópuvefinn sem var mikilsvert framlag til umræðunnar. Björn og Styrmir komu á fámenna spjallfundi. Styrmir þó oftar enda nákunnugur formanninum, Ragnar Arnalds.

Á þessum fundum Heimssýnar heyrði ég fyrstu drögin að ummælum sem Styrmir varð frægastur fyrir. Þessi ummæli hafa verið sett í allt annað samhengi en Styrmir ætlaði. Í mín eyru talaði Styrmir um ,,ógeðslegt" þjóðfélag þegar hann bar saman samfélagið sem hann ólst upp í við það sem varð til um aldamótin og fékk viðurnefnið útrás.

Í Rannsóknaskýrslu alþingis eru orð Styrmis þessi:

Ég er búinn að fylgjast með þessu þjóðfélagi í 50 ár. Þetta er ógeðslegt þjóðfélag, þetta er allt ógeðslegt. Það eru engin prinsipp, það eru engar hugsjónir, það er ekki neitt. Það er bara tækifærismennska, valdabarátta.

Orðin hafa verið túlkuð þannig að hann sé að lýsa Íslandi frá 1960 til 2008. En því fer víðs fjarri. Styrmir var að bera saman Ísland kaldastríðsáranna við Útrásar-Ísland.

Kynslóðin sem mótaði Styrmi og jafnaldra hans er kennd við lýðveldið. Hann leit á sig sem merkisbera lýðveldiskynslóðarinnar í köldu stríði þar sem lýðveldið sjálft var í húfi.

Styrmir Gunnarsson látinn

Loftslag, kóf og barnaher

,,Ungir umhverfissinnar hafa boðað til þriggja upplýsingafunda um loftslagmál og segja að jafn róttækar aðgerðir þurfi í loftslagsmálum og heimsfaraldri COVID-19," segir á RÚV. Ennfremur

Fyrirlesarar voru sammála um að faraldurinn hefði kennt heimsbyggðinni ákafleg margt um hvernig hægt sé að bregðast við neyðarástandi líkt og loftslagsmálunum.

Allir eldri en tvævetur vita að faraldurinn kenndur við Kínaveiruna er eitt og loftslag á jörðinni er allt annað.

Aðgerðasinnar á hinn bóginn sjá sér leik á borði að hræða fólk til fylgis við glópahlýnun með þeim rökum að hvorttveggja sé neyðarástand, veira og veðurfar.

Á miðöldum sendi kaþólska kirkjan barnaher til að frelsa Jerúsalem undan múslímum. Í dag senda Sameinuðu þjóðirnar börn til að berjast gegn náttúrulegu veðurfari.

Við lifum svo sannarlega á upplýstum tímum.

 

Hamfarahlýnun stærsta ógn barna og ungmenna

Framtíð í veirusamfélagi - skemmtun utan eftirlits

Framtíðarsýn sóttvarnarlæknis er að Kínaveiran og afbrigði hennar verði á ferðinni í samfélaginu næstu misseri og ár. Til að hamla útbreiðslu er ráðlegt að grípa til sóttvarna sem reynslan segir að virki. Veitingamenn segja nærri sér hoggið og

telja ljóst að fólk muni ekki hætta að hitt­ast og skemmta sér sér held­ur færa sig í heima­hús eða annað hús­næði þar sem ekk­ert eft­ir­lit er.

Skemmta sér heima utan eftirlits? Nei, það gengur ekki og er afskaplega óviðfelldin framtíðarsýn.

Vitanlega á öll skemmtun að vera undir eftirliti.

Kveðja,

Stóri bróðir.

 

 

Lýsa yfir áhyggjum af framtíðarsýn sóttvarnalæknis

Sólin, ekki CO2 skýrir hlýnun, segja 23 vísindamenn

Ný ritrýnd rannsókn 23 vísindamanna kemst að þeirri niðurstöðu að virkni sólar skýrir hlýnun jarðar frá miðri 19. öld - ekki koltvísýringur, CO2.

Rannsóknin kippir stoðunum undan nýlegri IPCC skýrslu Sameinuðu þjóðanna sem segir mannlífi á jörðinni hætta búin vegna manngerðra loftslagsbreytinga.

Frá miðri 19. öld hefur meðalhitastig jarðarinnar hækkað um 1 gráðu, já eina gráðu. Ekki beinlínis hamfarahlýnun.

Ef það er sólin en ekki losun mannsins á CO2 sem skýrir hlýrra loftslag er tilgangslaust að breyta atferli manna - það er ekki maðurinn sem stýrir loftslagsbreytingum heldur náttúran. Eins og hún hefur alltaf gert.

Að lifa með veiru, gosi og pólitík

Afbrigði Kínaveirunnar eru óútreiknanleg og óvissa er með rétt viðbrögð. Enginn veit hvenær gosinu við Grindavík lýkur.

Aftur vitum við að þingkosningar verða 25. september.

Merkileg staðreynd að pólitík er orðin fyrirsjáanlegri en farsótt og náttúruhamfarir.

Delta-afbrigðið leggst harðar á börn

Íslenskar fjölskyldur í Afganistan? Eða ofsóttir í sumarleyfi?

Meintar tvær íslenskar fjölskyldur í Afganistan komust í fréttirnar þegar talibanar tóku völdin.

En hér er eitthvað málum blandið. Frétt RÚV segir

Tvenn hjón og börn þeirra, sem eru með íslenskan ríkisborgararétt, eru stödd í Kabúl...

Grunur vaknar að hér séu á ferðinni Afganir sem fengu landvist á Íslandi, líklega sem ofsóttir flóttamenn. En svo fóru þeir í sumarleyfi til Afganistan að hitta vini og ættingja.

Kyndugt að fara í sumarleyfi til lands þar sem maður er ofsóttur, ekki satt?

Tillögur um móttöku flóttamanna klárar fyrir helgi

Ísland eftir amerísku öldina

Ameríska öldin sem gekk í garð eftir seinna stríð leið undir lok á flugvellinum í Kabúl, er ráðandi frásögn eftir Afganistanklúðrið. Ameríska heimsveldið er liðið undir lok, segir í uppslætti í Telegraph. Ógrynni álíka fréttaskýringa eru í öllum heimsins miðlum.

Það getur verið, en er hvergi víst, að Bandaríkin verði fráhverf hlutverki alheimslögreglu. Ein 14 ár eru frá frægri ræðu Valdimír Pútín Rússlandsforseta á öryggisráðstefnunni í Munchen þar sem hann harmaði bandarískan og vestrænan hroka í einpóla heimi. Líklega var skálað í Kreml þegar heimsfjölmiðlar veltu sér upp úr ræmum frá flugvellinum í Kabúl. 

Enn er óvíst hvort ameríska öldin sé runnin sitt skeið. Ekkert ríki kemst í hálfkvist við hernaðarmátt stórveldisins. Aftur er nánast öruggt að alþjóðahyggja, glóbalismi, er horfin af sviðinu. Bandaríkin og Evrópusambandið reyndu fyrir sér með glóbalisma á jafn ólíkum stöðum og Úkraínu, Írak, Sýrlandi, Líbýu og Afganistan. Eftir Kabúl er glóbalismi dautt hross.

Landafræði breytist ekki þótt hugmyndafræði kollvarpist. Á meðan Bandaríkin sleikja sárin og gera upp við sig framtíðarhorfur munu stjórnvöld í Washington treysta varnarlínuna sem liggur næst bandaríska meginlandinu. Ný hugmyndafræði, kennd við raunsæi, er þegar til á teikniborðinu.

Ísland situr í túngarði Bandaríkjanna landfræðilega. Það má gera ráð fyrir að Sámur frændi sæki Frón heim og búi í haginn fyrir nýtt hlutverk stórveldisins á alþjóðavísu.