Summa heimskunnar

Gjaldþrot Björgólfs Guðmundssonar er auglýsing á fáráðlingahætti samborgara okkar sem halda að efnisauður skipti sköpum í lífinu. Björgólfur reyndi fyrir sér í Hafskipum á sínum tíma og strandaði. Lexían sem hann lærði þegar hann var handtekinn á heimili sínu um lágnættið var að peningar breyti öllu; auðugur maður getur ekki verið annað en saklaus. Jón Ásgeir Jóhannesson þurfti ekki handtöku til að sannfærast um þessa speki.

Björgólfur ætlaði að kaupa sér aflát frá vægum dómi sem hann fékk fyrir Hafskipsævintýrið. Hann fjármagnaði bækur og réð lögfræðistóð að fá endurupptök samtímis sem hann févæddi listamenn og menningu.

Summa heimskunnar er sannfæringin um að auður geri manninn réttlátan.

 

Björgólfur gjaldþrota

Ríkisstjórn á barmi taugaáfalls

Ríkisstjórnin boðar til blaðamannafundar að morgni föstudags verslunarmannahelgar, þegar enginn er að hlusta. Í gær undir kvöld var forsætisráðherra skutlað úr fríi og stillt upp fyrir framan stjórnarráðið í fréttaviðtal RÚV. Fréttaveitur og bloggarar úr röðum stjórnarsinna reyna að finna ,,réttan" vinkil á fréttina um höfnun Alþjóða gjaldeyrissjóðsins. Í einu og sama viðtalinu tókst forsætisráðherra að segja annar vegar að frestunin væri vond og hins vegar að hún skipti litlu máli.

Írafár ríkisstjórnarinnar vegna fyrirséðra atburða, menn vissu að áhöld væru um hvort lánið fengi afgreiðslu, er bein yfirlýsing um sundurþykkju stjórnarheimilisins. Þar á bæ er engin samstaða um hvert eigi að stefna í helstu málefnum þjóðarinnar. Ríkisstjórnin stundar ómarkvissa viðbragðapólitík.

Evrópustefna Samfylkingarinnar beið skipbrot strax og henni var ýtt úr vör. Traust á Íslandi erlendis minnkaði við umsóknina, bæði vegna þess að umsóknin var samþykkt með naumum meirihluta og hins að hún var í útlöndum túlkuð sem uppgjöf. Hjákátlegir tilburðir utanríkisráðherra að búa til nýja utanríkisstefnu upp úr þurru til að fegra betlumsóknina til Brussel sannfærðu enga, hvorki heima né ytra.

Umsóknarklúðrið og óleyst Icesave-mistök eru misheppnuð pólitík og diplómatísk stórslys. Ríkisstjórnin veit að spilið er búið.

Röng vaxtapólitík skýrir frestun

Alþjóðagjaldeyrissjóðurinn afgreiðir ekki lán til Íslands vegna þess að stýrivextir Seðlabanka Íslands voru lækkaðir of hratt í vor með tilheyrandi veikingu krónunnar. Þetta er mun líklegri skýring en hin, sem meira er til heimabrúks hjá Samfylkingu og Vg, að Icesave-deilan sé óleyst. Í vor varaði fulltrúi AGS hér á landi Franek Rozwadowski við vaxtalækkun enda stefndi það gengi krónunnar í hættu.

Í byrjun mánaðarins mátti lesa eftirfarandi í Hagsjá Landsbankans

Áður en vaxtaákvörðunin var birt sá Franek Rozwadowski, fulltrúi Alþjóðagjaldeyrissjóðsins á Íslandi, ástæðu til að lýsa því yfir í samtali við Bloomberg fréttaveituna að sjóðurinn hefði ráðlagt Seðlabankanum að setja stöðugleika á gjaldeyrismarkaði í forgang til þess að hemja verðbólgu. Vaxtaákvarðanir Seðlabankans yrðu því að taka mið af því öðru fremur að gengi héldist stöðugt.

Yfirlýsing AGS og tímasetning hennar kemur á óvart þar sem sjóðurinn og Seðlabankinn hafa áður lýst því yfir að peningastefnunefnd hafi fullt sjálfstæði við stýrivaxtaákvarðanir. Ljóst er að ef AGS blandar sér með svo opinberum hætti í umræðu um ákvarðanir Seðlabankans á hann enn erfiðara verkefni fyrir höndum við að móta trúverðuga og sjálfstæða peningastefnu.

Alþjóða gjaldeyrissjóðurinn var búinn að vara stjórnvöld og Seðlabanka við en þeir skelltu skollaeyrum við. Þess vegna er frestun, ekki vegna Icesave.

 

 

Sælir eru einfaldir

Á meðan forsætisráðherra er í fríi er fjármálaráðherra með mannaforráð og veit ekki í hvorn fótinn hann á að stíga. Það er ekki boðlegt að nota frestun Alþjóðagjaldeyrissjóðsins til að berja á þingmönnum að samþykkja Icesave-samninginn. Skötuhjúin í stjórnarráðinu verða að hósta upp fyrirætlunum sínum núna þegar bjargráðin fást hvorki í Washington eða Brussel.

Einfaldar lausnir sækja einfeldninga heim. Samfylkingin lofaði að krónan myndi styrkjast við umsókn um aðild að ESB og Steingrímur J. að Icesave-samningur væri glæsilegur. Hvorugt gekk fram.

Ríkisstjórn Jóhönnu Sigurðardóttir stendur á gati á miðju sumri. Þjóðinni yrði greiði gerður ef mál skipuðust svo að stjórnin félli með Icesave-samningum í næstu viku. 

Afgreiðslu AGS frestað

Þurfum stjórnvöld sem segja satt

Samfylkingin lofaði að krónan myndi styrkjast við það eitt umsókn um ESB yrði send Brussel. Reyndin er önnur. Formaður Vg sagði öll gögn um Icesave komin á borðið en verið margsinnis verið staðinn að lygum eftir það. Ríkisstjórnin þvældist inn í heim lyga og blekkinga þegar til stjórnarinnar var stofnað.

Ríkisstjórnin mun ekki ná tiltrú almennings á ný. Eymdin dregst á langinn eftir því sem ríkisstjórn Jóhönnu Sigurðardóttur situr lengur. Vonandi íhugar forsætisráðherra að segja af sér eftir sumarfrí sitt.

Evran aldrei dýrari á árinu

Bannorð aðildarsinna eru umsókn og innganga

Íslenskir aðildarsinnar eru lævíst fólk sem tekið hefur höndum saman að ljúga þjóðina inn í Evrópusambandið. Samtök iðnaðarins keypti í áravís spurningu hjá Gallup um hvort taka ætti upp aðildarviðræður við ESB. Fréttablaðið tekur upp þráðinn og spyr hvort fólk styðji aðildarviðræður.

Fréttablaðið þykist ekki vita að Ísland hefur sótt um aðild að Evrópusambandinu og er það í takt við valkvæða heimsku aðildarsinna. Á þessu stigi máls hefði spyrill með lágmarksvit spurt annað tveggja hvort fólk væri hlynnt umsókn Íslands að ESB eða inngöngu Íslands téðan félagsskap.

Fréttablaðið skrifar slepjuleiðara um að þjóðin og ríkisstjórnin séu í takt með aðildarviðræður. Það er sami lævísi áróðurinn og maður las um íslensku útrásina og hve kaupsýslumenn væru flinkir.

Aðildarsinnar og útrásarliðið eru sama fólkið, bara komin ný kennitala.

Meirihluti styður viðræður

Einangrunarhyggja aðildarsinna

Aðildarsinnar Íslands að ESB eru iðulega með á vörum varnaðarorð um að landið einangrist ef við förum ekki inn í Evrópusambandið. Í reynd er það svo að Evrópa hefur einangrað sig frá umheiminum með því að setja upp tollmúra til að verja hagsmuni sína annars vegar og hins vegar að deila og drottna gagnvart nágrönnum sínum í Afríku og Asíu.

Evrópa er útskagi á meginlandi sem hefst við Kyrrahaf. Þær þjóðir Evrópu sem ráða lögum og lofum í ESB eru gömul nýlenduveldi sem leiddu yfir heimsbyggðina ánauð, áþján og tvær heimsstyrjaldir.

Við erum svo heppni að sitja fallega eyju á miðju Atlantshafi á milli tveggja heimsálfa. Í raun eigum við margt fleira sameiginlegt með þeirri sem liggur til vesturs þótt við komum frá útnára Evrópu. Þótt kjánaprik meðal okkar telji hagsmunum okkar borgið í ESB vitum við flest að svo er ekki. Kjánarnir hafa bara svo þröngan sjóndeildarhring.

2007-útgáfan af Jóni Ásgeiri

Á dögum útrásarinnar var Jón Ágeir Jóhannesson einn valdamesti maður landsins í krafti auðs og fjölmiðlaveldis. Stjórnmálamenn margir hverjir sátu og stóðu eins og hann bauð. Þegar einhver gagnrýndi Jón Ásgeir var fjölmiðlum sigað á viðkomandi. Eftir að útrásin hefur verið afhjúpuð sem eitt allsherjar svindl er Jón Ásgeir sem klæðalausi keisarinn. Hann fattar ekki að fólk hefur séð í gegnum blöffið og tekur ekki mark á orðum útrásarliðsins.

Vill ekki einhver segja Jóni Ásgeiri að það sé komið 2009?

Yfirlýsing frá Jóni Ásgeiri Jóhannessyni

Íþróttafélög fái ríkisbankana

Bankarnir og sparisjóðir eru flestir í eigu ríkisins beint eða óbeint. Þeir sem áttu fjármálafyrirtækin geta ekki eignast þau aftur, fjárhagslegt sakavottorð þeirra leyfir það ekki. Við þurfum að finna nýja eigendur að fjármálastofnunum og hvers vegna ekki að koma þeim í eigu íþróttafélaga?

Íþróttafélög gegna lykilhlutverki í félagskerfi samfélagins og þau eru iðulega blönk. Með því að þau fái fjármálafyrirtækin er dreifð eignaraðild tryggð, samkeppnishugsun og gera mætti regluverkið þannig úr garði að vöxtur verði hóflegur og afrakstur fari í starfið.

Við núverandi aðstæður verður að hugsa út fyrir ramman. Félagslegur íþróttakapítalismi er pæling.

Lítil trú á efnahagsmálum

Spænskur ráðherra: Íslensk fiskimið eru fjársjóður

Evrópumálaráðherra Spánar Diego Lopez Garrido segir í viðtali við spænska stórblaðið El Pais að Spánn muni sjá til þess að hagsmunir landsins verði ekki fyrir borð bornir í aðildarviðræðum Evrópusambandsins við Ísland. Hann segir íslensku fiskimiðin vera fjársjóð.

Spænski úthafsveiðiflotinn er einn sá stærsti í heimi og hefur um árabil stundað veiðar í lögsögu ríkja sem Evrópusambandið hefur gert samninga við. Spænskum togurum var hleypt inn í írska fiskveiðlögsögu eftir að Írland gekk inn í Evrópusambandið.

Hér er umfjöllun El Pais.