Þórður Snær: engin byrlun og ekki afritun en samt gögn

Talsmaður sakborninga í byrlunar- og símastuldsmálinu, Þórður Snær Júlíusson ritstjóri Heimildarinnar, áður Kjarnans, skrifar Facebook-færslu í gær og ber sig aumlega. Hann telur sig ranglega sakborning í máli sem komi honum ekkert við.

Miðað við að byrlunar- og símastuldsmálið sé ritstjóranum óviðkomandi veit hann töluvert um málavöxtu. DV vitnar í færslu Þórðar Snæs:

lögreglan vonast til þess að finna einhver samskipti sem sýni að blaðamenn hafi víst pantað byrlun (sem átti sér ekki stað), eitrun (sem átti sér ekki stað), símastuld (sem fyrrverandi eiginkona í miðjum skilnaði hefur gengist við og sagt hafa skilað nokkrum dögum síðar) og ævintýralega afritun (sem átti sér ekki stað) hjá andlega veikri konu

Sem sagt engin afbrot 3. maí 2021. Þáverandi eiginkona Páls skipstjóra Steingrímssonar byrlaði honum ekki, stal hvorki síma hans né færði blaðamönnum símann í hendur til afritunar. En hvernig komust símagögnin þá til Þórðar Snæs?

Þórður Snær birtir undir sínu nafni frétt í Kjarnanum þann 21. maí 2021 sem vísaði í gögn úr síma skipstjórans. Sama morgun birti Aðalsteinn Kjartansson á Stundinni samskonar frétt og vitnar í sömu gögn úr síma skipstjórans. Samræmd birting á keimlíkum fréttum er byggja á einni og sömu heimild í tveim óskyldum fjölmiðlum staðfestir samráð og skipulag. En með hvaða hætti bárust gögnin til Þórðar Snæs á Kjarnanum og Aðalsteins á Stundinni?

Ef Þórður Snær upplýsti hvernig hann fékk gögnin úr síma skipstjórans væri hann líkast til ekki sakborningur. Þögn ritstjórans er ekki til að vernda heimildarmann. Þáverandi eiginkona skipstjórans, sem stríðir við andlega vanheilsu, hefur gengist við byrlun, þjófnaði og afhendingu síma skipstjórans til blaðamanna. Hún er heimildarmaðurinn. Enginn annar kemur til greina. 

Hvers vegna upplýsir Þórður Snær ekki hvernig hann fékk gögn úr síma skipstjórans? Jú, ástæðan er einföld. Ritstjórinn vissi fullvel þegar hann tók við gögnunum að þau voru illa fengin. Ef atburðarásin vorið 2021 yrði upplýst kæmi á daginn hvernig samráði og skipulagi var háttað, hvaða hlutverk hver og einn sakborninga hafði - þeir eru fimm. Í fréttinni frá 21. maí 2021 skrifar Þórður Snær:

Ábyrgðarmenn Kjarnans vilja taka fram að umrædd gögn sem eru grundvöllur umfjöllunar miðilsins bárust frá þriðja aðila. Starfsfólk Kjarnans hefur engin lögbrot framið...

Þórður Snær vissi að einhver ónafngreindur ,,þriðji aðili" hafði framið lögbrot, játningin kemur fram í fréttinni sem hann er skráður höfundur að. Ritstjórinn er þar með þjófsnautur hið minnsta. Í öðru lagi kemur Þórður Snær í veg fyrir að lögregla upplýsi lögbrotið með því að neita að gefa upplýsingar um hvernig gögnin komust í hans hendur. Það er yfirhylming á glæp.

Þórður Snær stundar blekkingar þegar hann segist verja heimildarmann. Sakborningarnir, blaðamennirnir, ætluðu að leika þann leik að kasta gögnunum á milli sín og vera heimildarmenn hver fyrir annan. Þykjast svo réttlætisriddarar að verja nafnlausa heimildarmenn - sig sjálfa.

Lögreglan sá í gegnum málatilbúnaðinn snemma í rannsókninni. Í greinargerð lögreglu frá febrúar 2022 segir 

Í þessu máli er engin þörf á að fjalla um heimild fjölmiðlamanna til að vernda heimildarmenn sína. Lögreglan veit hver heimildarmaðurinn er. Heimildarmaðurinn er X.

X stendur fyrir fyrrum eiginkonu Páls skipstjóra. Sakborningarnir búa að vitneskju um samskiptin við veiku konuna, hvenær þau hófust og um hvað var sammælst. Víst er að samskiptin hófust áður en byrlun og þjófnaður fóru fram. 

Þegar veika konan mætti með símann á RÚV 4. maí 2021, daginn eftir byrlun, var búið að kaupa samskonar síma, af Samsung-gerð, sem beið tilbúinn og var notaður til að afrita síma Páls skipstjóra. Þóra Arnórsdóttir ritstjóri Kveiks á RÚV hafði keypt Samsung-símann í apríl 2021. Blaðamenn vissu að sími skipstjórans var væntanlegur í hús. Skipulagið gerði ráð fyrir að eftir afritun yrði símanum skilað á sjúkrabeð skipstjórans sem var meðvitundarlaus á gjörgæslu Landspítalans. Það gekk eftir. Miðstöðin var á Efstaleiti, Stundin og Kjarninn sáu um að koma þýfinu i umferð og gerðu það samkvæmt skipulagðri dagskrá. 

Þórður Snær reynir að skálda og fleipra sig úr réttarstöðu grunaðs manns. Dæmi um lygar ritstjórans er að hann kvaðst hafa verið handtekinn af sveit eyfirskra lögreglumanna og færður í járnum norður yfir heiðar. Rétt er að Þórður Snær var boðaður símleiðis til skýrslutöku á lögreglustöðinni á Hverfisgötu í Reykjavík. Hann átti að mæta í febrúar 2022 en skilaði sér ekki í skýrslutöku fyrr en sex mánuðum seinna, í ágúst. Svo kvartar Doddinn um seinagang á rannsókn sem hann sjálfur tafði um hálft ár. Ósvífninni verður ekki logið upp á ritstjórann.

Tímasetning Facebook-færslu Þórðar Snæs í gær er athyglisverð. Fréttir um hásumar eiga til að fara fyrir ofan garð og neðan. Vanir blaðamenn birta ekki í júlí tíðindi sem þeir vilja að fái útbreiðslu. Nema mikið sé í húfi. Það skyldi þó ekki vera að ritstjórinn hafi fregnað að ný gögn séu væntanleg á borð lögreglu? Krafa Þórðar Snæs um að rannsókn ljúki strax ber það með sér. Byrlunar- og símastuldsmálið má ekki upplýsa. Þá verða a.m.k. fimm blaðamenn fyrrverandi.

 

 

Úkraína er evrópskt vandamál

Bandaríkin eru þreytt á kröfum Evrópuríkja að ausa vopnum og fé í Úkraínu, sem í raun er evrópskt vandamál. Á þessa leið mælir Elbridge Colby í Telegraph. Colby er handgenginn Trump. Telegraph telur að sigri Trump forsetakosningarnar í Bandaríkjunum í haust fái Colby áhrifastöðu í bandarískri utanríkisstefnu.

Úkraínudeilan var seld almenningi á vesturlöndum sem framhald af kalda stríðinu, barátta góðs og ills, borgaralegs lýðræðis gegn kommúnisma. Í raun er deilan ,,gamaldags landvinningastríð", eins og Þordís Kolbrún utanríkis orðar það. Bandaríkin og Evrópusambandið ætluðu sér landvinninga í austri, fyrst Úkraína síðan Rússland.

Kremlarbændur töldu sig hafa loforð frá falli Berlínarmúrsins og sameiningu Þýskalands að Nató og vestrið hygðu ekki á útþenslu í austurveg. Lítið fór fyrir þeim efndum. Eftir að Mið-Evrópa og Pólland og Eystrasaltsríkin urðu Nató-ríki um og eftir aldamót sögðu Rússar hingað og ekki lengra. Ef Nató væri friðarbandalag, eins og látið er í veðri vaka, hefði Rússum verið boðin aðild eftir fall járntjaldsins. En það gerðist ekki, stóð aldrei til.

Vestrið vildi Rússland ekki sem bandamann heldur sífellt veikari andstæðing er loks gæfi sig upp sem hjálenda án þess að skoti væri hleypt af. Stjórnvísin byggði á kaldastríðsforsendum, vestrið ynni Rússland með efnahagsmætti líkt og Sovétríkin voru lögð að velli. Er Úkraínu og Georgíu var boðin Nató-aðild á leiðtogafundi í Búkarest 2008 sendu Rússar vopnuð skilaboð, lögðu undir sig Georgíu í ágúst sama ár. Smáríki, var sagt í höfuðborgum vestursins. Rússar gjamma en bíta ekki, hafa ekki til þess tennur.

Stjórnarbylting í Kænugarði 2014 setti Úkraínudeiluna í farveg, sem fyrir hálfu þriðja ári breyttist í fullveðja stríð. Búkarest-yfirlýsingin er frá apríl 2008. Er fram líða stundir verður hún til marks um háflæði vestræns hroka. Í yfirlýsingunni er talað um árangursríkan herleiðangur í Afganistan. Ævintýrinu í múslímaríkinu lauk í ágúst 2021, 13 árum eftir Búkarest-yfirlýsinguna. Í 20 ár reyndi vestrið að umskapa Afganistan en mistókst herfilega. En, auðvitað, þá er um að gera að umturna kjarnorkuveldinu Rússlandi, léttmeti í samanburði við Afganistan, er það ekki?

Flest gengur vestrinu í óhag í Úkraínu. Stríðið mjakast hægt, mælt í landvinningum, en það eru Rússar sem sækja. Stjórnin í Kænugarði verst með vestrænum vopnum og fjármagni. Hve lengi enn er óvíst. Hitt er þeim ljóst, sem fylgjast með, að hverfandi líkur eru á hamingjuskiptum stríðsaðila.  

Nái Trump kjöri í nóvember gæti annað af tvennu gerst. Bandaríkin kipptu að sér höndunum og Úkraína yrði ofurseld Rússum. Hinn kosturinn er friðarsamningar, mjög á rússneskum forsendum.

Stuðningur kjósenda á vesturlöndum við Úkraínu mun ekki aukast. Almenningur er nógu upplýstur til að átta sig á að bitamunur en ekki fjár er á lýðræðisást í Kænugarði og Moskvu. Pútín í Rússlandi er með það umfram Selenskí í Úkraínu að hafa lögmætt lýðræðislegt umboð. Kjörtímabili Selenskí rann út í vor. Engar kosningar, stjórnað með tilskipunum. Fyrir margt löngu voru menn í hermannabúningum ráðandi afl í Suður-Víetnam, með Bandaríkin sem bakhjarl en litla alþýðuhylli. Selenskí sést aldrei nema í kakí-fötum. 

Evrópa, í merkingunni Evrópusambandið plús Bretland, á ekki roð við Rússlandi. Þrátt fyrir að telja hálfan milljarð, Rússland hýsir 150 milljón sálir, er Evrópusambandið efnahagsrisi á hernaðarlegum brauðfótum sem háður er rússneskum hrávörum, einkum gasi og olíu en einnig korni sem áður var úkraínskt en brátt rússneskt. Án Bandaríkjanna tapast Úkraína.

Litla Ísland má prísa sig sælt að vera ekki á áhrifasvæði Evrópusambandsins.

 

 

Selenskí mætir á NATO-fundinn

Mamma er karl á valdi ranghugmynda

Heimildamynd fyrir börn ber heitið Mamma er með yfirvaraskegg. Þar er kennt að sumir fæðast í röngum líkama, karl geti verið kona og öfugt, kona karlmaður. Blaðamaðurinn Christopher F. Rufo kynnir innihaldið og vekur athygli á að meðal bakhjarla er lyfjafyrirtæki sem selur kynbreytingalyf ætluð börnum.

Kona getur ekki fengið meðferð við pungsigi, karl ekki fengið bólgur í móðurlífi. Líffræðilega er um að ræða ómöguleika, kona er ekki með hreðjar og karl ekki með leg. Þriðji ómöguleikinn er að hægt sé að fæðast í röngum líkama. Meðvitundin fæðist með líkamanum en kemur ekki sem sjálfstæð eining. 

Nýburi er annað tveggja sveinbarn eða meybarn. Sárafá tilvik þar sem kyn er álitamál er fæðingargalli sem læknisfræðin leysir úr. Líffræðileg kyn eru aðeins tvö, ekki þrjú, fimm eða seytján.

Ómöguleikum í fleirtölu haldið að börnum. Hér á landi var umræða síðast liðið haust um aðkomu lífsskoðunarfélagsins Samtakanna 78 að kennsluefni í leik- og grunnskólum. Tilfallandi skrifaði:

Samtökin 78 er lífskoðunarfélag fullorðinna með jaðarhugmyndir um kyn og kynlíf. Líkt og aðrir sértrúarhópar á félagsskapurinn sinn tilverurétt - í heimi fullorðinna.

[...]

Ágengni samtaka gagnvart börnum sýnir að undir fagurgala um fjölbreytileika er ráðist á garðinn þar sem hann er lægstur, vammlausri og óreyndri æsku sem býr ekki að stálpaðri dómgreind. Fullorðinn sem talar fávisku ofan í börnin, t.d. að hægt sé að fæðast í röngu kyni, nýtir sér barnslegt sakleysi óharðnaðra ungmenna.

Foreldar vakna upp við þann vonda draum að kyn- og kynlífspælingar sem þeim dytti aldrei í hug að halda að börnum sínum er skipulega flaggað framan í börnin þegar foreldar eru fjarri.

Hvers vegna er lífsskoðunarfélaginu Samtökunum 78 hleypt inn í leik- og grunnskóla? Ástæðan er pólitísk. Vinstriflokkarnir, þ.e. Vinstri grænir, Samfylking, Píratar og Viðreisn eru allir hlynntir kreddum og hugmyndafræði Samtakanna 78. Vinstrimenn eru stærsti hópurinn í fræðslu- og skólastarfi. Ekki dettur þeim í hug að amast við verulega óæskilegri þróun þar sem börn eru leiksoppar í furðuveröld jaðarhóps fullorðinna.

Einhver börn sem verða fyrir áróðrinum munu bíta á agnið og leggja trúnað á ómöguleika, t.d. að hafa fæðst í röngum líkama. Grípi ekki einhver fullorðinn í taumana geta mál þróast á þann veg að barn á valdi ranghugmynda fari í kynbreytingarferli.

Helga Dögg Sverrisdóttir kennari fjallar reglulega um transmálefni og veitir gjarnan innsýn í umræðuna á Norðurlöndum. Í nýju bloggi er sagt frá hliðstæðum milli kynbreytinga og skelfilegra tilrauna á geðsjúklingum, lobotomi. Helga Dögg þýðir frá norska sálfræðingnum Silje Schevig:

Það eru margir myrkir kaflar í sögu læknisfræðinnar, en einn sá myrkasti er ennisblaðskurðlækningarnar (lobotomi). Á þeim tíma var samstaða í fræðasamfélaginu um vinnubrögð sem við fordæmum. Nú hryllir okkur við því hvernig geðsjúklingar urðu fyrir heilaskaða í þeirri trú að meðferðin hjálpaði.

Góður ásetningur er engin trygging fyrir góðum árangri. Ég tel að kynþroska blokkandi lyf fyrir börn, hormónameðferð, brjóstanám og kynfæraaðgerðir á ungu fólki geti verið ennisblaðskurðlækningar (lobotomi) okkar tíma. Ég byggi þessar fullyrðingar á vísindum.

Bráðlega hefst undirbúningur næsta skólaárs. Fræðsluyfirvöld og skólar ættu að huga vel að námsefninu. Það er ekki boðlegt að æskan sé ofurseld kennsluefni frá Samtökunum 78 sem kennir líffræðilegan ómöguleika.

Hamas-atkvæðin í Bretlandi

Telegraph segir að nokkur þingsæti í Bretlandi hafi verið unnin af frambjóðendum sem lofuðu Hamas-hryðjuverkasamtökunum á Gasa fullum stuðningi. Það sem meira er; múslímaatkvæðin fóru í afgerandi hlutfalli til þessara frambjóðenda.

Aðeins örlítið hlutfall breskra múslíma hefur einhverja tengingu við Gasa eða heimastjórn Palestínuaraba á vesturbakkanum. Þorri breskra múslíma á ættir að rekja til Pakistan, Bangaladess, Sómalíu og Indlands. En sem kjósendahópur eru múslímar ofurseldir Hamas-hugmyndafræðinni að útrýma Ísraelsríki.

Frambjóðendurnir, sem sóttust eftir og fengu Hamas-fylgið, voru vel meðvitaðir um hug múslímsku kjósendanna. Telegraph rekur dæmin. Fyrrum leiðtogi Verkamannaflokksins, Jeremy Corbyn, fékk kjör til þingmennsku sem sjálfstæður frambjóðandi og felldi frambjóðanda Verkamannaflokksins.

Hamas og Palestína eru landfræðilega, pólitískt og menningarlega í órafjarlægð frá Pakistan, Indlandi, Bangladess og Sómalíu. En, vel að merkja, ekki trúarlega.

Trúarleg samstaða með öfgaútgáfu af herskáustu sort af íslam trompar allt annað sem drjúgur hluti múslíma telja skipta máli í almennum þingkosningum í Bretlandi - sem er enn að nafninu til veraldlegt vestrænt ríki, svona eins og Ísrael.

Múslímar koma ekki í stórum hópum til vesturlanda til að samlagast vestrænum gildum. Markmiðið er að íslamvæða vestrið. Eins og það er huggulegt að búa við Hamas-yfirvaldið í Gasa og klerkastjórnina í Íran. Einkum eru það minnihlutahópar eins og samkynhneigðir og kristnir sem láta vel af atlæti íslamista. Eða hitt þó heldur.

 

Kuldi í veðri en enginn ábyrgur

Kuldafréttir af Íslandi og norðurhveli jarðar eru nokkrar síðustu vikur. Kaldasti vetur aldarinnar, sagði mbl.is síðasta vetrardag. Kaldur júní í Danmörku, Bretlandi og Íslandi, segir visir.is.

Jafnvel hamfaramiðstöðin á Efstaleiti slæst í för og segir árið kalt.

Engar skýringar fylgja. Í viðtengdri frétt er rætt við Einar Sveinbjörnsson veðurfræðing. Hann er liðtækur hamfaraspámaður. Fyrir tveim árum, sumarið 2022, boðaði Einar hitabylgjur vegna manngerðrar hlýnunar. Sex mánuðum síðar, í desember 2022, kynnir Einar mesta kuldakast á öldinni. En enginn er ábyrgur, allra síst maðurinn. En smávegis hlýindi eru skrifuð á reikning mannsins.

Hvað segir Einar núna þegar heldur er kuldalegt í samanburði við sumarveður síðustu þrjátíu ára? Veðurkappinn fullyrðir að kuldinn í sumar segi ,,hins veg­ar ekk­ert til um næstu ár."

En komi nokkrir hlýir dagar í ágúst má búast við að Einar spái hamfarahitabylgjum næstu áratugi.

Tilfellið er að vísindamenn skilja ekki veðrið nema að takmörkuðu leyti. Veðurspár eru ekki gerðar nema 5-8 daga fram í tímann. Ef menn vissu betur væri hægt að segja til um veðrið vikur, mánuði og ár fram í tímann. Óvart er það ekki hægt sökum vanþekkingar. Þó þykjast hamfarasinnar vita að öll hlýnun sé manngerð en kuldatímabil ekki. Hvernig má það vera? Tekur náttúran sig sjálfa úr sambandi þegar hlýnar en starfar að öðru leyti eftir lítt þekktum lögmálum? Heiðarlegir vísindamenn, t.d. William Harper, viðurkenna að spálíkön um veðurfar til framtíðar eru ómögulegar.

Kjörhitastig jarðar er óþekkt stærð. En Sameinuðu þjóðirnar og glóparnir vilja ekki undir nokkrum kringumstæðum að meðalhiti jarðar hækki meira en um eina og hálfa gráðu miðað við iðnbyltinguna á 19. öld. En þá lauk veðurfarstímabili sem stóð frá 13. öld og er kallað litla ísöld.

Segir það ekki nokkra sögu um loftslagskirkjuna að helvítishlýnun er kynnt sem manngerð en veðrið að öðru leyti lýtur náttúrulögmálum? 

Manngerð hlýnun er skáldskapur sem þjónar þeim tilgangi einum að vekja ótta og undirgefni.

 

 

Köld sumur ekki endilega komin til að vera

Sigmundur Davíð, íslenskur Farage

Miðflokkurinn í Bretlandi kennir sig við umbætur og fékk 14 prósent atkvæða, sama hlutfall og Miðflokkurinn mælist með hér á landi. Íhaldsflokkurinn, Sjálfstæðisflokkur þeirra Breta, fékk 24% fylgi, nokkru meira en fylgi móðurflokks íslenskra stjórnmála nú um stundir.

Líkt með Sigmundi Davíð og Farage er að hægrisinnaðir kjósendur leita til þeirra er ráðandi hægriflokkur, Íhaldsflokkurinn í Bretalandi og Sjálfstæðisflokkur hér heima, tapar trúverðugleika. 

Ólíkt Sjálfstæðisflokknum hafa íhaldsmenn í Bretlandi skipt ört um formenn á síðustu árum. Frá Brexit-þjóðaratkvæðinu 2016 eru formennirnir fimm. Bjarni Ben hefur verið formaður Sjálfstæðisflokksins allar götu síðan 2009. Samanburðurinn, að því marki sem hægt er að bera þessa tvo flokka saman, gefur til kynna að trúverðugleikinn ráðist af stefnu fremur en formennsku.

Báðir hægriflokkarnir hafa gert þau mistök að taka upp stefnu ættaða úr hugmyndaheimi vinstrimanna. Einstakir málaflokkar eru t.d. t.d. hamfaratrú í loftslagsmálum og transhugmyndafræði. Alþjóðahyggja, m.a í formi ESB-daðurs, er stef í forystu beggja flokka þótt þorri fylgismanna taki þjóðhyggju fram yfir. Vegna alþjóðhyggjunnar eru útlendingamál til vandræða í báðum flokkum.

Trúverðugleika er erfitt að mæla. Atkvæðafylgi er aftur skýr og afmörkuð hlutfallstala. Skriftin er á veggnum, nenni menn að lesa.

 

 

Stórmerkilegar kosningar að baki og Farage á þing

Ingi Freyr fær vernd uppljóstrara á RÚV

RÚV er rekið með 190 milljón króna tapi á fyrsta ársfjórðungi. Á nýlegum fundi stjórnar RÚV boðar Stefán Eiríksson útvarpsstjóri fækkun starfsmanna, bæði með að ráða ekki í störf sem losna og með uppsögnum. RÚV þarf að skera niður útgjöld upp á tæpar 300 milljónir í ár.

Hart er ári hjá RÚV fjárhagslega. Það er þó hjóm eitt í samanburði við siðferðilegan og faglegan kólgubakka við sjóndeildarhringinn, byrlunar- og símastuldsmálið. Fimm blaðamenn eru sakborningar, þar af fyrrum fréttamaður á RÚV, Aðalsteinn Kjartansson, nú á Heimildinni, og Þóra Arnórsdóttir, fyrrum ritstjóri Kveiks, nú vistuð á Landsvirkjun. Fyrrum stjörnufréttamaður RÚV, Helgi Seljan, er einnig bendlaður við málið.

Mitt í fjárhagslegu  og faglegu andstreymi RÚV, með frystingu á ráðningum, yfirvofandi uppsögnum og afhjúpun á miðlægu hlutverki ríkisfjölmiðilsins í sakamáli, er ráðinn á Efstaleiti einn sakborninganna í byrlunar- og símastuldsmálinu, Ingi Freyr Vilhjálmsson blaðamaður á Heimildinni. Ingi Freyr býr ekki að neinni reynslu af ljósvakamiðlun. Fréttabarn er léttara á fóðrum en reyndur blaðamaður. Ingi Freyr er af sama sauðahúsi og Aðalsteinn og Helgi Seljan. Blaðamenn sem kenna sig við rannsóknir en framleiða smjörklípur á saklaust fólk. Verðmæti Inga Freys sem innanbúðarmanns á RÚV er ekki fréttamennska.

Ingi Freyr hefur störf á RÚV í ágúst næst komandi. Í mars síðast liðnum gaf Stefán útvarpsstjóri út reglur sem heita Verklagsreglur vegna uppljóstrunar starfsfólks um lögbrot eða aðra ámælisverða háttsemi í starfsemi Ríkisútvarpsins.

Fyrsta grein reglnanna er svohljóðandi:

Þessar verklagsreglur eru settar á grundvelli 5. gr. laga um vernd uppljóstrara nr. 40/2020. Þessar verklagsreglur gilda um allt starfsfólk Ríkisútvarpsins ohf. (RÚV), stjórn og verktaka. Markmið reglnanna er að stuðla að því að upplýst verði um lögbrot og aðra ámælisverða háttsemi í starfsemi RÚV.

Ingi Freyr er ráðinn á RÚV undir þeim formerkjum að hann njóti verndar uppljóstrara. Ráðningin er tímabundin. Framhaldið ræðst af faglegri og, ef að líkum lætur, siðferðilegri frammistöðu. Eins og segja frá ,,lögbrotum og annarri ámælisverðri háttsemi", svo vitnað sé í Stefánsreglurnar.

Heimildin, þar sem Ingi Freyr starfaði til skamms tíma, er á hvínandi kúpunni og býður ekki upp á lífvænlega afkomu. Aldrei hafa færri skoðað Heimildina á netinu, skv. Gallup, en í nýliðinni viku, undir 12 þúsund. Skal ekki undra, annar ritstjórinn er sakborningur í lögreglurannsókn en hinn systir sakbornings í sama máli. Í fréttamennsku er venjan að segja frá afbrotum en ekki fremja glæpi og hylma yfir.

Embættisferill Stefáns Eiríkssonar endar með skömm sitji hann með hendur í skauti og bíði eftir að RÚV verði afhjúpað sem miðstöð í byrlunar- og símastuldsmálinu. Með sakamál á bakinu er ekki greiðfært að opinberum embættum. Stefán lætur af störfum á Efstaleiti næsta vor. Aftur, ef útvarpsstjóri beitir sér við að upplýsa alvarlegt sakamál, fær hann fjöður í hattinn.

Rólegt sumar dylur heitt haust.

 

 

Hælisglæpir og siðblinda í boði RÚV, Samfylkingar, Pírata og Viðreisnar

Siðblindur hælisleitandi Mohamad Kourani lék lausum hala á hér á landi, stundaði líkamsárásir og ofbeldisbrot með velvild og samþykki þingmanna Samfylkingar, Pírata og Viðreisnar. Í fjölmiðlum nýtur glæpamaðurinn verndar RÚV.

Hvernig má rökstyðja ofangreinda ályktun? Jú, bæði mbl.is og visir.is segja frá dómsmálinu þar sem siðblindi glæpamaðurinn svarar til saka. RÚV segir enga frétt af ofbeldisfulla hælismanninum. Ríkisfjölmiðillinn birtir ótal fréttir um veik börn í röðum hælisleitenda en þegir um glæpamennina. RÚV skipulega dregur upp þá mynd að hælisfólkið sé einkum hjálparvana börn. Veruleikinn er annar.

Siðblindur Múhameð Kourani kemur hingað til lands árið 2018 frá Sýr­landi og fær alþjóðlega vernd. Vegna gallaðra útlendingalaga var ekki hægt að senda ofbeldismanninn úr landi þegar fulljóst var að maðurinn er óþokki. Þegar vonum seinna tókst betrumbæta lögin greiddu þingmenn Pírata atkvæði gegn lögunum en þingmenn Samfylkingar og Viðreisnar sátu hjá.

RÚV og þingmenn Samfylkingar, Viðreisnar og Pírata vilja íslensku samfélagi illt. Óþokkaöflin linna ekki látunum fyrr en Ísland verður þriðja heims ríki.

„Ég mun drepa þig og fjölskyldu þína“

Sigríður Dögg er brotleg, ekki Hjálmar

Sigríður Dögg Auðunsdóttir formaður Blaðamannafélags Íslands flæmdi Hjálmar Jónsson framkvæmdastjóra félagsins úr starfi í byrjun árs. Sigríður Dögg varð uppvís að skattalagabroti, stakk undan leigutekjum, sennilega um 100 milljónir króna. Sigríður Dögg keypti lögfræðiálit sem sagði Hjálmar hafa misnotað aðstöðu sína sem framkvæmdastjóri og tekið sér fyrirframgreidd laun.

Hér er ólíku saman að jafna. Keypt lögfræðiálit er aðeins almannatengslaþjónusta og ber að líta á ávirðingar í garð Hjálmars í því ljósi. Sigríður Dögg var staðin að skattalagbroti, hún viðurkenndi og hlaut viðurlög. En hún neitar að gera hreint fyrir sínum dyrum og útskýra eðli og umfang skattsvikanna.

Glæpur Hjálmars var að segja ótækt að formaður stéttafélags blaðamanna sé skattsvikari. RÚV, þar sem Sigríður Dögg starfaði, var sama sinnis og Hjálmar. Sigríði Dögg var gert að taka pokann sinn á fréttastofu RÚV. Hún varð að finna sér annað launað starf og settist í stól framkvæmdastjóra eftir að Hjálmar var hrakinn á brott. Blaðamannafélag Íslands er látið borga, bæði laun skattsvikarans og falskar ásakanir lögmannsstofu í garð fyrrum framkvæmdastjóra.

Harðsnúinn hópur blaðamanna, kenndur við RSK-miðla (RÚV, Stundin og Kjarninn, nú Heimildin), styður Sigríði Dögg. Fimm blaðamenn RSK-miðla eru sakborningar í byrlunar- og símastuldsmálinu. Formaður Blaðamannafélags Íslands telur sjálfsagt að sakborningar í refsimáli komist upp með að gera ekki grein fyrir aðkomu sinni og teljist samt heiðarlegir blaðamenn. Sakborningarnir og fjölmiðlar þeirra endurgjalda greiðann og láta Sigríði Dögg komast upp með að segja skattsvik sín einkamál. Síðan hvenær urðu skattsvik einkamál í íslenskum fjölmiðlum?

Þorri félagsmanna BÍ lætur sér vel líka að forysta stéttarfélagsins sé í höndum fólks með óhreint mjöl í pokahorninu. Sumum eru þó ofboðið. Fríða Björnsdóttir, blaðamaður númer 1 samkvæmt félagaskrá BÍ, hóf störf í faginu fyrir rúmum sextíu árum og var framkvæmdastjóri BÍ í 20 ár áður en Hjálmar tók við um aldamótin. Fríða skrifar færslu á Facebook og hvetur Sigríði Dögg að ,,taka ábyrgð og loks svara fyrir sín mál því orka og athygli á að beinast að því að efla veg blaðamennsku á Íslandi, félagsmönnum og faginu til heilla."

Á meðan Blaðamannafélag Íslands er í höndum skattsvikara og sakborninga er blaðamennska hér á landi merkt óheilindum og tvöföldu siðgæði. Blaðamennskuna setur niður, tiltrú og traust almennings hverfur. Blaðamenn þykjast fulltrúar almannahagsmuna. Teljast skattsvik og yfirhylming glæpa þjónusta við almannahag? 

Segir Hjálmar hafa misnotað aðstöðu sína

Öfgar í hugmyndafræði, ekki veðri

Í viðtengdri frétt er dæmi um veðuröfgar að hiti í Sádi-Arabíu hafi farið yfir 50 gráður selsíus. En sé flett upp í alfræðibók kemur á daginn að hitinn í eyðimerkurlandinu fer iðulega yfir 50 gráður að sumri til, stundum 55.

Til skamms tíma var breytilegt veðurfar kennt við árstíðir. Á veturna er kaldari en á sumrin. Nú aftur er hversdagslegt veður kallaðar öfgar.

Vísindin hamfarasinna eru þunnur þrettándi, svo vægt sé til orða tekið. Trúarjátningin, blessuð af Sameinuðu þjóðunum, er að meðalhiti jarðar megi ekki hækka meira en um 1,5 gráðu frá iðnbyltingu til að ekki verði aftur snúið - jörðin verði óbyggileg sökum hamfarahita.

En viti menn, allt bendir til að heimurinn sé þegar 1,5 gráðu hlýrri en hann var á 19. öld. Eðlisfræðingurinn og vísindamiðlarinn Sabine Hossenfelder, sjálf haldin hamfaratrú, rekur óvissuna í stuttu myndskeiði. Þar þræta spámennirnir Jim Hansen og Michael Mann hvort hlýnun frá iðnbyltingu sé meiri eða minni en 1,5 gráða. Mann segist hafa þrjár háskólagráður í eðlisfræði og hann geti fullyrt að hlýnunin sé ekki meira en 1,3 gráða. Rökfastur veðurguðinn með háskólapróf í fleirtölu.

Hvorki Sabína né veðurguðirnir vekja athygli á að hitastig miðaldahlýskeiðsins, um 900-1300, var 1,5 gráðu hærra en það er í dag. Engin urðu ragnarökin. Þvert á móti. Eiríkur rauði og félagar bjuggu í velsæld við norrænan kvikfjárbúskap í Grænlandi er hlýindi gáfu græna haga. Brátt varð um norræna byggð á Grænlandi er litla ísöld gekk í garð um 1300 og stóð til um 1900. Við lá að kuldi og náttúruhamfarir, móðuharðindin, gerðu Ísland óbyggilegt.

Hamfaratrúin er ekki reist á vísindum, segir loftslagsvísindamaðurinn Richard Lindzen, heldur hugmyndafræði. Hann rekur upphaf trúarkreddunnar til pólitískra aðstæðna í Bandaríkjunum á áttunda og níunda áratug síðustu aldar. Marxismi vinstrimanna var genginn sér til húðar og eitthvað þurfti að finna í staðinn til að trylla lýðinn. Koltvísýringur, CO2, og hamfarahlýnun af völdum fjölskyldubílsins var vinningstvenna. Vinstrimenn klappa æ síðan þennan stein og verður ágengt. Íhaldsflokkurinn í Bretlandi og Sjálfstæðisflokkurinn á Íslandi hoppuðu á hamfaravagninn - báðir flokkarnir raunar núna í útrýmingarhættu.

Koltvísýringur er lífsnauðsynleg lofttegund, fæða plantna. Án koltvísýrings væri jörðin óbyggileg, segir annar loftslagsvísindamaður, William Happer. En við horfum upp á krossferð gegn þessari náttúrulegu lofttegund undir þeim formerkjum að hún valdi hamfarahlýnun og veðuröfgum.

Ísland er orðið tilraunadýr í skringilegum uppátækjum hamfaraheimskunnar. Trjákurl voru flutt í massavís til landsins og sökkt undan Íslandsströndum, að sögn til að draga úr koltvísýringi í andrúmsloftinu. Í Hafnarfirði er milljarðaverkefni á döfinni að dæla fljótandi koltvísýringi í berglög, innfluttum í sérhönnuðum skipum frá Evrópu. Hvorugt mun nokkru breyta um loftslagsbúskap jarðarinnar. Staðbundnar aðstæður á Íslandi gætu aftur versnað. Fíflunum er att á foraðið.

 

  

 

Öfgakennt veðurfar veldur usla