ESB-kafbátur í VG

Undirferli er Árna Þór Sigurðssyni eðlislægt. Hvort sem hann situr í stjórn SPRON eða þykist virkur félagi í Heimssýn er sérgæskan Árna Þór tömust. Honum græddust milljónir með braski á stofnfjárhlutum í SPRON og hann sér fram á starfsmöguleika í Brussel þegar hann ásamt Össuri Skarphéðinssyni hefur vélað Ísland inn í Evrópusambandið.

Árni Þór er menntaður í Moskvu og var handgenginn Svavari Gestssyni formanni Alþýðubandalagsins. Um aldamótin þegar uppstokkun varð á vinstri kantinum veðjaði Árni Þór á Samfylkinguna en höfðu ekki nema hugsjónamenn trú á að VG yrði fullveðja stjórnmálaflokkur.

Árni Þór stökk yfir í VG þegar ljóst varð að flokkurinn væri kominn til að vera. Árni Þór fór í starfsnám til Brussel og er námsfús eins og forðum daga í Moskvu.

Kækur hjá Árna Þór er að fálma með hægri hönd í vinstri brjóstvasa þegar hann lýgur. Ókunnugir halda að hann sé með hægri hönd í fatla.

Árni Þór að hugsa um ESB

Greiðsluþrot fjórhjólafólksins

Hluti af þeim heimilum sem eru í vandræðum komust í þau vegna óráðsíu. Hér er maður í fjárhagskröggum og til að kóróna óreiðuna kaupir hann sér fjórhjól á kaupleigu og er þó með bíl fyrir á slíkum samningi. Þegar allt þrýtur krefst viðkomandi greiðsluaðlögunar og fer með málið upp í Hæstarétt.

Lög sem sett verða til að koma til móts við heiðarlegt fólk sem lenti í fjárhagserfiðleikum vegna hrunsins verða mjólkuð af frekjuliðinu sem hvorki kann mannasiði né fótum sínum fjárhagsleg forráð.

Svei attan.

Beiðni um greiðsluaðlögun hafnað

Hefnd Jóhönnu afhjúpar sekt hennar

Endurreisn bankanna eftir hrun er æfing í blekkingum, undirferli og ógegnsæi. Einsdæmi í veraldarsögunni er að ríkisstjórn hagi málum þannig að fjármálastofnanir komist í eigu huldueigenda sem þurfa ekki að standa neinum reikningsskil gerða sinna. Stjórnarandstaðan krefst rannsóknar á endurreisn banka eftir hrun.

Krafan kemur við kaunin á Jóhönnu Sig. og ríkisstjórninni. Í morgun var sérstakt mál á dagskrá ríkisstjórnar, sem ætla mætti að hefði nóg á sinni könnu, um einkavæðingu bankanna 2001 - 2003.

Jóhanna Sig. hefur engan áhuga á sögulegum staðreyndum um klúður, lögleysu og spillingu við einkavæðingu bankanna. Hún ætlar að hefna sín á Sjálfstæðisflokki og Framsóknarflokki.

Æðruleysi og yfirvegum Jóhönnu Sig. verður ekki fulllofuð.

Einkavæðing bankanna rannsökuð

Stjórnmálamenn sviðsmynd á uppistandi

Reykvískir sveitarstjórnarmenn gerðu sig að sviðsmynd fyrir uppistand Jóns Gnarr og Besta flokksins. Niðurlæging Dags B., Hönnu Birnu og Sóleyju T. er afleiðing upplausnar í stjórnmálum sem starfandi stjórnmálaflokkar bera ábyrgð á.

Kjósendur veittu Besta flokknum brautargengi vegna þess að heiðarlegt grín var betri kostur en dæmigerður óheiðarleiki flokkastjórnmálanna. 

Starfandi stjórnmálaflokkar fá tæpan hálfan milljarð króna beint úr ríkiskassanum. Það hlýtur að vera hægt að fá ódýrari sviðsmynd.

Meira ímyndunarafl en rökhugsun

Ríkisrök Íslands

Ríki eru bundin rökum hvers rætur liggja í landfræðilegum, sögulegum og menningarlegum aðstæðum. Ríkisrök skilgreina kjarnahagsmuni ríkja og sjálfsmynd þeirra.  Stjórnvald sem brýtur gegn ríkisrökum er komið á leiðarenda. Finnsk stjórnvöld brytu gegn ríkisrökum Finnlands með því að bjóða Rússum herstöðvar; sænsk með þátttöku í hernaðarbandalagi; írsk með því að taka enska pundið sem gjaldmiðil og svo má áfram telja.

Stórir atburður breyta ríkisrökum. Heimsstyrjaldirnar tvær, sem farið er að nefna seinni 30 ára stríðið, breyttu ríkisrökum Þýskalands. Það sem áður hét lífsrými með þýsku forræði varð að evrópuhugsjón með  þýsku fjármagni.

Ríkisrök Íslands eru þau að forræði eigin mála er forsenda fyrir lífvænlegu samfélagi. Frá miðri 13. öld og fram á síðustu öld var forræði íslenskra mála í útlöndum. Ísland var hjálenda með tilheyrandi eymd í 650 ár og varð ekki þjóð meðal þjóð fyrr en Íslendingar tóku við forræði eigin mála.

Ríkisstjórn Jóhönnu Sig. þverbraut ríkisrök Íslands með því að senda til Brussel umsókn um aðild að Evrópusambandinu. 

Bregðast krosstré

Allsherjargrínvæðing borgarstjórnar er ekkert gamanmál. Stjórnmálaflokkar sem láta teyma sig út í brandarapólitík grafa sína eigin gröf. Þegar í ofanálag pukrast er með gjörninginn verður spurningin í hvaða veruleika þetta fólk lifir og hrærist í.

Besti flokkurinn stendur fyrir eitt mál og aðeins eitt: Yfirlýst ábyrgðarleysi. Þeir stjórnmálaflokkar sem taka þátt í trúðslátunum eiga ekki afturkvæmt í hversdagsleikann þar sem orð og gjörðir eru metin á viðurkenndar mælistikur.

Hláturinn lengir ekki líf stjórnmálamanna.

Vísir: Hanna Birna þiggur embættið

Íslensk stjórnvöld vekja furðu erlendis

Ríkisstjórn Íslands þykir furðuverk erlendis. Stjórnin heldur til streitu umsókn um ESB-aðild þrátt fyrir megna andstöðu og kemur þar að auki í veg fyrir þinglega umræðu um þingsályktunartillögu þar sem alþingi felur ríkisstjórninni að draga tilbaka umsóknina. Á þessa leið er umfjöllun norska fréttavefjarins ABC.

Æ betur kemur í ljós hversu herfilega misráðin Brussel-helför Jóhönnu og Össurar var. Það er eitt að striplast málefnalaus og umboðslaus hér heima en að gera það frammi fyrir alþjóð er þjóðarskömm.

Óðum er að renna upp fyrir fólki hverjir ruddu brautina fyrir trúðsframboðinu í borginni. Samfylkingin með þau Jóhönnu og Össur í broddi fylkingar rufu sambandið milli heilbrigðrar skynsemi og stjórnmála. Við þær aðstæður er fremur hlustað á trúða sem koma ekki fram undir fölsku gervi stjórnmálamanna.

Pressan, málgang auðróna og ESB-sinna

Pressan undir stjórn Björns Inga Hrafnssonar fyrrum borgarfulltrúa Framsóknarflokksins er helsta vígi auðrónadeilda Framsóknarflokks og Sjálfstæðisflokks. Í réttu hlutfalli við Mammonsdýrkunina er Pressan í baráttu fyrir inngöngu Íslands í Evrópusambandið enda marga feita gelti að flá þar.

Ólafur Arnarson reið á vaðið í morgun með frýjunarorðum til þingmanns Sjálfstæðisflokksins Unnar Brár sem boðaði fyrir helgi þingsályktun um að aðildarumsókn Íslands skyldi dregin tilbaka. Unnur Brá lagði fram þingsályktunina eftir hádegi ásamt Gunnari Braga úr Framsóknarflokki, Birgittu úr Hreyfingunni og Ásmundi Einari VG.

Björn Ingi kom til skjalanna og bjó til frétt um að grasrótin í Framsóknarflokknum væri æf vegna þess að Gunnar Bragi þingsflokksformaður væri meðflutningsmaður tillögunnar. Í öllum stjórnmálaflokkum er andstaðan við ESB-aðild hvergi meiri en einmitt í Framsóknarflokknum. ,,Grasrótin" reyndist kunnur ESB-sinni, Hallur Magnússon, sem fékk pressuvettvang fyrir áróðurinn.

Undir kvöld birtist neytendafrömuðurinn og aðildarsinninn Gísli Tryggvason sem bað um miðstjórnarfund til að ræða þá ósvinnu að þingflokksformaðurinn fari að vilja afgerandi meirihluta flokksmanna.

Auðrónar og ESB-sinnar eiga verðugt málgagn.

Jóhanna í þögn

Forsætisráðherra hefur ekkert að segja þjóð sinni enda er ríkisstjórnina þrotið örendið. Jóhanna Sig. getur ekki beðið eftir því að komast í sumarfrí og lái henni hver sem vill. Ríkisstjórnin forgangsraðaði rangt og stundaði klofninspólitík sem kom henni sjálfri í koll.

Þegar þingið kemst í sumarleyfi fara flokkarnir í uppgjörsvinnu á landsfundum og flokksráðsfundum. Þeir flokkar sem reyna að þegja í hel vandamálin sem eru óuppgerð lenda fyrr heldur en seinna á öngstræti.

Þögnin er mest rétt fyrir storminn.

Jóhanna tekur ekki til máls

Þingsályktunin um afturköllun ESB-umsóknar

Búið er að dreifa þingsályktun um afturköllun umsóknar Íslands að Evrópusambandinu. Flutningsmenn tillögunnar koma frá öllum flokkum á þingi nema Samfylkingunni. Unnur Brá Konráðsdóttir, Sjálfstæðisflokki, Ásmundur Einar Daðason VG, Gunnar Bragi Sveinsson Framsóknarflokki og Birgitta Jónsdóttir Hreyfingunni eru skrifuð fyrir tillögunni.

Niðurlag greinargerðar með þingsályktuninni er eftirfarandi:

Mikilvægt er að nýta krafta stjórnsýslunnar og fjármagn ríkisins til þeirra brýnu verkefna sem fyrir liggja í kjölfar bankahrunsins. Að halda áfram aðildarferlinu þegar bersýnilegt er að hugur fylgir ekki máli er slæmt fyrir orðspor Íslands á alþjóðavettvangi.
    Íslandi og Evrópusambandinu er lítill greiði gerður með því að íslensk stjórnvöld efni til aðildarviðræðna á þeim hæpnum forsendum sem hér hafa verið raktar. Fyrirsjáanlegt er að aðildarsamningur verði felldur í þjóðaratkvæðagreiðslu og mun sú niðurstaða ekki auka velvilja í garð Íslendinga hjá aðildarþjóðum Evrópusambandsins.
    Af öllu framangreindu er ljóst að umsókn Íslands um aðild að Evrópusambandinu er ótímabær og því hníga öll rök að því að draga hana til baka.